Joshua

8 Ọyena vwọ wan nu, Jihova da ta kẹ Joshua nẹ: “Wọ djoshọ yẹrẹ phariẹẹ. Reyọ ituofovwin na eje nene oma rere ovwan kpare ofovwin kpo Ai. Nighere, mi phi ovie rẹ Ai, ihwo rọyen, orere rọyen, kugbe otọ rọyen phiyọ obọ wẹn nure. 2 Ru Ai vẹ ovie rọyen kirobo wo ru Jẹriko vẹ ovie rọyen, ekuakua rọyen vẹ ichuru rọyen ọvo yen wọ ghwẹ kẹ oma wẹn. Hwa phiyọ hẹrhẹ vwẹ obuko rẹ orere na.”

3 Ọtiọyena Joshua vẹ ituofovwin na eje da kpare ofovwin kpo Ai. Joshua da sane egba ofovwin 30,000 o de ji ayen yanran vwẹ ason. 4 Ọ da vwẹ iji nana vwọ kẹ ayen: “Nighere, ovwan hwa phiyọ obuko rẹ orere na. Ovwan yan sherẹ kẹ orere naa, ovwan eje me je choma. 5 Mẹvwẹ vẹ ihwo eje re vẹ ovwẹ gba herọ ki che kpo obo orere na, ọke rẹ ayen da ro otafe rhi nene avwanre họnre kirobo ri jovwo, kẹ avwanre cha mrẹ ayen djẹ. 6 Ọke rẹ ayen da ro otafe rhi nene avwanre họnre, kẹ avwanre cha riẹriẹ ayen vwo nẹ orere na, kidie ayen cha tanẹ, ‘Ayen mrẹ avwanre djẹ kirobo ri jovwo.’ Kẹ avwanre cha mrẹ ayen djẹ. 7 Ọke yena ovwan gbe vrẹn nẹ asan rẹ ovwan hwa phiyọ na rere ovwan reyọ orere na; Jihova Ọghẹnẹ rẹ ovwan che phio phiyọ ovwan obọ. 8 Ugege rẹ ovwan da reyọ orere na nu, ovwan gbe phi erhanre phiyọ. Ovwan ru nene ota ri Jihova. Nighere, me vwẹ iji vwọ kẹ ovwan nure.”

9 Ọtiọyena Joshua de ji ayen yanran, ayen da yanran kpo asan rẹ ayen cha hwa phiyọ na; ayen da hwa phiyọ uvwre rẹ Bẹtẹl vẹ Ai, vwẹ ẹbẹre ọnre shera rẹ Ai, Joshua vẹ ihwo ri chekọ na da ghwọrọ ason na kugbe.

10 Ọke rẹ Joshua vwo vrẹn vwẹ edegburhiọke ji se* ituofovwin na koko nu, ọ vẹ ekpako rẹ Izrẹl de sun ayen kpo Ai. 11 Ituofovwin na eje re vẹ ọyen gba herọ da yanran kpo obaro rẹ orere na. Ayen de wonphiyọ* obohwẹre ọnre rẹ Ai, iyara hẹ uvwre rayen vẹ Ai. 12 Vwẹ uvwre ọke nana, jẹ o ji omarẹ eshare 5,000 nẹ ayen ra hwa phiyọ vwẹ uvwre rẹ Bẹtẹl vẹ Ai, vwẹ ẹbẹre ọnre shera rẹ orere na re. 13 Ọtiọyena i ri me bun vwẹ ituofovwin na de wonphiyọ obohwẹre ọnre rẹ orere na, e re hwa phiyọ na ke rha hẹ ẹbẹre ọnre shera rẹ orere na, Joshua da yan kpo uherevie rẹ iyara* na vwẹ ason yena.

14 Ugege rẹ ovie rẹ Ai vwọ mrẹ ọnana, ọ vẹ eshare rẹ orere na de brokpakpa vwẹ edegburhiọke ra vwa ihwo rẹ Izrẹl vwẹ ofovwin vwẹ asan ọvo ro kpenu kẹ aton na. Ẹkẹvuọvo ọ riẹnre nẹ a hwa phiyọ hẹrhẹ ọyen vwẹ obuko rẹ orere naa. 15 Ọke rẹ eshare rẹ Ai vwọ kpare ofovwin rhe, Joshua vẹ ihwo rẹ Izrẹl eje da djẹ nene idjerhe ro kpo obo aton na. 16 Ọtiọyena ayen de se eshare rẹ orere na eje nẹ ayen rhe vwọtua ayen; rẹ ayen vwọtua Joshua na, jẹ a riẹriẹ ayen vwo nẹ orere na. 17 Ọshare vuọvo chekọ vwẹ Ai vẹ Bẹtẹl ro jẹ ihwo rẹ Izrẹl na ẹvwọtuaa. Ayen da yanjẹ orere na vwo rhiephiyọ ghwroro, ayen da vwọtua ihwo rẹ Izrẹl.

18 Asaọkiephana Jihova da ta kẹ Joshua nẹ: “Riẹn javilin rọhẹ obọ wẹn na phiyọ Ai, kidie obọ wẹn yen mi che phio phiyọ.” Ọtiọyena Joshua da riẹn javilin rọhẹ obọ rọyen na phiyọ orere na. 19 Ọ ghwa vwọ rionbọ rọyen phia, ihwo re hwa phiyọ na de brokpakpa vrẹn nẹ asan rẹ ayen hwa phiyọ na, ayen da djẹ ro orere na je reyọ. Ugege yena ayen de phi erhanre phiyọ.

