Ukeri
32 Asaọkiephana emọ ri Rubẹn vẹ emọ ri Gad vwo ichuru buebun, ayen da mrẹ nẹ otọ ri Jeza kugbe Giliẹd eyen asan ri yovwirin vwọ kẹ ichuru. 2 Ọtiọyena emọ ri Gad vẹ emọ ri Rubẹn de bru Mosis, Ẹlieza orherẹn na, kugbe isun rẹ ọghwẹgbe na ra, ayen da ta: 3 “Atarọt, Daibọn, Jeza, Nimra, Hẹshbọn, Ẹliela, Sibam, Nibo, kugbe Biọn, 4 otọ rẹ Jihova phikparobọ vwẹ obaro rẹ ọghwẹgbe rẹ Izrẹl na, ọyen otọ ro yovwirin vwọ kẹ ichuru, jẹ idibo wẹn vwo ichuru buebun.” 5 Vwọba, ayen da ta: “Ọ da dianẹ avwanre mrẹ ẹroesiri wẹn, e jẹ ọnana dia otọ ra cha vwọ kẹ idibo wẹn kerẹ ughwẹ. Wo jẹ avwanre shariẹ Jọdan na vrẹẹ.”
6 Ọtiọyena Mosis da ta kẹ emọ ri Gad vẹ emọ ri Rubẹn: “Iniọvo rẹ ovwan ki che kpo ofovwin, jẹ ovwan komobọ dia etinẹ? 7 Diesorọ ovwan vwo si udu nẹ ihwo rẹ Izrẹl awọ rere ayen vwo jẹ ẹwanvrẹ ra ro otọ ro muẹro nẹ Jihova cha vwọ kẹ ayen na? 8 Ọyena yen oborẹ esẹ rẹ ovwan ruru vwẹ ọke ri mi vwo ji ayen nẹ Kedẹsh-bania re ni otọ na. 9 Ọke rẹ ayen vwo yerin Iyara* rẹ Ẹshkọl rẹ ayen vwọ mrẹ otọ na, ayen de si udu nẹ ihwo rẹ Izrẹl awọ rere ayen vwo jẹ otọ rẹ Jihova cha vwọ kẹ ayen na ẹruọ. 10 Ophu de mu Jihova gangan vwẹ ẹdẹ yena, tẹ ẹdia ro vwo duvwun iyorin: 11 ‘Eshare ri nẹ Ijipt rhe rehẹ ẹgbukpe 20 kpenu cha mrẹ otọ ri mi duvwun iyorin nẹ me cha vwọ kẹ Ebraham, Aizik, kugbe Jekọp naa, kidie ayen vwẹ ubiudu rayen eje vwo nene uvwee— 12 jokparẹ Kelẹb ọmọ ri Jẹfunẹ ohwo ri Kẹniz na kugbe Joshua ọmọ ri Nọn, kidie ayen vwẹ ubiudu rayen eje vwo nene Jihova.’ 13 Ọtiọyena Jihova de mu ophu gangan kpahen Izrẹl, ọ da nẹrhẹ ayen yan oyan osoghoro vwevunrẹ aton na vwẹ ẹgbukpe 40, bẹsiẹ rẹ uvwiẹ yena eje ri ruẹ obo re brare vwẹ ẹro ri Jihova na rhi vwo te oba. 14 Asaọkiephana ovwan reyọ ẹdia rẹ esẹ rẹ ovwan kerẹ emọ rẹ ihwo umwemwu re nẹrhẹ ophu ọtuatua ri Jihova rhoma tuaphiyọ vwọ kpahen Izrẹl. 15 Ovwan de chukokuo, ovwan rhe nenee, vwọrẹ imuẹro ọ cha rhoma yanjẹ ayen vwo vwevunrẹ aton na, kẹ ovwan cha hwarhiẹ oghwọrọ bru ihwo nana eje rhe.”
16 Ọke vwọ yanran na, ayen de bro ra, ayen da ta: “E jẹ avwanre bọn iwevwin rẹ eranvwe rẹ ikuta vwẹ etinẹ na vwọ kẹ ichuru rẹ avwanre kugbe irere vwọ kẹ emọ rẹ avwanre. 17 Ẹkẹvuọvo avwanre ji che muegbe vwọ kẹ ofovwin, kẹ avwanre cha kobaro vwọ kẹ ihwo rẹ Izrẹl bẹsiẹ avwanre vwọ reyọ ayen te asan rayen, jẹ emọ rẹ avwanre dia evunrẹ irere ra gbogba riariẹ phiyọ na vwọrẹ ofuvwegbe vwo nẹ abọ rẹ ihwo re dia otọ na. 18 Avwanre che rhivwin rhe iwevwin rẹ avwanree bẹsiẹ rẹ ọvuọvo rẹ ihwo rẹ Izrẹl vwọ reyọ otọ rọyen kerẹ ughwẹ. 19 Avwanre vẹ ayen che vwo ughwẹ vwẹ ẹbẹre ro chekọ ri Jọdan naa, kidie avwanre reyọ ughwẹ rẹ avwanre vwẹ ẹbẹre rẹ onre va nẹcha ri Jọdan na nure.”
