Ukeri
34 Jihova da rhoma ta ota kẹ Mosis, ọ da ta: 2 “Vwẹ iji nana kẹ ihwo rẹ Izrẹl: ‘Ọke rẹ ovwan da ro evunrẹ otọ ri Kenan, ọnana yen otọ ra cha vwọ kẹ ovwan kerẹ uku, otọ ri Kenan vwo nene ughwru rọyen.
3 “‘Ughwru rẹ ovwan rọhẹ ẹbẹre rẹ obọrhen ọnre na cha hẹre nẹ aton ri Zin rọ kẹrẹ Idọm rhe, ughwru rẹ ovwan rẹ obọrhen ọnre na rọhẹ ẹbẹre ọnre va nẹcha na che nẹ oba rẹ Abadi rẹ Ughwanka* na rhe. 4 Ughwru rẹ ovwan cha gẹre kpo ẹbẹre rẹ obọrhen ọnre na vwẹ idjerhe rẹ ugbenu rẹ Akrabim, ọ me yanran kpo Zin, oba rọyen kọ cha dia ẹbẹre rẹ obọrhen ọnre ri Kedẹsh-bania. Ọ me hẹre re te Heza-ada rhirin re te Azmọn. 5 Ughwru na cha gẹre kpo Azmọn vwo kpo Iwadi* rẹ Ijipt, oba rọyen kọ cha dia obo Abadi na.*
6 “‘Ughwru rẹ ovwan vwẹ ẹbẹre ọnre shera na cha dia Abadi Rode na* kugbe orhoma rẹ abadi na. Ọnana yen cha dia ughwru rẹ ovwan vwẹ ẹbẹre ọnre shera na.
7 “‘Asaọkiephana ọnana yen cha dia ughwru rẹ ovwan vwẹ ẹbẹre rẹ obohwẹre ọnre na: Ovwan cha jokaphiyọ ughwru rẹ ovwan vwo nẹ Abadi Rode na re te Ugbenu ri Họ. 8 Ovwan cha jokaphiyọ ughwru na vwo nẹ Ugbenu ri Họ re te Libo-hemat,* oba rẹ ughwru na kọ cha dia Zidad. 9 Ughwru na me hẹre re te Zifrọn, oba rọyen kọ cha dia Heza-inan. Ọnana yen cha dia ughwru rẹ ovwan vwẹ ẹbẹre rẹ obohwẹre ọnre na.
10 “‘Ovwan me jokaphiyọ ughwru rẹ ovwan vwẹ ẹbẹre ọnre va nẹcha na vwo nẹ Heza-inan re te Shifam. 11 Ughwru na me hẹre vwo nẹ Shifam re te Ribla vwo kpo ẹbẹre ọnre va nẹcha rẹ Ein, ughwru na me yanran ọ me wanvrẹ ọghwrọrọ rẹ Abadi ri Kinẹrẹt* rọhẹ ẹbẹre ọnre va nẹcha. 12 Ughwru na cha hẹre re te Jọdan na, oba rọyen kọ cha dia Abadi rẹ Ughwanka na. Ọnana yen cha dia otọ rẹ ovwan vẹ ughwru re riarierẹ phiyọ.’”
13 Ọtiọyena Mosis da vwẹ iji vwọ kẹ ihwo rẹ Izrẹl, ọ da ta: “Ọnana yen otọ rẹ ovwan cha ghare kerẹ uku womarẹ itẹ na, kirobo rẹ Jihova ji iji rọyen nẹ ọyen cha vwọ kẹ uvwiẹ irhirin gbubro na. 14 Kidie uvwiẹ ri Rubẹn vwo nene uwevwin rẹ ọsẹ rayen, uvwiẹ ri Gad vwo nene uwevwin rẹ ọsẹ rayen kugbe ubro rẹ uvwiẹ ri Manasẹ reyọ uku rayen jovwo re. 15 Uvwiẹ ivẹ gbubro na reyọ uku rayen nure vwẹ ẹbẹre ro chekọ ri Jọdan na vwẹ Jẹriko ro kpo ẹbẹre ọnre va nẹcha na.”
16 Jihova da rhoma ta ota kẹ Mosis, ọ da ta: 17 “Enana yen edẹ rẹ eshare re cha ghare otọ na kẹ ovwan rere ovwan riuku rọyen: Ẹlieza orherẹn na kugbe Joshua ọmọ ri Nọn. 18 Ovwan me reyọ osun ọvo vwo nẹ uvwiẹ ọvuọvo rhe rere ayen ghare otọ na kerẹ uku kẹ ovwan. 19 Enana yen edẹ rẹ eshare na: vwo nẹ uvwiẹ ri Juda, Kelẹb ọmọ ri Jẹfunẹ; 20 vwo nẹ uvwiẹ rẹ emọ ri Simiọn, Shẹmuẹl ọmọ rẹ Amaihọd; 21 vwo nẹ uvwiẹ ri Bẹnjamin, Elaidad ọmọ ri Kislọn; 22 vwo nẹ uvwiẹ rẹ emọ ri Dan, osun ọvo, Bọkai ọmọ ri Jọglai; 23 emọ ri Josẹf vwo nẹ uvwiẹ rẹ emọ ri Manasẹ, osun ọvo, Haniẹl ọmọ rẹ Ẹfọd; 24 vwo nẹ uvwiẹ rẹ emọ rẹ Ifrem, osun ọvo, Kẹmuẹl ọmọ ri Shiftan; 25 vwo nẹ uvwiẹ rẹ emọ ri Zẹbulọn, osun ọvo, Ẹlizefan ọmọ ri Panak; 26 vwo nẹ uvwiẹ rẹ emọ rẹ Isaka, osun ọvo, Paltiẹl ọmọ rẹ Azan; 27 vwo nẹ uvwiẹ rẹ emọ rẹ Asha, osun ọvo, Ahaihọb ọmọ ri Shilomai; 28 vwo nẹ uvwiẹ rẹ emọ ri Naftalai, osun ọvo, Pẹdahẹl ọmọ rẹ Amaihọd.” 29 Enana yen ihwo rẹ Jihova ji iji kẹ nẹ e ghare otọ na kẹ ihwo rẹ Izrẹl rehẹ otọ ri Kenan.