Diutaronomi

9 “Ovwan nyo, E Izrẹl, nonẹna ovwan cha shariẹ Jọdan na vrẹ ra reyọ etọ rẹ ẹgborho ride ri ji vwo ẹgba vrẹ ovwan, irere ride ra gbogba riariẹ phiyọ re te idjuvwu na,* 2 ihwo ri vwo ẹgba re je pha grongron, emọ rẹ Anak rẹ ovwan riẹnre rẹ ovwan ji nyo rẹ ihwo ta kpahan nẹ, ‘Ono yen se mudia vwọso emọ rẹ Enak?’ 3 Ọtiọyena ovwan riẹn nonẹna nẹ, Jihova Ọghẹnẹ rẹ ovwan cha kobaro kẹ ovwan. Ọyen erhanre rọ ghwọrọ erọnvwọn fiotọ, ọ je cha ghwọrọ ayen. O che phi ayen kparobọ vwẹ irharo rẹ ovwan rere ovwan sa vwọ djẹ ayen yanran kpakpata je ghwọrọ ayen, kirobo rẹ Jihova ve kẹ ovwan.

4 “Ọke rẹ Jihova Ọghẹnẹ rẹ ovwan da djẹ ayen yanran nẹ obaro rẹ ovwan, e jẹ ovwan ta vwẹ ubiudu rẹ ovwan nẹ, ‘Fikirẹ ophiọnphiọn romobọ mẹ yen Jihova vwọ reyọ ovwẹ rhe rhe re ughwẹ rẹ otọ nanaa.’ Ukperẹ ọtiọyen, fikirẹ umwemwu rẹ ẹgborho nana yen Jihova vwọ djẹ ayen yanran vwo nẹ obaro rẹ ovwan. 5 Ọ dia fikirẹ ọsoso yẹrẹ ophiọnphiọn rẹ ubiudu rẹ ovwan yen ovwan cha vwọ yanran ra re ughwẹ rẹ otọ rayeen. Ukperẹ ọtiọyen, fikirẹ umwemwu rẹ ẹgborho nana yen Jihova Ọghẹnẹ rẹ ovwan cha vwọ djẹ ayen yanran nẹ obaro rẹ ovwan, rere Jihova se vwo ru ota ro duvwun iyorin rọyen kẹ esẹ rẹ ovwan ride, Ebraham, Aizik, kugbe Jekọp gba. 6 Ọtiọyena ovwan me riẹn nẹ ọ dia fikirẹ ophiọnphiọn rẹ ovwan yen Jihova Ọghẹnẹ rẹ ovwan cha vwọ vwẹ otọ oyoyovwin nana vwọ kẹ ovwan kerẹ ughwẹẹ, kidie ovwan ihwo ri ruẹ ubiudu gangan.*

7 “Ovwan karophiyọ—e jẹ ọ chọrọ ovwan ẹroo—oborẹ ovwan kpare ophu ri Jihova Ọghẹnẹ rẹ ovwan wan vwevunrẹ aton na. Vwo nẹ ọke rẹ ovwan vwo vrẹn nẹ otọ rẹ Ijipt rhi te ọke rẹ ovwan vwo te etinẹ na yen ovwan vwo gbe vwọsua Jihova. 8 Ovwan tobọ je kpare ophu ri Jihova vwẹ Horẹb, Jihova de muophu kpahen ovwan te ẹdia ro de muegbe rọ vwọ ghwọrọ ovwan. 9 Ọke mi vwo yerin kpo enu rẹ ugbenu na ra reyọ ephapha rẹ ukuta na, ephapha rẹ ọphọ rẹ Jihova vẹ ovwan rere na, me da daji enu rẹ ugbenu na ẹdẹ 40 kugbe ason 40, me riemuu, me je da amee. 10 Ọtiọyena Jihova da kẹ vwẹ ephapha rẹ ukuta ivẹ rọ vwẹ urhiobọ rọyen vwo si phiyọ na, eta na eje rẹ Jihova ta kẹ ovwan vwẹ enu rẹ ugbenu na, vwo nẹ erhanre na rhe, vwẹ ẹdẹ rẹ ọghwẹgbe na vwo koko na yen e si phiyọ ayen. 11 Vwẹ oba rẹ ẹdẹ 40 kugbe ason 40 na, Jihova da kẹ vwẹ ephapha rẹ ukuta ivẹ na, ephapha rẹ ọphọ na, 12 Jihova da ta kẹ vwẹ nẹ, ‘Vrẹn jọphẹre, yerin kpotọ nẹ etinẹ na, kidie ihwo wẹn ru wọ reyọ vwo nẹ Ijipt rhe na ru obo re brare. Ayen ghwọrọ ọke tavwen ayen ki kuomarhẹriẹ vwo nẹ idjerhe ri mi ji iji kẹ ayen nẹ ayen nene naa. Ayen ma oma rẹ utehru* vwọ kẹ oma rayen re.’ 13 Jihova da ta kẹ vwẹ nẹ, ‘Me mrẹ ihwo nana re, nighere! ayen ihwo vẹ ubiudu gangan.* 14 Yanjẹ uvwe vwo, je me ghwọrọ ayen ji si odẹ rayen nẹ otọ rẹ idjuvwu na, rere mi ru we phiyọ ẹgborho rọ gan vrẹ ayen ro ji bun vrẹ ayen.’

