Ọbe Rivẹ ri Samuẹl
7 Ọke rẹ ovie na vwọ dia uwevwin* robọ rọyen re, rẹ Jihova je vwọ kẹ urovwoma vwo nẹ obọ rẹ ivwighrẹn rọyen eje re riarierẹ phiyọ nu, 2 ovie na da ta kẹ Netan ọmraro na nẹ: “Me dia uwevwin rẹ isida, jẹ Ekpeti rẹ Ọphọ rẹ Ọghẹnẹ rẹ uyota na hẹ evunrẹ utughẹ.” 3 Netan da kpahen kẹ ovie na nẹ: “Yanran rere wo ru kemu kemu rọhẹ ubiudu wẹn, kidie Jihova vẹ owẹ herọ.”
4 Vwẹ ason yena, ota ri Jihova de bru Netan rhe nẹ: 5 “Yanran rere wọ ta kẹ odibo mẹ Devid, ‘Ọnana yen oborẹ Jihova tare: “Wẹwẹ yen ohwo ro fori nẹ ọ bọn uwevwin kẹ vwẹ dia? 6 Kidie me je rhe dia evunrẹ uwevwin vwo nẹ ẹdẹ re me vwọ reyọ ihwo rẹ Izrẹl vwo nẹ Ijipt rhe rhi te ọke naa, ẹkẹvuọvo mi nẹ* asan ọvo kpo ọfa vwevunrẹ utughẹ.* 7 Vwẹ ọke na eje ri mi vwo nene ihwo rẹ Izrẹl* ejobi yan na, o vwo ọke ọvo re me vwọ ta kẹ ọvo vwẹ usun rẹ isun rẹ uvwiẹ rẹ Izrẹl ri mi vwo mu nẹ ọ vwẹrote ihwo mẹ Izrẹl nẹ, ‘Diesorọ wọ rha bọn uwevwin rẹ isida kẹ vwẹẹ?’”’ 8 Asaọkiephana ta ọnana kẹ odibo mẹ Devid, ‘Ọnana yen oborẹ Jihova rẹ otuofovwin tare: “Me reyọ owẹ nẹ asan rẹ ichuru da ria odin, asan ru wọ da vwẹrote ichuru, rhe dia osun vwẹ enu rẹ ihwo mẹ Izrẹl. 9 Mi che nene uwe dia vwẹ kasan kasan ru wọ rare, me cha ghwọrọ* ivwighrẹn wẹn eje vwo nẹ obaro wẹn; me cha nẹrhẹ odẹ wẹn titi mamọ kerẹ odẹ rẹ ihwo ri titiri vwẹ akpọ na. 10 Me cha vwẹ asan kẹ ihwo mẹ Izrẹl rere ayen dia, ayen cha dia etiyin, e rhe che kpokpo ayen ọfaa; ihwo umwemwu rhe che shenyẹ ayen kirobo rẹ ayen ruru vwẹ ọke re wanree, 11 vwo nẹ ẹdẹ re me vwọ vwẹ iguẹdjọ vwo mu vwẹ enu rẹ ihwo mẹ Izrẹl. Me cha kẹ wẹ urovwoma vwo nẹ obọ rẹ ivwighrẹn wẹn eje.
“‘“Vwọba, Jihova vuẹ wẹ jovwo re nẹ, Jihova cha bọn uwevwin kẹ wẹ.* 12 Ọke rẹ ẹdẹ wẹn de te oba re, ru wo de ghwu kerẹ esẹ wẹn ride, me cha kpare ọmọ* wẹn, ọmọshare wẹn* kpenu, me cha vwẹ uvie rọyen vwo muotọ bẹdẹ. 13 Ọyen yen ohwo rọ cha bọn uwevwin kẹ odẹ mẹ, me cha vwẹ ekete rẹ uvie rọyen vwo muotọ bẹdẹ. 14 Me cha dia ọsẹ rọyen, kọ cha dia ọmọ mẹ. Ọke ro de ru chọ, me cha vwẹ ọkpọ rẹ ihworakpọ kugbe uphiaphia rẹ emọ rẹ ihworakpọ* vwọ ghwọkuo. 15 Mi che dje ẹguọnọ ro jẹ rhẹriẹ kẹ ọkieje, me cha kpairoro vrẹ kirobo me kpairoro vrẹ Sọọl, ohwo ri mi si nẹ obaro wẹn. 16 Uwevwin wẹn vẹ uvie wẹn cha dia bẹdẹ vwẹ obaro wẹn; ekete wẹn che muotọ bẹdẹ.”’”
