Ukeri

15 Jihova da rhoma ta ota kẹ Mosis, ọ da ta: 2 “Ta ota kẹ ihwo rẹ Izrẹl rere wọ vuẹ ayen nẹ, ‘Ọke rẹ ovwan da ro otọ re me vwọ kẹ ovwan nẹ ovwan dia na 3 ovwan de ze izobo ra vwẹ erhanre torhẹ kẹ Jihova vwo nẹ ohri rẹ erhuẹn, igodẹ yẹrẹ ẹvwe na, owenẹ ọ dia izobo rẹ ẹtorhẹ yẹrẹ izobo re ze fikirẹ ive rẹ oghẹresan yẹrẹ okẹ ro nẹ otọ rẹ ẹwẹn rhe yẹrẹ izobo re ze vwẹ ọke rẹ erẹ rẹ ovwan rẹ ọke sansan, rere o vwo gbọn ọnrhe ọvwevwerhen vwọ kẹ Jihova— 4 ohwo rọ vwẹ izobo rọyen kpahotọ na me je vwẹ izobo rẹ eka rẹ omamọ rẹ iflawa vwọ kpahotọ kẹ Jihova, ẹkẹn ọvo rẹ ẹkẹn ihwe rẹ ifah* re ku kugbe vẹ ẹkẹn ọvo rẹ ẹkẹn ẹne ri hin* rẹ evwri. 5 Ovwan me je vwẹ iwaini vwọ kpahotọ kerẹ izobo rẹ udi, ẹkẹn ọvo rẹ ẹkẹn ẹne ri hin, vwọ ba izobo rẹ ẹtorhẹ yẹrẹ vwọ kẹ izobo rẹ omogodẹ ọshare ọvuọvo. 6 Yẹrẹ vwọ kẹ egbon, ovwan mi ru izobo rẹ eka rẹ ẹkẹn ivẹ rẹ ẹkẹn ihwe rẹ ovwanvwọ rẹ ifah rẹ omamọ rẹ iflawa re ku kugbe vẹ ẹkẹn ọvo rẹ ẹkẹn erha ri hin rẹ evwri. 7 Ovwan me vwẹ iwaini vwọ kpahotọ kerẹ izobo rẹ udi, ẹkẹn ọvo rẹ ẹkẹn erha ri hin, kerẹ ọnrhe ọvwevwerhen kẹ Jihova.

8 “‘Ẹkẹvuọvo ọ da dianẹ ovwan cha vwẹ erhuẹn ọshare vwọ kpahotọ kerẹ izobo rẹ ẹtorhẹ yẹrẹ izobo re ze fikirẹ ive rẹ oghẹresan yẹrẹ izobo rẹ ọrekugbe vwọ kẹ Jihova, 9 ovwan me je vwẹ erhuẹn ọshare vẹ izobo rẹ eka rẹ ẹkẹn erha rẹ ẹkẹn ihwe rẹ ovwanvwọ rẹ ifah rẹ omamọ rẹ iflawa re ku kugbe vẹ ubro ri hin rẹ evwri vwọ kpahotọ. 10 Ovwan me je vwẹ iwaini vwọ kpahotọ kerẹ izobo rẹ udi, ubro ri hin, kerẹ izobo ra vwẹ erhanre torhẹ ro gbon ọnrhe ọvwevwerhen kẹ Jihova. 11 Ọnana yen obo re che ru vwọ kẹ erhuẹn ọvuọvo yẹrẹ vwọ kẹ egbon ọvuọvo yẹrẹ vwọ kẹ omogodẹ ọshare ọvuọvo yẹrẹ ẹvwe na. 12 O toro uche rẹ ovwan vwọ kpahotọọ, ọyen oborẹ ovwan che ru kẹ ayen ọvuọvo vwo nene uche rayen. 13 Enẹ yen kọmotọ kọmotọ rẹ Izrẹl cha vwẹ izobo ra vwẹ erhanre torhẹ vwọ kpahotọ kerẹ ọnrhe ọvwevwerhen kẹ Jihova.

14 “‘Ọrhorha ro nene ovwan dia yẹrẹ ohwo rọhẹ ohri rẹ ovwan vwẹ ọke grongron re da vwẹ izobo ra vwẹ erhanre torhẹ vwọ kpahotọ kerẹ ọnrhe ọvwevwerhen kẹ Jihova, o mi ruo kirobo rẹ ovwan ruo. 15 Ovwan rehẹ ọghwẹgbe na kugbe ọrhorha ro nene ovwan dia che vwo urhi ọvo. Ọ cha dia urhi ri bẹdẹ vwọ kẹ uvwiẹ rẹ ovwan eje. Ovwan vẹ ọrhorha na me dia abavo vwẹ obaro ri Jihova. 16 Urhi ọvuọvo kugbe orhiẹn-ebro ọvuọvo yen cha dia vwọ kẹ ovwan kugbe erhorha ri nene ovwan dia.’”

17 Jihova da ta kẹ Mosis: 18 “Ta ota kẹ ihwo rẹ Izrẹl rere wọ vuẹ ayen nẹ, ‘Ọke rẹ ovwan da ro otọ re me reyọ ovwan ra na 19 ovwan da re ọvo vwẹ usun rẹ ibrẹdi* rẹ otọ na, ovwan mi ru utoro kẹ Jihova. 20 Ovwan me vwẹ emamọ rẹsosuọ rẹ eka ra nọ wiẹẹn rẹ ovwan che toro na vwọ kpahotọ kerẹ ibrẹdi re ru họhọ ubiosa. Ovwan me vwọ kpahotọ kirobo rẹ ovwan ruẹ utoro rẹ asan re de wonro ibi ekankọn na. 21 Ovwan me vwẹ evo vwẹ usun rẹ emamọ rẹsosuọ rẹ eka rẹ ovwan ra nọ wiẹẹn vwo ru itetoro kẹ Jihova vwẹ uvwiẹ rẹ ovwan eje.

