Ọbe Rivẹ ri Samuẹl

18 Ọtiọyena Devid de kere eshare re vẹ ọyen gba herọ na, o de phi ayen phiyọ otọ rẹ inotu rẹ uriorin kugbe inotu rẹ ujorin. 2 Devid de ji ẹkẹn ọvo rẹ ẹkẹn erha rẹ eshare rehẹ otọ* ri Joab, ẹkẹn ọvo rẹ ẹkẹn erha rehẹ otọ rẹ oniọvo ri Joab re se Abishai ọmọ ri Zẹruya, kugbe ẹkẹn ọvo rẹ ẹkẹn erha rehẹ otọ rẹ Itai rẹ ohwo ri Gat yanran. Ovie da ta kẹ eshare na nẹ: “Mi ji che nene ovwan yanran.” 3 Ẹkẹvuọvo ayen da tanẹ: “Wo nene avwanree, kidie avwanre da djẹ, ayen cha davwerhọ rẹ* avwanree; ọ da dianẹ ubro rẹ avwanre ghwuru, ayen cha davwerhọ rẹ avwanree, kidie wọ ghanre te 10,000 rẹ avwanre. Ọtiọyena o che yovwin wọ da vwẹ ukẹcha kẹ avwanre vwo nẹ orere na rhe.” 4 Ovie na da ta kẹ ayen nẹ: “Mi che ru kemu kemu rẹ ovwan rorori nẹ ọyen me yovwin.” Ọtiọyena ovie na de mudia kẹrẹ ẹchẹ rẹ anurhoro rẹ orere na, eshare na eje da yanran ujujorin kugbe ururiorin. 5 Ọyena vwọ wan nu, ovie na da vwẹ iji nana kẹ Joab, Abishai, kugbe Itai nẹ: “Ovwan jomaotọ nene eghene ọshare na Absalọm ru fiki mẹ.” Eshare na eje nyoro ọke rẹ ovie na vwọ vwẹ iji na kẹ inotu na eje kpahen Absalọm.

6 Eshare na da yanran kpo obo aghwa na ra vwa Izrẹl, ayen de phi ofovwin vwevunrẹ egbo rẹ Ifrem. 7 Idibo ri Devid de phi ihwo rẹ Izrẹl kparobọ vwẹ etiyin, ọ dia ọmọrhiẹ ihwo yen ayen hweri vwẹ ẹdẹ yenaa—eshare 20,000. 8 Ofovwin na hẹrabọ nene ekogho na eje. Kpobarophiyọ, ihwo rẹ egbo na hweri bun vrẹ ihwo ra vwẹ ọlọkọ hwe vwẹ ẹdẹ yena.

