Ukeri
24 Ọke rẹ Belam vwọ mrẹ nẹ oma vwerhen* Jihova ro vwo bruba kẹ Izrẹl, ọ rha yanran ra guọnọ obo rọ sa vwọ bọ epha rẹ okpetuu, ẹkẹvuọvo o de hirhe opharo ku aton na. 2 Belam vwọ kpare opharo rọyen je mrẹ Izrẹl ro wonphiyọ* vwo nene ivwiẹ rọyen, ẹwẹn rẹ Ọghẹnẹ da ro oma rọyen. 3 O de bru isẹ nana:
“Eta ri Belam ọmọ ri Biọ,
Kugbe eta rẹ ohwo re rhiẹro rọyen,
4 Eta rẹ ohwo ro nyo ota rẹ Ọghẹnẹ,
Ohwo rọ mrẹ emramrẹ rẹ Ọromevwẹgba na,
Ohwo rọ bọvwọn opharo rhuotọ vẹ ẹro rọyen ri rhiephiyọ:
5 Mavọ yen itughẹ wẹn vwo erhuvwu te, E Jekọp,
Itabanako wẹn, E Izrẹl!
6 Kerẹ iyara* na, e hẹrabọ yanran shesheri,
Kerẹ idju rehẹ orhoma rẹ urhie,
Kerẹ ekankọn rẹ alo rẹ Jihova kọnre,
Kerẹ isida rehẹ orhoma rẹ ame.
7 Ame rhe hwẹ nẹ igogono rọyen ivẹ ra vwẹ ophiẹn vwo ru cha,
A kọn ubi* rọyen kẹrẹ ame buebun.
Ovie rọyen cha rho nọ Egag,
A cha kpare uvie rọyen kpenu.
8 Ọghẹnẹ reyọ nẹ Ijipt cha;
Ọ pha kerẹ idjo rẹ erhuẹn rẹ aghwa vwọ kẹ ayen.
Ọ cha ghwọrọ ẹgborho na, ihwo re vwọsuọ,
Ọ cha re ibeku rayen, ọ je cha vwẹ edada rọyen vwọ ghwọrọ ayen.
9 O rhuẹn totọ, o sherhẹn totọ kerẹ okpohrokpo,
Kerẹ okpohrokpo, ono yen yivwin rhọvwọn?
Ebruba vwọ kẹ ihwo ri bruba kẹ wẹ,
Ekan vwọ kẹ ihwo ri duvwun iyorin kẹ wẹ.”
10 Ọtiọyena ophu de mu Belak mamọ kpahen Belam. Belak da teyen abọ rọyen vwọrẹ ivun emiovwo, ọ da ta kẹ Belam: “Mi se we rhe rere wo rhi duvwun iyorin vwọ kẹ ivwighrẹn mẹ, jẹ asaọkiephana, emu vuọvo ru wo ruru yen wo vwo bruba kẹ ayen abọ erha nana. 11 Asaọkiephana gbe kpo jọphẹre, mi vwo ẹwẹn ri mi vwo brọghọ phiyọ owẹ oma gbidiki jovwo, ẹkẹvuọvo nighere! Jihova mie we uphẹn rẹ ọghọ re.”
12 Belam da kpahen kẹ Belak: “Me vuẹ ikọn ru wo ji rhe vwe jovwo nẹ, 13 ‘Ọ da tobọ dianẹ Belak cha kẹ vwẹ uwevwin rọyen rọ ghwẹ vọn vẹ idọnọ efuanfon kugbe iro, me cha sa vwẹ ọhọre robọ mẹ* vwo ru orọnvwọn vuọvo rọ vrẹ oborẹ Jihova ji iji rọyeen, owenẹ ọ dia obo ri yovwirin yẹrẹ obo re brare, nẹ oborẹ Jihova vuẹ vwẹ ọvo yen me cha ta.’ 14 Asaọkiephana mi rhivwin bru ihwo mẹ ra. Gba yanrhe rere me vuẹ wẹ oborẹ ihwo nana che ru ihwo wẹn vwẹ ọke rọ cha obaro na.”* 15 O de bru isẹ nana:
“Eta ri Belam ọmọ ri Biọ,
Kugbe eta rẹ ohwo re rhiẹro rọyen,
16 Eta rẹ ohwo ro nyo ota rẹ Ọghẹnẹ,
Kugbe ohwo ro vwo erianriẹn rẹ Ọ ro Me Kpenu na,
Ọ mrẹ emramrẹ rẹ Ọromevwẹgba na
Ọke rọ vwọ bọvwọn opharo rhuotọ vẹ ẹro rọyen ri rhiephiyọ:
17 Me cha mrẹ, ẹkẹvuọvo ọ dia enẹnaa;
Me cha mrẹ, ẹkẹvuọvo ọ dia kẹrẹkpẹẹ.
Isio ọvo che nẹ Jekọp rhe,
Ọkpọ rẹ usuon che nẹ Izrẹl rhe.
Vwọrẹ imuẹro, ọ cha guọghọ arhare ri Moab*
Kugbe ekpehruyovwin rẹ emọ rẹ ozighi eje.
18 Idọm cha dia ughwẹ rọyen,
E, Siẹ ughwẹ rẹ ivwighrẹn rọyen,
Ọke rẹ Izrẹl de dje uduefiogbere rọyen phia.
19 Ohwo ọvo ro nẹ Jekọp rhe che rhe phiẹkparobọ,
Kọ cha ghwọrọ kohwo kohwo ro sivwin rhọ nẹ orere na.
20 Ọke rọ vwọ mrẹ Amalẹk, o de bru isẹ rọyen na kpobarophiyọ:
“Amalẹk yen ọrẹsosuọ vwẹ usun rẹ ẹgborho na,
Ẹkẹvuọvo vwẹ oba rọyen, ọ cha ghwọrọ.”
21 Ọke rọ vwọ mrẹ ihwo ri Kẹn, o de bru isẹ rọyen na kpobarophiyọ:
“Asan ru wọ dia fuoma, enu rẹ oragha yen a bọn uwevwin wẹn phiyọ.
22 Ẹkẹvuọvo ohwo ọvo cha torhẹ Kein totọ.
Mavọ yen o kri te tavwen Asiria ki rhi mu we yanran kerẹ ọviẹn?”
23 O de ji bru isẹ rọyen na kpobarophiyọ:
“Okpetu rode! Ono yen che sivwin rhọ ọke rẹ Ọghẹnẹ de ru ọnana?
24 Ikuna che nẹ orhoma rẹ urhie ri Kitim rhe,
Ayen che gboja kẹ Asiria,
Ayen che gboja kẹ Iba.
Ẹkẹvuọvo ọyen komobọ je cha ghwọrọ totọ.”
25 Ọyena vwọ wan nu, Belam de vrẹn, o de rhivwin kpo asan rọyen. Belak da je yan ọrọyen yanran.