Diutaronomi

4 Asaọkiephana, E Izrẹl, ovwan kerhọ rẹ irhi kugbe orhiẹn-ebro ri mi yono ovwan nẹ ovwan nene na, rere ovwan sa vwọ rhọ, ovwan je vwọ ro je reyọ otọ rẹ Jihova Ọghẹnẹ rẹ esẹ rẹ ovwan ride cha vwọ kẹ ovwan na. 2 Ovwan nama vwẹ eta vwọ ba iji re me vwọ kẹ ovwan naa, yẹrẹ ovwan siẹ noo, rere ovwan vwọ sẹro rẹ iji ri Jihova Ọghẹnẹ rẹ ovwan re me vwọ kẹ ovwan na.

3 “Ẹro robọ rẹ ovwan mrẹ oborẹ Jihova ruru fikirẹ Bel ri Piọ; Jihova Ọghẹnẹ rẹ ovwan ghwọrọ ihwo eje ri nene Bel ri Piọ vwo nẹ ohri rẹ ovwan. 4 Ẹkẹvuọvo ovwan re yọnrọn Jihova Ọghẹnẹ rẹ ovwan gan, jehẹ akpọ nonẹna. 5 Nighere, mi yono ovwan irhi kugbe orhiẹn-ebro re, kirobo rẹ Jihova Ọghẹnẹ mẹ ji iji rọyen kẹ vwẹ, rere ovwan se vwo ru nene ayen vwẹ otọ rẹ ovwan cha re ughwẹ rọyen na. 6 Ovwan me jomaotọ nene ayen, kidie ọnana che dje aghwanre vẹ ẹruọ phia vwẹ ẹbẹre rẹ ovwan vwẹ obaro rẹ ihwo ri che nyo kpahen iji nana eje, kẹ ayen cha tanẹ, ‘Aphro herọọ, ihwo rẹ ẹgborho rode nana vwo aghwanre vẹ ẹruọ.’ 7 Ẹgborho rode vọ yen vwo eghẹnẹ re kẹrẹ ayen kirobo rẹ Jihova Ọghẹnẹ rẹ avwanre kẹrẹ avwanre kọke kọke rẹ avwanre de se? 8 Ẹgborho rode vọ yen ji vwo irhi ọsoso kugbe orhiẹn-ebro kerẹ ọsoso rẹ Urhi nana re me vwọ kẹ ovwan nonẹna?

9 “Ovwan jomaotọ je nabọ nomaso* rere erọnvwọn nana rẹ ẹro rẹ ovwan mrẹre na vwo jẹ ovwan ẹro ẹchọrọ, rere i vwo jẹ ubiudu rẹ ovwan eno vwẹ ẹdẹ rẹ akpọ rẹ ovwan ejobi. Ovwan me vwẹ ayen vwo yono emọ rẹ ovwan kugbe ivwrọmọ rẹ ovwan. 10 Vwẹ ẹdẹ rẹ ovwan mudia obaro ri Jihova Ọghẹnẹ rẹ ovwan vwẹ Horẹb, Jihova da ta kẹ vwẹ, ‘Se ihwo na koko bru vwe rhe rere me vwọ nẹrhẹ ayen nyo eta mẹ, rere ayen se vwo yono obo ra djoshọ mẹ vwẹ ẹdẹ rẹ akpọ rayen eje vwẹ otọ na, rere ayen ji se yono emọ rayen.’

