Joshua

10 Ugege rẹ Ovie Adonaizidẹk ri Jerusalẹm vwo nyo nẹ Joshua reyọ Ai je ghwọrọ totọ, nẹ o ru Ai vẹ ovie rọyen kirobo ro ru Jẹriko vẹ ovie rọyen, kugbe oborẹ ihwo ri Gibiọn vwo ọrhọnvwekugbe rẹ ufuoma vẹ Izrẹl, rẹ ayen da dia ohri rayen, 2 oshọ de muo mamọ kidie Gibiọn ọyen orere rode, kerẹ ọvo vwẹ usun rẹ irere rẹ ivie na. Ọ rho nọ Ai, eshare rọyen eje jẹ egba ofovwin. 3 Ọtiọyena Adonaizidẹk ovie ri Jerusalẹm da vwẹ ovuẹ nana vwo rhe Hoham ovie ri Hẹbrọn, Pairam ovie ri Jamọt, Jefaya ovie ri Lekish, kugbe Dibiẹ ovie rẹ Ẹglọn: 4 “Ovwan rhe cha vwẹ uko rere e nene Gibiọn họnre, kidie ọ vẹ Joshua kugbe ihwo rẹ Izrẹl na vwo ọrhọnvwekugbe rẹ ufuoma re.” 5 Ọtiọyena ivie iyorin rẹ ihwo rẹ Amọ na—ovie ri Jerusalẹm, ovie ri Hẹbrọn, ovie ri Jamọt, ovie ri Lekish, kugbe ovie rẹ Ẹglọn—da ghwomakoko vẹ ituofovwin rayen, ayen da yanran re wonphiyọ* asan rẹ ayen de che nene Gibiọn họnre.

6 Ọtiọyena eshare ri Gibiọn da vwẹ ovuẹ rhe Joshua vwẹ asan ro wonphiyọ vwẹ Gilga nẹ: “Wọ kpairoro vrẹ* idibo wẹẹn. Brokpakpa rhe! Rhi sivwin avwanre rere wọ cha avwanre uko! Ivie rẹ ihwo rẹ Amọ eje rehẹ ekogho rẹ igbenu na ghwomakoko rhe vwọso avwanre.” 7 Ọtiọyena Joshua vẹ ituofovwin na eje kugbe egba ofovwin na de vrẹn nẹ Gilga kpo oboyin.

8 Jihova da ta kẹ Joshua nẹ: “Wo jẹ oshọ rayen mu wee, kidie mi phi ayen phiyọ obọ wẹn nure. O vwo ọvuọvo vwẹ usun rẹ ayen ro che se mudia vwọso owẹẹ.” 9 Joshua da ro ayen ọrhan ọke rọ vwọ ghwọrọ ason na eje vwọ yan nẹ Gilga rhe nu. 10 Jihova da so oyanghan phiyọ ohri rayen vwẹ obaro rẹ ihwo rẹ Izrẹl, ayen de hwe ihwo buebun vwẹ usun rayen vwẹ Gibiọn, ayen da vwọtua ayen wan idjerhe rẹ ugbenu ri Bẹt-horọn, ayen da nyavwe ayen hwe rhirin re te Azika kugbe Makida. 11 Rẹ ayen vwọ djẹ kẹ ihwo rẹ Izrẹl je djẹ nene ọghwrọrọ ri Bẹt-horọn, Jihova de siobọnẹ imicho ride nẹ obenu rhe she teyen ayen rhirin re te Azika, ayen de ghwu. Vwọrẹ uyota, ihwo rẹ imicho na hweri bun vrẹ e rẹ ihwo rẹ Izrẹl vwẹ ọlọkọ hwe.

12 Vwẹ ọke yena, vwẹ ẹdẹ rẹ Jihova si ihwo rẹ Amọ nẹ obaro rẹ ihwo rẹ Izrẹl na yen Joshua vwọ ta kẹ Jihova vwẹ obaro rẹ Izrẹl nẹ:

13 Ọtiọyena ọnre na de mudia, emeranvwe na nẹ asan rọ hepha bẹsiẹ ẹgborho na vwọ ghwọrọ ivwighrẹn rayen nuu. E rhe sio phiyọ ọbe ri Jesha? Ọnre na mudia vwẹ uherevie rẹ ophephe na, o rhe brokpakpa she vwẹ omarẹ ọsoso ẹdẹ ọvoo. 14 A je rhe mrẹ ẹdẹ kerẹ ọnana dẹvoo, owenẹ ọ dia ẹdẹ re wanre yẹrẹ e re vwọ kpahọn, rẹ Jihova vwọ kerhọ rẹ upho rẹ ohworakpọ, kidie Jihova họnra vwọ kẹ Izrẹl.

