Diutaronomi
2 “Ọyena vwọ wan nu, avwanre de kuomarhẹriẹ, avwanre da wan idjerhe rẹ Abadi Ọvwavware na vwo kpo aton na, kirobo rẹ Jihova vuẹ vwẹ, avwanre da yan oyan rẹ ẹdẹ buebun riariẹ Ugbenu ri Siẹ. 2 Ukuotọ rọyen, Jihova da ta kẹ vwẹ nẹ, 3 ‘Ovwan yan riariẹ ugbenu nana kri te re, asaọkiephana ovwan gbe kuomarhẹriẹ kpo ẹbẹre rẹ obohwẹre ọnre na. 4 Vwẹ iji nana vwọ kẹ ihwo na: “Ovwan cha wanvrẹ ughwru rẹ iniọvo rẹ ovwan, emọ rẹ Isọ re dia Siẹ, oshọ rẹ ovwan che mu ayen, ovwan me nabọ jomaotọ. 5 Ovwan vwọsua ayeen,* kidie me cha vwẹ otọ rayen vuọvo vwọ kẹ ovwaan, owenẹ ọ tobọ dia asan rọ cha gba uchiyotọ ọvo dede, kidie me vwẹ Ugbenu ri Siẹ vwọ kẹ Isọ nure kerẹ ughwẹ rọyen. 6 Ovwan me vwẹ igho rẹ emu rẹ ovwan cha re vwọ kẹ ayen, ovwan me je hwosa rẹ ame rẹ ovwan cha da. 7 Kidie Jihova Ọghẹnẹ rẹ ovwan bruba kẹ ovwan vwẹ erọnvwọn eje rẹ ovwan ruru. Ọ nabọ riẹn kpahen oyan rẹ ovwan yanre wan aton rode nana. Jihova Ọghẹnẹ rẹ ovwan vẹ ovwan herọ vwẹ ukpe 40 nana, emu vuọvo kanre ovwaan.”’ 8 Ọtiọyena avwanre da wanvrẹ iniọvo rẹ avwanre, emọ rẹ Isọ re dia Siẹ, jẹ avwanre kẹnoma kẹ idjerhe rẹ Araba, Ilat kugbe Iziọn-giba.
“Ọyena vwọ wan nu, avwanre de kuomarhẹriẹ, avwanre da wan idjerhe rẹ aton ri Moab. 9 Etiyin Jihova da ta kẹ vwẹ nẹ, ‘Wọ vwọsua Moab yẹrẹ nene họnraa, kidie me cha vwẹ otọ rọyen vuọvo vwọ kẹ wẹ kerẹ ughwẹẹ, kidie me vwẹ Ar vwọ kẹ emọ ri Lọt nure kerẹ ughwẹ. 10 (Ihwo rẹ Imẹm dia etiyin jovwo, ihwo ri vwo ẹgba mamọ re pha buebun re je pha grongron kerẹ ihwo rẹ Anak. 11 Ẹro re vwo ni ihwo rẹ Anak yen e ji vwo ni ihwo ri Rẹfeim, ihwo ri Moab se ayen Imẹm. 12 Ọke ri jovwo, ihwo ri Họ dia Siẹ, ẹkẹvuọvo emọ rẹ Isọ de mie ayen asan na je ghwọrọ ayen, kẹ ayen dia asan rayen kirobo rẹ ihwo rẹ Izrẹl che ru otọ rọ dia ughwẹ rayen na rẹ Jihova cha vwọ kẹ ayen vwọrẹ imuẹro.) 13 Asaọkiephana, ovwan yanran rere ovwan shariẹ Iyara* ri Zirẹd vrẹ.’ Ọtiọyena avwanre da shariẹ Iyara* ri Zirẹd na vrẹ. 14 Ọke rọ reyọre avwanre ke yan nẹ Kedẹsh-bania rhirin ra shariẹ Iyara* ri Zirẹd vrẹ da dia ẹgbukpe 38, bẹsiẹ rẹ uvwiẹ rẹ eshare rẹ ofovwin na eje ki ghwu nẹ ọghwẹgbe na, kirobo rẹ Jihova duvwin iyorin rọyen kẹ ayen jovwo na. 15 Obọ ri Jihova vwọso ayen rọ vwọ ghwọrọ ayen nẹ ọghwẹgbe na bẹsiẹ rẹ ayen vwo ghwu.
