Diutaronomi
3 “Ọtiọyena, avwanre de kuomarhẹriẹ, avwanre da ra wan idjerhe ri Beshan. Ọg ovie ri Beshan vẹ ihwo rọyen eje da kpare ofovwin bru avwanre rhe vwẹ Ẹdriai. 2 Jihova da ta kẹ vwẹ nẹ, ‘Wo jẹ oshọ rọyen mu wee, kidie mi che phio vẹ ihwo rọyen eje kugbe otọ rọyen phiyọ obọ wẹn, ku wo che ruo kirobo wo ru Saihọn ovie rẹ ihwo rẹ Amọ, rọ dia Hẹshbọn.’ 3 Ọtiọyena Jihova Ọghẹnẹ rẹ avwanre de ji phi Ovie Ọg ri Beshan vẹ ihwo rọyen eje phiyọ obọ rẹ avwanre, kẹ avwanre teyọn hwe, avwanre de ru ọtiọyen re te ọke rẹ ọvuọvo vwẹ usun rayen rhe sivwin rhọọ. 4 Avwanre de phi irere rọyen eje kparobọ. O vwo orere vuọvo rẹ avwanre jẹ reyọ vwo mie ayeen—irere 60, ekogho rẹ Agọb eje, uvie rẹ Ọg vwẹ Beshan. 5 Irere nana eje vwo igbẹhẹ ri kpenu, ẹchẹ, kugbe ekpọ,* ọtiọyen ji te emeko buebun. 6 Ẹkẹvuọvo, avwanre ghwọrọ ayen kirobo rẹ avwanre ru Ovie Saihọn ri Hẹshbọn, rẹ avwanre vwọ ghwọrọ irere na eje, ọtiọyen ji te eshare, eya, vẹ emọ. 7 Avwanre da reyọ ichuru na eje vẹ erọnvwọn rẹ avwanre gborho nẹ irere na kẹ oma rẹ avwanre.
8 “Vwẹ ọke yena, avwanre da reyọ otọ rẹ ivie rẹ Amọ ivẹ na rehẹ ekogho ri Jọdan, vwo nẹ Iyara rẹ Anọn* rhirin re te Ugbenu ri Hẹmọn 9 (ugbenu rẹ ihwo ri Saidọn se Siriọn, rẹ ihwo rẹ Amọ se Siniẹ), 10 irere na eje rehẹ otọ ro kpenu rọ pha riẹriẹriẹ na, Giliẹd eje, kugbe Beshan eje rhirin re te Salẹka vẹ Ẹdriai, irere rẹ uvie rẹ Ọg vwẹ Beshan. 11 Kidie Ovie Ọg ri Beshan yen ọ ro chekọ vwẹ usun rẹ ihwo ri Rẹfeim na. Utehru* yen e vwo ru ehwa re vwo mu orivwin* rọyen, ọ jehẹ Raba rẹ ihwo rẹ Amọn. Ugrongron rọyen kubit* irhirin, ohẹhẹre rọyen ke rha kubit ẹne vwo nene uwan rẹ ovwanvwọ ri kubit. 12 Vwẹ ọke yena, avwanre da reyọ otọ nana vwo nẹ Aroa rọ kẹrẹ Iyara rẹ Anọn,* kugbe ubro rẹ ekogho rẹ igbenu ri Giliẹd, me vwẹ irere rọyen vwọ kẹ uvwiẹ ri Rubẹn vẹ uvwiẹ ri Gad nure. 13 Vẹ ẹbẹre ro chekọ ri Giliẹd kugbe Beshan ejobi rẹ uvie rẹ Ọg, me vwẹ ayen kẹ ubro rẹ uvwiẹ ri Manasẹ. A riẹn ekogho rẹ Agọb eje rọhẹ Beshan phiyọ otọ ri Rẹfeim jovwo.
