Diutaronomi
21 “Ọ da dianẹ a mrẹ ohwo ro ghwuru vwẹ aghwa rẹ otọ na rẹ Jihova Ọghẹnẹ rẹ ovwan vwọ kẹ ovwan nẹ ovwan re ughwẹ rọyen na, jẹ a riẹn ohwo ro hweree, 2 ekpako rẹ ovwan vẹ iguẹdjọ na me yanran ra vwanvwe oborẹ orivwin na sherabọ te kẹ irere re riarierẹ phiyọ. 3 Ekpako rẹ orere rọ ma kẹrẹ orivwin na me reyọ erhuẹn otete ra je rhe reyọ vwo ruiruo vuọvoo ro ji rhi mu urhekpe vuọvoo vwo nẹ ichuru na, 4 ekpako rẹ orere na me reyọ erhuẹn otete na kpo iyara* rọ djẹ ọkẹre rẹ ame re ji rhi voro yẹrẹ kọn ubi phiyọ dẹvoo, ayen mi vwirhin ohọre rẹ erhuẹn otete na vwẹ etiyin vwẹ iyara na.
5 “Irherẹn na, ihwo ri Livae na, ke cha yanrhe kidie Jihova Ọghẹnẹ rẹ ovwan sane ayen rẹ ayen vwo gbodibo kẹ ọyen, rẹ ayen vwo ghwoghwo ebruphiyọ vwẹ odẹ ri Jihova. Ayen cha ta obo ra cha wan rhuẹrẹ kota kota ro shekpahen ozighi re gberi phiyọ. 6 Ekpako na eje rehẹ orere rọ ma kẹrẹ orivwin na me hworhẹ abọ rayen vwẹ enu rẹ erhuẹn otete re vwirhin ohọre rọyen vwẹ iyara na, 7 ayen me tanẹ, ‘Abọ rẹ avwanre ku ọbara nana kuotọọ, ẹro rẹ avwanre je mrẹ ọke re vwo kuo kuotọọ. 8 Wo kere ọnana ba ihwo wẹn Izrẹl obọọ, ihwo ru wọ tan hirhe na, E Jihova, wo jẹ abe rẹ ọbara rẹ ohwo rẹ obọ rọyen fonro dia ohri rẹ ihwo wẹn Izrẹẹl.’ Ọtiọyena e rhe che kere abe rẹ ọbara na ba ayen obọọ. 9 Idjerhe nana yen ovwan che vwo si abe rẹ ọbara rẹ ohwo rẹ abọ rọyen fonro nẹ ohri rẹ ovwan, womarẹ ovwan vwo ruẹ obo ri shephiyọ vwẹ ẹro ri Jihova.
10 “Ovwan de nene ivwighrẹn rẹ ovwan phi ofovwin, Jihova Ọghẹnẹ rẹ ovwan de phi ayen kparobọ vwọ kẹ ovwan, ovwan de mu ayen reyọ, 11 wọ da mrẹ aye ro vwo erhuvwu vwẹ usun rẹ ihwo rẹ ovwan muru na, o de je we, wọ da je guọnọ reyọ kerẹ aye, 12 wọ me reyọ ro uwevwin wẹn. Ọ me wanre ẹton rẹ uyovwin rọyen, biẹn ififabọ rọyen, 13 ji ku iwun rẹ ọviẹn rọyen nu, kọ cha dia uwevwin wẹn. Ọ me viẹ fikirẹ ọsẹ rọyen vẹ oni rọyen vwẹ ọsoso rẹ emeranvwe ọvo, ọyena da wan nu, ku wo se nene vwerhẹn; ku wọ dia ọshare rọyen, ekpuyovwin rọyen kọ dia aye wẹn. 14 Jẹ oma rọyen rha vwerhen owẹẹ, wo se siobọno yanran kpo kasan kasan rọ guọnọre. Ẹkẹvuọvo wọ cha sa shẹ reyọ igho yẹrẹ gboja kẹẹ, kidie wọ phọpherọ nure.
15 “Ọshare de vwo eya ivẹ, o de vwo ẹguọnọ rẹ ọvo vwọ vrẹ ọ ro chekọ na, ayen ivẹ na de vwiẹ emeshare vwọ kẹ jẹ ọ ro jẹ ẹguọnọ rọyen evwo na kọyen vwiẹ ọmọshare ọkpako, 16 vwẹ ẹdẹ rọ da cha ghare uku rọyen vwọ kẹ emọ rọyen emeshare na, a cha rhọnvwe nẹ ọ reyọ ọmọ rẹ aye ro vwo ẹguọnọ rọyen na vwo ru ọmọkpako ukperẹ ọmọ rẹ aye ro jẹ ẹguọnọ rọyen evwo rọ dia ọmọkpako naa. 17 E jẹ ọ rhọnvwe nẹ ọmọ rẹ aye ro jẹ ẹguọnọ rọyen evwo na yen ọmọkpako womarẹ ọ vwọ kẹ asakuivẹ* rẹ erọnvwọn eje ro vwori, kidie ọmọ yena yen ọtonphiyọ rẹ ẹgba rẹ uvwiẹ rọyen. Ọyen vwo uturhi rẹ ẹdia rẹ ọmọkpako na.
18 “Ọ da dianẹ ọshare vwo ọmọ ro ruẹ uyovwin gangan ro ji gbe vwọsua, rọ rhọnvwa nyẹme rẹ ọsẹ rọyen yẹrẹ oni rọyeen, ayen davwẹngba rẹ ayen vwọ kpọ vi jẹ ọ rhọnvwe kerhọ rayeen, 19 ọsẹ rọyen vẹ oni rọyen me yọnrọn, ayen me reyọ kpo otafe bru ekpako na ra vwẹ anurhoro rẹ orere rọyen 20 ayen me ta kẹ ekpako rẹ orere rọyen na nẹ, ‘Ọmọ rẹ avwanre nana ruẹ uyovwin gangan, o ji gbe vwọsua, ọ rhọnvwa kerhọ rẹ avwanree. Ọyen ọgbọre kugbe ọgbaudi.’ 21 Eshare na eje rẹ orere rọyen mi phio hwe. Ọtiọyena ovwan mi si obo re brare nẹ ohri rẹ ovwan, Izrẹl eje mi nyo, oshọ ko mu ayen.
22 “Ọ da dianẹ ohwo ru umwemwu ro fo ughwu, e de hwe je vwọ ya urhe, 23 e jẹ orivwin rọyen dia enu rẹ urhe na kọkirhiee. Ukperẹ ọtiọyen, ovwan mi sho vwẹ ẹdẹdẹ yena, kidie ohwo ra vwọ ya urhe, ọyen emu rẹ ekan vwọ kẹ Ọghẹnẹ, ovwan gbe otọ rẹ ovwan rẹ Jihova Ọghẹnẹ rẹ ovwan cha vwọ kẹ ovwan kerẹ uku na ẹguaa.