9 Ukuotọ rọyen, Absalọm da rhe mrẹ oma rọyen vwẹ obaro rẹ idibo ri Devid. Absalọm gua eranvwe re se miu,* eranvwe na da djẹ ro obotọ rẹ eghọn rẹ urhe rode ọvo, ẹton rẹ uyovwin rọyen da jẹphiyọ urhe rode na, ọtiọyena ko phieghe vwẹ ophephe na,* jẹ eranvwe rọ gua jovwo na rha djẹ yanran. 10 Ohwo ọvo da mrẹ, ọ da ta kẹ Joab nẹ: “Nighere! Me mrẹ Absalọm rọ gbaphiyọ urhe rode ọvo.” 11 Joab da kpahen kẹ ọshare rọ vuẹrẹ na nẹ: “Ọ da dianẹ wọ mrẹrẹ, diesorọ wọ rha teyọn hwe ro de she teyen otọ ugege yenaa? Ọke yena oma kọ rha vwerhen ovwẹ vwọ vwẹ idọnọ efuanfon ihwe kugbe umuehun kẹ wẹ.” 12 Ẹkẹvuọvo ọshare na da ta kẹ Joab nẹ: “Ọ da tobọ dianẹ a vwẹ idọnọ efuanfon 1,000 kẹ vwẹ,* me cha sa vwẹ obọ mẹ vwo te ọmọ rẹ ovie naa, kidie avwanre nyoro ọke rẹ ovie vwọ vwẹ iji kẹ wẹ vẹ Abishai kugbe Itai nẹ, ‘Ovwan jomaotọ rere ohwo vuọvo vwo jẹ eghene ọshare na Absalọm oma ẹwan.’ 13 Ọ da dianẹ mi nyẹmee re me da reyọ arhọ rọyen,* e rhe se sionu vwọ kẹ oviee, wọ rha je chochọn mẹẹ.” 14 Ọtiọyena Joab da tanẹ: “Mi rhe che nene uwe ghwọrọ ọke ọfaa!” Joab da reyọ erọnvwọn re pha kerẹ ipẹrẹn* erha, o de duvwun ayen ro ubiudu rẹ Absalọm rọ je vwọ wẹn vwẹ uherevie rẹ urhe rode na. 15 Ọtiọyena idibo ihwe ri muẹ ekuakua ofovwin ri Joab da rhe, ayen da vwẹ ekuakua ofovwin na vwọ teyen Absalọm bẹsiẹ ro vwo ghwu. 16 Joab de hworo ọgban na, eshare re vwọtua Izrẹl na de rhivwin rhe; Joab da vuẹ ayen nẹ ayen dobọji. 17 Ayen de mu Absalọm, ayen de do phiyọ ukpotọ rode ọvo vwevunrẹ egbo na, ayen da rhuẹrẹ ikuta buebun phiyọ enu rọyen. Izrẹl eje da djẹ kpo iwevwin rayen.

18 Asaọkiephana, ọke rẹ Absalọm vwọ hẹ akpọ, ọ vwẹ uchivwo ọvo vwo vi kẹ oma rọyen vwẹ Iyara* rẹ Ovie na, kidie ọ tare nẹ: “Mi vwo ọmọshare rọ cha nẹrhẹ odẹ mẹ diaa.” Ọtiọyena ọ da vwẹ odẹ rọyen vwo se uchivwo na, e se Uchivwo rẹ Absalọm rhi te ọke na.

19 Ahimahaz ọmọ ri Zedọk da tanẹ: “Biko juvwe djẹ yanran ra vuẹ ovie iyẹnrẹn na, kidie Jihova brorhiẹn ọsoso kẹ ro vwo sivwon vwo nẹ obọ rẹ ivwighrẹn rọyen.” 20 Ẹkẹvuọvo Joab da ta kẹ nẹ: “Wọ cha dia ohwo rọ ghwa iyẹnrẹn nonẹnaa. Wọ sa ghwa iyẹnrẹn vwẹ ẹdẹ ọfa, ẹkẹvuọvo nonẹna wọ cha ghwa iyẹnrẹn naa, kidie ọmọ rẹ ovie yen ghwuru na.” 21 Joab da ta kẹ ohwo ri Kush ọvo nẹ: “Yanran, vuẹ ovie na obo ru wọ mrẹre.” Ọtiọyena ohwo ri Kush na da vwẹ uyovwin kpotọ kẹ Joab, ọ da djẹ yanran. 22 Ahimahaz ọmọ ri Zedọk da rhoma ta kẹ Joab nẹ: “O toro obo re phiaree, biko juvwe je djẹ nene ohwo ri Kush na vwẹ obuko.” Ẹkẹvuọvo Joab da tanẹ: “Diesorọ wọ vwọ djẹ yanran, ọmọ mẹ, ju wo vwo iyẹnrẹn ru wọ cha nẹẹ?” 23 Dedena ọ da tanẹ: “O toro obo re phiaree, juvwe djẹ yanran.” Ọtiọyena Joab da ta kẹ nẹ: “Gba djẹ yanran!”Ahimahaz da djẹ wan idjerhe rẹ ubrotọ ri Jọdan na,* ukuotọ rọyen, ọ da djẹ wanvrẹ ohwo ri Kush na.