20 Mosis da kpahen kẹ ayen: “Ovwan de se ru ọnana: Ovwan mu ekuakua ofovwin vwẹ obaro ri Jihova vwọ kẹ ofovwin na; 21 ovwan ihwo eje de mu ekuakua ofovwin je shariẹ Jọdan na vrẹ vwẹ obaro ri Jihova ọke rọ da djẹ ivwighrẹn rọyen nẹ obaro rọyen 22 bẹsiẹ re vwo phi otọ na kparobọ vwẹ obaro ri Jihova, e de ru ọyena nu, kẹ ovwan se rhivwin je vrabọ rẹ abe vwẹ obaro ri Jihova vẹ Izrẹl. Ọke yena, otọ nana kọ cha dia ughwẹ rẹ ovwan vwẹ obaro ri Jihova. 23 Ẹkẹvuọvo ovwan rhe ru ọnanaa, jẹ ovwan ru umwemwu vwọso Jihova re. Ovwan gba riẹn nẹ ovwan cha rioja fikirẹ umwemwu rẹ ovwan. 24 Ọtiọyena ovwan sa bọn irere vwọ kẹ emọ rẹ ovwan kugbe iwevwin rẹ eranvwe vwọ kẹ ichuru rẹ ovwan, ẹkẹvuọvo ovwan mi ru oborẹ ovwan veri.”
25 Emọ ri Gad vẹ emọ ri Rubẹn da ta eta nana kẹ Mosis: “Idibo wẹn che ru kirobo rẹ ọrovwavwanre ji iji rọyen na. 26 Emọ rẹ avwanre, eya rẹ avwanre, ichuru rẹ avwanre, kugbe eranvwe rẹ avwanre eje re dia orere cha dia etiyin vwẹ irere ri Giliẹd, 27 ẹkẹvuọvo idibo wẹn cha shariẹ vrẹ, kọshare kọshare ro muegbe vwọ kẹ ofovwin cha yanran re phi ofovwin vwẹ obaro ri Jihova, kirobo rẹ ọrovwavwanre ta na.”
28 Ọtiọyena Mosis da vwẹ iji kpahen ayen vwọ kẹ Ẹlieza orherẹn na, Joshua ọmọ ri Nọn, kugbe igbuyovwin rẹ iwevwin rẹ esẹ rẹ ivwiẹ rẹ Izrẹl. 29 Mosis da ta kẹ ayen: “Emọ ri Gad vẹ emọ ri Rubẹn de nene ovwan shariẹ Jọdan na vrẹ, kọshare kọshare ro muegbe vwọ kẹ ofovwin na vwẹ obaro ri Jihova, e de phi otọ na kparobọ vwẹ obaro rẹ ovwan, ovwan me kẹ ayen otọ ri Giliẹd kerẹ ughwẹ. 30 Ẹkẹvuọvo ayen rhe mu ekuakua ofovwin ji nene ovwan shariẹ vrẹẹ, kẹ ayen cha dia ohri rẹ ovwan vwẹ otọ ri Kenan.”
31 Ọtiọyena emọ ri Gad vẹ emọ ri Rubẹn da kpahen: “Oborẹ Jihova vuẹ idibo rọyen na yen avwanre che ru. 32 Avwanre che mu ekuakua ofovwin je wanvrẹ vwẹ obaro ri Jihova kpo otọ ri Kenan, ẹkẹvuọvo otọ rẹ avwanre cha riuku rọyen na cha dia ẹbẹre obonẹ ri Jọdan na.” 33 Ọtiọyena Mosis da kẹ ayen, kọyen emọ ri Gad, emọ ri Rubẹn, kugbe ubro rẹ uvwiẹ ri Manasẹ ọmọ ri Josẹf uvie ri Saihọn ovie rẹ ihwo rẹ Amọ kugbe uvie rẹ Ọg ovie ri Beshan, otọ rọ dia ọ rẹ irere na vwẹ ekogho yena kugbe irere rẹ otọ rọ riarierẹ phiyọ.
34 Emọ ri Gad da bọn Daibọn, Atarọt, Aroa, 35 Atrọt-shofan, Jeza, Jọg-bẹha, 36 Bẹt-nimra, kugbe Bẹt-heran, irere ra gbogba riariẹ phiyọ, ayen je bọn iwevwin rẹ eranvwe rẹ ikuta vwọ kẹ ichuru rayen. 37 Emọ ri Rubẹn bọn Hẹshbọn, Ẹliela, Kiriateim, 38 Nibo, kugbe Bel-miọn—e wene edẹ rayen—kugbe Sibma; kẹ ayen mu edẹ kpokpọ vwọ kẹ irere rẹ ayen rhoma bọn na.
39 Emọ ri Mekiẹ rọ dia ọmọ ri Manasẹ da kpare ofovwin bru Giliẹd ra, ayen de phio kparobọ, ayen da djẹ ihwo rẹ Amọ re dia etiyin no. 40 Ọtiọyena Mosis da vwẹ Giliẹd vwọ kẹ Mekiẹ ọmọ ri Manasẹ, kọ dia evun rọyen. 41 Jeẹ ọmọ ri Manasẹ da họnre vwọso ayen, o de phi eko rayen re dia itughẹ kparobọ, ko se ayen Havọt-jeẹ.* 42 Noba da họnre vwọso Kinat, o de phio vẹ irere rọyen re riarierẹ phiyọ kparobọ, ọ da vwẹ odẹ robọ rọyen Noba vwo se.