11 “Ọtiọyena ovwan de sikẹrẹ ugbenu na ji mudia obotọ rọyen, jẹ ugbenu na tuan kpenu vẹ erhanre vwo kpo idjuvwu na,* ebri, evwru, kugbe ebri hwi herọ. 12 Jihova kọ ta ota kẹ ovwan vwo nẹ evunrẹ erhanre na cha. Ovwan nyo ohwo rọ ta ota, ẹkẹvuọvo ovwan mrẹ orọnvwọn vuọvoo—urhuru na ọvo yen ovwan nyori. 13 O de ghwoghwo ọphọ rọyen kẹ ovwan rọ vuẹ ovwan nẹ ovwan nene—Irhi Ihwe na.* Ọyena vwọ wan nu, o de si ayen phiyọ ephapha rẹ ukuta ivẹ. 14 Ọke yena Jihova da vuẹ vwẹ nẹ mi yono ovwan iji kugbe orhiẹn-ebro rẹ ovwan che nene vwẹ otọ rẹ ovwan cha ro ra reyọ kerẹ ughwẹ na.

15 “Ọtiọyena ovwan gba nabọ nomaso* rọ vwọ dianẹ ovwan mrẹ ohwo vuọvo vwẹ ẹdẹ rẹ Jihova ta ota kẹ ovwan vwẹ Horẹb vwo nẹ uherevie rẹ erhanre na rhe naa 16 rere ovwan vwo jẹ obo re brare eruo womarẹ ovwan vwọ kare oma vwọ kẹ oma rẹ ovwan rọ họhọ korọnvwọn korọnvwọn, ọ rọ họhọ ọshare yẹrẹ aye, 17 ọ rọ họhọ eranvwe rọhẹ otọrakpọ na yẹrẹ ọ rọ họhọ ọphran rọ rhan vwẹ ophephe na, 18 ọ rọ họhọ orọnvwọn ro kpono vwẹ otọ na yẹrẹ ọ rọ họhọ iyerin rọhẹ evunrẹ ame vwẹ obotọ rẹ akpọ na. 19 Ọke rẹ ovwan da kpare ẹro rẹ ovwan vwo ni idjuvwu na, ọnre na, vẹ emeranvwe na, kugbe isio na—erọnvwọn eje rehẹ idjuvwu na—e jẹ ayen riẹriẹ ovwan rere ovwan vwẹ uyovwin kpotọ kẹ ayen je ga ayeen. Jihova Ọghẹnẹ rẹ ovwan vwẹ ayen kẹ ihwo eje rehẹ otọ rẹ idjuvwu na eje. 20 Ẹkẹvuọvo ovwan yen ihwo rẹ Jihova reyọ vwo nẹ ogidi erhanre ra vwọ wran utehru rhe, vwo nẹ Ijipt rhe, rere ovwan dia ihwo re dia ughwẹ robọ rọyen* kirobo rẹ ovwan hepha nonẹna.

21 “Ophu de mu Jihova kpahen ovwẹ fikirẹ ovwan, o de duvwun iyorin nẹ me cha shariẹ Jọdan na vrẹ yẹrẹ ro otọ oyoyovwin rẹ Jihova Ọghẹnẹ rẹ ovwan cha vwọ kẹ ovwan kerẹ uku naa. 22 Kidie mi che ghwu vwẹ otọ nana; me cha shariẹ Jọdan na vrẹẹ, ẹkẹvuọvo ovwan cha shariẹ vrẹ ra re ughwẹ rẹ otọ oyoyovwin nana. 23 Ovwan jomaotọ rere ọphọ rẹ Jihova Ọghẹnẹ rẹ ovwan vẹ ovwan gba re na vwo jẹ ovwan ẹro ẹchọrọ, ovwan je kara oma vwọ kẹ oma rẹ ovwaan, oma ri korọnvwọn korọnvwọn rẹ Jihova Ọghẹnẹ rẹ ovwan vuẹ ovwan nẹ ovwan gha. 24 Kidie Jihova Ọghẹnẹ rẹ ovwan erhanre rọ ghwọrọ erọnvwọn fiotọ, Ọghẹnẹ rọ guọnọ ẹga ọsoso.

