Joshua

2 Ọyena vwọ wan nu, Joshua ọmọ ri Nọn de ji eshare ivẹ vwo nẹ Shitim nẹ e ra bẹbẹ ni otọ na. Ọ da ta kẹ ayen nẹ: “Ovwan yanran re ni otọ na, ma rho kẹ Jẹriko.” Ayen da yanran, ayen de rhi te uwevwin rẹ igberadja ọvo re se Rehab, ayen da dia etiyin. 2 A da vuẹ ovie ri Jẹriko nẹ: “Nighere! Eshare rẹ Izrẹl rhere vwẹ ason na rhe bẹbẹ ni otọ na.” 3 Ọtiọyena ovie ri Jẹriko da vwẹ ovuẹ rhe Rehab nẹ: “Reyọ eshare re rhere rehẹ uwevwin wẹn na phia, kidie ayen rhere rhe bẹbẹ ni otọ na ejobi.”

4 Ẹkẹvuọvo aye na da reyọ eshare ivẹ na, o de si ayen nu. Ọ da ta: “Uyota, eshare na bru vwe rhe, ẹkẹvuọvo me riẹn asan rẹ ayen nurhee. 5 Ọke vwo she nu ra vwọ guọnọ kanra ẹchẹ rẹ anurhoro rẹ orere na, eshare na da ro otafe. Me riẹn asan rẹ ayen raree, ẹkẹvuọvo ovwan de brokpakpa vwọtua ayen, ovwan sa djẹ ayen mu.” 6 (Ẹkẹvuọvo ọ reyọ ayen kpo enu rẹ uwevwin na jovwo re, ji si ayen nu vwẹ uvwre rẹ igbẹn rẹ iflasi ra gbare ẹkuẹko vwẹ enu rẹ uwevwin na.) 7 Ọtiọyena eshare na da vwọtua ayen vwo nene idjerhe ro kpo ẹbẹre ra sa vwẹ owọ shue wan rẹ urhie ri Jọdan, a da kanre ẹchẹ rẹ anurhoro rẹ orere na ugege rẹ ihwo re vwọtua ayen na vwọ ro otafe nu.

8 Tavwen eshare na ki sherhẹn, o de bru ayen ra kpo enu rẹ uwevwin na. 9 Ọ da ta kẹ eshare na nẹ: “Me riẹnre nẹ Jihova cha vwẹ otọ na kẹ ovwan, oshọ rẹ ovwan ji muẹ avwanre gangan. Udu brẹ ihwo eje re dia otọ na fikirẹ ovwan, 10 kidie avwanre nyo kpahen oborẹ Jihova nẹrhẹ ame rẹ Abadi Ọvwavware na yamu vwọ kẹ ovwan ọke rẹ ovwan vwo nẹ Ijipt cha, vẹ oborẹ ovwan ru ivie ivẹ rẹ ihwo rẹ Amọ, Saihọn kugbe Ọg, ihwo rẹ ovwan ghwọrọre karekare vwẹ ẹbẹre ro chekọ* ri Jọdan na. 11 Ọke rẹ avwanre vwo nyo kpahọn, udu de nẹ avwanre awọ,* o vwo ohwo vuọvo ro se fiudugberi* fikirẹ ovwaan, kidie Jihova Ọghẹnẹ rẹ ovwan, ọyen Ọghẹnẹ vwẹ idjuvwu na vẹ akpọ na. 12 Asaọkiephana, biko, ovwan duvwun iyorin kẹ vwẹ vwẹ odẹ ri Jihova nẹ kidie nẹ mi dje ẹguọnọ ro jẹ rhẹriẹ kẹ ovwan, ovwan ji che dje ẹguọnọ ro jẹ rhẹriẹ kẹ evwruwevwin rẹ ọsẹ mẹ; ovwan me je kẹ vwẹ oka ro muẹro* nẹ ovwan che ru nene oborẹ ovwan tare. 13 Ovwan ke sẹro rẹ arhọ rẹ ọsẹ mẹ vẹ oni mẹ, iniọvo mẹ rẹ eshare vẹ e rẹ eya, kugbe ihwo rayen eje, kẹ ovwan ji sivwin avwanre* vwo nẹ ughwu.”

