Diutaronomi

16 “Ovwan jokaphiyọ emeranvwe rẹ Ebib,* rere ovwan re Orẹ rẹ Ọwanvrẹ na kẹ Jihova Ọghẹnẹ rẹ ovwan, kidie emeranvwe rẹ Ebib yen Jihova Ọghẹnẹ rẹ ovwan vwọ reyọ ovwan nẹ otọ rẹ Ijipt vwẹ ason. 2 Ovwan mi ze izobo rẹ Ọwanvrẹ na kẹ Jihova Ọghẹnẹ rẹ ovwan, vwo nẹ ẹvwe vẹ igodẹ kugbe erhuẹn na vwẹ asan rẹ Jihova sanere nẹ odẹ rọyen cha dia. 3 Ovwan vwẹ orọnvwọn vuọvo ro vwo iphuephu vwọ ba riọọ; kidie ẹdẹ ighwrẹn yen ovwan cha re ibrẹdi ro jephuo, ibrẹdi rẹ oja, kidie ovwan vrẹn nẹ otọ rẹ Ijipt vẹ okpakpa. Ovwan ru ọnana rere ovwan sa vwọ karophiyọ ẹdẹ rẹ ovwan vwo vrẹn nẹ otọ rẹ Ijipt vwẹ uchọke rẹ ovwan dia akpọ kri te. 4 E jẹ a mrẹ egun rẹ ibrẹdi ro vwo iphuephu* vwẹ obọ rẹ ovwan vwẹ ekogho rẹ ovwan eje vwẹ ẹdẹ ighwrẹẹn, yẹrẹ e jẹ eranvwe vuọvo rẹ ovwan che vwo ze izobo vwẹ ovwọnvwọn rẹ ẹdẹ rẹsosuọ na dia re te urhiọke rẹ ẹdẹ rivẹẹ. 5 A cha rhọnvwe nẹ ovwan ze izobo rẹ Ọwanvrẹ na vwẹ korere korere ro je ovwan vwẹ usun rẹ irere rẹ Jihova Ọghẹnẹ rẹ ovwan cha vwọ kẹ ovwan naa. 6 Ẹkẹvuọvo ovwan mi ruo vwẹ asan rẹ Jihova Ọghẹnẹ rẹ ovwan sanere nẹ odẹ rọyen cha dia. Ovwan mi ze izobo rẹ Ọwanvrẹ na vwẹ ovwọnvwọn ugege rẹ ọnre na de shekpotọ nu, vwẹ ọke ro shephiyọ vẹ ọke rẹ ovwan vwo vrẹn nẹ Ijipt. 7 Ovwan mi chere je riọ vwẹ asan rẹ Jihova Ọghẹnẹ rẹ ovwan cha sane, ovwan se rhivwin kpo itughẹ robọ rẹ ovwan vwẹ urhiọke. 8 Ovwan me re ibrẹdi ro jephuo vwẹ ẹdẹ esan, ẹdẹ righwrẹn na cha dia ọghwẹgbe ọfuanfon kẹ Jihova Ọghẹnẹ rẹ ovwan. Ovwan ruiruo vuọvoo.

9 “Ovwan mi kere idughwrẹn ighwrẹn. Ovwan me ton ekere rẹ idughwrẹn ighwrẹn na phiyọ vwo nẹ ọke rẹ ovwan vwo tu vwẹ ubiakpa vwo bru eka ri mudia. 10 Ovwan me re orẹ rẹ idughwrẹn na kẹ Jihova Ọghẹnẹ rẹ ovwan vẹ izobo rẹ ovwan ro nẹ otọ rẹ ẹwẹn rhe, rẹ ovwan vwọ kpahotọ vwo nene oborẹ Jihova Ọghẹnẹ rẹ ovwan bruba kẹ ovwan te. 11 Ovwan me ghọghọ vwẹ obaro ri Jihova Ọghẹnẹ rẹ ovwan, te ovwan te emeshare rẹ ovwan, emetẹ rẹ ovwan, eviẹn rẹ ovwan eshare, eviẹn rẹ ovwan eya, ihwo ri Livae re dia irere* rẹ ovwan, erhorha, emọ ri jẹ esẹ evwo,* kugbe eyauku re dia ohri rẹ ovwan, vwẹ asan rẹ Jihova Ọghẹnẹ rẹ ovwan sanere nẹ odẹ rọyen cha dia. 12 Ovwan karophiyọ nẹ ovwan dia eviẹn vwẹ Ijipt jovwo, rere ovwan vwo oniso ji ru nene iji nana.