17 Netan da vuẹ Devid eta nana eje ra vuẹrẹ vwẹ emramrẹ na.
18 Ọtiọyena Ovie Devid de chidia obaro ri Jihova, ọ da tanẹ: “Ono yen omẹvwẹ, E Ọrovwori ro Me Kpenu Jihova? Die yen uwevwin mẹ ru wo vwo ru enana eje kẹ vwẹ? 19 Kerẹsiẹ a da mrẹ nẹ enana terii, E Ọrovwori ro Me Kpenu Jihova, wọ je tanẹ uwevwin rẹ odibo wẹn cha dia re te ọke grongron rọ cha; E Ọrovwori ro Me Kpenu Jihova, ọnana iji* ru wọ vwọ kẹ ihworakpọ eje. 20 Die ọfa yen odibo wẹn Devid sa ta kẹ wẹ, rọ vwọ dianẹ wọ nabọ riẹn vwẹ na, E Ọrovwori ro Me Kpenu Jihova? 21 Wo ru emu ride nana ejobi fikirẹ ota wẹn kugbe vwo nene ọhọre wẹn ru wo vwo dje ayen phia kẹ odibo wẹn. 22 Ọyena yen sorọ wọ vwọ rho mamọ, E Ọrovwori ro Me Kpenu Jihova Ọghẹnẹ. Ohwo ọfa herọ kerẹ owẹẹ, Ọghẹnẹ ọfa herọọ jokparẹ owẹ; kemu kemu rẹ avwanre vwẹ erhọ rẹ avwanre nyo vwẹ imuẹro rẹ ọnana phia. 23 Ẹgborho ọfa vọ vwẹ akpọ na yen họhọ ihwo wẹn Izrẹl? Ọghẹnẹ yanran, ọ da tan ayen kerẹ ihwo rọyen, ọ womarẹ iruo ride kugbe igbevwunu ro ru kẹ ayen vwọ re odẹ kẹ oma rọyen. Wọ djẹ ẹgborho na vẹ eghẹnẹ rayen no fikirẹ ihwo wẹn, ihwo ru wọ tan nẹ Ijipt rhe kẹ oma wẹn. 24 Wọ vwẹ ihwo wẹn Izrẹl vwo ru ihwo robọ wẹn bẹdẹ; wẹ, E Jihova, rhe dia Ọghẹnẹ rayen re.
25 “Asaọkiephana, E Jihova Ọghẹnẹ, ru ive ru wo ve kẹ odibo wẹn kugbe uwevwin rọyen gba bẹdẹ, rere wo ru oborẹ wo ghwe ve na. 26 E jẹ a kpare odẹ wẹn kpenu bẹdẹ, rere ihwo sa vwọ tanẹ, ‘Jihova rẹ otuofovwin ọyen Ọghẹnẹ vwẹ enu rẹ Izrẹl,’ e jẹ uwevwin rẹ odibo wẹn Devid dia bẹdẹ vwẹ obaro wẹn. 27 Kidie wẹ, Jihova rẹ otuofovwin, Ọghẹnẹ rẹ Izrẹl, vwerọ phia kẹ odibo wẹn ru wọ vwọ tanẹ, ‘Me cha bọn uwevwin ọvo kẹ wẹ.’* Kọyensorọ odibo wẹn vwo fiudugberi* nẹrhovwo nana rhe we. 28 Asaọkiephana, E Ọrovwori ro Me Kpenu Jihova, wẹwẹ yen Ọghẹnẹ rẹ uyota na, eta wẹn uyota, wo ji ve ive rẹ emu esiri nana kẹ odibo wẹn. 29 E jẹ oma vwerhen owẹ vwo bruba kẹ uwevwin rẹ odibo wẹn, e jẹ uwevwin rẹ odibo wẹn dia bẹdẹ vwẹ obaro wẹn; kidie wẹ, E Ọrovwori ro Me Kpenu Jihova, ve nure, jẹ ebruba dia kẹ uwevwin rẹ odibo wẹn bẹdi bẹdẹ.”