Iguẹdjọ
3 Enana yen ẹgborho rẹ Jihova yan jovwo nẹ e dia rere ayen sa vwọ davwen ihwo rẹ Izrẹl eje ni, i ri ji rhi rhiẹromrẹ ofovwin rẹ ihwo ri Kenan vuọvoo 2 (ọnana dia ọtiọyen rere ivwiẹ rẹ Izrẹl re cha vwo rhiẹromrẹ ofovwin, ihwo ri ji rhi rhiẹromrẹ oka rẹ orọnvwọn ọtiọyen jovwoo): 3 isun iyorin rẹ ihwo ri Filistia, kugbe ihwo ri Kenan eje, ihwo ri Saidọn, kugbe ihwo ri Haiv re dia Ugbenu ri Lẹbanọn, vwo nẹ Ugbenu ri Bel-hẹmọn rhirin re te Libo-hemat.* 4 Ayen da dia obo ra vwọ davwen Izrẹl ni, ra vwọ riẹn sẹ Izrẹl cha yọnrọn iji ri Jihova rọ vwọ kẹ esẹ rayen womarẹ Mosis. 5 Ọtiọyena ihwo rẹ Izrẹl da dia ohri rẹ ihwo ri Kenan na, ihwo ri Hẹt, ihwo rẹ Amọ, ihwo ri Pẹriz, ihwo ri Haiv, kugbe ihwo ri Jẹbus. 6 Ayen da rọvwọn emetẹ rayen, ayen da vwẹ emetẹ rayen vwọ kẹ emeshare rayen rọvwọn, ayen da ga eghẹnẹ rayen.
7 Ọtiọyena ihwo rẹ Izrẹl de ru obo re brare vwẹ ẹro ri Jihova, Jihova Ọghẹnẹ rayen chọrọ ayen ẹro, ayen da ra ga Bel kugbe ekpọ rẹ ẹga* na. 8 Ọtiọyena Jihova de muophu ọgangan kpahen Izrẹl, ọ da shẹ ayen kẹ Kusharishateim ovie ri Mẹsopotemia.* Ihwo rẹ Izrẹl da ga Kusharishateim ẹgbukpe ẹrenren. 9 Ọke rẹ ihwo rẹ Izrẹl vwo kperi se Jihova vwọ kẹ ukẹcha, Jihova da vwẹ osivwin ọvo vwo mu ro che sivwin ihwo rẹ Izrẹl, Ọtniẹl ọmọ ri Kinaz, oniọvo ri Kelẹb rẹ otete. 10 Jihova da vwẹ ẹwẹn ọfuanfon rọyen kẹ, ọ da rhe dia oguẹdjọ rẹ Izrẹl. Ọke ro vwo kpo ofovwin, Jihova de phi Kusharishateim ovie ri Mẹsopotemia* phiyọ obọ rọyen, o de phi Kusharishateim kparobọ. 11 Ọyena vwọ wan nu, otọ na de vwo urovwoma* ẹgbukpe 40. Ọtniẹl ọmọ ri Kinaz de ghwu.
12 Obọfa ihwo rẹ Izrẹl na da tuẹn eruo rẹ obo re brare phiyọ vwẹ ẹro ri Jihova. Ọtiọyena Jihova da vwẹ uphẹn kẹ Ẹglọn ovie ri Moab nẹ o phi Izrẹl kparobọ, kidie ayen ru obo re brare vwẹ ẹro ri Jihova. 13 Vwọba, ọ da reyọ ihwo rẹ Amọn kugbe ihwo rẹ Amalẹk rhe vwọso ayen. Ayen de nene Izrẹl họnre, ayen da reyọ orere rẹ iriẹ na. 14 Ihwo rẹ Izrẹl da ga Ẹglọn ovie ri Moab ẹgbukpe 18. 15 Ihwo rẹ Izrẹl de kperi se Jihova vwọ kẹ ukẹcha, ọtiọyena Jihova da vwẹ osivwin ọvo vwo mu vwọ kẹ ayen, Ihọd ọmọ ri Gira, ohwo rẹ orua ri Bẹnjamin rọ dia ọhwẹrobọ. Ọke vwọ yan obaro, Izrẹl da wan oma rọyen vwẹ arhọghọ vwo rhe Ẹglọn ovie ri Moab. 16 Asaọkiephana Ihọd ru ọlọkọ ro vwo akon ivẹ ro gron te kubit* ọvo kẹ oma rọyen, ọ da gba mu ekpoghowọ rẹ obọrhen rọyen, o de ku ewun rhurho. 17 Ọ da vwẹ arhọghọ na vwọ kẹ Ẹglọn ovie ri Moab. Asaọkiephana Ẹglọn ọyen ọshare rọ rhuoma mamọ.