16 “Ugege rẹ eshare rẹ ofovwin na eje vwo ghwu nẹ ohri rẹ ihwo na nu, 17 Jihova da rhoma ta kẹ vwẹ nẹ, 18 ‘Nonẹna ovwan cha wanvrẹ ekogho ri Moab, kọyen Ar. 19 Ovwan de sikẹre ihwo rẹ Amọn, ovwan kpokpo ayen yẹrẹ nẹrhẹ ophu muẹ ayeen, kidie me cha vwẹ otọ rẹ ihwo rẹ Amọn vuọvo vwọ kẹ ovwan kerẹ ughwẹẹ, kidie me vwerọ kẹ emọ ri Lọt nure kerẹ ughwẹ rayen. 20 E ji no nẹ ọnana otọ rẹ ihwo ri Rẹfeim. (Ihwo ri Rẹfeim dia etiyin jovwo, ihwo rẹ Amọn se ayen Zamzumim. 21 Ayen ihwo ri vwo ẹgba mamọ re pha buebun ri ji gron kerẹ ihwo rẹ Anak; ẹkẹvuọvo Jihova ghwọrọ ayen vwẹ obaro rẹ ihwo rẹ Amọn, enana da djẹ ayen phia, kẹ ayen dia asan rayen. 22 Ọyena yen obo ro ru kẹ emọ rẹ Isọ re dia Siẹ asaọkiephana, ọke rọ vwọ ghwọrọ ihwo ri Họ nẹ obaro rayen, rere ayen sa vwọ djẹ ayen je dia asan rayen rhi te nonẹna. 23 Vwọ kẹ ihwo rẹ Avim, ayen wonphiyọ* asan sansan rhirin re te Gaza, bẹsiẹ rẹ ihwo ri Kaftọrim ri nẹ Kaftọ* rhe ke rhe ghwọrọ ayen, kẹ ayen dia asan rayen.)
24 “‘Ovwan vrẹn rere ovwan shariẹ Iyara* rẹ Anọn na vrẹ. Nighere, mi phi Saihọn ovie ri Hẹshbọn ohwo rẹ Amọ na phiyọ obọ rẹ ovwan nure. Ọtiọyena ovwan gba ton ẹreyọ rẹ otọ rọyen phiyọ ji nene họnre. 25 Nonẹna mi che phi uguegue vẹ oshọ rẹ ovwan phiyọ oma rẹ ihwo eje rehẹ otọ rẹ idjuvwu na ri nyo usi rẹ ovwan. Ẹwẹn rayen cha yanghan, ayen mi ji guegue fikirẹ ovwan.’
26 “Mi de ji ikọn vwo nẹ aton ri Kẹdẹmọt bru Ovie Saihọn ri Hẹshbọn ra vẹ eta rẹ ufuoma nana, 27 ‘Juvwe wan otọ wẹn vrẹ. Me cha daji idjerhe na, mi che kuomarhẹriẹ kpo obọrhen yẹrẹ obohwẹree. 28 Emu vẹ ame ru wọ cha shẹ kẹ vwẹ ọvo yen me cha re je da. Juvwe de vwẹ owọ wanvrẹ 29 —ọyena yen oborẹ emọ rẹ Isọ re dia Siẹ kugbe ihwo ri Moab re dia Ar ru kẹ vwẹ—bẹsiẹ me vwọ wan Jọdan na ra ro otọ rẹ Jihova Ọghẹnẹ rẹ avwanre cha vwọ kẹ avwanre.’ 30 Ẹkẹvuọvo Ovie Saihọn ri Hẹshbọn rhọnvwe kẹ avwanre nẹ avwanre wanvrẹẹ, kidie Jihova Ọghẹnẹ rẹ ovwan vwẹ uphẹn kẹ ẹwẹn rọyen rọ vwọ kparoma, kugbe ubiudu rọyen rọ vwọ dia gangan rere o se vwo phio phiyọ obọ rẹ ovwan kirobo rọ hepha enẹna.
31 “Etiyin Jihova da ta kẹ vwẹ, ‘Nighere, mi phiẹ Saihọn vẹ otọ rọyen phiyọ obọ rẹ ovwan re. Asaọkiephana ovwan reyọ otọ rọyen kerẹ ughwẹ.’ 32 Ọke rẹ Saihọn vẹ ihwo rọyen eje vwọ rhe rhe vwa avwanre rere ayen nene avwanre họnre vwẹ Jehaz, 33 Jihova Ọghẹnẹ rẹ avwanre de phio phiyọ avwanre obọ, rere avwanre vwo phio vẹ emọ rọyen kugbe ihwo rọyen eje kparobọ. 34 Avwanre reyọ irere rọyen eje vwẹ ọke yena je ghwọrọ korere korere, ọtiọyen ji te eshare, eya, vẹ emọ. Avwanre yanjẹ ohwo vuọvo vwo nẹ ọ rhọọ. 35 Ichuru na ọvo yen avwanre gborho kẹ oma rẹ avwanre, ọtiọyen ji te ekuakua rehẹ evunrẹ irere rẹ avwanre reyọre na. 36 Vwo nẹ Aroa rọhẹ orhoma rẹ Iyara rẹ Anọn* (ọtiọyen ji te orere rọhẹ evunrẹ iyara na), rhirin re te Giliẹd, o vwo orere vuọvo rẹ obọ rẹ avwanre je tee. Jihova Ọghẹnẹ rẹ avwanre phi ayen eje phiyọ obọ rẹ avwanre. 37 Ẹkẹvuọvo, ovwan sikẹrẹ otọ rẹ ihwo rẹ Amọnii, ọtiọyen ji te orhoma rẹ Iyara* ri Jabọk eje kugbe irere rehẹ ekogho rẹ igbenu na, yẹrẹ asan efa rẹ Jihova Ọghẹnẹ rẹ avwanre sen kẹ avwanre nẹ avwanre ruaa.