13 “Ovwan me re Orẹ rẹ Itughẹ* na vwẹ ẹdẹ ighwrẹn ọke rẹ ovwan de koko orhọ vwo nẹ asan rẹ ovwan de wonro ibi ekankọn kugbe asan rẹ ovwan de mie iwaini vẹ evwri. 14 Ovwan me ghọghọ vwẹ ọke rẹ orẹ rẹ ovwan, te ovwan te emeshare rẹ ovwan, emetẹ rẹ ovwan, eviẹn rẹ ovwan eshare, eviẹn rẹ ovwan eya, ihwo ri Livae, erhorha, emọ ri jẹ esẹ evwo, kugbe eyauku re dia evunrẹ irere rẹ ovwan. 15 Ovwan cha re orẹ kẹ Jihova Ọghẹnẹ rẹ ovwan vwẹ ẹdẹ ighwrẹn vwẹ asan rẹ Jihova sanere, kidie Jihova Ọghẹnẹ rẹ ovwan che ku ebruphiyọ ku iruo rẹ ovwan eje kugbe erọnvwọn eje rẹ ovwan ruẹ, kẹ ovwan cha vọn vẹ aghọghọ.

16 “Abọ erha ẹgbukpe, eshare rẹ ovwan eje me vwomaphia vwẹ obaro ri Jihova Ọghẹnẹ rẹ ovwan vwẹ asan rọ sanere: vwẹ Orẹ rẹ Ibrẹdi ro Jephuo, Orẹ rẹ Idughwrẹn, kugbe Orẹ rẹ Itughẹ,* e jẹ ohwo vuọvo vwẹ usun rayen vwomaphia vwẹ obaro ri Jihova vẹ abọ fefee. 17 Okẹ rẹ ohwo ọvuọvo cha vwọ rhe me dia abavo vẹ ebruphiyọ rẹ Jihova Ọghẹnẹ rẹ ovwan vwọ kẹ.

18 “Ovwan me vwẹ iguẹdjọ kugbe inotu vwo mu vwọ kẹ uvwiẹ ọvuọvo rehẹ irere na eje* rẹ Jihova Ọghẹnẹ rẹ ovwan vwọ kẹ ovwan, ayen mi guẹdjọ rẹ ihwo na vẹ ẹdjọeguo ọsoso. 19 Ovwan gẹrẹ orhiẹn ọsoso, nẹ ohwo ruẹ, yẹrẹ ria udii, kidie udi ẹriọ rhuẹro rẹ ọvwaghwanre, ọ je chahan eta rẹ ọvwata. 20 Orhiẹn ọsoso—orhiẹn ọsoso yen ovwan che bru rere ovwan sa rha dia je re ughwẹ rẹ otọ rẹ Jihova Ọghẹnẹ rẹ ovwan cha vwọ kẹ ovwan na.

21 “Ovwan kọn urhe vuọvo kerẹ ọkpọ rẹ ẹga* kẹrẹ agbada ri Jihova Ọghẹnẹ rẹ ovwan rẹ ovwan so kẹ oma rẹ ovwan naa.

22 “Ovwan je vwẹ ichivwo rẹ ẹga vwo viẹ kẹ oma rẹ ovwaan, orọnvwọn rẹ Jihova Ọghẹnẹ rẹ ovwan vwo utuoma kpahen.