Ọbe Rivẹ ri Samuẹl
13 Asaọkiephana Absalọm ọmọ ri Devid vwo oniọvo ọmọtẹ ro vwo erhuvwu, odẹ rọyen Tema, Amnọn ọmọ ri Devid ọfa de vwo ẹguọnọ rọyen. 2 Ofu de dje Amnọn mamọ te ẹdia rọ da muọga fikirẹ oniọvo rọyen ọmọtẹ* Tema, kidie ọmọtobẹ yen o ruẹ, jẹ Amnọn no nẹ ọyen che se nene ru obo rehẹ ẹwẹn rọyen naa. 3 Asaọkiephana Amnọn vwo ugbeyan ọvo re se Jehonadab, ọmọ ri Shimia, oniọvo ri Devid; Jehonadab hworo ona mamọ. 4 Ọtiọyena Jehonadab da nọ Amnọn nẹ: “Diesorọ wẹwẹ rẹ ọmọ rẹ ovie vwo muomaphiyọ kurhiọke kurhiọke? Wọ sa vuẹ vwẹ?” Amnọn da kpahen kẹ nẹ: “Mi vwo ẹguọnọ ri Tema, oniọvo rẹ Absalọm ọmọsẹ mẹ.” 5 Jehonadab da kpahen kẹ nẹ: “Sherhẹn ehwa wẹn rere wo me ru kerẹ ohwo rọ muọga. Ọke rẹ ọsẹ wẹn da rhe rhe mrẹ wẹ, ta kẹ nẹ, ‘Biko, jẹ oniọvo mẹ ọmọtẹ Tema bru vwe rhe rere ọ jẹ emu kẹ vwẹ re. O de chere emu re chere kẹ ohwo rọ muọga* vwẹ obaro mẹ, me cha dia obọ rọyen da riọ.’”
6 Amnọn de sherhẹn totọ, o de me ru kerẹ ohwo rọ muọga, ovie na da rhe rhe mrẹ. Amnọn da ta kẹ ovie na nẹ: “Biko jẹ oniọvo mẹ Tema rhe rhi ru ikeki ivẹ re họhọ ubiudu vwẹ irharo mẹ, rere me dia obọ rọyen da riọ.” 7 Ọtiọyena Devid da vwẹ ovuẹ rhe Tema vwẹ obo uwevwin nẹ: “Biko kpo uwevwin rẹ oniọvo wẹn Amnọn, rere wo ru emu* kẹ.” 8 Ọtiọyena Tema de kpo uwevwin rẹ oniọvo rọyen Amnọn, vwẹ asan ro sherhẹn. Ọ da reyọ iflawa, o de gbe kugbe vwo ru ikeki vwẹ irharo rọyen, ọ da kaka ayen. 9 Ọtiọyena Tema da reyọ ipani, o de mu ikeki na kẹ. Ẹkẹvuọvo Amnọn rhọnvwe ree, ọ da tanẹ: “E jẹ ihwo ejobi yanjẹ uvwe vwo!” Ihwo ejobi da yan jovwo.