15 Ọyena vwọ wan nu, Joshua vẹ Izrẹl eje de rhivwin kpo asan rẹ ayen wonphiyọ na vwẹ Gilga.

16 Vwẹ uvwre rẹ ọke nana, ivie iyorin na da djẹ re siomanu vwevunrẹ unu rẹ ukuta* vwẹ Makida. 17 Ọtiọyena a da niyẹnrẹn kẹ Joshua nẹ: “A mrẹ ivie iyorin na ri siomanu vwevunrẹ unu rẹ ukuta vwẹ Makida.” 18 Ọtiọyena Joshua da ta: “We ghorien ikuta ride vwo din unu rẹ ukuta na, ovwan je vwẹ eshare mu nẹ e rhẹrẹ ayen. 19 Ẹkẹvuọvo ovwan ri chekọ na domajẹẹ, ovwan vwọtua ivwighrẹn rẹ ovwan rere ovwan nyavwe ayen hwe vwo nẹ obuko rhe. Ovwan vwẹ uphẹn kẹ ayen rere ayen ro evunrẹ irere rayeen, kidie Jihova Ọghẹnẹ rẹ ovwan phi ayen phiyọ obọ rẹ ovwan nure.”

20 Ọke rẹ Joshua vẹ ihwo rẹ Izrẹl na vwo hwe buebun rẹ ihwo na te ẹdia rẹ ayen vwo si ayen eje nẹ otọ nu, jokparẹ imihwo evo ri sivwin rhọ, re djẹ vabọ ro irere ra gbogba riariẹ na, 21 ihwo na eje de rhivwin bru Joshua rhe vwẹ asan rẹ ayen wonphiyọ na vwẹ Makida gbẹrhẹnẹdẹ. O rhe vwo ohwo vuọvo ro yivwin ta ota* vwọso ihwo rẹ Izrẹl naa. 22 Joshua da tanẹ: “Ovwan rhie unu rẹ ukuta na rere ovwan reyọ ivie iyorin na nẹ evun rọyen rhe vwe.” 23 Ọtiọyena ayen da reyọ ivie iyorin nana vwo nẹ unu rẹ ukuta na bro ra: ovie ri Jerusalẹm, ovie ri Hẹbrọn, ovie ri Jamọt, ovie ri Lekish, kugbe ovie rẹ Ẹglọn. 24 Ọke rẹ ayen vwọ reyọ ivie nana vwo bru Joshua rhe, o de se eshare rẹ Izrẹl ejobi, ọ da ta kẹ inotu rẹ ituofovwin ri nenire yanran na nẹ: “Ovwan yanrhe obaro. Ovwan mu awọ rẹ ovwan kpahen obuko ohọre rẹ ivie nana.” Ayen da yanrhe obaro, ayen de mu awọ rayen kpahen obuko ohọre rayen. 25 Joshua da ta kẹ ayen nẹ: “Ovwan djoshọ yẹrẹ phariẹẹ. Ovwan fiudugberi rere ovwan goma, kidie ọnana yen oborẹ Jihova che ru kẹ ivwighrẹn rẹ ovwan eje rẹ ovwan nene họnra na.”

26 Joshua da nyavwe ayen hwe, ọ da vwẹ ayen ya irhe iyorin, ayen da dia enu rẹ irhe na rhirin re te ovwọnvwọn. 27 Ọnre vwo she re, Joshua da vwẹ iji phia nẹ e mu ayen nẹ irhe na phiyotọ, rere e do ayen phiyọ unu rẹ ukuta rẹ ayen de siomanu jovwo na. E de mu ikuta ride vwo din unu rẹ ukuta na, enana* je herọ rhi te ọke na.

