Iguẹdjọ
2 Ọyena vwọ wan nu, amakashe ri Jihova de nẹ Gilga kpo Bokim, ọ da ta: “Me reyọ ovwan vwo nẹ Ijipt rhe otọ ri mi duvwun iyorin rọyen nẹ me cha vwọ kẹ esẹ rẹ ovwan ride. Vwọba, me da ta, ‘O vwo ọke vuọvo me cha vwọ phan ọphọ re me vẹ ovwan reree. 2 Vwọ kẹ ovwan, ovwan nene ihwo re dia otọ nana ria ọphọọ, ovwan guọghọ egbada rayen.’ Ẹkẹvuọvo ovwan nyupho mẹẹ. Diesorọ ovwan vwo ru ọnana? 3 Kọyensorọ me je vwọ tanẹ, ‘Me cha djẹ ayen vwo nẹ obaro rẹ ovwaan, ayen cha dia ufi vwọ kẹ ovwan, eghẹnẹ rayen je cha riẹriẹ ovwan reyọ.’”
4 Ọke rẹ amakashe ri Jihova vwọ ta eta nana kẹ ihwo rẹ Izrẹl eje, ihwo na da tuẹn oviẹ ọgangan phiyọ. 5 Ọtiọyena ayen de se odẹ rẹ asan na Bokim,* ayen de ze izobo kẹ Jihova vwẹ etiyin.
6 Ọke rẹ Joshua vwo siobọnẹ ihwo na yanran, ihwo rẹ Izrẹl na ọvuọvo de kpo uku rọyen ra re ughwẹ rẹ otọ na. 7 Ihwo na ga Jihova vwẹ ẹdẹ ri Joshua eje kugbe ẹdẹ rẹ ekpako na eje re tọn nọ Joshua, re je mrẹ iruo ride eje rẹ Jihova ru vwọ kẹ Izrẹl. 8 Ọyena vwọ wan nu, Joshua ọmọ ri Nọn, odibo ri Jihova na de ghwu rọ vwọ hẹ ẹgbukpe 110. 9 Ọtiọyena ayen de sho phiyọ ekogho rẹ uku rọyen vwẹ Timnat-hirẹs, vwẹ ekogho rẹ igbenu rẹ Ifrem, vwẹ obohwẹre ọnre rẹ Ugbenu ri Geash. 10 Uvwiẹ yena eje de ghwu kirobo rẹ esẹ rayen ride ghwuru, uvwiẹ ọfa rọ riẹn Jihova yẹrẹ obo ro ru vwọ kẹ Izrẹẹl da rhe vwomaphia.
11 Ọtiọyena ihwo rẹ Izrẹl na de ru obo re brare vwẹ ẹro ri Jihova, ayen da ga* Bel. 12 Ọtiọyena ayen da kpairoro vrẹ Jihova, Ọghẹnẹ rẹ esẹ rayen, rọ reyọ ayen vwo nẹ otọ rẹ Ijipt rhe. Ayen de nene eghẹnẹ efa, eghẹnẹ rẹ ihwo eje re riariẹ ayen phiyọ, ayen da vwẹ uyovwin kpotọ kẹ ayen ji gbe Jihova ku. 13 Ayen kpairoro vrẹ Jihova, ayen da ga Bel kugbe ema rẹ Ashtorẹt. 14 Ọtiọyena Jihova de muophu ọgangan kpahen Izrẹl, o de phi ayen phiyọ obọ rẹ ihwo ri gborho ihwo, re vwẹ ogangan vwọ reyọ erọnvwọn rayen. Ọ da shẹ ayen kẹ ivwighrẹn re riariẹ ayen phiyọ, ayen rhe se nene ivwighrẹn rayen họnre ọfaa. 15 Kasan kasan rẹ ayen rare, obọ ri Jihova kọ vwọsua ayen, rọ vwọ sua okpetu kẹ ayen kirobo rẹ Jihova tare jovwo, kugbe kirobo rẹ Jihova duvwun iyorin rọyen kẹ ayen jovwo, ayen de rhi shero okpetu rode. 16 Ọtiọyena Jihova kọ vwẹ iguẹdjọ vwo muẹ kẹ ayen ri che sivwin ayen vwo nẹ obọ rẹ ihwo ri gborho ayen na.
17 Ẹkẹvuọvo ayen rhọnvwe kerhọ rẹ iguẹdjọ na dedee, kerẹ igberadja, ayen vwẹ oma rayen kẹ eghẹnẹ efa je vwẹ uyovwin kpotọ kẹ ayen. Ayen brokpakpa chukoku idjerhe rẹ esẹ rayen ride neneri, ihwo re yọnre iji ri Jihova. Ayen se ru ọtiọyeen. 18 Kọke kọke rẹ Jihova da vwẹ iguẹdjọ vwo mu kẹ ayen, Jihova mi nene oguẹdjọ na dia ji sivwẹn ayen vwo nẹ obọ rẹ ivwighrẹn rayen vwẹ ẹdẹ rẹ oguẹdjọ na eje; kidie aro rayen dọn Jihova fikirẹ irhivwẹn rẹ ayen de fikirẹ ihwo ri shenyẹ ayen kugbe ihwo re vwẹ oja ria ayen.
19 Ẹkẹvuọvo ọke rẹ oguẹdjọ na de ghwu nu, kẹ ayen rhoma ruẹ obo re bra vrẹ ọ rẹ esẹ rayen ruru womarẹ ayen vwo nene eghẹnẹ efa, ga ayen, je vwẹ uyovwin kpotọ kẹ ayen. Ayen siobọnẹ iruemu rayen vẹ udu ọgangan rayen naa. 20 Ukuotọ rọyen Jihova de rhi muophu ọgangan kpahen Izrẹl, ọ da ta: “Kidie nẹ ẹgborho nana ru nene ọphọ ri mi nene esẹ rayen ree, ayen ji nyẹme mẹẹ, 21 me cha djẹ ọvuọvo dede vwẹ usun rẹ ẹgborho rẹ Joshua ghwu jovwo na nẹ obaro rayeen. 22 Me cha vwẹ ọnana vwọ davwen Izrẹl ni sẹ ayen cha dia evunrẹ idjerhe ri Jihova womarẹ ayen vwọ yan vwọ kirobo rẹ esẹ rayen ruru.” 23 Ọtiọyena Jihova da vwẹ uphẹn kẹ ẹgborho nana nẹ e dia. Ọ djẹ ayen no kpakpataa, o ji phi ayen phiyọ obọ ri Joshuaa.