Ukeri
21 Ọke rẹ ovie rẹ Erad ohwo ri Kenan rọ dia Nẹgẹb vwo nyo nẹ ihwo rẹ Izrẹl wan idjerhe rẹ Atarim cha, ọ da ra họnre vwọso Izrẹl, o de mu evo usun rayen yanran kerẹ eviẹn. 2 Ọtiọyena Izrẹl de ve ive nana kẹ Jihova: “Wo de phi ihwo nana phiyọ obọ mẹ, o vwo obo rọ wanree, me cha ghwọrọ irere rayen.” 3 Jihova da kerhọ rẹ urhuru rẹ Izrẹl, o de phi ihwo ri Kenan na phiyọ obọ rayen, ayen da ghwọrọ ayen vẹ irere rayen. Ọtiọyena ayen de se asan na Họma.*
4 Ayen vwo mu oyan phiyọ vwo nẹ Ugbenu ri Họ nene idjerhe rẹ Abadi Ọvwavware na rere ayen ghrẹnghrẹn otọ rẹ Idọm wan, oma de rhi bru ihwo na* ku fikirẹ oyan na. 5 Ihwo na ke je ta ota vwọsua Ọghẹnẹ vẹ Mosis rẹ ayen vwọ ta: “Diesorọ wọ vwọ reyọ avwanre nẹ otọ rẹ Ijipt rhe rhi ghwu vwevunrẹ aton na? Emuọre vuọvo herọọ, ame vuọvo je herọọ, avwanre* rhi vwo utuoma kpahen orharhe rẹ ibrẹdi nana re.” 6 Ọtiọyena Jihova de ji eredekọ ri vwo obi ro ohri rẹ ihwo na, kẹ ayen rhovwan ihwo na, ihwo rẹ Izrẹl buebun de ghwu.
7 Ihwo na de bru Mosis rhe, ayen da ta: “Avwanre ru umwemwu rẹ avwanre vwọ ta ota vwọso Jihova vẹ owẹ. Rẹ Jihova rere o si eredekọ na nẹ ohri rẹ avwanre.” Mosis da rẹ fikirẹ ihwo na. 8 Ọtiọyena Jihova da ta kẹ Mosis: “Ru oma rẹ ọrọdekọ ro vwo obi rere wọ vwọ ya ọkpọ. Kohwo kohwo rẹ eredekọ na rhovwonro ko no rere ọ sa vwọ rhọ.” 9 Ugege yena, Mosis de ru ọrọdekọ rẹ ẹrovwo, ọ da vwọ ya ọkpọ na, siẹrẹ ọrọdekọ da rhovwọn ohwo, o de ni ọrọdekọ rẹ ẹrovwo na, ọ me rhọ.
10 Ọyena vwọ wan nu, ihwo rẹ Izrẹl de vrẹn, ayen de wonphiyọ* Obọt. 11 Ayen de vrẹn nẹ Obọt, kẹ ayen wonphiyọ Aiye-abarim, vwẹ aton ro hirharoku Moab vwẹ ẹbẹre ọnre va nẹcha. 12 Ayen vwo vrẹn nẹ etiyin, ayen de wonphiyọ Iyara* ri Zirẹd. 13 Ayen vwo vrẹn nẹ etiyin, ayen de wonphiyọ ekogho rẹ Anọn rọhẹ aton ro nẹ ughwru rẹ ihwo rẹ Amọ rhe, kidie Anọn yen ughwru ri Moab, ọ hẹ uvwre ri Moab vẹ ihwo rẹ Amọ. 14 Ọyensorọ ọbe rẹ Ifovwin ri Jihova vwọ ta ota kpahen “Vehẹb rọhẹ Sufa kugbe iyara* rẹ Anọn, 15 kugbe ọghwrọrọ* rẹ iyara* na re ghwrọrọ kpotọ ra ro orere rẹ Ar re je herabọ re te ughwru ri Moab.”
16 Ayen vwo nẹ etiyin, ayen de kpo Biẹ. Ọnana yen asan orhare rẹ Jihova da ta ota nana kẹ Mosis: “Koko ihwo na rere me vwẹ ame kẹ ayen.”
17 Vwẹ ọke yena, Izrẹl da so une nana:
“Vwẹ ame phia, E orhare!—Kpahen* kẹ!
18 Orhare rẹ emọ rẹ ivie tọnre, rẹ ihwo ri titiri tọnre,
Vẹ ọkpọ rẹ osun kugbe ekpọ romobọ rayen.”