22 “‘Asaọkiephana ọ da dianẹ obọ chọ ovwan, ovwan rha yọnrọn iji nana eje rẹ Jihova ji kẹ Mosis naa, 23 erọnvwọn eje rẹ Jihova ji iji rọyen kẹ ovwan womarẹ Mosis vwo nẹ ẹdẹ rẹ Jihova vwẹ iji na phia kẹ ovwan rhirin ra ro uvwiẹ rẹ ovwan re cha, 24 ọ da je dianẹ obọ chọ ovwan jẹ ọghwẹgbe na riẹn kpahọọn, ọghwẹgbe na ejobi me vwẹ erhuẹn otete ọvo kpahotọ kerẹ izobo rẹ ẹtorhẹ ro gbon ọnrhe ọvwevwerhen kẹ Jihova, ọtiọyen ji te izobo rẹ eka vẹ izobo rẹ udi kirobo rẹ ovwan ruo jovwo, kugbe ẹmẹvwe ọvo kerẹ izobo rẹ umwemwu. 25 Orherẹn na che ru arhuẹrẹ vwọ kẹ ọghwẹgbe rẹ ihwo rẹ Izrẹl na eje, ke che vwo ghovwo ayen kidie obọ chọ ayen, ayen je vwẹ okẹ rayen rhe, izobo ra vwẹ erhanre torhẹ kẹ Jihova kugbe izobo rẹ umwemwu vwẹ obaro ri Jihova fikirẹ echobọ rayen. 26 E che vwo ghovwo ọghwẹgbe rẹ ihwo rẹ Izrẹl na eje kugbe erhorha re dia ohri rayen, kidie echobọ yen ọ hepha vwẹ ẹbẹre rẹ ihwo na eje.

27 “‘Obọ da chọ ohwo* vwo ru umwemwu, ọ me vwẹ ẹvwe aye rọhẹ ukpe rẹsosuọ rọyen vwọ kpahotọ kerẹ izobo rẹ umwemwu. 28 Orherẹn na mi ru arhuẹrẹ vwọ kẹ ohwo* rẹ obọ chọre vwo ru umwemwu vwọrẹ jẹriẹn vwẹ obaro ri Jihova na, ke che vwo ghovwo. 29 Vwọ kẹ ọmotọ rọhẹ ohri rẹ ihwo rẹ Izrẹl kugbe ọrhorha rọ dia ohri rẹ ovwan, urhi ọvuọvo yen cha dia vwọ kẹ ovwan vwẹ ota ro shekpahen orọnvwọn re ruru vwọrẹ jẹriẹn.

30 “‘Ẹkẹvuọvo ohwo* rọ vwẹ arogba vwo ru orọnvwọn, owenẹ ọ dia ọmotọ yẹrẹ ọrhorha, ọ hanrha Jihova, ke bro* nẹ ohri rẹ ihwo rọyen. 31 Kidie nẹ ọ jẹ ota ri Jihova fia je churhi rọyen, o vwo obo rọ wanree, ke bru ohwo* yena kufia. Oruchọ rọyen kọ dia enu rẹ uyovwin rọyen.’”

32 Ọke rẹ ihwo rẹ Izrẹl je vwọ hẹ aton na, ayen da mrẹ ọshare ọvo rọ tọrọ ẹbẹre rẹ irhe vwẹ Ẹdẹ Urovwoma na. 33 Ihwo re mrẹrẹ rọ vwọ tọrọ irhe na da reyọ vwo rhe Mosis vẹ Erọn kugbe ọghwẹgbe na eje. 34 A da kanrọ phiyọ asan kidie a je rhe ta obo re che ruoo.

35 Jihova da ta kẹ Mosis: “O vwo obo rọ wanree, e jẹ a teyen ọshare na hwe, ọghwẹgbe na eje me vwẹ ikuta vwo phio vwẹ otafe rẹ asan rẹ ayen wonphiyọ* na.” 36 Ọtiọyena ọghwẹgbe na eje da reyọ rhe otafe rẹ asan rẹ ayen wonphiyọ na, ayen de phio te ẹdia ro vwo ghwu, kirobo rẹ Jihova ji iji rọyen kẹ Mosis.

37 Jihova da ta ọnana kẹ Mosis: 38 “Ta ota kẹ ihwo rẹ Izrẹl rere wọ vuẹ ayen nẹ ayen ru ejọjọ phiyọ obotọ rẹ iwun rayen vwẹ uvwiẹ rayen eje, ayen mi ru ufi rẹ iblu phiyọ obenu rẹ esiri rẹ ejọjọ rẹ ewun na. 39 ‘Ovwan mi ru ejọjọ nana rere ọke rẹ ovwan da mrẹ, kẹ ovwan karophiyọ iji ri Jihova eje, ovwan mi ru ayen. Ovwan nene ubiudu vẹ ẹro rẹ ovwan re nẹrhẹ ovwan gbe ọfanrhiẹn* naa. 40 Ọnana cha cha ovwan uko vwọ karophiyọ, kẹ ovwan je cha yọnrọn iji mẹ eje je dia fuanfon kẹ Ọghẹnẹ rẹ ovwan. 41 Mẹvwẹ Jihova Ọghẹnẹ rẹ ovwan, rọ reyọ ovwan nẹ otọ rẹ Ijipt rhe rere mi vwo dje kẹ ovwan nẹ mẹvwẹ Ọghẹnẹ rẹ ovwan. Mẹvwẹ Jihova Ọghẹnẹ rẹ ovwan.’”