25 “Ovwan da rhe dia esẹ vwọ kẹ emọ kugbe ivwrọmọ, ovwan da je dia ọke grongron vwẹ otọ na, ovwan de ji ru obo re chọre je kare oma ri kemu kemu, ovwan de ji ru obo re brare vwẹ ẹro ri Jihova Ọghẹnẹ rẹ ovwan rere ophu vwo muo, 26 me reyọ idjuvwu vẹ otọrakpọ na kerẹ iseri vwọso ovwan nonẹna, nẹ ovwan cha ghene ghwọrọ kpakpata vwo nẹ otọ rẹ ovwan cha shariẹ Jọdan na vrẹ ra reyọ kerẹ ughwẹ na. Ovwan cha dia evun rọyen krii, ẹkẹvuọvo a cha ghwọrọ ovwan karekare. 27 Jihova cha hra ovwan ro ohri rẹ ihwo na, imihwo krẹn vwẹ usun rẹ ovwan yen che sivwin rhọ vwẹ ohri rẹ ẹgborho rẹ Jihova cha djẹ ovwan bru ra na. 28 Etiyin ovwan da cha ga eghẹnẹ rẹ urhe vẹ ukuta rẹ ihworakpọ vwẹ obọ vwo ru, eghẹnẹ re cha sa mrorẹ yẹrẹ nyẹme yẹrẹ riemu yẹrẹ nyo ọnrhee.

29 “Ovwan da guọnọ Jihova Ọghẹnẹ rẹ ovwan vwẹ etiyin, ovwan cha ghene mrẹ, ovwan da vwẹ ubiudu rẹ ovwan eje kugbe erhi* rẹ ovwan eje vwọ guọnọ. 30 Ọke rẹ ovwan da rioja gangan re, rẹ erọnvwọn nana eje da phia kẹ ovwan vwẹ ọke rọ cha na, kẹ ovwan che rhivwin bru Jihova Ọghẹnẹ rẹ ovwan rhe je kerhọ rẹ urhuru rọyen. 31 Kidie Jihova Ọghẹnẹ rẹ ovwan Ọghẹnẹ rẹ arodọnvwẹ. Ọ cha yanjẹ ovwan vwo yẹrẹ ghwọrọ ovwan yẹrẹ kpairoro vrẹ ọphọ ro duvwun iyorin rọyen kẹ esẹ rẹ ovwan ridee.

32 “Asaọkiephana, ovwan gba nọ kpahen ẹdẹ rẹ awanre na tavwen a ke mrẹ ọke rẹ ovwan, vwo nẹ ẹdẹ rẹ Ọghẹnẹ vwọ ma ohworakpọ vwẹ otọrakpọ na; ovwan hiẹ vwo nẹ oba ọvo rẹ idjuvwu na vwo kpo oba ro chekọ rẹ idjuvwu na. Orọnvwọn rọ rho te ọnana phiare jovwo re, yẹrẹ e nyo kpahen orọnvwọn rọ họherọ dẹvure? 33 O vwo ihwo efa ri nyo urhuru rẹ Ọghẹnẹ vwo nẹ erhanre rhe vwẹ idjerhe rẹ ovwan nyoro rẹ ovwan da je rhọ na? 34 Yẹrẹ Ọghẹnẹ je jowọ rọ vwọ reyọ ẹgborho ọvo vwo nẹ ohri rẹ ẹgborho ọfa rhe vwọ kẹ oma rọyen vẹ edjọeguo,* eka, igbevwunu, ofovwin, obọ ọgangan, obọ rọ riẹn phia, kugbe irueru ri muoshọ, kirobo rẹ Jihova Ọghẹnẹ rẹ ovwan ru kẹ ovwan vwẹ Ijipt vwẹ irharo rẹ ovwan na? 35 O dje erọnvwọn nana kẹ ovwan rere ovwan vwọ riẹn nẹ Jihova yen Ọghẹnẹ rẹ uyota na; o vwo ọfa rọ họherọọ. 36 Ọ nẹrhẹ ovwan nyo urhuru rọyen vwo nẹ idjuvwu na rhe rọ vwọ kpọ ovwan viẹ, ọ je nẹrhẹ ovwan mrẹ erhanre rode rọyen vwẹ otọrakpọ na, ovwan de ji nyo eta rọyen vwo nẹ erhanre na rhe.

