Joshua

15 Otọ ra ghare* vwọ kẹ uvwiẹ ri Juda, vwọ kẹ erua rayen, hẹre te ughwru rẹ Idọm, aton ri Zin, re te Nẹgẹb na vwẹ oboba rẹ obọrhen ọnre rọyen. 2 Ughwru rayen vwẹ obọrhen ọnre tonphiyọ vwo nẹ oboba rẹ Abadi rẹ Ughwanka* na, vwo nẹ ọkọkọ ro hirharoku obọrhen ọnre. 3 Ọ hẹre nene obọrhen ọnre re te idjerhe ra wan yerẹn kpo Akrabim, ọ da wanvrẹ kpo Zin, o de rhe nene obọrhen ọnre kpo Kedẹsh-bania, wan Hẹzrọn re te Ada, o de kinriariẹ kpo Kaka. 4 Ọ da wanvrẹ kpo Azmọn je hẹre te Iwadi* rẹ Ijipt, ughwru na de vwoba vwẹ Abadi na.* Ọnana yen ughwru rayen vwẹ obọrhen ọnre.

5 Ughwru rẹ ẹbẹre ọnre va nẹcha na yen Abadi rẹ Ughwanka* na re te oboba ri Jọdan na, ughwru na vwẹ ẹbẹre rẹ obohwẹre ọnre na ọyen ọkọkọ rẹ abadi na vwẹ oboba ri Jọdan. 6 Ughwru na kpo Bẹt-họgla je wan obohwẹre ọnre ri Bẹt-araba vrẹ, ughwru na de kpenu re te ukuta ri Bohan ọmọ ri Rubẹn. 7 Ughwru na de kpo Dibiẹ vwẹ Iyara* rẹ Ekọ, o de gunu kpo obohwẹrẹ ọnre kpo Gilga, rọhẹ obaro rẹ idjerhe ra wan yerẹn kpo Adọmim, kọyen obọrhen ọnre rẹ iwadi na, ughwru na da wanvrẹ kpo asan ame rẹ Ẹn-shimẹsh, o de vwoba vwẹ Ẹn-rogẹl. 8 Ughwru na de kpo Iyara rẹ Ọmọ ri Hinọm, kpo ọghwrọrọ rẹ ihwo ri Jẹbus vwẹ obọrhen ọnre na, kọyen Jerusalẹm, ughwru na de kpo obenu rẹ ugbenu ro hirharoku Iyara ri Hinọm vwẹ ẹbẹre ọnre shera na, rọhẹ oboba rẹ Iyara* ri Rẹfeim vwẹ obohwẹre ọnre na. 9 E de gbere ughwru na vwo nẹ enu rẹ ugbenu na kpo ogbugbu rẹ ame ri Nẹftoa, je hẹre te irere rẹ Ugbenu rẹ Ifrọn; e ji gbere ughwru na kpo Bela, kọyen Kiriat-jiarim. 10 Ughwru na de kinriariẹ vwo nẹ Bela vwẹ ẹbẹre ọnre shera kpo Ugbenu ri Siẹ, je wan ọghwrọrọ rẹ Ugbenu ri Jiarim vwẹ obohwẹre ọnre vrẹ, kọyen Kẹsalọn, o de kpo Bẹt-shimẹsh je wanvrẹ kpo Timna. 11 Ughwru na da hẹre kpo ọghwrọrọ rẹ Ẹkrọn rọhẹ obohwẹre ọnre na, e de gbere ughwru na kpo Shikẹrọn, ọ da wanvrẹ kpo Ugbenu ri Bela, je hẹre te Jabnil, ughwru na de vwoba vwẹ abadi na.

12 Ughwru rẹ ẹbẹre ọnre shera na hẹ Abadi Rode* na vẹ orhoma rọyen. Ọnana yen ughwru rẹ emọ ri Juda vwo nene erua rayen vwẹ kẹbẹre kẹbẹre.

13 Joshua da ghare ẹkẹn vwọ kẹ Kelẹb ọmọ ri Jẹfunẹ vwẹ ohri rẹ emọ ri Juda vwo nene iji rẹ Jihova vwọ kẹ, kọyen Kiriat-aba (Aba yen ọsẹ rẹ Enak), kọyen Hẹbrọn. 14 Ọtiọyena Kelẹb da djẹ emeshare rẹ Enak erha na vwo nẹ etiyin: Shishai, Ahaiman, kugbe Talmai, emọ rẹ Enak. 15 Ọyena vwọ wan nu, o de nẹ etiyin re nene ihwo re dia Dibiẹ họnre. (Kiriat-sifa yen odẹ ri Dibiẹ jovwo.) 16 Kelẹb da ta: “Ohwo ro nene Kiriat-sifa họnre je reyọ, me cha vwẹ ọmọtẹ mẹ Aksa vwọ kẹ rọvwọn.” 17 Ọtniẹl ọmọ ri Kinaz, oniọvo ri Kelẹb da reyọ. Ọtiọyena ọ da vwẹ ọmọtẹ rọyen Aksa vwọ kẹ rọvwọn. 18 Ọke ro vwo kpo uwevwin rẹ ọshare rọyen, ọmọtẹ na da vuẹ ọshare rọyen nẹ ọ rẹ ọsẹ rọyen rere ọ kẹ otọ ọvo. Ọmọtẹ na de wontọ nẹ ekẹkẹtẹ rọyen.* Kelẹb da nọ nẹ: “Die wọ guọnọre?” 19 Ọmọtẹ na da tanẹ: “Biko bruba kẹ vwẹ, kidie wọ kẹ vwẹ otọ vwẹ obọrhen ọnre* jovwo re; je kẹ vwẹ Gulọt-meim.”* Ọtiọyena ọ da kẹ Gulọt rẹ Obenu vẹ Gulọt rẹ Obotọ.

