Ọbe Rivẹ ri Samuẹl
15 Erọnvwọn nana eje vwọ wan nu, Absalọm de rhi vwo akpẹrẹ vẹ iyesi kugbe eshare 50 re djẹ kobaro kẹ. 2 Absalọm ko vrẹn vwẹ edegburhiọke o mi mudia ọkọkọ rẹ idjerhe ro kpo anurhoro rẹ orere na. Kọke kọke rẹ ohwo de vwo ẹdjọ ro mu rhe ovie, Absalọm ko se, ọ me nọ: “Orere vọ yen wo nurhe?” Ohwo na me ta: “Ọvo vwẹ usun rẹ ivwiẹ rẹ Izrẹl yen odibo wẹn nurhe.” 3 Absalọm me ta kẹ ohwo na nẹ: “Nighere, obo ru wọ tare na gbare, o ji shephiyọ, ẹkẹvuọvo o vwo ohwo vuọvo rẹ ovie vwo mu nẹ ọ kerhọ rẹ ẹdjọ wẹẹn.” 4 Absalọm me ta: “Mane ka sa vwẹ ovwẹ mu oguẹdjọ vwẹ otọ na, kohwo kohwo ro vwo ẹdjọ ko se bru vwe rhe, ki mi brorhiẹn ọsoso kẹ.”
5 Ọke rẹ ohwo de sikẹrẹ rọ vwọ vwẹ uyovwin kpotọ kẹ, Absalọm me rionbọ rọyen, ọ me gbanọ, ọ me fiọnfiọn. 6 Absalọm ko ruẹ ọnana kẹ ihwo rẹ Izrẹl eje ri mu ẹdjọ rayen bru ovie na rhe; ọtiọyena Absalọm kọ vwẹ ona phiẹn* ihwo rẹ Izrẹl reyọ.
7 Vwẹ oba rẹ ẹgbukpe ẹne,* Absalọm da ta kẹ ovie na nẹ: “Biko, juvwe yanran kpo Hẹbrọn ra hwa ive ri mi ve kẹ Jihova. 8 Kidie odibo wẹn ve ive nana vwẹ ọke re me vwọ dia Gẹshọ vwẹ Siria nẹ: ‘Ọ da dianẹ Jihova reyọ ovwẹ rhivwin rhe Jerusalẹm, mi che ze izobo ọvo* kẹ Jihova.’” 9 Ọtiọyena ovie na da ta kẹ nẹ: “Yanran vwọrẹ ufuoma.” O de vrẹn, o de kpo Hẹbrọn.
10 Asaọkiephana Absalọm da bẹbẹ ji ikọn ro ivwiẹ Izrẹl ejobi tanẹ: “Ugege rẹ ovwan de nyo edo rẹ ọgban na, ovwan mi ghwoghwo nẹ, ‘Absalọm hirhephiyọ ovie re vwẹ Hẹbrọn!’” 11 Asaọkiephana eshare 200 nene Absalọm nẹ Jerusalẹm kpo oboyin re; e durhie ayen, ayen da yanran, jẹ ayen riẹn obo re phiaa. 12 Kpobarophiyọ, ọke ro vwo ze izobo na, Absalọm de ji ohwo re se Ahitofẹl ohwo ri Gailo, obruche ri Devid, vwo nẹ orere rọyen Gailo rhe. Ero na rha ganphiyọ, ihwo ri biẹcha Absalọm ji buẹnphiyọ.
13 Ọke vwọ yan obaro, ohwo ọvo de bru Devid rhe tanẹ: “Ubiudu rẹ ihwo rẹ Izrẹl kurhẹriẹ bru Absalọm re.” 14 Vwẹ ugege yena, Devid da ta kẹ idibo rọyen eje re vẹ ọyen gba hẹ Jerusalẹm nẹ: “Ovwan vrẹn rere a djẹ, kidie o vwo ohwo vuọvo vwẹ usun rẹ avwanre na rọ cha djẹ vabọ rẹ Absalọmuu! Jọphẹre, kidie o se brokpakpa djẹ avwanre mu, ọ me so okpetu kẹ avwanre je vwẹ ọlọkọ vwo hwe ihwo rẹ orere na!” 15 Odibo rẹ ovie na da kpahen kẹ ovie nẹ: “Kemu kemu rẹ ọrovwovwe ovie brorhiẹn rọyen, idibo wẹn muegbe re vwo ru ayen.” 16 Ọtiọyena ovie na da ro otafe vẹ evwruwevwin rọyen eje ri nene, ẹkẹvuọvo ovie yanjẹ esen ihwe vwo nẹ e vwẹrote uwevwin* na. 17 Ovie na vẹ ihwo ri nene ejobi ke yanran, ayen da domaji vwẹ Bẹt-mẹhak.
18 Idibo rọyen eje ri nene,* ihwo ri Kẹrẹt eje, ihwo ri Pẹlẹt, kugbe ihwo ri Gat, eshare 600 ri nenire vwo nẹ Gat rhe ke wanvrẹ, jẹ ovie na nẹ ayen.* 19 Ọtiọyena ovie na da ta kẹ Itai ohwo ri Gat nẹ: “Diesorọ wo vwo nene avwanre? Rhivwin re nene ovie kpokpọ na dia, kidie wẹ ọrhorha, wo ji che se rhivwin kpo asan ru wo nurhee. 20 Odẹ rọ wanre na yen wọ rhere, me gba rhọnvwe kẹ wẹ nonẹna nẹ wo nene avwanre ghoro, rere wo vrẹn ọke ri mi de vrẹ ji kpo asan re me rare? Wẹ vẹ iniọvo wẹn rhivwin, e jẹ Jihova dje ẹguọnọ ro jẹ rhẹriẹ kugbe evun-ẹfuọn kẹ wẹ!” 21 Ẹkẹvuọvo Itai da kpahen kẹ ovie na nẹ: “Jihova vwọ herọ na, ọrovwovwe ovie je vwọ herọ yerẹn na, kasan kasan ọrovwovwe ovie diare, etiyin yen odibo wẹn cha dia, owenẹ ọ dia ughwu yẹrẹ arhọ!” 22 Ọtiọyena Devid da ta kẹ Itai: “Yanran rere wọ shariẹ vrẹ.” Ọtiọyena Itai ohwo ri Gat vẹ eshare rọyen eje kugbe emọ rọyen da shariẹ vrẹ.
