Diutaronomi

26 “Ọke rẹ ovwan da ro otọ rẹ Jihova Ọghẹnẹ rẹ ovwan cha vwọ kẹ ovwan kerẹ uku na, ovwan da reyọ, ovwan da je dia evun rọyen re, 2 ovwan me reyọ evo vwẹ usun rẹ emamọ rẹsosuọ rẹ ekankọn rẹ otọ na eje rẹ ovwan che koko vwo nẹ otọ rẹ Jihova Ọghẹnẹ rẹ ovwan cha vwọ kẹ ovwan na, ovwan me ghwẹ ayen phiyọ obere vwo kpo asan rẹ Jihova Ọghẹnẹ rẹ ovwan sanere nẹ odẹ rọyen cha dia na. 3 Ovwan mi bru orherẹn rọ ga vwẹ ọke yena ra, ovwan me ta kẹ nẹ, ‘Me niyẹnrẹn kẹ Jihova Ọghẹnẹ rẹ ovwan nonẹna nẹ me ro otọ rẹ Jihova duvwun iyorin rọyen kẹ esẹ rẹ avwanre ride nẹ ọyen cha vwọ kẹ avwanre na re.’

4 “Orherẹn na mi mu obere na mie ovwan, o mi muo phiyọ obaro rẹ agbada ri Jihova Ọghẹnẹ rẹ ovwan. 5 Wọ me ta vwẹ obaro ri Jihova Ọghẹnẹ rẹ ovwan nẹ, ‘Ọsẹ mẹ ohwo rẹ Aremia rọ yan oyan rẹ osoghoro,* o de kpo Ijipt, ọ vẹ imihwo krẹn vwẹ evwruwevwin rọyen da dia oboyin kerẹ erhorha. Ẹkẹvuọvo ọ da rhe dia ẹgborho rode ro vwo ẹgba rọ je dia buebun vwẹ oboyin. 6 Ihwo rẹ Ijipt de gboja kẹ avwanre ji shenyẹ avwanre, ayen da vwẹ avwanre vwọ wiowian ọgangan kerẹ eviẹn. 7 Ọtiọyena avwanre de kperi se Jihova Ọghẹnẹ rẹ esẹ rẹ avwanre ride, Jihova de nyo urhuru rẹ avwanre, ọ da mrẹ ojaẹriọ rẹ avwanre vẹ okpetu rẹ avwanre kugbe oshenyẹ rẹ avwanre. 8 Ukuotọ rọyen, Jihova da reyọ avwanre nẹ Ijipt vẹ obọ ọgangan kugbe obọ rọ riẹn phia vẹ irueru ri muoshọ kugbe eka vẹ igbevwunu. 9 Ọ da reyọ avwanre rhe asan nana, ọ da kẹ avwanre otọ nana, otọ rọ djẹ ọkẹre rẹ ameivie vẹ ame ọnyọn. 10 Asaọkiephana mi mu emamọ rẹsosuọ rẹ ekankọn rẹ otọ rẹ Jihova vwọ kẹ vwẹ na rhire.’

“Wo mi muo phiyọ obaro ri Jihova Ọghẹnẹ rẹ ovwan, wọ me vwẹ uyovwin kpotọ vwẹ obaro ri Jihova Ọghẹnẹ rẹ ovwan. 11 Wọ me ghọghọ fikirẹ erọnvwọn iyoyovwin na eje rẹ Jihova Ọghẹnẹ rẹ ovwan vwọ kẹ wẹ vẹ evwruwevwin wẹn na, te owẹ te ihwo ri Livae kugbe erhorha re dia ohri rẹ ovwan na.

12 “Ọke rẹ ovwan de koko ẹkẹn ọvo rẹ ẹkẹn ihwe na eje rẹ ekankọn rẹ ovwan vwẹ ukpe rerha na nu, vwẹ ukpe rẹ ẹkẹn ọvo rẹ ẹkẹn ihwe na, ovwan me vwẹ ayen kẹ ihwo rẹ Livae na, erhorha na, emọ ri jẹ esẹ evwo,* kugbe eyauku na, kẹ ayen cha re evun vọn vwẹ irere* rẹ ovwan. 13 Ovwan me ta vwẹ obaro ri Jihova Ọghẹnẹ rẹ ovwan nẹ, ‘Mi si ẹkẹn ọfuanfon na nẹ uwevwin mẹ, me da vwọ kẹ ihwo ri Livae na, erhorha na, emọ ri jẹ esẹ evwo, kugbe eyauku, kirobo ru wo ji iji rọyen kẹ vwẹ. Mi gbe urhi wẹn ẹgua yẹrẹ gbobọnyẹẹ. 14 Me re ẹbẹre vuọvo rọyen ọke mi vwo vwere uvwerii yẹrẹ si ẹbẹre vuọvo rọyen no ọke mi vwo jẹfuọọn yẹrẹ ke me vwẹ ẹbẹre vuọvo rọyen vwo ruiruo fikirẹ ohwo ro ghwuruu. Mi nyo urhuru ri Jihova Ọghẹnẹ mẹ, mi de ru erọnvwọn eje ru wo ji iji rọyen kẹ vwẹ. 15 Asaọkiephana gbe ni otọ vwo nẹ asan ọfuanfon ru wọ dia na rhe, idjuvwu na, rere wo bruba kẹ ihwo wẹn Izrẹl kugbe otọ ru wọ vwọ kẹ avwanre na, kirobo ru wo duvwun iyorin rọyen kẹ esẹ rẹ avwanre ride, otọ rọ djẹ ọkẹre rẹ ameivie vẹ ame ọnyọn.’

16 “Nonẹna, Jihova Ọghẹnẹ rẹ ovwan ji iji kẹ ovwan nẹ ovwan ru nene irhi vẹ orhiẹn-ebro nana. Ovwan mi vwo oniso rayen ji ru nene ayen vẹ ubiudu rẹ ovwan eje kugbe erhi* rẹ ovwan eje. 17 Nonẹna, a vwẹ ota ri Jihova phia kẹ ovwan rọ vwọ tanẹ ọyen cha dia Ọghẹnẹ rẹ ovwan, rẹ ovwan vwọ yan vwẹ idjerhe rọyen ji ruẹ nene irhi rọyen, iji rọyen, kugbe orhiẹn-ebro rọyen, rẹ ovwan je vwọ kerhọ rẹ urhuru rọyen. 18 Nonẹna, Jihova ji nyo ota rẹ ovwan rẹ ovwan vwọ tanẹ ovwan cha dia ihwo rọyen, ekuakua rẹ oghẹresan* rọyen, kirobo ro ve kẹ ovwan, nẹ ovwan che ru nene iji rọyen eje, 19 nẹ o che phi ovwan phiyọ asan ro kpenu vwọ vrẹ ẹgborho ri chekọ na eje rọ mare, ọ cha kẹ ovwan ujiri vẹ otitivwe kugbe urinrin rẹ ovwan vwo dje oma rẹ ovwan phia kerẹ ihwo efuanfon vwọ kẹ Jihova Ọghẹnẹ rẹ ovwan, kirobo ro veri.”