Ọbe Rivẹ ri Samuẹl
20 Asaọkiephana o vwo ọguọnota ọvo re se Shiba ọmọ ri Bikrai, ohwo rẹ orua ri Bẹnjamin. O de hworo ọgban, ọ da tanẹ: “Avwanre vwo ẹkẹn vwẹ Devidii, avwanre ji vwo uku vwẹ ọmọ ri Jẹsii. Dohwo dọghẹnẹ rọyen bru ra,* E Izrẹl!” 2 Ọtiọyena eshare rẹ Izrẹl eje da dobọ rẹ enene rẹ Devid ji, ayen de re nene Shiba ọmọ ri Bikrai; ẹkẹvuọvo eshare ri Juda churu mu ovie rayen, ayen de suon vwo nẹ Jọdan re te Jerusalẹm.
3 Ọke rẹ Devid vwọ rhe uwevwin* rọyen vwẹ Jerusalẹm, ovie na da reyọ esen ihwe rọ yan jovwo nẹ e vwẹrote uwevwin na, o de phi ayen phiyọ uwevwin ọvo rẹ ohwo rhẹrẹ. Ọ vwẹ emu kẹ ayen, ẹkẹvuọvo o nene ayen mromaa. Ayen da dia etiyin rhirin re te ẹdẹ ughwu rayen, ayen yerẹn kerẹ eyauku dede nẹ ọshare rayen hẹ akpọ.
4 Asaọkiephana ovie na da ta kẹ Amesa nẹ: “Se eshare ri Juda koko kẹ vwẹ vwẹ uvwre rẹ ẹdẹ erha, wọ me je dia etinẹ.” 5 Ọtiọyena Amesa da yanran re se Juda koko, ẹkẹvuọvo ọke re bru kẹ na wanre tavwen o ki rhivwin rhe. 6 Devid da ta kẹ Abishai: “Shiba ọmọ ri Bikrai sa so omaẹwan kẹ avwanre vrẹ oborẹ Absalọm ruru. Reyọ idibo mẹ* rere wọ vwọ tua, o vwo jẹ irere ra gbogba riariẹ ẹdjẹ ruọ, rọ da djẹ va avwanre abọ.” 7 Ọtiọyena eshare ri Joab, ihwo ri Kẹrẹt, ihwo ri Pẹlẹt, kugbe egba na eje da vwọ tua; ayen de vrẹn nẹ Jerusalẹm ra vwọtua Shiba ọmọ ri Bikrai. 8 Ọke rẹ ayen vwo sikẹrẹ ukuta rode na vwẹ Gibiọn re, Amesa da rhe vwa ayen. Asaọkiephana Joab ku ewun rẹ ofovwin rọyen phiyọ, ọ chọrọ ọlọkọ rọyen phiyọ ako rọ gba si ehun rọyen. Ọke rọ vwọ yan obaro, ọlọkọ na de she.
9 Joab da ta kẹ Amesa: “Erọnvwọn eje shephiyọ, oniọvo mẹ?” Ọ da vwẹ obọrhen rọyen vwọ yọnrọn ẹtuegban rẹ Amesa kerẹsiẹ ra da mrẹ nẹ ọ guọnọ fiọnfiọn. 10 Amesa nomaso kpahen ọlọkọ rọhẹ obọ ri Joab naa, Joab de duvwon vwẹ evun, ivun rọyen de turu kuotọ. O rhe duvwon obọfaa; obọ vuọvo ro duvwinro na te vwo hwe. Joab vẹ oniọvo rọyen Abishai da vwọtua Shiba ọmọ ri Bikrai.
11 Ọvo vwẹ usun rẹ ighene eshare ri Joab de mudia kẹrẹ jẹ ọ tanẹ: “E jẹ kohwo kohwo rọhẹ ẹbẹre ri Joab kugbe kohwo kohwo rọ dia ọ ri Devid nene Joab!” 12 Vwẹ ọke nana eje na, jẹ Amesa gbune vwẹ ọbara rọyen vwẹ uherevie rẹ idjerhe na. Ọke rẹ ọshare na vwọ mrẹ nẹ ihwo eje muẹdia, o de mu Amesa nẹ idjerhe na ro aghwa. O de do ewun rhurho, kidie ọ mrẹ nẹ kohwo kohwo muẹdia vwẹ ọke rẹ ayen de te asan rọ hepha. 13 Ọke ro vwo muo nẹ idjerhe na nu, eshare na eje de nene Joab ra vwọtua Shiba ọmọ ri Bikrai.