15 “Ọtiọyena mi de kuomarhẹriẹ, mi de yerin kpotọ rẹ ugbenu na ọke rẹ ugbenu na vwọ tuan vẹ erhanre, jẹ ephapha rẹ ukuta ivẹ rẹ ọphọ na hẹ abọ mẹ. 16 Etiyin mi de ni, me da mrẹ nẹ ovwan ru umwemwu vwọso Jihova Ọghẹnẹ rẹ ovwan re! Ovwan vwẹ utehru* vwọ ma oma rẹ ọmọ rẹ erhuẹn vwọ kẹ oma rẹ ovwan. Ovwan hwọkee, ovwan de kuomarhẹriẹ vwo nẹ idjerhe rẹ Jihova ji iji rọyen kẹ ovwan nẹ ovwan nene. 17 Ọtiọyena me da yọnrọn ephapha ivẹ na, me da vwẹ abọ ivẹ mẹ vwọ vwẹ ayen phi otọ, e da guọghọ vwẹ irharo rẹ ovwan. 18 Mi de she bọvwọn opharo rhuotọ vwẹ obaro ri Jihova kirobo ri mi ruru ẹsosuọ, vwẹ ẹdẹ 40 kugbe ason 40. Me riemuu, me je da amee, fikirẹ imwemwu na eje rẹ ovwan ruru rẹ ovwan vwo ru obo re brare vwẹ ẹro ri Jihova ji gbe ku. 19 Kidie oshọ mu vwe fikirẹ ophu ọgangan ri Jihova vwọ kpahen ovwan, kidie o muegbe rọ vwọ ghwọrọ ovwan. Ẹkẹvuọvo Jihova je kerhọ mẹ vwẹ ọke yena.

20 “Jihova muophu mamọ kpahen Erọn te ẹdia ro de muegbe rọ vwọ ghwọrọ, ẹkẹvuọvo me je rẹ vwọ kẹ Erọn ọke yena. 21 Etiyin me da reyọ orọnvwọn rẹ umwemwu rẹ ovwan ruru na, ọmọ rẹ erhuẹn na, me da vwẹ erhanre vwọ torhẹ; me da guọghọ je lọ vworovworo bẹsiẹ rọ rhe vwọ họhọ iwurhie, mi de ku iwurhie na phiyọ urhie rọ djẹ nẹ ugbenu na cha.

22 “Kpobarophiyọ, ovwan je kpare ophu ri Jihova vwẹ Tabẹra, Masah, kugbe Kibrọt-hateava. 23 Ọke rẹ Jihova vwo ji ovwan vwo nẹ Kedẹsh-bania, rọ vwọ tanẹ, ‘Ovwan yanran ra re ughwẹ rẹ otọ re me cha vwọ kẹ ovwan na!’ Ovwan da rhoma gbe vwọso iji ri Jihova Ọghẹnẹ rẹ ovwan, ovwan dje esegbuyota phia kpahọọn, ovwan je kerhọ rọyeen. 24 Rhanvwẹ ọke ri mi vwo vughe ovwan na yen ovwan vwo gbe vwọsua Jihova.

25 “Ọtiọyena ke me bọvwọn opharo rhuotọ vwẹ obaro ri Jihova ọkieje vwẹ ẹdẹ 40 kugbe ason 40, me bọvwọn opharo mẹ rhuotọ vwẹ idjerhe tiọna kidie Jihova tare nẹ ọyen cha ghwọrọ ovwan. 26 Ke me rẹ Jihova re me vwọ ta, ‘E Ọrovwori ro Me Kpenu Jihova, wọ ghwọrọ ihwo wẹẹn. Ayen ughwẹ romobọ wẹn* ru wọ vwẹ ọrho wẹn vwọ tan hirhe je reyọ nẹ Ijipt rhe vẹ obọ ọgangan. 27 Karophiyọ idibo wẹn Ebraham, Aizik, kugbe Jekọp. Wọ davwerhọ rẹ udu ọgangan rẹ ihwo nana, umiovwo rayen, kugbe umwemwu rayeen. 28 Ọ rha dia ọtiọyeen, ihwo rẹ otọ ru wọ reyọ avwanre nurhe na sa ta: “Jihova sa reyọ ayen ro otọ ro ve kẹ ayen naa, kidie nẹ o vwo utuoma kpahen ayen, ọ da reyọ ayen phia rhe teyen hwe vwevunrẹ aton na.” 29 Kidie ayen ihwo wẹn kugbe ughwẹ* romobọ wẹn ru wọ reyọ phia vẹ ẹgba rode wẹn kugbe obọ wẹn ru wọ riẹn phia.’