Ayen de vrẹn nẹ aton na kpo Matena, 19 vwo nẹ Matena kpo Nahaliẹl, vwo nẹ Nahaliẹl kpo Bemọt. 20 Ayen de nẹ Bemọt vwo kpo iyara rọhẹ ekogho* ri Moab, vwẹ obenu ri Pisga, asan ra da kparo mrẹ Jẹshaimọn.*
21 Izrẹl de ji ikọn bru Saihọn, ovie rẹ ihwo rẹ Amọ ra, ọ da ta: 22 “Jẹ avwanre wan otọ wẹn vrẹ. Avwanre che kuomarhẹriẹ ro udju yẹrẹ ogba rẹ ivainii. Avwanre cha da ame rẹ orhare vuọvoo. Avwanre cha wan Idjerhe rẹ Ovie na bẹsiẹ rẹ avwanre vwọ wan ekogho wẹn vrẹ.” 23 Ẹkẹvuọvo Saihọn rhọnvwere nẹ Izrẹl wan ekogho rọyeen. Ukperẹ ọtiọyen, Saihọn de koko ihwo rọyen eje, ayen da yanran ra họnre vwọso Izrẹl vwẹ aton na, ayen da rhe Jehaz, ayen vẹ Izrẹl da tuẹn ohọnre phiyọ. 24 Ẹkẹvuọvo Izrẹl da vwẹ ọlọkọ vwo phio kparobọ, je reyọ otọ rọyen vwọ riuku vwo nẹ Anọn re te Jabọk, rọ kẹrẹ ihwo rẹ Amọn, kidie Jeza yen ughwru rẹ ekogho rẹ ihwo rẹ Amọn.
25 Ọtiọyena Izrẹl da reyọ irere nana eje, kẹ ayen dia irere rẹ ihwo rẹ Amọ eje ọtiọyen ji te Hẹshbọn vẹ irho na eje rehẹ otọ rọyen.* 26 Hẹshbọn ọyen orere ri Saihọn rọ dia ovie rẹ ihwo rẹ Amọ ro nene ovie ri Moab họnre je reyọ etọ rọyen eje mie rhirin re te Anọn. 27 Ọnana yen sorọ e vwo bru isẹ rẹ ehwẹjẹ nana:
“Yanrhe Hẹshbọn.
E jẹ a bọn orere ri Saihọn rere e muo vi kokoroko.
28 Kidie erhanre nẹ Hẹshbọn rhe, erhanre nẹ orere ri Saihọn rhe.
Ọ torhẹ Ar ri Moab, irivwori rẹ asan ri kpenu rẹ Anọn.
29 Okpetu rode kẹ wẹ Moab! A cha ghwọrọ owẹ, E ihwo ri Kimọsh!
O ru emeshare rọyen phiyọ ihwo ri muẹ djẹ, emetẹ rọyen phiyọ eviẹn ri Saihọn, ovie rẹ ihwo rẹ Amọ.
30 E jẹ avwanre sa ayen;
A cha ghwọrọ Hẹshbọn rhirin re te Daibọn;
E jẹ avwanre ghwọrọ rhirin re te Nofa;
Erhanre cha hrabọ rhirin re te Mẹdeba.”
31 Ọtiọyena Izrẹl kọ dia otọ rẹ ihwo rẹ Amọ. 32 Ọyena vwọ wan nu, Mosis de ji eshare evo ra bẹbẹ ni Jeza. Ayen da reyọ irho rehẹ otọ rọyen* je djẹ ihwo rẹ Amọ rehẹ etiyin no. 33 Ọyena vwọ wan nu, ayen de kuomarhẹriẹ, ayen da ra wan idjerhe ri Beshan. Ọg ovie ri Beshan vẹ ihwo rọyen eje da kpare ofovwin bru ayen rhe vwẹ Ẹdriai. 34 Jihova da ta kẹ Mosis: “Wo jẹ oshọ rọyen mu wee, kidie mi che phio vẹ ihwo rọyen eje kugbe otọ rọyen phiyọ obọ wẹn, ku wo che ruo kirobo wo ru Saihọn ovie rẹ ihwo rẹ Amọ, rọ dia Hẹshbọn.” 35 Ọtiọyena kẹ ayen teyọn hwe, ọ vẹ emọ rọyen kugbe ihwo rọyen eje re te ọke rẹ ọvuọvo vwẹ usun rẹ ihwo rọyen rhe sivwin rhọọ, ayen da vwẹ otọ rọyen vwọ riuku.