14 Shiba da wan ivwiẹ rẹ Izrẹl eje vrẹ kpo Ebẹl ri Bẹt-meaka. Ihwo ri Bikrai da ghwomakoko ji nene ro orere na.
15 Joab vẹ eshare rọyen* da rhe, ayen da gba riariẹ vwẹ Ebẹl ri Bẹt-meaka, ayen da gba riariẹ orere na, kidie ogba riariẹ orere na. Eshare ri Joab eje ki kporon igbẹhẹ na rere ayen vwo genre she. 16 Aye ọvo ro vwo aghwanre de se ayen nẹ evunrẹ orere na rhe: “Ovwan kerhọ, eshare, ovwan kerhọ! Biko ovwan vuẹ Joab nẹ, ‘Yanrhe obonẹ, rere mi nene uwe ta ota.’” 17 Ọtiọyena Joab de sikẹrẹ aye na, aye na da nọ: “Wẹ yen Joab?” Ọ da kpahen: “E, mẹvwẹ.” Ọtiọyena aye na da ta kẹ: “Kerhọ rẹ eta rẹ odibo wẹn.” Ọ da ta: “Mi nyo we.” 18 Aye na da je tanẹ: “Ọkieje yen ihwo vwọ ta vwẹ ọke awanre nẹ, ‘Wọ da guọnọ rhuẹrẹ ota phiyọ, gbe kpo Ebẹl ra guọnọ uchebro, jẹ ota na reri.’ 19 Mi mudia kẹ ihwo rẹ ufuoma kugbe ihwo re fuevun vwẹ Izrẹl. Wọ guọnọ ghwọrọ orere rọ pha kerẹ oni vwẹ Izrẹl. Diesorọ wọ vwọ ghwọrọ uku ri Jihova?”* 20 Joab da kpahen nẹ: “Mi che se ru emu ọtiọyeen, re me vwọ guọghọ je ghwọrọ orere na. 21 Ọ dia ọyena yen ota rọhẹ otọ naa. Ukperẹ ọtiọyen, ọshare ọvo re se Shiba ọmọ ri Bikrai ro nẹ ekogho rẹ igbenu rẹ Ifrem rhe gbe vwọso Ovie Devid. Ovwan da reyọ ọshare nana ọvo vwọ kpahotọ, mi che siomareyọ vwo nẹ orere na.” Aye na da ta kẹ Joab nẹ: “Nighere! E che do uyovwin rọyen wan igbẹhẹ na bru we rhe!”
22 Ugege yena, aye ro vwo aghwanre na da ro evunrẹ orere na bru ihwo na eje ra, ayen de bru uyovwin ri Shiba ọmọ ri Bikrai no, ayen de do rhe Joab. Ọtiọyena Joab de hworo ọgban na, ayen da hrabọ vwo nẹ orere na kpo dohwo duwevwin rọyen; Joab de rhivwin kpo Jerusalẹm bru ovie na ra.
23 Asaọkiephana Joab yen onotu rẹ otuofovwin rẹ Izrẹl eje; Bẹnaya ọmọ ri Jehoyada yen suẹn ihwo ri Kẹrẹt vẹ ihwo ri Pẹlẹt. 24 Adoram yen suẹn ihwo rẹ ovie jurhi kẹ nẹ e wian kẹ ọyen; Jẹhoshafat ọmọ rẹ Ahailọd yen siẹ obo re phiare vwẹ otọ na phiyotọ. 25 Shiva yen osiọbe; Zedọk kugbe Abayata yen irherẹn. 26 Aira rẹ ohwo ri Jeẹ da je rhe dia osun rẹ idibo ri* Devid.