Joshua

16 Otọ ra vwẹ itẹ ghare* kẹ uvwiẹ ri Josẹf nẹ Jọdan na kpo Jẹriko kpo asan ame na vwẹ ẹbẹre ọnre va nẹcha ri Jẹriko, ọ wan aton na vwo nẹ Jẹriko ro ekogho rẹ igbenu ri Bẹtẹl. 2 Ọ hẹre vwo nẹ Bẹtẹl ri Lọz re te ughwru rẹ ihwo rẹ Aki vwẹ Atarọt, 3 o de kpo obotọ rẹ ẹbẹre ọnre shera kpo ughwru rẹ ihwo ri Jaflẹt rhirin re te ughwru ri Bẹt-horọn rẹ Obotọ kugbe Giza, o de vwoba vwẹ abadi na.

4 Ọtiọyena emọ ri Josẹf, Manasẹ kugbe Ifrem da vwẹ otọ rayen vwọ re ughwẹ. 5 Ughwru rẹ uvwiẹ rẹ Ifrem vwo nene erua rayen kẹ ọna: Ughwru rẹ uku rayen vwẹ ẹbẹre ọnre va nẹcha yen Atarọt-ada rhirin re te Bẹt-horọn rẹ Obenu, 6 ughwru na da hẹre re te abadi na. Mikmita hẹ obohwẹre ọnre na, ughwru na de kinriariẹ vwẹ ẹbẹre ọnre va nẹcha kpo Teanat-shailo, ọ da wan ẹbẹre ọnre va nẹcha na vrẹ kpo Jenoa. 7 O de kpotọ vwo nẹ Jenoa kpo Atarọt vẹ Neara re te Jẹriko, ọ da je hẹre re te Jọdan na. 8 Vwo nẹ Tapua, ughwru na de nene ẹbẹre ọnre shera kpo Iwadi ri Kena, o de vwoba vwẹ abadi na. Ọnana yen uku rẹ uvwiẹ rẹ Ifrem vwo nene erua rayen; 9 uvwiẹ rẹ Ifrem ji vwo irere vwevunrẹ uku ri Manasẹ, irere na eje kugbe eko rayen.

10 Ẹkẹvuọvo ayen djẹ ihwo ri Kenan re dia Giza noo, ihwo ri Kenan na je dia ohri rẹ ihwo rẹ Ifrem rhi te ọke na, ayen de rhi hirhephiyọ ihwo ra gba vwo ruiruo.