Ukeri
36 Igbuyovwin rẹ orua rẹ emọ ri Giliẹd ọmọ ri Mekiẹ ọmọ ri Manasẹ, ohwo rẹ orua rẹ emọ ri Josẹf da yanrhe, ayen da ta ota vwẹ obaro ri Mosis vẹ isun na, igbuyovwin rẹ orua rẹ ihwo rẹ Izrẹl. 2 Ayen da ta: “Jihova vwẹ iji kẹ ọrovwovwe nẹ ọ ghare otọ na womarẹ itẹ kerẹ uku vwọ kẹ ihwo rẹ Izrẹl; Jihova je vwẹ iji kẹ ọrovwovwe nẹ ọ vwẹ uku rẹ oniọvo rẹ avwanre Zẹlofihad vwọ kẹ emetẹ rọyen. 3 Ayen da rọvwọn eshare nẹ uvwiẹ ọfa vwẹ Izrẹl, ka je cha reyọ uku rẹ eya na vwo nẹ uku rẹ esẹ rẹ avwanre, a me vwọ ba uku rẹ uvwiẹ rẹ ayen cha ra na, ọtiọyena ka cha reyọ vwo nẹ ẹkẹn rẹ uku rẹ avwanre. 4 Asaọkiephana ọke rẹ Ukpe rẹ Ugbomọphẹ na de te vwọ kẹ ihwo rẹ Izrẹl, ka je cha vwẹ uku rẹ eya na vwọ ba uku rẹ uvwiẹ rẹ ayen cha dia vwẹ ọke yena, ọtiọyena ka cha reyọ uku rayen vwo nẹ uku rẹ uvwiẹ rẹ esẹ rẹ avwanre.”
5 Mosis da vwẹ iji kẹ ihwo rẹ Izrẹl vwo nene oborẹ Jihova tare: “Oborẹ uvwiẹ rẹ emọ ri Josẹf ta na gbare. 6 Ọnana yen oborẹ Jihova ji iji rọyen vwọ kpahen emetẹ ri Zẹlofihad: ‘Ayen sa rọvwọn kohwo kohwo ro je ayen. Ẹkẹvuọvo ayen me rọvwọn ohwo ro nẹ orua ọvo vwẹ uvwiẹ rẹ ọsẹ rayen rhe. 7 E jẹ uku rẹ ihwo rẹ Izrẹl vuọvo nẹ uvwiẹ ọvo vwo kpo ọfaa, e jẹ ihwo rẹ Izrẹl sẹro rẹ uku rẹ uvwiẹ rẹ esẹ rayen ride. 8 Kọmọtẹ kọmọtẹ ro vwo uku vwẹ ohri rẹ uvwiẹ rẹ Izrẹl me dia aye rẹ ohwo ọvo vwẹ uvwiẹ rẹ ọsẹ rọyen, rere ihwo rẹ Izrẹl sa vwọ sẹro rẹ uku rẹ esẹ rayen ride. 9 E jẹ uku vuọvo nẹ uvwiẹ ọvo vwo kpo ọfaa, e jẹ uvwiẹ rẹ ihwo rẹ Izrẹl sẹro rẹ uku robọ rayen.’”
10 Emetẹ ri Zẹlofihad de ghwe ru kirobo rẹ Jihova ji iji rọyen kẹ Mosis. 11 Ọtiọyena emetẹ ri Zẹlofihad, Mala, Tiẹza, Họgla, Milka, kugbe Noa da rọvwọn emọ rẹ iniọvo rẹ ọsẹ rayen. 12 Ayen da rhe dia eya rẹ eshare ri nẹ erua ri Manasẹ ọmọ ri Josẹf rhe, rere uku rayen sa vwọ daji uvwiẹ rẹ orua rẹ ọsẹ rayen.
13 Enana yen iji kugbe orhiẹn-ebro rẹ Jihova vwọ kẹ ihwo rẹ Izrẹl womarẹ Mosis vwẹ aton ri Moab rọ kẹrẹ Jọdan na vwẹ Jẹriko.