Ukeri

33 Ọnana oyan rẹ ihwo rẹ Izrẹl yanre nẹ asan kpo asan ọke rẹ ayen vwo nẹ Ijipt vwo nene ẹkuẹko rayen* vwẹ otọ rẹ odjekẹ ri Mosis vẹ Erọn. 2 Mosis ko siẹ edẹ rẹ asan sansan rẹ ayen vrẹn nu vwẹ oyan rẹ ayen yanre vwo nẹ asan kpo asan vwo nene iji ri Jihova. Enana yen asan sansan rẹ ayen teri vwẹ oyan rayen rẹ ayen vwo nẹ asan ọvo vwo kpo ọfa: 3 Ayen vrẹn nẹ Ramẹsis vwẹ emeranvwe rẹsosuọ, vwẹ ẹdẹ 15 rẹ emeranvwe na. Vwẹ ẹdẹ rọ vwọ kpahen Ọwanvrẹ na dẹn, ihwo rẹ Izrẹl da yanran vẹ uduefiogbere* vwẹ irharo rẹ ihwo rẹ Ijipt eje. 4 Jẹ ihwo rẹ Ijipt shẹ emekpako na eje rẹ Jihova teyen hwe vwẹ ohri rayen, kidie Jihova brorhiẹn hwe eghẹnẹ rayen.

5 Ọtiọyena ihwo rẹ Izrẹl de vrẹn nẹ Ramẹsis, ayen de wonphiyọ* Sọkọt. 6 Ayen de vrẹn nẹ Sọkọt, ayen de wonphiyọ Itam rọhẹ oboba rẹ aton na. 7 Ọyena vwọ wan nu, ayen de vrẹn nẹ Itam, ayen de kuomarhẹriẹ kpo ẹbẹre ri Paihahairọt, asan ra da kparo mrẹ Bel-zifọn, ayen de wonphiyọ obaro ri Migdọl. 8 Ayen de rhe vrẹn nẹ Paihahairọt, ayen da wan uherevie rẹ abadi na vwo kpo aton na, kẹ ayen yan oyan rẹ ẹdẹ erha vwevunrẹ aton rẹ Itam, ayen de wonphiyọ Mera.

9 Ayen de vrẹn nẹ Mera, ayen de rhi te Ilim. Asaọkiephana igbugbu rẹ ame 12 vẹ iriẹ 70 hẹ evunrẹ Ilim, ọtiọyena ayen de wonphiyọ etiyin. 10 Ayen de rhe vrẹn nẹ Ilim, ayen de wonphiyọ orhoma rẹ Abadi Ọvwavware na. 11 Ọyena vwọ wan nu, ayen de vrẹn nẹ Abadi Ọvwavware na, ayen de wonphiyọ aton ri Sin. 12 Ayen de vrẹn nẹ aton ri Sin, ayen de wonphiyọ Dọfka. 13 Ọke vwọ yanran na, ayen de vrẹn nẹ Dọfka, ayen de wonphiyọ Elọsh. 14 Ayen de rhe vrẹn nẹ Elọsh, ayen de wonphiyọ Rẹfidim, asan ro vwo ame vuọvo rẹ ihwo na cha daa. 15 Ọyena vwọ wan nu, ayen de vrẹn nẹ Rẹfidim, ayen de wonphiyọ aton ri Sainai.

16 Ayen de vrẹn nẹ aton ri Sainai, ayen de wonphiyọ Kibrọt-hateava. 17 Ayen de rhe vrẹn nẹ Kibrọt-hateava, ayen de wonphiyọ Hazirọt. 18 Ọyena vwọ wan nu, ayen de vrẹn nẹ Hazirọt, ayen de wonphiyọ Ritma. 19 Ayen de rhe vrẹn nẹ Ritma, ayen de wonphiyọ Rimọn-pirẹz. 20 Ọyena vwọ wan nu, ayen de vrẹn nẹ Rimọn-pirẹz, ayen de wonphiyọ Libna. 21 Ayen de rhe vrẹn nẹ Libna, ayen de wonphiyọ Risa. 22 Ayen de vrẹn nẹ Risa, ayen de wonphiyọ Kehẹleta. 23 Ayen de rhe vrẹn nẹ Kehẹleta, ayen de wonphiyọ Ugbenu ri Shifa.

24 Ọyena vwọ wan nu, ayen de vrẹn nẹ Ugbenu ri Shifa, ayen de wonphiyọ Hareda. 25 Ayen de rhe vrẹn nẹ Hareda, ayen de wonphiyọ Makhilọt. 26 Ayen de vrẹn nẹ Makhilọt, ayen de wonphiyọ Tehat. 27 Ọyena vwọ wan nu, ayen de vrẹn nẹ Tehat, ayen de wonphiyọ Tira. 28 Ayen de vrẹn nẹ Tira, ayen de wonphiyọ Mitka. 29 Ọke vwọ yanran na, ayen de vrẹn nẹ Mitka, ayen de wonphiyọ Hashmona. 30 Ayen de rhe vrẹn nẹ Hashmona, ayen de wonphiyọ Mosirọt. 31 Ayen de vrẹn nẹ Mosirọt, ayen de wonphiyọ Bẹnẹ-jeakan. 32 Ayen de rhe vrẹn nẹ Bẹnẹ-jeakan, ayen de wonphiyọ Họ-hagidgad. 33 Ọyena vwọ wan nu, ayen de vrẹn nẹ Họ-hagidgad, ayen de wonphiyọ Jọtbata. 34 Ọke vwọ yanran na, ayen de vrẹn nẹ Jọtbata, ayen de wonphiyọ Abrọna. 35 Ayen de rhe vrẹn nẹ Abrọna, ayen de wonphiyọ Iziọn-giba. 36 Ayen de vrẹn nẹ Iziọn-giba, ayen de wonphiyọ aton ri Zin, kọyen Kedẹsh.

