Joshua
1 Ọke rẹ Mosis odibo ri Jihova vwo ghwu nu, Jihova da ta kẹ Joshua* ọmọ ri Nọn, odibo ri Mosis nẹ: 2 “Mosis odibo mẹ ghwure. Asaọkiephana vrẹn wọ shariẹ Jọdan na vrẹ, wẹ vẹ ihwo nana eje, ihwo rẹ Izrẹl, rere ovwan kpo otọ re me cha vwọ kẹ ayen na. 3 Me cha vwẹ kasan kasan ru wo phi owọ wẹn phiyọ vwọ kẹ wẹ kirobo ri mi ve vwọ kẹ Mosis. 4 Otọ wẹn cha hẹre vwo nẹ aton na re te Lẹbanọn, re te urhie rode na, Yufretis—otọ rẹ ihwo ri Hẹt eje—kugbe re te Abadi Rode na* vwẹ ẹbẹre ọnre shera na. 5 O vwo ohwo vuọvo rọ cha sa vwọso owẹ vwẹ uchọke ru wọ diarọ kri tee. Kirobo re me vẹ Mosis diarọ, ọtiọyen mẹ vẹ owẹ je cha dia. Me cha yanjẹ uwe vwo yẹrẹ kpairoro vrẹ wẹẹ. 6 Gbe fiudugberi rere wọ goma, kidie wẹ yen ohwo rọ cha nẹrhẹ ihwo nana riuku rẹ otọ ri mi ve vwọ kẹ esẹ rayen ride nẹ me cha vwọ kẹ ayen.
7 “Takpe nẹ fiudugberi rere wọ nabọ goma, wọ je jomaotọ yọnrọn Urhi na eje rẹ odibo mẹ Mosis ji kẹ wẹ na. Wọ vwẹriẹ no kpo obọrhen yẹrẹ obohwẹree, rere wo se vwo dje uruemu rẹ aghwanre phia vwẹ kasan kasan ru wọ rare. 8 Wo jẹ ọbe rẹ Urhi nana nẹ unu wẹẹn, ku wo se ji roro kokodo kpahọn* te ason te uvo, rere wọ sa vwọ nabọ ru nene obo re si phiyọ evun rọyen eje; ọke yena kemu kemu ru wo ruẹ ko yovwin kẹ wẹ, ku wo ji che dje uruemu rẹ aghwanre phia. 9 Ọ dia omẹ yen ji iji kẹ wẹ? Fiudugberi rere wọ goma. Wo guegue yẹrẹ djoshọọ, kidie Jihova Ọghẹnẹ wẹn vẹ owẹ herọ vwẹ kasan kasan ru wọ ra ejobi.”
10 Ọyena vwọ wan nu, Joshua da vwẹ iji kẹ inotu rẹ ihwo na nẹ: 11 “Yan nene asan re wonphiyọ* na eje rere wọ vwẹ iji nana kẹ ihwo na, ‘Muegbe rẹ emuọre phiyotọ, kidie ẹdẹ erha yen chekọ, kẹ ovwan cha shariẹ Jọdan na vrẹ ra re ughwẹ rẹ otọ rẹ Jihova Ọghẹnẹ rẹ ovwan vwọ kẹ ovwan nẹ ovwan re ughwẹ rọyen na.’”
12 Joshua da ta kẹ uvwiẹ ri Rubẹn, uvwiẹ ri Gad, kugbe ubro rẹ uvwiẹ ri Manasẹ nẹ: 13 “Karophiyọ iji rẹ Mosis odibo ri Jihova vwọ kẹ ovwan nẹ: ‘Jihova Ọghẹnẹ rẹ ovwan kẹ ovwan urovwoma, ọ je kẹ ovwan otọ nana nure. 14 Eya rẹ ovwan, emọ rẹ ovwan, kugbe ichuru rẹ ovwan cha dia otọ rẹ Mosis vwọ kẹ ovwan vwẹ ẹbẹre nana* ri Jọdan na, ẹkẹvuọvo ovwan rẹ egba ofovwin eje me tẹnrẹn urhiẹ rẹ ofovwin je kobaro kẹ iniọvo rẹ ovwan vwọ shariẹ Jọdan na vrẹ. Ovwan jẹ ukẹcha ẹ vwọ kẹ ayeen 15 bẹsiẹ Jihova vwọ kẹ iniọvo rẹ ovwan urovwoma kirobo rọ kẹ ovwan nure na, ayen me je re ughwẹ rẹ otọ rẹ Jihova Ọghẹnẹ rẹ ovwan vwọ kẹ ayen na. Ọyena da wan nu, ovwan gbe rhivwin kpo otọ ra vwọ kẹ ovwan nẹ ovwan dia je re ughwẹ rọyen na, otọ rẹ Mosis odibo ri Jihova vwọ kẹ ovwan vwẹ ẹbẹre ọnre va nẹcha ri Jọdan na.’”
16 Ayen da kpahen kẹ Joshua nẹ: “Avwanre che ru emu eje ru wo ji iji rọyen na, avwanre ji che kpo kasan kasan ru wo ji avwanre ra. 17 Kirobo rẹ avwanre ru kemu kemu rẹ Mosis tare, ọtiọyen avwanre ji che ru kẹ wẹ. Takpe nẹ Jihova Ọghẹnẹ wẹn vẹ owẹ dia kirobo rọ vẹ Mosis diarọ. 18 Kohwo kohwo ro gbe vwọso iji wẹn ro ru nene iji ejobi ru wọ vwọ kẹẹ, ka teyọn hwe. Takpe nẹ fiudugberi rere wọ goma.”