Diutaronomi

17 “Ovwan vwẹ erhuẹn yẹrẹ ogodẹ ro vwo oka yẹrẹ ọ rẹ asan ọvo shechọ vwẹ oma rọyen vwo ze izobo kẹ Jihova Ọghẹnẹ rẹ ovwaan, kidie ọ cha dia emu rẹ ẹgua vwọ kẹ Jihova Ọghẹnẹ rẹ ovwan.

2 “Ọ da dianẹ a mrẹ ọshare yẹrẹ aye vwẹ ohri rẹ ovwan, vwẹ ọvo usun rẹ irere rẹ ovwan rẹ Jihova Ọghẹnẹ rẹ ovwan vwọ kẹ ovwan, ro ruẹ obo re brare vwẹ ẹro ri Jihova Ọghẹnẹ rẹ ovwan ro ji gbe ọphọ rọyen kuẹ, 3 o de bo ghwru ra ga eghẹnẹ efa, ọ da vwẹ uyovwin kpotọ vwọ kẹ ayen yẹrẹ vwọ kẹ ọnre na yẹrẹ emeranvwe na yẹrẹ erọnvwọn eje rehẹ idjuvwu na, orọnvwọn ri mi ji iji rọyeen. 4 A da niyẹnrẹn rọyen kẹ ovwan yẹrẹ ovwan de nyo kpahọn, ovwan me nabọ fuẹrẹn ota na fiotọ. E de vwo imuẹro nẹ e ghini ru emu rẹ ẹgua tiọyena vwẹ Izrẹl, 5 ovwan me reyọ ọshare yẹrẹ aye ro ru emu ọbrabra na kpo otafe rẹ anurhoro rẹ orere na, e mi phi ọshare yẹrẹ aye na hwe. 6 E mi hwe ohwo re che hwe na siẹrẹ iseri* ivẹ yẹrẹ erha da herọ. E jẹ e hwe ohwo naa ọ da dianẹ oseri ọvuọvo yen herọ. 7 Abọ rẹ iseri na me dia abọ rẹsosuọ ri tu te rere ayen teyọn hwe tavwen abọ rẹ ihwo ri chekọ na ejobi ki rhi te. Ovwan si obo re brare vwo nẹ ohri rẹ ovwan.

8 “Ota de she vwẹ ọvo usun rẹ irere rẹ ovwan rọ bẹn kẹ ovwan eguo, owenẹ ọ dia ota rẹ ọbara re ku kuotọ yẹrẹ ota rẹ urhi yẹrẹ ozighi re gberi yẹrẹ eta rẹ ẹghwọ efa, ovwan mi vrẹn kpo asan rẹ Jihova Ọghẹnẹ rẹ ovwan sanere. 9 Ovwan gbe bru irherẹn re dia ihwo ri Livae kugbe iguẹdjọ re ga vwẹ ọke yena ra, rere ovwan nọ mie ayen, kẹ ayen cha vuẹ ovwan orhiẹn-ebro na. 10 Ovwan mi ru nene orhiẹn-ebro rẹ ayen vwọ kẹ ovwan vwẹ asan rẹ Jihova sanere na. Ovwan me jomaotọ ru nene oborẹ ayen vuẹ ovwan eje. 11 Ovwan mi ru nene urhi rẹ ayen dje kẹ ovwan ji ru nene orhiẹn-ebro rẹ ayen ghwoghwo kẹ ovwan. Ovwan kuomarhẹriẹ nẹ orhiẹn-ebro rẹ ayen cha vwọ kẹ ovwan na vwo kpo obọrhen yẹrẹ obohwẹree. 12 Ohwo rọ kparoma rọ rhọnvwe kerhọ rẹ orherẹn ro gbodibo kẹ Jihova Ọghẹnẹ rẹ ovwan yẹrẹ oguẹdjọ naa ko ghwu. Ovwan si obo re brare vwo nẹ Izrẹl. 13 Ihwo ejobi ki che nyo, oshọ ko che mu ayen, ayen rha cha kparoma ọfaa.

14 “Ọke rẹ ovwan da ro otọ rẹ Jihova Ọghẹnẹ rẹ ovwan cha vwọ kẹ ovwan na, ovwan da re ughwẹ rọyen je dia evun rọyen re, ovwan da tanẹ, ‘E jẹ avwanre vwẹ ovie mu vwẹ enu rẹ avwanre kerẹ ẹgborho na eje re riariẹ avwanre phiyọ,’ 15 vwẹ ọke yena, o vwo obo rọ wanree, ovwan me vwẹ ovie rẹ Jihova Ọghẹnẹ rẹ ovwan sanere vwo mu. Ovwan vwẹ ovie vwo mu vwo nẹ ohri rẹ iniọvo rẹ ovwan. Ọyen emu ra gha rẹ ovwan vwọ vwẹ ọrhorha rọ dia oniọvo rẹ ovwaan vwo mu vwẹ enu rẹ ovwan. 16 Ẹkẹvuọvo, e jẹ ọ dẹ iyesi buebun kẹ oma rọyen yẹrẹ nẹrhẹ ihwo na rhivwin kpo Ijipt ra dẹ iyesi efaa, rọ vwọ dianẹ Jihova vuẹ ovwan nẹ, ‘Ovwan nama wan idjerhe nana rhivwiin.’ 17 E jẹ ọ reyọ eya buebun vwọ kẹ oma rọyeen rere ubiudu rọyen vwo je bo ghwrẹ; yẹrẹ o koko idọnọ efuanfon vẹ iro buebun kẹ oma rọyeen. 18 Ọke ro de chidia ekete rẹ uvie rọyen re, o mi si Urhi nana phiyọ ọbe* ọvo vwọ kẹ oma rọyen, o mi ni ọ rẹ irherẹn re dia ihwo ri Livae na sẹro rọyen na vwo sio.

19 “Ọ me sẹro rọyen, o mi se vwẹ ẹdẹ rẹ akpọ rọyen eje, rere o se vwo yono obo ra djoshọ rẹ Jihova Ọghẹnẹ rọyen, ji vwo oniso rẹ eta rẹ Urhi nana eje kugbe iji nana womarẹ o vwo ruẹ nene ayen. 20 Ọtiọyena ọ rha cha kparoma vwọ kẹ iniọvo rọyeen, o ji che kuomarhẹriẹ vwo nẹ iji na vwo kpo obọrhen yẹrẹ obohwẹree, rere ọ sa vwọ dia ọke grongron vwẹ enu rẹ uvie rọyen, te ọyen te emọ rọyen vwẹ ohri rẹ Izrẹl.