10 Amnọn da ta kẹ Tema nẹ: “Mu emu* na rhe uvun rere me dia obọ wẹn da riọ.” Ọtiọyena Tema da reyọ ikeki re họhọ ubiudu ro ruru na, o de mu ayen rhe oniọvo rọyen Amnọn vwẹ obo uvun. 11 Ọke ro vwo mu ayen rhe rere ọ re, Amnọn de shabọ phiyọ, ọ da tanẹ: “Yanrhe, nene uvwe vwerhẹn, oniọvo mẹ.” 12 Ẹkẹvuọvo Tema da ta kẹ nẹ: “Ẹjo, oniọvo mẹ! Wọ phọphọ ovwẹẹ, kidie e ruẹ emu ọtiọna vwẹ Izrẹẹl. Wo ruẹ emu rẹ ophọphọvwe nanaa. 13 Mavọ mi se vwo yerin ghene ophọphọvwe tiọyena? E che ni we kerẹ ọvo vwẹ usun rẹ eshare ri vwobọ vwẹ uruemu rẹ ophọphọvwe vwẹ Izrẹl. Asaọkiephana, biko ta kẹ ovie kidie ọ cha sen rọ vwọ vwẹ ovwẹ kẹ wẹẹ.” 14 Ẹkẹvuọvo ọ rhọnvwe kerhọ kẹẹ, obọ rọyen da gan nọ, ọ da phọphọ rọ vwọ gba du. 15 Ọyena vwọ wan nu, oma ri Tema ko tuẹn Amnọn gangan, te ẹdia rẹ utuoma ro vwo kpahọn da gan vrẹ ẹguọnọ ro vwo kpahọn jovwo. Amnọn da ta kẹ nẹ: “Vrẹn; yan nẹ etinẹ!” 16 Tema da ta kẹ nẹ: “Ẹjo oniọvo mẹ, wọ vwọ djẹ vwẹ yanran bra vrẹ obo ru wo ru vwe na!” Ẹkẹvuọvo ọ rhọnvwe kerhọ kẹẹ.
17 Ọtiọyena Amnọn de se odibo rọyen rẹ eghene, ọ da tanẹ: “Reyọ ohwo nana nẹ obaro mẹ, rere wọ kanre ẹchẹ na.” 18 (Asaọkiephana o ku ewun rẹ oghẹresan ọvo phiyọ, kidie enana iwun rẹ emetẹ rẹ ovie re dia emetobẹ kuẹphiyọ.) Ọtiọyena odibo rẹ Amnọn da reyọ kpo otafe ọ da kanre ẹchẹ gbe. 19 Tema da ghwẹ iwurhie ku uyovwin rọyen, ọ da bẹrẹ iwun oyoyovwin ro kuphiyọ; o de muabọ kpahen uyovwin, ọ da yanran, jẹ ọ viẹ rọ vwọ yanran na.
20 Ọtiọyena Absalọm oniọvo rọyen da nọ nẹ: “Oniọvo wẹn Amnọn yen gba wẹ du na? Fotovwin oniọvo mẹ. Oniọvo wẹn yen o ruẹ. Wo jẹ obo re phiare na kpokpo uwe ẹwẹẹn.” Ọtiọyena Tema da dia uwevwin rẹ oniọvo rọyen Absalọm, jẹ ọ vwomaba ihwoo. 21 Ọke rẹ Ovie Devid vwo nyo erọnvwọn nana eje, ivun de miovwo gangan. Ẹkẹvuọvo ọ guọnọ ru emu vuọvo ro che kpokpo ẹwẹn rẹ ọmọ rọyen Amnọọn, kidie o vwo ẹguọnọ rọyen, ọyen yen ọmọ rọyen ọkpako. 22 Absalọm ta ota vuọvo kẹ Amnọọn, owenẹ ọ dia ota ọbrabra yẹrẹ ọ rẹ esiri; kidie Absalọm vwo utuoma kpahen Amnọn kidie ọ phọphọ oniọvo rọyen Tema.
23 Ẹgbukpe ivẹ vwọ wan nu, Absalọm de rhi vwo ihwo ri brẹ ẹton rẹ igodẹ rọyen vwẹ Bel-hezọ, rọ kẹrẹ Ifrem, Absalọm de durhie emọ rẹ ovie na ejobi. 24 Ọtiọyena Absalọm de bru ovie rhe, ọ da tanẹ: “Odibo wẹn brẹ ẹton rẹ igodẹ rọyen. Biko jẹ ovie vẹ idibo rọyen nene uvwe yanran.” 25 Ẹkẹvuọvo ovie na da ta kẹ Absalọm nẹ: “Ẹjo, ọmọ mẹ. Avwanre ihwo eje de nene uwe yanran, avwanre cha dia oghwa vwọ kẹ wẹ.” Dede nẹ Absalọm rẹ, ọ rhọnvwe raa, ẹkẹvuọvo ọ da nẹrhovwo kẹ. 26 Ọtiọyena Absalọm da tanẹ: “Wo rhe nene uvwee, biko gbe jẹ oniọvo mẹ Amnọn nene avwanre.” Ovie na da kpahen kẹ nẹ: “Diesorọ ro vwo nene uwe yanran?” 27 Ẹkẹvuọvo Absalọm da rẹ, ọtiọyena ọ da tanẹ Amnọn vẹ emọ rẹ ovie na ejobi nene.