20 Ọke rẹ eshare rẹ Ai vwo kuomarhẹriẹ, ayen da mrẹ ivwirhi rẹ orere na ro brẹ kpenu, ayen rha sa djẹ kpo ẹbẹre vuọvo ọfaa. Ọtiọyena ihwo re mrẹ ayen djẹ kpo obo aton na jovwo na da rhẹrioma, kẹ ayen vwọtua ihwo re vwọtua ayen jovwo na. 21 Ọke rẹ Joshua vẹ ihwo rẹ Izrẹl eje vwọ mrẹ nẹ ihwo re hwa phiyọ na reyọ orere na re, je mrẹ ivwirhi rẹ orere na ro brẹ kpenu, ayen de kuomarhẹriẹ ra họnre eshare rẹ Ai. 22 E re reyọ orere na de nẹ evun rọyen rhe rhe vwa ayen, ọtiọyena e de ke ihwo rẹ Ai dje vwẹ uherevie, ihwo rẹ Izrẹl evo hẹ ẹbẹre nana, efa hẹ ẹbẹre yena, ayen da nyavwe ayen hwe bẹsiẹ rẹ ohwo vuọvo rhe chekọ yẹrẹ djẹ vabọọ. 23 Ẹkẹvuọvo ayen hwe ovie rẹ Ai naa, ayen de muo vwo rhe Joshua.

24 Ọke rẹ ihwo rẹ Izrẹl vwọ vwẹ ọlọkọ hwe ihwo rẹ Ai eje rehẹ evunrẹ aton rẹ ayen vwọtua ayen ro jovwo na nu, ihwo rẹ Izrẹl eje de rhivwin kpo Ai ra vwẹ ọlọkọ hwe ihwo ri chekọ vwẹ evun rọyen. 25 Ihwo eje re hweri vwẹ ẹdẹ yena, te eshare te eya da dia 12,000, kọyen ihwo rẹ Ai eje. 26 Joshua si obọ rọ vwọ riẹn javilin na phia na reyọọ, bẹsiẹ rọ vwọ ghwọrọ ihwo rẹ Ai ejobi karekare. 27 Ẹkẹvuọvo ihwo rẹ Izrẹl de mu ichuru je ghwẹ ekuakua rẹ orere na reyọ, vwo nene iji rẹ Jihova vwọ kẹ Joshua.

28 Joshua da torhẹ Ai, ẹko rẹ ikuta ra ghwẹ koko ọvo kọyen chekọ vwọ rhi te ọke na. 29 Ọ da vwẹ ovie rẹ Ai vwọ ya urhe bẹsiẹ ovwọnvwọn vwo te, rẹ ọnre na vwọ guọnọ she re, Joshua da vwẹ iji phia nẹ e mu orivwin rọyen nẹ urhe na phiyotọ. Ayen de muo phiyọ anurhoro rẹ orere na, ayen da ghwẹ ikuta buebun koko vwẹ enu rọyen, rọ je herọ rhi te ọke na.

30 Ọke yena yen Joshua vwọ so agbada kẹ Jihova Ọghẹnẹ rẹ Izrẹl vwẹ Ugbenu rẹ Ibal, 31 kirobo rẹ Mosis odibo ri Jihova vwẹ iji vwọ kẹ ihwo rẹ Izrẹl vwo nene obo re siro vwẹ ọbe rẹ Urhi ri Mosis nẹ: “Agbada ra vwẹ ọsoso rẹ ikuta vwo ru, ra vwẹ utehru vwo kporon ikuta rọyeen.” Enu rọyen yen ayen de ze izobo rẹ ẹtorhẹ kẹ Jihova ọtiọyen ji te izobo rẹ ọrekugbe.

32 Ọyena vwọ wan nu, o de si Urhi rẹ Mosis siri na phiyọ enu rẹ ikuta na vwẹ irharo rẹ ihwo rẹ Izrẹl na. 33 Izrẹl ejobi, ekpako rayen, inotu na, kugbe iguẹdjọ rayen de mudia te obonẹ te obonẹ rẹ Ekpeti rẹ Ọphọ na vwẹ obaro rẹ irherẹn re dia ihwo ri Livae ri muẹ ekpeti rẹ ọphọ ri Jihova na. Erhorha vẹ ihwo rẹ Izrẹl jehẹ etiyin. Ubro rayen mudia obaro rẹ Ugbenu ri Gẹrizim, ubro ro chekọ de rhe mudia obaro rẹ Ugbenu rẹ Ibal (kirobo rẹ Mosis odibo ri Jihova vwẹ iji rọyen phia jovwo re), rẹ ayen vwo bruba kẹ ihwo rẹ Izrẹl na. 34 Ọyena vwọ wan nu, o de se eta rẹ Urhi na ejobi phia gorigori, ebruba na kugbe iyorin na, vwo nene obo re si phiyọ ọbe rẹ Urhi na eje. 35 O vwo ọvuọvo vwẹ usun rẹ eta na ejobi rẹ Mosis ji iji rọyen rẹ Joshua je se phia gorigori vwẹ obaro rẹ ọghwẹgbe rẹ Izrẹl na ejee, te eya te emọ kugbe erhorha re dia* ohri rayen.