14 Ọtiọyena eshare na da ta kẹ nẹ: “Avwanre cha vwẹ arhọ rẹ avwanre vwo wene ọ rẹ ovwan!* Ovwan rha vuẹ ohwo vuọvo kpahen oyan rẹ avwanre naa, kẹ avwanre che dje ẹguọnọ ro jẹ rhẹriẹ kugbe evun-ẹfuọn kẹ wẹ ọke rẹ Jihova da vwẹ otọ na kẹ avwanre.” 15 Ọyena vwọ wan nu, ọ da vwẹ ufi vwọ lọrọ ayen wan ovakpo na kpotọ, kidie uwevwin rọyen hẹ enu rẹ ẹbẹre ọvo rẹ igbẹhẹ rẹ orere na. Vwọrẹ uyota, enu rẹ igbẹhẹ na yen ọ dia. 16 Ọ da ta kẹ ayen nẹ: “Ovwan kpo ekogho rẹ igbenu na re siomanu ẹdẹ erha rere ihwo re vwọtua ovwan na vwo jẹ ovwan ẹmrẹ. Siẹrẹ ihwo re vwọtua ovwan na de rhivwin rhire, kẹ ovwan se kpo asan rẹ ovwan ra.”

17 Eshare na da ta kẹ aye na nẹ: “Avwanre cha vrabọ rẹ abe rẹ iyorin nana ru wọ nẹrhẹ avwanre duvwun na 18 jokpanẹ ọke rẹ avwanre da rhe otọ na, wọ gba uruhrẹ ọvwavware nana si ovakpo ru wọ wan lọrọ avwanre kpotọ na. Wo mi koko ọsẹ wẹn, oni wẹn, iniọvo wẹn kugbe ihwo rẹ evwruwevwin rẹ ọsẹ wẹn eje vẹ owẹ phiyọ uwevwin nana. 19 Ọ da dianẹ ohwo ọvo nẹ uwevwin wẹn na ro otafe, ọbara rọyen cha dia uyovwin rọyen, avwanre ke vrabọ rẹ abe. Ẹkẹvuọvo ọ da dianẹ a wan ohwo* rọ vẹ owẹ daji evunrẹ uwevwin na oma, ọbara rọyen kọ dia uyovwin rẹ avwanre. 20 Ẹkẹvuọvo wọ da niyẹnrẹn rẹ oyan rẹ avwanre na, kẹ avwanre cha vrabọ rẹ abe rẹ iyorin ru wọ nẹrhẹ avwanre duvwun kẹ wẹ na.” 21 Ọ da kpahen: “E jẹ ọ dia ọtiọyen kirobo rẹ ovwan tarọ na.”

Ọtiọyena o de siobọnẹ ayen, ayen da yanran. Ọyena vwọ wan nu, o de churu ufi ọvwavware na si ovakpo na. 22 Ayen da yanran kpo ekogho rẹ igbenu na, ayen da dia oboyin ẹdẹ erha, bẹsiẹ rẹ ihwo re vwọtua ayen na vwo rhivwin. Ihwo re vwọtua ayen na guọnọ ayen nene idjerhe na ejobi ẹkẹvuọvo ayen mrẹ ayeen. 23 Eshare ivẹ na de wontọ nẹ ekogho rẹ igbenu na rhe, ayen da shariẹ urhie na vrẹ, ayen de bru Joshua ọmọ ri Nọn rhe. Ayen de gbikun rẹ obo re phia kẹ ayen na eje kẹ. 24 Ayen da ta kẹ Joshua nẹ: “Jihova phi otọ na eje phiyọ obọ rẹ avwanre nure. Vwọrẹ uyota, udu brẹ ihwo eje re dia otọ na fikirẹ avwanre.”