28 Joshua da reyọ Makida vwẹ ẹdẹ yena, ọ da vwẹ ọlọkọ vwọ ghwọrọ. O hwe ovie rọyen vẹ kohwo kohwo* rọhẹ evun rọyen, ọ yanjẹ ohwo vuọvo vwoo. O ru ovie ri Makida kirobo ro ru ovie ri Jẹriko.

29 Joshua vẹ Izrẹl eje de vrẹn nẹ Makida kpo Libna, ayen de nene Libna họnre. 30 Jihova de ji phi Libna vẹ ovie rọyen phiyọ obọ rẹ Izrẹl, ayen da vwẹ ọlọkọ ghwọrọ vẹ kohwo kohwo* rọhẹ evun rọyen, ayen yanjẹ ohwo vuọvo vwo vwọọ. Ayen de ru ovie rọyen kirobo rẹ ayen ru ovie ri Jẹriko.

31 Ọyena vwọ wan nu, Joshua vẹ Izrẹl eje de vrẹn nẹ Libna kpo Lekish, ayen de wonphiyọ etiyin, ayen de nene họnre. 32 Jihova de phi Lekish phiyọ obọ rẹ Izrẹl, ayen da reyọ vwẹ ẹdẹ rivẹ. Ayen da vwẹ ọlọkọ ghwọrọ vẹ kohwo kohwo* rọhẹ evun rọyen, kirobo rẹ ayen ru Libna.

33 Horam ovie ri Giza da yanran ra cha Lekish uko, ẹkẹvuọvo Joshua da nyavwọ vẹ ihwo rọyen hwe rhirin re te ọke rẹ ohwo vuọvo rhe chekọọ.

34 Ọyena vwọ wan nu, Joshua vẹ Izrẹl eje de vrẹn nẹ Lekish kpo Ẹglọn, ayen de wonphiyọ etiyin, ayen de nene họnre. 35 Ayen da reyọ vwẹ ẹdẹ yena je vwẹ ọlọkọ ghwọrọ. Ayen da ghwọrọ kohwo kohwo* rọhẹ evun rọyen vwẹ ẹdẹ yena, kirobo rẹ ayen ru Lekish.

36 Ọyena vwọ wan nu, Joshua vẹ Izrẹl eje de vrẹn nẹ Ẹglọn kpo Hẹbrọn, ayen de nene họnre. 37 Ayen da reyọ, ayen da vwẹ ọlọkọ ghwọrọ, ovie rọyen, irho rọyen, kugbe kohwo kohwo* rọhẹ evun rọyen, ayen yanjẹ ohwo vuọvo vwoo. Kirobo ro ru Ẹglọn, ọtiọyen ọ je ghwọrọ vẹ kohwo kohwo* rọhẹ evun rọyen.

38 Ukuotọ rọyen, Joshua vẹ Izrẹl eje da gare opharo vi Dibiẹ, ayen de nene họnre. 39 Ọ da reyọ, ovie rọyen, vẹ irho rọyen eje, ayen da vwẹ ọlọkọ vwọ ghwọrọ ayen, ayen da ghwọrọ kohwo kohwo* rọhẹ evun rọyen, ayen yanjẹ ohwo vuọvo vwoo. O ru Dibiẹ vẹ ovie rọyen kirobo ro ru Hẹbrọn kugbe Libna vẹ ovie rọyen.

40 Joshua de phi otọ rẹ ekogho rẹ igbenu na eje kparobọ, Nẹgẹb na, Shẹfila na, kugbe eghwrọrọ na, vẹ ivie rayen eje, ọ yanjẹ ohwo vuọvo vwoo; ọ ghwọrọ kemu kemu rọ wẹn karekare, kirobo rẹ Jihova Ọghẹnẹ rẹ Izrẹl ji iji rọyen. 41 Joshua de phi ayen kparobọ vwo nẹ Kedẹsh-bania re te Gaza kugbe otọ ri Goshẹn eje re te Gibiọn. 42 Joshua phi ivie nana eje kparobọ je reyọ otọ rayen vwẹ uvwre ọke vuọvo, kidie Jihova Ọghẹnẹ rẹ Izrẹl yen họnra vwọ kẹ Izrẹl. 43 Ọyena vwọ wan nu, Joshua vẹ Izrẹl eje de rhivwin kpo asan rẹ ayen wonphiyọ na vwẹ Gilga.