37 “Kidie nẹ o vwo ẹguọnọ rẹ esẹ rẹ ovwan ride je jẹ emọ* rayen reyọ, ọ da reyọ ovwan vwo nẹ Ijipt rhe womarẹ ẹgba rode rọyen. 38 Ọ djẹ ẹgborho re rhoro ji vwo ẹgba vrẹ ovwan vwo nẹ obaro rẹ ovwan, rere ọ vwọ reyọ ovwan ro otọ rayen je vwẹ otọ rayen kẹ ovwan kerẹ uku, kirobo rọ hepha nonẹna. 39 Ọtiọyena ovwan gba riẹn nonẹna je reyọ vwo te ubiudu nẹ Jihova yen Ọghẹnẹ rẹ uyota rẹ idjuvwu na vwẹ obenu kugbe otọrakpọ na vwẹ obotọ. Ọfa herọọ. 40 Ovwan me yọnrọn irhi kugbe iji rọyen re me vwọ kẹ ovwan nonẹna, rere o se vwo yovwin kẹ ovwan vẹ emọ rẹ ovwan re cha vwẹ obuko, rere ovwan vwọ dia ọke grongron vwẹ otọ rẹ Jihova Ọghẹnẹ rẹ ovwan cha vwọ kẹ ovwan na.”

41 Vwẹ ọke yena Mosis da sane irere erha vwẹ ẹbẹre ọnre va nẹcha ri Jọdan na. 42 Obọ da chọ ohwo vwo hwe ọrivẹ rọyen jẹ o vwo utuoma kpahọn jovwoo, ọ me djẹ kpo ọvo vwẹ usun rẹ irere yena rere ọ rhọ. 43 Irere na yen Biza rọhẹ aton na vwẹ otọ ro kpenu rọ pha riẹriẹriẹ na ra vwọ kẹ uvwiẹ ri Rubẹn, Remọt vwẹ Giliẹd ra vwọ kẹ uvwiẹ ri Gad, kugbe Golan vwẹ Beshan ra vwọ kẹ uvwiẹ ri Manasẹ.

44 Asaọkiephana ọnana yen urhi rẹ Mosis vwọ phia vwẹ obaro rẹ ihwo rẹ Izrẹl. 45 Enana yen ẹkarophiyọ, irhi, kugbe orhiẹn-ebro rẹ Mosis vwọ kẹ ihwo rẹ Izrẹl ọke rẹ ayen vwo vrẹn nẹ otọ rẹ Ijipt nu, 46 vwẹ ekogho ri Jọdan na, vwẹ iyara ro hirharoku Bẹt-piọ, vwẹ otọ rẹ Ovie Saihọn rẹ ihwo rẹ Amọ rọ dia Hẹshbọn, ohwo rẹ Mosis vẹ ihwo rẹ Izrẹl phikparobọ ọke rẹ ayen vwo nẹ Ijipt nu. 47 Ayen da reyọ otọ rọyen vẹ otọ rẹ Ovie Ọg ri Beshan, ivie ivẹ rẹ ihwo rẹ Amọ rehẹ ekogho rẹ ẹbẹre ọnre va nẹcha ri Jọdan, 48 vwo nẹ Aroa rọhẹ orhoma rẹ Iyara rẹ Anọn,* rhirin re te Ugbenu ri Saiyọn, kọyen Hẹmọn, 49 vẹ Araba na eje vwẹ ekogho rẹ ẹbẹre ọnre va nẹcha ri Jọdan na, rhirin re te Abadi rẹ Araba,* vwẹ obotọ rẹ ọghwrọrọ ri Pisga.