28 Ọtiọyena Absalọm da vwẹ iji kẹ idibo rọyen nẹ: “Ovwan gbẹrophiyotọ, ọke rẹ oma da vwerhan Amnọn fikirẹ iwaini na re, me cha ta kẹ ovwan nẹ, ‘Teyen Amnọn hwe!’ Ovwan me teyọn hwe. We jẹ oshọ muẹ ovwaan. Ọ dia omẹ yen vwẹ iji na kẹ ovwan? Ovwan goma rere ovwan fiudugberi.” 29 Ọtiọyena idibo rẹ Absalọm de ru Amnọn kirobo rẹ Absalọm ghwa vwẹ iji kẹ ayen; ọyena vwọ wan nu, emọ rẹ ovie na ejobi ri chekọ de vrẹn, dohwo deranvwe rọyen re se miu* da ro, ayen da djẹ. 30 Ayen vwọ hẹ idjerhe yanran, iyẹnrẹn de te Devid obọ nẹ: “Absalọm teyen emọ rẹ ovie na eje hwe, ọvuọvo rayen chekọọ.” 31 Ọtiọyena ovie na de vrẹn, ọ da bẹrẹ iwun rọyen, o de she teyen otọ, idibo rọyen eje de mudia kẹrẹ vẹ iwun rayen rẹ ayen bẹre.
32 Ẹkẹvuọvo Jehonadab ọmọ ri Shimia, oniọvo ri Devid da tanẹ: “E jẹ ọrovwovwe roro nẹ e hwe emọ rẹ ovie na ejobii, kidie Amnọn ọvo yen ghwuru. Ọnana iji rẹ Absalọm vwọ phia, o brorhiẹn ro vwo ru ọnana vwo nẹ ẹdẹ rẹ Amnọn vwọ phọphọ oniọvo rọyen Tema. 33 E jẹ ọrovwovwe ovie davwerhọ rẹ iyẹnrẹn naa* rọ tare nẹ, ‘Emọ rẹ ovie na ejobi ghwuru’; Amnọn ọvo yen ghwuru.”
34 Vwẹ uvwre rẹ ọke nana, Absalọm djẹre. Ọke vwọ yanran na, ọrhẹrotọ na da kpare opharo, ọ da mrẹ nẹ ihwo buebun nẹ idjerhe rọhẹ obuko rọyen rọ kẹrẹ ugbenu na cha. 35 Jehonadab da ta kẹ ovie na nẹ: “Nighere! Emọ rẹ ovie na rhivwin rhire, kirobo rẹ odibo wẹn ghwa ta.” 36 Ọ vwọ ta ota nu, emọ rẹ ovie na da rhe, jẹ ayen viẹ gangan; ovie na vẹ idibo rọyen ejobi da je viẹ gangan. 37 Ẹkẹvuọvo Absalọm da djẹ, o de bru Talmai ọmọ rẹ Amaihọd ovie ri Gẹshọ ra. Devid de vwere ọmọ rọyen vwẹ ẹdẹ buebun. 38 Absalọm vwọ djẹ kpo Gẹshọ nu, ọ da dia oboyin ẹgbukpe erha.
39 Ukuotọ rọyen, urhuru rẹ Ovie Devid vwọ ra mrẹ Absalọm ko sio, kidie ivun rhe miovwo fikirẹ ughwu rẹ Amnọn naa.*