Diutaronomi
20 “Ovwan da kpare ofovwin bru ivwighrẹn rẹ ovwan ra, ovwan da mrẹ iyesi rayen, ekpẹrẹ rayen vẹ isodje rayen ri bun vrẹ e rẹ ovwan, ovwan djoshọ rayeen, kidie Jihova Ọghẹnẹ rẹ ovwan rọ reyọ ovwan nẹ otọ rẹ Ijipti rhe na vẹ ovwan herọ. 2 Ọke rẹ ovwan da guọnọ kpo ofovwin re, orherẹn na me rhe rhe ta ota kẹ ihwo na. 3 Ọ me vuẹ ayen nẹ, ‘Ovwan nyo, E Izrẹl, ovwan che re nene ivwighrẹn rẹ ovwan họnre re. E jẹ udu nẹ ovwan awọọ. Ovwan djoshọ yẹrẹ phariẹ yẹrẹ guegue fiki rayeen, 4 kidie Jihova Ọghẹnẹ rẹ ovwan vẹ ovwan yen gba yanran na, ọ cha họnre ivwighrẹn rẹ ovwan vwọ kẹ ovwan ji sivwin ovwan.’
5 “Inotu rẹ isodje na me je vuẹ ihwo na nẹ, ‘Ono yen bọn uwevwin kpokpọ ro ji rhi rhiee? E jẹ o rhivwin kpo uwevwin rọyen. Ọ rha dia ọtiọyeen, o se ghwu vwẹ ofovwin na, ohwo ọfa mi rhie. 6 Ono yen kọn ogba rẹ ivaini ro ji rhi vun emamọ rọyeen? E jẹ o rhivwin kpo uwevwin rọyen. Ọ rha dia ọtiọyeen, o se ghwu vwẹ ofovwin na, ohwo ọfa mi vun emamọ rọyen. 7 Ono yen sa aye phiyotọ rọ je rhe rọvwọọn? E jẹ o rhivwin kpo uwevwin rọyen. Ọ rha dia ọtiọyeen, o se ghwu vwẹ ofovwin na, ohwo ọfa me rọvwọn.’ 8 Inotu rẹ isodje na me je nọ ihwo na nẹ, ‘Ono yen oshọ muẹ rẹ udu ji nu awọ? E jẹ o rhivwin kpo uwevwin rọyen rere o vwo jẹ udu esio nẹ awọ rẹ iniọvo rọyen kirobo rẹ udu ji no awọ na.’ 9 Ọke rẹ inotu rẹ isodje na da ta ota kẹ ihwo na nu, e jẹ ayen vwẹ inotu rẹ isodje mu ri che sun ihwo na kpo ofovwin na.
10 “Ovwan da kpare ofovwin kpo orere, ovwan mi ghwoghwo obo re cha nẹrhẹ ufuoma dia vwọ kẹ ayen. 11 Ayen da kpahen kẹ ovwan vwẹ idjerhe ro djerephia nẹ ayen guọnọ ufuoma, ihwo rehẹ evun rọyen eje ke cha dia ihwo rẹ ovwan sa gba vwo ruiruo, kẹ ayen cha ga ovwan. 12 Ẹkẹvuọvo, ayen da sen nẹ ayen vẹ ovwan che vwo ufuomaa, ukperẹ ọtiọyen ayen de nene ovwan phi ofovwin, ovwan me gba riariẹ orere na phiyọ, 13 Jihova Ọghẹnẹ rẹ ovwan che ghini phi orere na phiyọ obọ rẹ ovwan, ovwan me vwẹ ọlọkọ vwo hwe eshare na eje rehẹ evun rọyen. 14 Ẹkẹvuọvo, eya na, emọ na, ichuru na, kugbe erọnvwọn eje rehẹ evunrẹ orere na, erọnvwọn eje rẹ ovwan gborhori, ovwan sa reyọ ayen kẹ oma rẹ ovwan, ovwan cha re erọnvwọn rẹ ovwan gborho mie ivwighrẹn rẹ ovwan, rẹ Jihova Ọghẹnẹ rẹ ovwan vwọ kẹ ovwan na.
15 “Ọyena yen oborẹ ovwan che ru irere na eje ri sherabọ kẹ ovwan mamọ, rehẹ usun rẹ irere rẹ ẹgborho nana re kẹrẹ ovwan naa. 16 Ẹkẹvuọvo vwevunrẹ irere rẹ ihwo nana rẹ Jihova Ọghẹnẹ rẹ ovwan cha vwọ kẹ ovwan vwọ riuku na, ovwan yanjẹ orọnvwọn vuọvo rọ wẹn vwo vwẹ evun rọyeen. 17 Ukperẹ ọtiọyen, ovwan ghwọrọ ayen karekare, ihwo ri Hẹt, ihwo rẹ Amọ, ihwo ri Kenan, ihwo ri Pẹriz, ihwo ri Haiv, kugbe ihwo ri Jẹbus, kirobo rẹ Jihova Ọghẹnẹ rẹ ovwan ji iji rọyen kẹ ovwan; 18 rere ayen vwo jẹ ovwan eyono phiyọ iruemu rẹ ẹgua rayen eje rẹ ayen ru vwọ kẹ eghẹnẹ rayen, je nẹrhẹ ovwan ru umwemwu vwọso Jihova Ọghẹnẹ rẹ ovwan.
19 “Ovwan da gba riariẹ orere phiyọ ji phio kparobọ ọke rẹ ovwan de nene ayen họnre vwẹ ẹdẹ buebun nu, ovwan reyọ ushurhe vwọ ghwọrọ irhe rehẹ evun rọyeen. Ovwan sa re emamọ rayen, ẹkẹvuọvo ovwan gbọ ayen shee. Gbanẹ ovwan cha gba riariẹ irhe rẹ udju na phiyọ kirobo rẹ ovwan che ru ohworakpọ? 20 Irhe rẹ ovwan riẹnre nẹ a ria emamọ rayeen ọvo yen ovwan sa ghwọrọ. Ovwan sa gbọ ayen she rere ovwan reyọ ayen vwọ gbogba riariẹ orere ro nene ovwan phiẹ ofovwin na phiyọ bẹsiẹ ro vwo she.