Ukeri

10 Jihova da ta kẹ Mosis: 2 “Ru ewanre ivẹ kẹ oma wẹn; vwẹ idọnọ efuanfon re duvwunru vwo ru ayen, wo mi hworo ayen vwo koko ọghwẹgbe na je vuẹ ayen nẹ ayen mu oyan phiyọ nẹ asan rẹ ayen wonphiyọ* na. 3 Ọke re de hworo ivẹ na, ọghwẹgbe na eje mi koko bru we rhe vwẹ asan ra wan rua utughẹ ra da vwoma na. 4 Ọ da dia ọvo yen e hworori, isun na ọvo, kọyen igbuyovwin rẹ ẹkuẹko rẹ uriorin rẹ Izrẹl yen che koko bru we rhe.

5 “Ọke wo de hworo owanre na vẹ edo ro kpotọ kpenu, ihwo ri wonphiyọ ẹbẹre ọnre va nẹcha na mi mu oyan phiyọ. 6 Wọ da rhoma hworo owanre na obọ rivẹ vẹ edo ro kpotọ kpenu, ihwo ri wonphiyọ ẹbẹre rẹ obọrhen ọnre na mi mu oyan phiyọ. E jẹ ayen hworo owanre na vwẹ idjerhe nana kọke kọke rẹ ẹko ọvo vwẹ usun rayen de mu oyan phiyọ.

7 “Asaọkiephana wo de koko ọghwẹgbe na, wo mi hworo ewanre na, ẹkẹvuọvo e jẹ edo na kpotọ kpenuu. 8 Emọ rẹ Erọn, irherẹn na, mi hworo ewanre na, a me vwẹ ayen vwo ruiruo kerẹ urhi ri bẹdẹ vwọ kẹ ovwan vwẹ uvwiẹ rẹ ovwan eje.

9 “Ovwan da kpare ofovwin vwẹ otọ rẹ ovwan vwọso ọvweghrẹn ro shenyẹ ovwan, ovwan me vwẹ ewanre na vwo se use rẹ ofovwin, Jihova Ọghẹnẹ rẹ ovwan kọ cha karophiyọ ovwan, o mi sivwin ovwan vwo nẹ obọ rẹ ivwighrẹn rẹ ovwan.

10 “Vwọba, vwẹ irueru rẹ aghọghọ rẹ ovwan—erẹ rẹ ovwan kugbe ọtonphiyọ rẹ emeranvwe rẹ ovwan—ovwan mi hworo ewanre na vwẹ enu rẹ izobo rẹ ẹtorhẹ rẹ ovwan kugbe izobo rẹ ọrekugbe rẹ ovwan; ayen me dia kerẹ ẹkarophiyọ vwọ kẹ ovwan vwẹ obaro rẹ Ọghẹnẹ rẹ ovwan. Mẹvwẹ Jihova Ọghẹnẹ rẹ ovwan.”

11 Asaọkiephana vwẹ ukpe rivẹ, vwẹ emeranvwe rivẹ na, vwẹ ẹdẹ 20 rẹ emeranvwe na, evwru na da kparoma nẹ enu rẹ itabanako rẹ Oseri na. 12 Ọtiọyena ihwo rẹ Izrẹl de mu oyan phiyọ nẹ aton ri Sainai vwo nene ọrhuẹrẹphiyotọ re vwo mu vwọ kẹ oyan rayen, evwru na da domaji vwẹ aton ri Peran. 13 Ọnana yen obọ rẹsosuọ rẹ ayen tu vwo mu oyan phiyọ vwo nene iji ri Jihova womarẹ Mosis.

14 Ọtiọyena ẹko rẹ uvwiẹ erha rẹ emọ ri Juda de ke mu oyan phiyọ vwo nene ẹkuẹko rayen,* Nashọn ọmọ rẹ Aminadab yen suẹn ẹko rọyen. 15 Nẹtanẹl ọmọ ri Zua yen suẹn ẹko rẹ uvwiẹ rẹ emọ rẹ Isaka. 16 Elayab ọmọ ri Hilọn yen suẹn ẹko rẹ uvwiẹ rẹ emọ ri Zẹbulọn.

17 Ọke ra vwọ ghan itabanako na nu, emọ ri Gẹshọn vẹ emọ ri Mẹrerai ri muẹ itabanako na de mu oyan phiyọ.

