Ukeri

2 Asaọkiephana Jihova da ta kẹ Mosis vẹ Erọn: 2 “Ihwo rẹ Izrẹl mi wonphiyọ* asan ra vwọ kẹ ẹko rẹ uvwiẹ erha ra ghare ayen phiyọ, ohwo ọvuọvo mi won kẹrẹ ibana* rẹ uwevwin rẹ ọsẹ rọyen. Ayen mi wonphiyọ asan ro hirharoku utughẹ ra da vwoma na riariẹ phiyọ.

3 “Ihwo ri che wonphiyọ ẹbẹre ọnre va nẹcha na, cha dia ẹko rẹ uvwiẹ erha rẹ Juda suẹn ra ghare vwo nene ẹko rayen;* osun rẹ emọ ri Juda yen Nashọn ọmọ rẹ Aminadab. 4 Ihwo re si edẹ rayen phiyotọ vwẹ otuofovwin rọyen da dia 74,600. 5 Ihwo ri che won kẹrẹ cha dia uvwiẹ rẹ Isaka; osun rẹ emọ rẹ Isaka yen Nẹtanẹl ọmọ ri Zua. 6 Ihwo re si edẹ rayen phiyotọ vwẹ otuofovwin rọyen da dia 54,400. 7 Ọ rọ vwọ kpahọn yen uvwiẹ ri Zẹbulọn; osun rẹ emọ ri Zẹbulọn yen Elayab ọmọ ri Hilọn. 8 Ihwo re si edẹ rayen phiyotọ vwẹ otuofovwin rọyen da dia 57,400.

9 “Ihwo eje re si edẹ rayen phiyotọ vwẹ otuofovwin rẹ Juda suẹn na da dia 186,400. Ayen me dia ihwo rẹsosuọ re cha ghan utughẹ rayen nu.

10 “Ẹko rẹ uvwiẹ erha rẹ Rubẹn suẹn vwo nene ẹko rayen* cha dia ẹbẹre rẹ obọrhen ọnre na; osun rẹ emọ ri Rubẹn yen Ẹlaizọ ọmọ ri Shẹdaọ. 11 Ihwo re si edẹ rayen phiyotọ vwẹ otuofovwin rọyen da dia 46,500. 12 Ihwo ri che won kẹrẹ cha dia uvwiẹ ri Simiọn; osun rẹ emọ ri Simiọn yen Shilumiẹl ọmọ ri Zurishadai. 13 Ihwo re si edẹ rayen phiyotọ vwẹ otuofovwin rọyen da dia 59,300. 14 Ọ rọ vwọ kpahọn yen uvwiẹ ri Gad; osun rẹ emọ ri Gad yen Elayasaf ọmọ ri Ruẹl. 15 Ihwo re si edẹ rayen phiyotọ vwẹ otuofovwin rọyen da dia 45,650.

16 “Ihwo eje re si edẹ rayen phiyotọ vwẹ otuofovwin rẹ Rubẹn suẹn na da dia 151,450, ayen yen ẹko rivẹ re cha ghan utughẹ rayen nu.

17 “Ọke re de muẹ utughẹ ra da vwoma na, ẹko rẹ ihwo ri Livae na me dia uherevie rẹ ẹko ri chekọ na.

“Ayen me yan vwẹ idjerhe vuọvo rẹ ayen rhuẹrẹ oma phiyọ ọke rẹ ayen de wonphiyọ asan, dohwo dasan rọyen me dia vwo nene ẹko rẹ uvwiẹ erherha rayen.

18 “Ẹko rẹ uvwiẹ erha rẹ Ifrem suẹn ra ghare vwo nene ẹko rayen* cha dia ẹbẹre ọnre shera; osun rẹ emọ rẹ Ifrem yen Ẹlishama ọmọ rẹ Amaihọd. 19 Ihwo re si edẹ rayen phiyotọ vwẹ otuofovwin rọyen da dia 40,500. 20 Ọ rọ vwọ kpahọn cha dia uvwiẹ ri Manasẹ; osun rẹ emọ ri Manasẹ yen Gameliẹl ọmọ ri Pẹdazọ. 21 Ihwo re si edẹ rayen phiyotọ vwẹ otuofovwin rọyen da dia 32,200. 22 Ọ rọ vwọ kpahọn yen uvwiẹ ri Bẹnjamin; osun rẹ emọ ri Bẹnjamin yen Abidan ọmọ ri Gidiọnai. 23 Ihwo re si edẹ rayen phiyotọ vwẹ otuofovwin rọyen da dia 35,400.

24 “Ihwo eje re si edẹ rayen phiyotọ vwẹ otuofovwin rẹ Ifrem suẹn na da dia 108,100, ayen yen ẹko rerha re cha ghan utughẹ rayen nu.

25 “Ẹko rẹ uvwiẹ erha rẹ Dan suẹn ra ghare vwo nene ẹko rayen* cha dia ẹbẹre rẹ obohwẹre ọnre na; osun rẹ emọ ri Dan yen Ahaiza ọmọ rẹ Amashada. 26 Ihwo re si edẹ rayen phiyotọ vwẹ otuofovwin rọyen da dia 62,700. 27 Ihwo ri che won kẹrẹ cha dia uvwiẹ rẹ Asha; osun rẹ emọ rẹ Asha yen Pegiẹl ọmọ rẹ Ọkran. 28 Ihwo re si edẹ rayen phiyotọ vwẹ otuofovwin rọyen da dia 41,500. 29 Ọ rọ vwọ kpahọn yen uvwiẹ ri Naftalai; osun rẹ emọ ri Naftalai yen Ahaira ọmọ rẹ Inan. 30 Ihwo re si edẹ rayen phiyotọ vwẹ otuofovwin rọyen da dia 53,400.

31 “Ihwo eje re si edẹ rayen phiyotọ rẹ Dan suẹn na da dia 157,600. Ayen yen ihwo re cha ghan itughẹ rayen nu vwo nene ẹko rẹ uvwiẹ erherha rayen.”

32 Enana yen ihwo rẹ Izrẹl re si edẹ rayen phiyotọ vwo nene iwevwin rẹ esẹ rayen; ukeri rẹ ihwo eje rehẹ asan rẹ ayen wonphiyọ re si edẹ rayen phiyotọ vwọ kẹ otuofovwin na da dia 603,550. 33 Ẹkẹvuọvo e si edẹ rẹ ihwo ri Livae na phiyotọ kirobo re si edẹ rẹ ihwo rẹ Izrẹl ri chekọ na phiyotọọ, kirobo rẹ Jihova ji iji rọyen kẹ Mosis. 34 Ihwo rẹ Izrẹl de ru erọnvwọn eje rẹ Jihova ji iji rọyen kẹ Mosis. Ọnana yen oborẹ ayen rhuẹrẹ oma phiyọ vwẹ asan rẹ ayen wonphiyọ na vwo nene ẹko rẹ uvwiẹ erherha rayen kugbe oborẹ ayen ghan utughẹ rayen nu wan, dohwo dorua rọyen vwo nene iwevwin rẹ esẹ rayen.