Diutaronomi

18 “Irherẹn re dia ihwo ri Livae vẹ uvwiẹ ri Livae eje che vwo ẹkẹn yẹrẹ uku vwẹ Izrẹẹl. Ayen cha re vwo nẹ izobo ra vwẹ erhanre torhẹ kẹ Jihova, re dia uku rọyen. 2 Ọtiọyena e jẹ ayen vwo uku vuọvo vwẹ ohri rẹ iniọvo rayeen. Jihova yen uku rayen kirobo rọ vuẹ ayen jovwo.

3 “Asaọkiephana, ọnana yen cha dia ẹkẹn rẹ ihwo na cha vwọ kẹ irherẹn na: Kohwo kohwo ro ze izobo, owenẹ ọ dia erhuẹn yẹrẹ ogodẹ, me vwẹ igabọ na, ọhwa na, kugbe evun na vwọ kẹ orherẹn na. 4 Ovwan me vwẹ emamọ rẹsosuọ rẹ eka rẹ ovwan, iwaini kpokpọ rẹ ovwan, evwri rẹ ovwan, kugbe ẹton rẹsosuọ re bru nẹ ichuru rẹ ovwan vwọ kẹ. 5 Jihova Ọghẹnẹ rẹ ovwan sanerọ vẹ emọ rọyen vwo nẹ ivwiẹ rẹ ovwan eje rere ayen gbodibo vwẹ odẹ ri Jihova ọkieje.

6 “Ẹkẹvuọvo, ọ da dianẹ ohwo ri Livae ọvo vrẹn nẹ ọvo vwẹ usun rẹ irere rẹ ovwan vwẹ Izrẹl rọ dia jovwo vẹ ẹwẹn ro vwo kpo asan rẹ Jihova sanere,* 7 o se gbodibo vwẹ etiyin vwẹ odẹ ri Jihova Ọghẹnẹ rọyen kirobo rẹ iniọvo rọyen eje, ihwo ri Livae na ruẹ, ri mudia etiyin vwẹ obaro ri Jihova. 8 Ọ vẹ ayen che vwo ẹkẹn abavo rẹ emuọre, vwọ ba obo rọ mrẹre vwo nẹ ekuakua rẹ esẹ rọyen ride rọ shẹre.

9 “Ọke rẹ ovwan da ro otọ rẹ Jihova Ọghẹnẹ rẹ ovwan cha vwọ kẹ ovwan na, ovwan yono oborẹ ovwan sa vwọ vwẹrokere iruemu rẹ ẹgua rẹ ẹgborho yenaa. 10 E jẹ a mrẹ ohwo vuọvo vwẹ usun rẹ ovwan rọ torhẹ ọmọ rọyen ọmọshare yẹrẹ ọmọtẹ vwẹ erhanree,* kohwo kohwo rọ mraro, kohwo kohwo ro ruẹ imajiki, kohwo kohwo rọ guọnọ eka rọ vwọ riẹn obo re cha phia, ọboepha, 11 kohwo kohwo ro ruẹ inehweri, kohwo kohwo rọ guọnọ ukẹcha rẹ ohwo ro nene emekashe rẹ Idẹbono ruẹ kuẹgbe yẹrẹ ohwo rọ ta oborẹ obaro na cha dia, yẹrẹ kohwo kohwo rọ nọ mie ohwo ro ghwure. 12 Kidie kohwo kohwo ro ruẹ erọnvwọn nana tuẹn Jihova oma, fikirẹ erọnvwọn rẹ ẹgua nana yen Jihova Ọghẹnẹ rẹ ovwan vwọ djẹ ayen vwo nẹ obaro rẹ ovwan na. 13 Ovwan dje oma rẹ ovwan phia kerẹ ihwo ri jẹ ekan evwo vwẹ obaro ri Jihova Ọghẹnẹ rẹ ovwan.

14 “Kidie ẹgborho nana rẹ ovwan cha djẹ nẹ otọ rayen na kerhọ rẹ ihwo ri ruẹ imajiki jovwo kugbe ihwo re mraro, ẹkẹvuọvo Jihova Ọghẹnẹ rẹ ovwan vwẹ uphẹn vwọ kẹ ovwan nẹ ovwan ru orọnvwọn tiọyenaa. 15 Jihova Ọghẹnẹ rẹ ovwan cha vwẹ ọmraro ọvo kerẹ omẹvwẹ vwo mu kẹ ovwan vwo nẹ ohri rẹ iniọvo rẹ ovwan. Ovwan kerhọ rọyen. 16 Ọnana ẹkpahọnphiyọ rẹ oborẹ ovwan nọ mie Jihova Ọghẹnẹ rẹ ovwan vwẹ Horẹb, vwẹ ẹdẹ rẹ ọghwẹgbe na vwo koko, rẹ ovwan vwọ tanẹ, ‘Wo jẹ avwanre nyo urhuru ri Jihova Ọghẹnẹ rẹ avwanre yẹrẹ mrẹ erhanre rode nana ọfaa, rere avwanre vwo jeghwo.’ 17 Etiyin Jihova da ta kẹ vwẹ nẹ, ‘Oborẹ ayen tare na gbare. 18 Me cha vwẹ ọmraro ọvo kerẹ owẹ vwo mu kẹ ayen vwo nẹ ohri rẹ iniọvo rayen rhe, ki mi che phi eta mẹ phiyọ unu rọyen, kọ cha vuẹ ayen erọnvwọn eje ri mi ji iji rọyen kẹ. 19 Vwọrẹ uyota, ohwo rọ rhọnvwe kerhọ rẹ eta mẹ rọ cha ta vwẹ odẹ mẹ naa, me cha nọ orhiẹn.

20 “‘Kọmraro kọmraro rọ vwẹ omaẹkparọ vwọ ta ota re me vuẹrẹ nẹ ọ taa vwẹ odẹ mẹ yẹrẹ vwẹ odẹ rẹ eghẹnẹ efa, ọmraro yena che ghwu. 21 Ẹkẹvuọvo, ovwan sa ta vwẹ ubiudu rẹ ovwan: “Mavọ yen avwanre vwọ riẹn nẹ ọ dia Jihova yen ta ota naa?” 22 Ọke rẹ ọmraro na da ta ota vwẹ odẹ ri Jihova, ota na rhe rugbaa yẹrẹ ọ rha phiaa, kọyen Jihova ta ota yenaa. Ọmraro na tarọ vwọrẹ omaẹkparọ. Ovwan djoshọ rọyeen.’