23 Ihwo rehẹ otọ na eje ke viẹ gangan rẹ ihwo nana eje vwọ shariẹ vrẹ na, jẹ ovie na mudia kẹrẹ Iyara ri Kidrọn; ihwo na eje ke shariẹ vrẹ kpo idjerhe ro kpo aton na. 24 Zedọk vẹ ihwo ri Livae eje ri muẹ ekpeti rẹ ọphọ rẹ Ọghẹnẹ rẹ uyota na jehẹ etiyin; ayen de mu Ekpeti rẹ Ọphọ rẹ Ọghẹnẹ rẹ uyota na phiyotọ; Abayata jehẹ etiyin ọke rẹ ihwo na eje vwo vrẹn nẹ orere na shariẹ iyara na vrẹ. 25 Ẹkẹvuọvo ovie na da ta kẹ Zedọk nẹ: “Mu Ekpeti rẹ Ọphọ rẹ Ọghẹnẹ rẹ uyota na rhivwin kpo orere na. Me da mrẹ ẹroesiri ri Jihova, ọ je cha reyọ ovwẹ rhivwin je nẹrhẹ me mrẹ kugbe asan re muro phiyọ. 26 Ẹkẹvuọvo ọ da dianẹ ọ tare nẹ, ‘Ivun wẹn vwerhen ovwẹẹ,’ e gbe jẹ o ru vwe kemu kemu ro shephiyọ vwẹ ẹro rọyen.” 27 Ovie na da ta kẹ Zedọk orherẹn na nẹ: “Wẹwẹ dia ọmrorẹ?* Rhivwin kpo orere na vwọrẹ ufuoma, reyọ emọ rẹ ovwan ivẹ na Ahimahaz ọmọ robọ wẹn kugbe Jonatan ọmọ rẹ Abayata nene oma. 28 Nighere, mi che gbeghẹrẹ vwẹ aton na vwẹ asan ra sa vwẹ owọ shue rẹ urhie ri Jọdan bẹsiẹ ota vwo nẹ obọ rẹ ovwan bru vwe rhe.” 29 Ọtiọyena Zedọk vẹ Abayata de mu Ekpeti rẹ Ọphọ rẹ Ọghẹnẹ rẹ uyota na rhivwin kpo Jerusalẹm, ayen da daji oboyin.
30 Devid vwo yerẹn Ugbenu rẹ Oliv kpenu na, jẹ ọ viẹ ro vwo yerẹn yanran na; o rhurhu uyovwin rọyen, jẹ ọ vwẹ owọ fefe yan. Ihwo eje rẹ vẹ ọyen gba herọ na ji rhurhu uyovwin rayen, ayen je viẹ rẹ ayen vwo yerẹn yanran na. 31 A da vuẹ Devid nẹ: “Ahitofẹl hẹ usun rẹ ihwo re vẹ Absalọm gba ruero na.” Ọtiọyena Devid da ta: “E Jihova, biko rhẹriẹ iroroẹjẹ* rẹ Ahitofẹl phiyọ ọ rẹ ẹkpa!”
32 Ọke rẹ Devid vwo yerin te enu rẹ ugbenu na, asan rẹ ihwo da vwẹ uyovwin kpotọ kẹ Ọghẹnẹ, Hushai ohwo rẹ Aki da rhe vwa vwẹ etiyin, vẹ ewun rọyen rọ bẹre kugbe ekpẹn vwẹ uyovwin rọyen. 33 Ẹkẹvuọvo Devid da ta kẹ nẹ: “Wo de nene uvwe shariẹ vrẹ, wọ cha dia oghwa kẹ vwẹ. 34 Ẹkẹvuọvo wo de rhivwin kpo orere na, wọ da vuẹ Absalọm nẹ, ‘Mẹvwẹ odibo wẹn, E Ovie. Mẹvwẹ odibo rẹ ọsẹ wẹn vwẹ ọke ri jovwo, ẹkẹvuọvo mẹvwẹ odibo wẹn enẹna,’ ọke yena ku wo se nene uvwe yanghan iroroẹjẹ rẹ Ahitofẹl. 35 Zedọk vẹ Abayata irherẹn na vẹ owẹ herọ vwẹ oboyin? Wọ me vuẹ Zedọk vẹ Abayata irherẹn na erọnvwọn eje ru wo nyori vwẹ uwevwin rẹ ovie na. 36 Nighere! Emọ rayen ivẹ vẹ ayen hẹ oboyin, Ahimahaz ọmọ ri Zedọk kugbe Jonatan ọmọ rẹ Abayata, wan oma rayen vwẹ ovuẹ ri kemu kemu ru wo nyori vwo rhe vwe.” 37 Ọtiọyena Hushai, ugbeyan ri Devid,* da ro evunrẹ orere na vwẹ ọke vuọvo rẹ Absalọm vwọ rua Jerusalẹm.