Ọbe Rivẹ ri Samuẹl
4 Ọke rẹ ọmọ ri Sọl Ish-boshẹt vwo nyo nẹ Abna ghwuru vwẹ Hẹbrọn, udu de no awọ,* ẹwẹn rẹ ihwo rẹ Izrẹl eje da yanghan ku. 2 Ọmọ ri Sọl vwo ẹko rẹ isodje ri gborho ugborho, o vwo eshare ivẹ re vwẹrote ayen: odẹ rẹ ọvo Beanah, ọ ro chekọ Rikab. Ayen emọ ri Rimọn ohwo ri Biẹrọt, rẹ uvwiẹ ri Bẹnjamin. (Kidie e ji kere Biẹrọt kerẹ ẹbẹre ọvo rẹ orua ri Bẹnjamin jovwo. 3 Ihwo ri Biẹrọt da djẹ kpo Giteim, ayen da dia erhorha re dia etiyin rhi te ọke na.)
4 Asaọkiephana Jonatan ọmọ ri Sọl vwo ọmọshare ọvo rẹ awọ miavwa.* Ọ hẹ ẹgbukpe iyorin ọke rẹ iyẹnrẹn rẹ ughwu ri Sọl vẹ Jonatan vwo nẹ Jẹzriẹl rhe, ohwo rọ vwẹrote de muo vwọ djẹ, ẹkẹvuọvo ọ vwọ djẹ vẹ oshọ, ọmọ na de she, o de hirhephiyọ ukpono. Odẹ rọyen Mẹfiboshẹt.
5 Rikab vẹ Beanah, emọ ri Rimọn rẹ ohwo ri Biẹrọt na de kpo uwevwin rẹ Ish-boshẹt ọke rẹ uvo na vwọ rhovwan gangan, ro vwo rovwoma vwẹ oghẹruvo. 6 Ayen da ro evunrẹ uwevwin na kerẹsiẹ ra da mrẹ nẹ ayen ghwẹ iwiti, ayen de duvwon vwẹ evun; Rikab vẹ oniọvo rọyen Beanah da djẹ vabọ. 7 Ọke rẹ ayen vwọ ro uwevwin na, jẹ o sherhẹn ehwa vwẹ uvun rọyen, ayen de duvwon, o de ghwu, ọyena vwọ wan nu, ayen de bru uyovwin rọyen no. Ayen de mu uyovwin rọyen, ayen da yan vwẹ ason na eje vwẹ idjerhe ro kpo Araba. 8 Ayen de mu uyovwin rẹ Ish-boshẹt rhe Devid vwẹ Hẹbrọn, ayen da ta kẹ ovie nẹ: “Ọnana uyovwin rẹ Ish-boshẹt ọmọ ri Sọl, ọvweghrẹn wẹn rọ guọnọ arhọ* wẹn. Nonẹna Jihova nene ọrovwovwe ovie hwosa kẹ Sọl vẹ emọ rọyen.”
9 Ẹkẹvuọvo Devid da kpahen kẹ Rikab vẹ oniọvo rọyen Beanah, emọ ri Rimọn ohwo ri Biẹrọt na, ọ da ta kẹ ayen nẹ: “Rẹ Jihova rọ dia ohwo ro sivwin uvwe* nẹ ukpokpogho eje vwọ herọ na, 10 ọke rẹ ohwo ọvo vwọ niyẹnrẹn kẹ vwẹ nẹ, ‘Nighere, Sọl ghwure,’ o de roro nẹ ọ ghwẹ iyẹnrẹn esiri bru vwe rhe, mi de shabọ phiyọ, me da teyọn hwe vwẹ Ziklag. Ọyena yen osa rẹ ikọn re me hwa kẹ! 11 Mi rhe ru obo re vrẹ ọtiọyen ọke rẹ eshare re dia irumwemwu vwo hwe ọvwata vwẹ uwevwin robọ rọyen vwẹ ehwa rọyen? O rhe fo nẹ me nokpẹn rẹ ọbara rọyen vwẹ obọ rẹ ovwan ji si ovwan nẹ akpọ na?” 12 Devid da vuẹ ighene eshare na nẹ i hwe ayen. Ayen de bru abọ vẹ awọ nẹ ayen, ayen da vwẹ ayen ya kẹrẹ ẹtẹrhe ame rọhẹ Hẹbrọn. Ẹkẹvuọvo ayen de mu uyovwin rẹ Ish-boshẹt, ayen de sho phiyọ ushi rẹ Abna vwẹ Hẹbrọn.