Livitikọs
24 Jihova da rhoma ta ota kẹ Mosis, ọ da ta: 2 “Vwẹ iji kẹ ihwo rẹ Izrẹl nẹ ayen vwẹ omamọ rẹ evwri rẹ oliv rhe vwọ kẹ irhukpẹ na, rere irhukpẹ na sa vwọ rha la ọkieje. 3 Erọn mi ru ọrhuẹrẹphiyotọ ra vwọ vwẹ irhukpẹ na vwo mu vwẹ obaro rẹ ikọtini rẹ Oseri na vwẹ utughẹ ra da vwoma na nẹ ovwọnvwọn re te urhiọke vwẹ obaro ri Jihova ọkieje. Ọnana urhi ri bẹdẹ vwọ kẹ uvwiẹ rẹ ovwan eje. 4 Ọ me rhuẹrẹ ayen phiyọ ogburhukpẹ ra vwẹ uvi rẹ oro vwo ru na vwẹ obaro ri Jihova ọkieje.
5 “Wọ me reyọ omamọ rẹ iflawa rere wọ reyọ vwo ru ibrẹdi 12 re họhọ ubiosa. Ẹkẹn ivẹ rẹ ẹkẹn ihwe rẹ ifah* yen wo che vwo ru ibrẹdi ọvuọvo. 6 Wọ me rhuẹrẹ ayen phiyọ ẹko ivẹ, esan me dia ẹko ọvuọvo, vwẹ imẹjẹ ra vwẹ uvi rẹ oro vwo ru na vwẹ obaro ri Jihova. 7 Wo mi phi uvi rẹ ifrankisẹnsi phiyọ ẹko ọvuọvo, kọ cha dia ibrẹdi rẹ ẹkẹn rẹ ẹkarophiyọ ra vwẹ erhanre torhẹ kẹ Jihova. 8 Kẹdurovwoma kẹdurovwoma, ọ me rhuẹrẹ phiyọ obaro ri Jihova ọkieje. Ọyen ọphọ ri rhirin rọ vẹ ihwo rẹ Izrẹl rere. 9 Ọ cha dia ọ rẹ Erọn vẹ emọ rọyen, ayen me riọ vwẹ asan ọfuanfon, kidie ọyen emu rọ ma fon vwọ kẹ vwo nẹ izobo ri Jihova ra vwẹ erhanre torhẹ kerẹ urhi ri bẹdẹ.”
10 Asaọkiephana ọmọshare ọvo rẹ aye rẹ Izrẹl ọvo vẹ ọshare rẹ Ijipt ọvo vwiẹre hẹ ohri rẹ ihwo rẹ Izrẹl, ọ vẹ ọshare rẹ Izrẹl ọvo ke họnra vwẹ asan rẹ ayen wonphiyọ* na. 11 Ọmọshare rẹ aye rẹ Izrẹl na kọ ta eta ebrabra kpahan Odẹ na* je hanrhọ.* Ọtiọyena a da reyọ bru Mosis rhe. A da rhe riẹn nẹ odẹ rẹ oni rọyen Shilomit, ọmọtẹ ri Dibrai rẹ ohwo rẹ uvwiẹ ri Dan. 12 A da kanrọ phiyọ asan bẹsiẹ ra vwọ vwẹ orhiẹn ri Jihova vwọ phia kẹ ayen phephẹn.
13 Ọtiọyena Jihova da ta kẹ Mosis: 14 “Reyọ ohwo rọ ta eta ebrabra na kpo otafe rẹ asan rẹ ayen wonphiyọ na, ihwo eje ri nyoro me ghwabọ rayen kpahen uyovwin rọyen, ọghwẹgbe na eje me vwẹ ikuta vwo phio. 15 Wọ me je vuẹ ihwo rẹ Izrẹl nẹ, ‘Ọ da dianẹ ohwo hanrhe Ọghẹnẹ rọyen, ọ cha rioja fikirẹ umwemwu rọyen. 16 Ọtiọyena o vwo obo rọ wanree, e jẹ a teyen ohwo rọ hanrhe odẹ ri Jihova na hwe. O vwo obo rọ wanree, ọghwẹgbe na eje me vwẹ ikuta vwo phio. E jẹ a teyen ọrhorha hwe kirobo ra je teyen ọmotọ rọ hanrhe odẹ na hwe.
17 “‘Ohwo da reyọ arhọ rẹ ohworakpọ, o vwo obo rọ wanree, e jẹ a teyọn hwe. 18 Kohwo kohwo rọ ghwiẹ eranvwe rọ dia orere, o de ghwu, ọ me hwosa rọyen, vwẹ arhọ vwọ hwosa rẹ arhọ.* 19 Ohwo da wan ọrivẹ rọyen oma, e jẹ e ruo obo ro ruro na. 20 Vwẹ ubeku ro vwirhirin vwọ hwosa rẹ ubeku ro vwirhirin, ẹro vwọ hwosa rẹ ẹro, ubiakon vwọ hwosa rẹ ubiakon, oka rẹ omaẹwan rọ so kẹ ohwo na yen a je so vwọ kẹ. 21 Ohwo rọ ghwiẹ eranvwe, o de hwe, ọ me hwosa rọyen, ẹkẹvuọvo ohwo rọ ghwiẹ ohworakpọ, o de hwe, a me teyọn hwe.
22 “‘Oka rẹ orhiẹn-ebro ọvuọvo yen ovwan che vwo ruiruo, owenẹ ọ dia ọrhorha yẹrẹ ọmotọ, kidie mẹvwẹ Jihova Ọghẹnẹ rẹ ovwan.’”
23 Mosis da ta ota kẹ ihwo rẹ Izrẹl, ayen da reyọ ohwo rọ ta eta ebrabra na kpo otafe rẹ asan rẹ ayen wonphiyọ na, ayen de phio. Ọtiọyena ihwo rẹ Izrẹl de ru kirobo rẹ Jihova ji iji rọyen kẹ Mosis.