24 Asaọkiephana Devid chidia phiyọ uvwre rẹ ẹchẹ ivẹ rẹ anurhoro rẹ orere na, ọrhẹrotọ na de yerin kpenu rẹ uwevwin rọhẹ igbẹhẹ rẹ anurhoro na. Ọ da kpare opharo, ọ da mrẹ ọshare ọvo rẹ ọyen ọvo djẹ cha. 25 Ọtiọyena ọrhẹrotọ na da kpare unu vuẹ ovie na. Ovie na da tanẹ: “Ọ da dianẹ ọyen ọvo yen cha, kọyen o vwo iyẹnrẹn rọ cha vwọ phia.” O vwo siẹkẹrẹ ememerha na, 26 ọrhẹrotọ na da mrẹ ọshare ọfa rọ djẹ cha. Ọrhẹrotọ na de kperi se ọ ro mudia anurhoro na nẹ: “Nighere! Ọshare ọfa djẹ cha, ọyen ọvo usun!” Ovie na da tanẹ: “Iyẹnrẹn yen ọnana je ghwa cha.” 27 Ọrhẹrotọ na da tanẹ: “Mi no nẹ ọshare rẹsosuọ na djẹ kerẹ Ahimahaz ọmọ ri Zedọk,” ọtiọyena ovie na da tanẹ: “Ọyen ohwo esiri, iyẹnrẹn esiri yen ọ ghwa cha na.” 28 Ahimahaz da kpare unu vuẹ ovie na nẹ: “Erọnvwọn eje shephiyọ!” Ọtiọyena o de she bọvwọn opharo rhuotọ kẹ ovie na. Ọ da tanẹ: “E jẹ ujiri dia kẹ Jihova Ọghẹnẹ wẹn, ohwo rọ vwẹ ihwo ri gbe vwọso* ọrovwovwe ovie kpahotọ!”

29 Ẹkẹvuọvo ovie na da nọ: “Erọnvwọn eje shephiyọ kẹ eghene ọshare na Absalọm?” Ahimahaz da kpahen nẹ: “Me mrẹ oyanghan rode vwẹ ọke rẹ Joab vwo ji odibo rẹ ovie kugbe odibo wẹn, ẹkẹvuọvo me riẹn oboresorọọ.” 30 Ọtiọyena ovie na da tanẹ: “Gba ro ọkọkọ wo mudia etiyin.” Ọtiọyena ọ da ro ọkọkọ, o de mudia etiyin.

31 Ọyena vwọ wan nu, ohwo ri Kush na da rhe, ọ da tanẹ: “E jẹ ọrovwovwe ovie rhiabọreyọ iyẹnrẹn nana: Nonẹna Jihova brorhiẹn ọsoso ro vwo sivwin uwe vwo nẹ obọ rẹ ihwo eje ri gbe vwọso owẹ.” 32 Ẹkẹvuọvo ovie na da nọ ohwo ri Kush na nẹ: “Erọnvwọn eje shephiyọ kẹ eghene ọshare na Absalọm?” Ọtiọyena ohwo ri Kush na da kpahen nẹ: “E jẹ ivwighrẹn rẹ ọrovwovwe ovie eje kugbe ihwo eje ri gbe vwọso owẹ re vwọ wan wẹ oma dia kerẹ eghene ọshare na!”

33 Ọnana da nẹrhẹ ẹwẹn rẹ ovie na yanghan, o de yerin kpo uvun rọhẹ enu rẹ anurhoro na, ọ da viẹ, jẹ ọ ta rọ vwọ yan na: “Ọmọ mẹ Absalọm, ọmọ mẹ, ọmọ mẹ Absalọm! Mane kẹ omẹvwẹ yen ghwuru ukperẹ owẹ, Absalọm ọmọ mẹ, ọmọ mẹ!”