14 “Jeẹ rọ dia ọmọ ri Manasẹ da reyọ ekogho rẹ Agọb eje rhirin re te ughwru rẹ ihwo ri Gẹshọ kugbe ihwo ri Meakat, ọ da vwẹ odẹ rọyen vwo se eko ri Beshan yena Havọt-jeẹ* rhi duvwun nonẹna. 15 Me je vwẹ Giliẹd vwọ kẹ Mekiẹ re. 16 Me vwẹ Giliẹd re te Iyara rẹ Anọn* vwọ kẹ uvwiẹ ri Rubẹn kugbe uvwiẹ ri Gad vẹ uherevie rẹ iyara na kerẹ ughwru, rhirin re te Jabọk, iyara rọ dia ughwru rẹ ihwo rẹ Amọn, 17 vẹ Araba na kugbe Jọdan na vẹ ughwru na, vwo nẹ Kinẹrẹt re te Abadi rẹ Araba, Abadi rẹ Ughwanka* na rọhẹ obotọ rẹ ọghwrọrọ ri Pisga vwẹ ẹbẹre ọnre va nẹcha.
18 “Me da vwẹ iji nana kẹ ovwan: ‘Jihova Ọghẹnẹ rẹ ovwan vwẹ otọ nana vwọ kẹ ovwan nẹ ọ dia ughwẹ rẹ ovwan. Eshare rẹ ovwan eje ri vwo ẹgba cha reyọ ekuakua ofovwin, ayen me shariẹ vrẹ vwẹ obaro rẹ iniọvo rẹ ovwan, ihwo rẹ Izrẹl. 19 Eya rẹ ovwan ọvo, emọ rẹ ovwan, kugbe ichuru rẹ ovwan (me nabọ riẹn nẹ ovwan vwo ichuru buebun mamọ) yen cha rha dia irere re me vwọ kẹ ovwan na, 20 bẹsiẹ rẹ Jihova vwọ kẹ iniọvo rẹ ovwan omaerovwon kirobo ro ru kẹ ovwan, kugbe ọke rẹ ayen da re ughwẹ rẹ otọ rẹ Jihova Ọghẹnẹ rẹ ovwan vwọ kẹ ayen vwẹ obovrẹ ri Jọdan na. Kẹ ovwan che rhivwin kpo dohwo dughwẹ rọyen re me vwọ kẹ ovwan.’
21 “Etiyin me da vwẹ iji nana kẹ Joshua: ‘Wọ vwẹ ẹro robọ wẹn vwọ mrẹ oborẹ Jihova Ọghẹnẹ rẹ ovwan ru ivie ivẹ nana. Jihova che ru ọtiọyen vwọ kẹ uvie na eje rẹ ovwan cha shariẹ ra ro na. 22 Ovwan nama djoshọ rayeen, kidie Jihova Ọghẹnẹ rẹ ovwan yen họnra vwọ kẹ ovwan.’
23 “Ọke yena, me da rẹ Jihova nẹ, 24 ‘E Ọrovwori ro Me Kpenu Jihova, wo mu ọrho wẹn kugbe obọ ọgangan wẹn edjephia vwọ kẹ odibo wẹn re, ọghẹnẹ vọ vwẹ idjuvwu na yẹrẹ vwẹ otọrakpọ na yen se ru emu ride tiọyen kerẹ owẹ? 25 Biko juvwe wanvrẹ ra mrẹ otọ oyoyovwin na rọhẹ obovrẹ ri Jọdan na, ekogho rẹ igbenu oyoyovwin nana kugbe Lẹbanọn.’ 26 Ẹkẹvuọvo ophu ji muẹ Jihova kpahan ovwẹ fikirẹ ovwan, ọtiọyena ọ rha kerhọ mẹẹ. Ukperẹ ọtiọyen, Jihova da ta kẹ vwẹ, ‘Ọwẹn na te re! Wọ rha vwanriẹn ota nana kẹ vwẹ ọfaa. 27 Yerin kpenu ri Pisga rere wo ni kpo ẹbẹre ọnre shera vẹ obohwẹre ọnre na vẹ obọrhen ọnre na kugbe ẹbẹre ọnre va nẹcha, rere wọ vwẹ ẹro wẹn vwọ mrẹ otọ na, kidie wọ cha shariẹ Jọdan nana vrẹẹ. 28 Vwẹ Joshua vwo mu rere wo phiuduphiyọ awọ je bọn gan, kidie ọyen ohwo rọ cha shariẹ vrẹ vwẹ obaro rẹ ihwo nana, ọyen jehẹ ohwo rọ cha nẹrhẹ ayen riuku rẹ otọ ru wọ cha mrẹ na.’ 29 Enana eje phiare ọke rẹ avwanre vwọ dia iyara rọhẹ obaro ri Bẹt-piọ.