37 Ọke vwọ yanran na, ayen de vrẹn nẹ Kedẹsh, ayen de wonphiyọ Ugbenu ri Họ vwẹ ughwru rẹ otọ rẹ Idọm. 38 Erọn orherẹn na de kpenu rẹ Ugbenu ri Họ vwo nene iji ri Jihova, o de ghwu vwẹ etiyin vwẹ ukpe 40 rẹ ihwo rẹ Izrẹl vwo vrẹn nẹ Ijipt nu vwẹ emeranvwe riyorin, vwẹ ẹdẹ rẹsosuọ rẹ emeranvwe na. 39 Erọn hẹ ẹgbukpe 123 ọke ro vwo ghwu vwẹ Ugbenu ri Họ.

40 Asaọkiephana ovie rẹ Erad ohwo ri Kenan rọ dia Nẹgẹb vwẹ otọ ri Kenan, de nyo nẹ ihwo rẹ Izrẹl cha.

41 Ọke vwọ yanran na, ayen de vrẹn nẹ Ugbenu ri Họ, ayen de wonphiyọ Zalmona. 42 Ọyena vwọ wan nu, ayen de vrẹn nẹ Zalmona, ayen de wonphiyọ Punọn. 43 Ayen de rhe vrẹn nẹ Punọn, ayen de wonphiyọ Obọt. 44 Ayen de vrẹn nẹ Obọt, ayen de wonphiyọ Aiye-abarim, vwẹ ughwru ri Moab. 45 Ọke vwọ yanran na, ayen de vrẹn nẹ Aiyim, ayen de wonphiyọ Daibọn-gad. 46 Ayen de vrẹn nẹ Daibọn-gad, ayen de wonphiyọ Almọn-diblateim. 47 Ayen de rhe vrẹn nẹ Almọn-diblateim, ayen de wonphiyọ igbenu rẹ Abarim vwẹ obaro ri Nibo. 48 Ukuotọ rọyen, ayen de vrẹn nẹ igbenu rẹ Abarim, ayen de wonphiyọ aton ri Moab vwẹ orhoma ri Jọdan rọ kẹrẹ Jẹriko. 49 Ayen da daji orhoma ri Jọdan na vwo nẹ Bẹt-jẹshimọt rhirin re te Ebẹl-shitim, vwẹ aton ri Moab.

50 Jihova da ta ota kẹ Mosis vwẹ aton ri Moab rọ kẹrẹ Jọdan na vwẹ Jẹriko, ọ da ta: 51 “Ta ota kẹ ihwo rẹ Izrẹl rere wọ vuẹ ayen nẹ, ‘Ovwan cha shariẹ Jọdan na vrẹ ra ro otọ ri Kenan. 52 Ovwan me djẹ ihwo eje re dia otọ na nẹ obaro rẹ ovwan rere ovwan je ghwọrọ ema rẹ ikuta rayen eje kugbe ema rẹ utehru rayen* eje, ovwan me ghwọrọ asan ri kpenu eje rẹ ayen da ga ẹga. 53 Ovwan cha riuku rẹ otọ na je dia evun rọyen, kidie vwọrẹ imuẹro, me cha vwẹ otọ na kẹ ovwan kerẹ uku. 54 Ovwan me vwẹ itẹ vwọ ghare otọ na kerẹ uku vwẹ uvwre rẹ erua rẹ ovwan. Vwọ kẹ ẹko ro bunru, ovwan mi phiba uku rọyen, vwọ kẹ ẹko rọ hanvwere, ovwan mi si nẹ uku rọyen. Uku rẹ ohwo ọvuọvo cha dia asan rẹ itẹ rọyen she phiyọ. Ovwan cha reyọ otọ rẹ ovwan kerẹ uku vwo nene ivwiẹ rẹ esẹ rẹ ovwan.

55 “‘Ovwan rha djẹ ihwo re dia otọ na nẹ obaro rẹ ovwaan, ihwo rẹ ovwan yan jovwo nẹ e dia otọ na ke cha dia kerẹ obo ri duvwun ẹro rẹ ovwan kugbe idjigbẹn vwẹ ẹfẹn rẹ ovwan, kẹ ayen che kpokpo ovwan vwevunrẹ otọ rẹ ovwan cha dia na. 56 Ki mi che ru ovwan obo re me guọnọ ru ayen jovwo na.’”