18 Ẹko rẹ uvwiẹ erha ri Rubẹn de mu oyan phiyọ vwo nene ẹkuẹko rayen,* Ẹlaizọ ọmọ ri Shẹdaọ yen suẹn ẹko rọyen. 19 Shilumiẹl ọmọ ri Zurishadai yen suẹn ẹko rẹ uvwiẹ rẹ emọ ri Simiọn. 20 Elayasaf ọmọ ri Duẹl yen suẹn ẹko rẹ uvwiẹ rẹ emọ ri Gad.

21 Ọyena vwọ wan nu, ihwo ri Kohat ri muẹ ekuakua rẹ asan ọfuanfon na de mu oyan phiyọ. A cha vwẹ itabanako na vwo vi tavwen ayen ki te oboyin.

22 Ẹko rẹ uvwiẹ erha rẹ emọ rẹ Ifrem de mu oyan phiyọ vwo nene ẹkuẹko rayen,* Ẹlishama ọmọ rẹ Amaihọd yen suẹn ẹko rọyen. 23 Gameliẹl ọmọ ri Pẹdazọ yen suẹn ẹko rẹ uvwiẹ rẹ emọ ri Manasẹ. 24 Abidan ọmọ ri Gidiọnai yen suẹn ẹko rẹ uvwiẹ rẹ emọ ri Bẹnjamin.

25 Ẹko rẹ uvwiẹ erha rẹ emọ ri Dan de mu oyan phiyọ vwo nene ẹkuẹko rayen,* ayen yen kobuko rere ayen sa vwọ rhẹrẹ ẹko ri chekọ na eje, Ahaiza ọmọ rẹ Amashada yen suẹn ẹko rọyen. 26 Pegiẹl ọmọ rẹ Ọkran yen suẹn ẹko rẹ uvwiẹ rẹ emọ rẹ Asha. 27 Ahaira ọmọ rẹ Inan yen suẹn ẹko rẹ uvwiẹ rẹ emọ ri Naftalai. 28 Ọnana yen ọrhuẹrẹphiyotọ rẹ oyan rẹ ihwo rẹ Izrẹl vẹ ẹkuẹko rayen nene ọke rẹ ayen de mu oyan phiyọ.

29 Ọyena vwọ wan nu, Mosis da ta kẹ Hobab ọmọ ri Ruẹl* ohwo ri Midian, ọgọ ri Mosis: “Avwanre kpo asan rẹ Jihova ta kpahen nẹ, ‘Me cha vwọ kẹ ovwan.’ Gbe nene avwanre, avwanre che nene uwe yerin vwevwerhen, kidie Jihova ve ive rẹ erọnvwọn iyoyovwin vwọ kẹ Izrẹl.” 30 Ẹkẹvuọvo ọ da ta kẹ: “Me cha raa. Mi che rhivwin kpo orere robọ mẹ bru ihwo mẹ ra.” 31 Ọtiọyena Mosis da ta: “Biko wọ yanjẹ avwanre vwoo, kidie wọ riẹn asan ro fori nẹ avwanre wonphiyọ vwẹ aton na, wọ sa dia kerẹ ohwo ro dje idjerhe kẹ avwanre.* 32 Wo de nene avwanre, kebruphiyọ kebruphiyọ rẹ Jihova vwọ kẹ avwanre ji che te we obọ.”

33 Ọtiọyena ayen da tuẹn oyan phiyọ vwo nẹ ugbenu ri Jihova, oyan rẹ ẹdẹ erha, ekpeti rẹ ọphọ ri Jihova da kobaro kẹ ayen vwẹ oyan rẹ ẹdẹ erha na, rọ vwọ guọnọ asan rẹ ayen de se rovwoma. 34 Jẹ evwru ri Jihova hẹ enu rayen vwẹ aruphẹn ọke rẹ ayen vwo mu oyan phiyọ nẹ asan rẹ ayen wonphiyọ na.

35 Kọke kọke re de mu Ekpeti na, Mosis me ta: “Vrẹn, E Jihova, e jẹ ivwighrẹn wẹn hrabọ, e jẹ ihwo ri vwo utuoma kpahen owẹ djẹ nẹ obaro wẹn.” 36 Ọke re de muo phiyotọ, ọ me ta: “Rhivwin rhe, E Jihova, vwo bru uriorin buebun* rẹ ihwo rẹ Izrẹl re che se kerii na rhe.”