18 Ọke rẹ Ihọd vwọ vwẹ arhọghọ na vwọ kẹ nu, ọ vẹ ihwo ri mu arhọghọ na rhe da yanran.* 19 Ẹkẹvuọvo ọke rẹ ayen vwo te asan ema ra kare na* vwẹ Gilga nu, ọyen ọvo de rhivwin, ọ da ta: “Mi vwo ovuẹ rẹ odjahọn kẹ wẹ, E ovie.” Ọtiọyena ovie na da tanẹ: “Ovwan fọ!” Ọtiọyena idibo rọyen eje da yan jovwo. 20 Ihọd de bro rhe vwẹ asan rẹ ọyen ọvo chidia vwẹ uvun rọ da reyọ odju vwẹ obenu rẹ uwevwin. Ihọd da ta: “Mi vwo ovuẹ ọvo ro nẹ obọ rẹ Ọghẹnẹ rhe vwọ kẹ wẹ.” Ọtiọyena o de vrẹn vwo nẹ ekete* rọyen. 21 Ihọd da vwẹ obohwẹre rọyen vwo yoro ọlọkọ na vwo nẹ ekpoghowọ rẹ obọrhen rọyen rhe, o de duvwon phiyọ evun rọyen. 22 Erhie rẹ ọlọkọ na* da ro evun rọyen, ivwri na de rhurhu ọlọkọ na kidie o yoro ọlọkọ na vwo nẹ evun rọyeen, isọn de turu phia. 23 Ihọd da wan ovakpo* na ro otafe, o de bi ẹchẹ rẹ uvun na gbe, ọ da kanre ayen. 24 Ọ vwọ yanran nu, idibo rọyen na de rhivwin rhe, ayen da mrẹ nẹ a kanre ẹchẹ rẹ uvun rẹ obenu na. Ọtiọyena ayen da ta: “O muẹro nẹ o kpirhẹn awọ* vwẹ uvun rọhẹ obevun na.” 25 Ayen da hẹrhẹ rhirin bẹsiẹ rẹ ofu vwo dje ayen, ẹkẹvuọvo ọke rẹ ayen vwọ mrẹ nẹ o ji rhi rhie ẹchẹ rẹ uvun rehẹ obenu rẹ uwevwin naa, ayen da reyọ usiaphrẹ na, ayen de rhie ẹchẹ na, ayen da mrẹ orivwin rẹ ọrovwori rayen ro she gbere otọ!
26 Ihọd djẹ vabọ ọke rẹ ayen vwo gbeghẹrẹ na, ọ da wan asan ema ra kare* na vrẹ, o de te Sẹaira gbẹrhẹnẹdẹ. 27 Ọke rọ vwọ rhe, o de hworo ọgban vwẹ ekogho rẹ igbenu rẹ Ifrem; ihwo rẹ Izrẹl de wontọ nẹ ekogho rẹ igbenu na rhe, jẹ ọ kobaro kẹ ayen. 28 Ọyena vwọ wan nu, ọ da ta kẹ ayen nẹ: “Ovwan nene uvwe, kidie Jihova phi ivwighrẹn rẹ ovwan, ihwo ri Moab na phiyọ obọ rẹ ovwan nure.” Ọtiọyena ayen de nene, ayen da reyọ asan ra sa vwẹ owọ shue rẹ urhie ri Jọdan na, rere ohwo ri Moab vuọvo vwo jẹ djẹ vabọ. 29 Ọke yena ayen de hwe ihwo ri Moab ri te omarẹ 10,000, ayen eje eshare re goma rẹ oshọ muẹẹ; ọvuọvo rayen djẹ vabọọ. 30 Ọtiọyena Izrẹl de phi Moab kparobọ vwẹ ẹdẹ yena; otọ na de vwo urovwoma* ẹgbukpe 80.
31 O vwo ghwu nu, a da mrẹ Shamga ọmọ rẹ Enat, rọ reyọ ọkpọ re vwo suẹn eranvwe vwo hwe eshare ri Filistia 600; o de ji sivwin Izrẹl.