Diutaronomi
25 “Ọke rẹ ota de she vwẹ uvwre rẹ eshare, ayen me vwomaphia vwẹ obaro rẹ iguẹdjọ na, kẹ ayen che guẹdjọ rayen je vuẹ ọvwata na nẹ ọ riase, ayen me rha vuẹ orumwemwu na nẹ ọ riabe. 2 Ọ da dianẹ orumwemwu na fo ehwe, oguẹdjọ na che vwo sherhẹn totọ, ke che hwe vwẹ irharo rọyen. Uchabọ ra cha fa mi shephiyọ vẹ oborẹ umwemwu ro ruru na bra te. 3 Ọ sa fa te abọ 40, ẹkẹvuọvo ọ cha vrẹ ọtiọyeen. Ọ da fa vrẹ ọtiọyen, ka cha phọphọ oniọvo wẹn vwẹ irharo wẹn.
4 “Wọ gba unu rẹ erhuẹn ọke ro de wonro ekaa.
5 “Ọ da dianẹ iniọvo dia kuẹgbe, ọvo vwẹ usun rayen de ghwu jẹ o vwiẹ ọmọsharee, e jẹ aye rẹ ọ ro ghwuru na vrẹn nẹ orua na ra rọvwọn ohwo ọfaa. Oniọvo rẹ ọshare rọyen mi bro ra, ọ me reyọ kerẹ aye rọyen rere ọ vẹ ọyen rọvwọn orọnvwe rẹ ayeuku. 6 Odẹ rẹ oniọvo rọyen ro ghwuru na yen e che vwo se ọmọ rẹsosuọ rẹ aye na che vwiẹ, rere odẹ rọyen vwo jeghwro nẹ Izrẹl.
7 Asaọkiephana, ọ da dianẹ ọshare na rhọnvwe rọvwọn ayeuku rẹ oniọvo rọyen naa, ayeuku rẹ oniọvo rọyen na mi bru ekpako na ra vwẹ anurhoro rẹ orere na, ọ me tanẹ, ‘Oniọvo rẹ ọshare mẹ senre nẹ ọyen cha sẹro rẹ odẹ rẹ oniọvo rọyen vwẹ Izrẹẹl. Ọ rhọnvwe nene uvwe rọvwọn orọnvwe rẹ ayeukuu.’ 8 Ekpako rẹ orere rọyen mi se, ayen me ta ota kẹ. Ọ da je sen rọ vwọ tanẹ, ‘Me cha rọvwọọn,’ 9 ayeuku rẹ oniọvo rọyen na mi sikẹrẹ vwẹ obaro rẹ ekpako na, o mi ku isabatu rẹ ọshare na nẹ owọ rọyen, dje enya ku opharo rọyen, je tanẹ, ‘Ọnana yen obo re che ru ọshare rọ rhọnvwe sẹro rẹ urhiẹ rẹ orua rẹ oniọvo rọyeen. 10 Ọyena da wan nu, ka cha rhe riẹn odẹ rẹ orua rọyen* vwẹ Izrẹl kerẹ ‘Uwevwin rẹ ọ re ku isabatu nu owọ rọyen.’
11 “Ọ da dianẹ eshare ivẹ họnra, aye rẹ ọvo vwẹ usun rayen de phi obọ phiyọ ohọnre na rọ vwọ chochọn rẹ ọshare rọyen vwo nẹ abọ rẹ ọ rọ ghwiẹ na, ọ da rionbọ rọyen phia vwọ yọnrọn oshọ rọyen, 12 e jẹ e bru obọ rọyen no. E jẹ aro rọyen dọn ovwaan.*
13 “Ovwan vwo oka rẹ ikuta ivẹ ri vwo dohwo dọnyẹ rọyen vwẹ ekpu rẹ ovwaan, ọrode vẹ ọ rẹ otete. 14 Ovwan vwo oka rẹ ibaskẹti ivẹ ra vwọ vwanvwa emu vwẹ uwevwin rẹ ovwaan,* ọrode vẹ ọ rẹ otete. 15 Ovwan mi vwo ọnyẹ rọ gbare rọ je dia uyota kugbe ovwanvwọ rọ gbare rọ je dia uyota, rere ovwan sa vwọ dia ọke grongron vwẹ otọ rẹ Jihova Ọghẹnẹ rẹ ovwan cha vwọ kẹ ovwan na. 16 Kidie kohwo kohwo rọ dia ohwo rẹ uyotaa ro ruẹ erọnvwọn tiọyena tuẹn Jihova Ọghẹnẹ rẹ ovwan oma.
17 “Karophiyọ oborẹ Amalẹk ru we vwẹ idjerhe ọke wo vwo nẹ Ijipt cha, 18 obo rọ vwọ vwa wẹ vwẹ idjerhe je họnre ihwo eje re yan ememerha vwẹ obuko wẹn ọke rẹ oma vwọ ghwọrọ owẹ ji bru we ku. Ọ djoshọ rẹ Ọghẹnẹẹ. 19 Ọke rẹ Jihova Ọghẹnẹ wẹn da kẹ wẹ omaerovwo vwo nẹ abọ rẹ ivwighrẹn wẹn eje re riariẹ owẹ phiyọ vwẹ otọ rẹ Jihova Ọghẹnẹ wẹn cha vwọ kẹ wẹ vwọ riuku na, wo mi si odẹ rẹ Amalẹk nẹ otọ rẹ idjuvwu na karekare. Wo jẹ ọ chọrọ owẹ ẹroo.