20 Ọnana yen uku rẹ uvwiẹ ri Juda vwo nene erua rayen.

21 Irere rẹ uvwiẹ ri Juda rehẹ oboba vwẹ obo ughwru rẹ Idọm vwẹ obọrhen ọnre na yen: Kabziẹl, Ida, Jegọ, 22 Kaina, Daimona, Adeda, 23 Kidẹsh, Hezọ, Itnan, 24 Zif, Tilẹm, Bielọt, 25 Hezọ-hadata, vẹ Kiriọt-hẹzrọn, kọyen Hezọ, 26 Emam, Shima, Moleda, 27 Heza-gada, Hẹshmọn, Bẹt-pẹlẹt, 28 Heza-shual, Biẹ-shiba, Biziotaya, 29 Bela, Aim, Izẹm, 30 Ẹltolad, Kisol, Họma, 31 Ziklag, Madmana, Sansanna, 32 Lebeọt, Shilhim, Ein, kugbe Rimọn—irere na eje 29 vẹ eko rayen.

33 Enana yen irere rehẹ Shẹfila na: Ẹshtaọl, Zora, Ashna, 34 Zenoa, Ẹn-ganim, Tapua, Inam, 35 Jamọt, Adọlam, Sokoh, Azika, 36 Sheareim, Aditeim, vẹ Gẹdira kugbe Gẹdirọteim*—irere 14 vẹ eko rayen.

37 Zinan, Hadasha, Migdal-gad, 38 Dailin, Mizpa, Jọktiẹl, 39 Lekish, Bọzkat, Ẹglọn, 40 Kabọn, Lamam, Kitlish, 41 Gẹdirọt, Bẹt-degọn, Neama, kugbe Makida—irere 16 vẹ eko rayen.

42 Libna, Ita, Eshan, 43 Ifta, Ashna, Nizib, 44 Kaila, Akzib, kugbe Marishah—irere irhirin vẹ eko rayen.

45 Ẹkrọn vẹ irho rehẹ otọ rọyen* kugbe eko rọyen; 46 vwo nẹ Ẹkrọn vwẹ ẹbẹre ọnre shera, ekogho eje rehẹ orhoma rẹ Ashdọd kugbe eko rayen.

47 Ashdọd vẹ irho rehẹ otọ rọyen* kugbe eko rọyen; Gaza vẹ irho rehẹ otọ rọyen* kugbe eko rọyen, re te Iwadi rẹ Ijipt, Abadi Rode* na vẹ ekogho re kẹrerẹ.

48 Ekogho rẹ igbenu na, Shemiẹ, Jatiẹ, Sokoh, 49 Dana, Kiriat-sana, kọyen Dibiẹ, 50 Enab, Ẹshtamọ, Enim, 51 Goshẹn, Holọn, kugbe Gailo—irere 11 vẹ eko rayen.

52 Arab, Duma, Ishan, 53 Jenim, Bẹt-tapua, Afika, 54 Họmta, Kiriat-aba, kọyen Hẹbrọn kugbe Zaiọ—irere irhirin vẹ eko rayen.

55 Meọn, Kamẹl, Zif, Jọta, 56 Jẹzriẹl, Jọkdiam, Zenoa, 57 Kein, Gibia, kugbe Timna—irere ihwe vẹ eko rayen.

58 Halhọl, Bẹt-zọ, Gidọ, 59 Mearat, Bẹt-enọt, kugbe Ẹltikọn—irere esan vẹ eko rayen.

60 Kiriat-bel, kọyen Kiriat-jiarim, kugbe Raba—irere ivẹ vẹ eko rayen.

61 Vwẹ aton na, Bẹt-araba, Midin, Sikeka, 62 Nibshan, Orere rẹ Ughwanka na, kugbe Ẹn-gẹdi—irere esan vẹ eko rayen.

63 Vwọ kpahen ihwo ri Jẹbus re dia Jerusalẹm, ihwo ri Juda sa djẹ ayen noo, ọtiọyena ihwo ri Jẹbus na ji nene ihwo ri Juda dia Jerusalẹm rhi te ọke na.