Diutaronomi

19 “Ọke rẹ Jihova Ọghẹnẹ rẹ ovwan da ghwọrọ ẹgborho rẹ Jihova Ọghẹnẹ rẹ ovwan cha vwẹ otọ rayen vwọ kẹ ovwan na, ọke rẹ ovwan da reyọ otọ rayen, ovwan da je dia irere rayen kugbe iwevwin rayen re, 2 ovwan me sane irere erha vwẹ otọ rẹ ovwan rẹ Jihova Ọghẹnẹ rẹ ovwan cha vwọ kẹ ovwan nẹ ovwan re ughwẹ rọyen na. 3 Ovwan me ghare ekogho rẹ otọ rẹ Jihova Ọghẹnẹ rẹ ovwan vwọ kẹ ovwan nẹ ovwan re ughwẹ rọyen na phiyọ ẹkẹn erha, ovwan me rhuẹrẹ idjerhe na rere ohwo ro hwe ohwo sa vwọ djẹ kpo ọvo vwẹ usun rẹ irere yena.

4 “Asaọkiephana ọnana yen obo re cha phia kẹ ohwo ro hwe ohwo rọ sa djẹ kpo etiyin rere ọ vwọ rhọ: Ọke rẹ obọ da chọ vwọ ghwiẹ ọrivẹ rọyen hwe jẹ ọ dia o vwo utuoma kpahọn jovwoo; 5 kerẹ ọke rẹ ọ vẹ ọrivẹ rọyen de kpo evunrẹ aghwa re koko irhe, ọ da kpare obọ kpenu rọ vwọ reyọ ushurhe vwọ gbọ urhe she, ẹkẹvuọvo uyovwin rẹ ushurhe na de yoro no, o de she ọrivẹ rọyen, o de ghwu, ọ ro hwe ohwo na me djẹ kpo ọvo vwẹ usun rẹ irere nana ra dia. 6 Ọ rha dia ọtiọyeen, vwevunrẹ ophu ọgangan,* ọreihri rẹ ọbara na sa vwọtua ọ ro hwe ohwo na, ọ me tua mu, o mi hwe, kidie ugbo rẹ orere na sheri nọ. Ẹkẹvuọvo, o fo ughwuu, rọ vwọ dianẹ o vwo utuoma kpahen ọrivẹ rọyen jovwo naa. 7 Kọyensorọ mi vwo ji iji kẹ ovwan: ‘Ovwan sane irere erha phiyọ ọkọkọ.’

8 “Ọ da dianẹ Jihova Ọghẹnẹ rẹ ovwan ru ekogho rẹ ovwan hẹrephiyọ kirobo ro duvwun iyorin rọyen kẹ esẹ rẹ ovwan ride, ọ da je kẹ ovwan otọ na eje ro veri nẹ ọ cha vwọ kẹ esẹ rẹ ovwan ride nu 9 —takpe nẹ ovwan fuevun ru nene iji nana eje re me vwọ kẹ ovwan nonẹna, ovwan vwo vwo ẹguọnọ rẹ Jihova Ọghẹnẹ rẹ ovwan je yan vwẹ idjerhe rọyen ọkieje—ovwan me vwẹ irere erha efa vwọ ba erha nana. 10 Ovwan de ru ọtiọyen, e rhe che ku ọbara rẹ ohwo vuọvo rẹ obọ rọyen fonro kuotọ rẹ ovwan rẹ Jihova Ọghẹnẹ rẹ ovwan cha vwọ kẹ ovwan vwọ riuku naa, abe rẹ ọbara vuọvo je cha dia uyovwin rẹ ovwaan.

11 “Ẹkẹvuọvo ohwo de vwo utuoma kpahen ọrivẹ rọyen, o de fiọnko hẹrhẹ je so omaẹwan ọgangan vwọ kẹ,* o de ghwu, ohwo na da djẹ kpo ọvo vwẹ usun rẹ irere yena, 12 ekpako rẹ orere rọyen mi se nẹ etiyin rhe, ayen mi phio phiyọ obọ rẹ ọreihri rẹ ọbara na, ọ me teyọn hwe. 13 E jẹ aro rọyen dọn ovwaan,* ovwan mi si abe rẹ obara rẹ ohwo rẹ abọ rọyen fonro vwo nẹ Izrẹl, rere o se vwo yovwin kẹ ovwan.

14 “Ọke rẹ uku rẹ ovwan de te ovwan obọ vwẹ otọ rẹ Jihova Ọghẹnẹ rẹ ovwan cha vwọ kẹ ovwan na, ovwan mu obo re vwo gbere ughwru phiyọ otọ rẹ ọrivẹ rẹ ovwan vwo nẹ asan rẹ esẹ ride na muro phiyọọ.

15 “E jẹ a vwẹ fikirẹ oseri ọvo vwo brorhiẹn hwe* ohwo ọfa fikirẹ oruchọ yẹrẹ umwemwu ra tare nẹ o ruruu. Womarẹ iseri* ivẹ yẹrẹ erha, ota na ko se muẹro. 16 E de soseri rẹ efian vwọso ohwo je tanẹ o ru obo re chọre, 17 ihwo ivẹ ri vwo ẹghwọ na ki che mudia obaro ri Jihova, irherẹn na kugbe iguẹdjọ na re ga vwẹ ọke yena. 18 Iguẹdjọ na cha nabọ guọnọ otọ rẹ ota na, ohwo ro soseri na da dia oseri rẹ efian ro gun efian nyẹ oniọvo rọyen, 19 ovwan mi ruo kirobo rọ jiroro rọyen nẹ ọyen che ru oniọvo rọyen jovwo na, ovwan mi si obo re brare nẹ ohri rẹ ovwan. 20 Ihwo ri chekọ ki che nyo, oshọ ko che mu ayen, ayen rhe che ru orọnvwọn ọbrabra tiọyena vwẹ ohri rẹ ovwan ọfaa. 21 Ovwan jẹ aro rayen dọn ovwaan:* A cha vwẹ arhọ* vwọ hwosa rẹ arhọ,* ẹro vwọ hwosa rẹ ẹro, ubiakon vwọ hwosa rẹ ubiakon, obọ vwọ hwosa rẹ obọ, owọ vwọ hwosa rẹ owọ.