Ọbe Rivẹ ri Samuẹl
21 Asaọkiephana owẹnvwe de rhi fi ẹgbukpe erha soso vwẹ ọke ri Devid, ọtiọyena Devid da nọ mie Jihova, Jihova da tanẹ: “Sọl vẹ uwevwin rọyen riabe rẹ ọbara kidie ọ teyen ihwo ri Gibiọn hwe.” 2 Ọtiọyena ovie na de se ihwo ri Gibiọn, ọ da ta ota kẹ ayen. (Kirobo rọ hepha, ihwo ri Gibiọn na dia ihwo rẹ Izrẹẹl, ẹkẹvuọvo ayen ihwo rẹ Amọ ri chekọ, ihwo rẹ Izrẹl duvwun iyorin nẹ ayen che djobọte ayeen, ẹkẹvuọvo Sọl guọnọ teyen ayen hwe fikirẹ oruru ro vwori rọ vwọ vwẹ ukẹcha kẹ ihwo rẹ Izrẹl vẹ Juda.) 3 Devid da nọ ihwo ri Gibiọn na nẹ: “Die yen mi ru kẹ ovwan, me sa vwọ hwosa na, rere ovwan vwo bruba kẹ uku ri Jihova?” 4 Ihwo ri Gibiọn na da ta kẹ nẹ: “Ọ dia ota rẹ idọnọ ọfuanfon yẹrẹ oro yehẹ uvwre rẹ avwanre vẹ Sọl kugbe evwruwevwin rọyen naa; avwanre je cha sa teyen ohwo vuọvo hwe vwẹ Izrẹẹl.” Ọtiọyena ọ da tanẹ: “Kemu kemu rẹ ovwan tare, mi che ruo kẹ ovwan.” 5 Ayen da ta kẹ ovie na nẹ: “Ohwo rọ davwẹngba ro vwo hwe avwanre eje, je jiroro rọ vwọ ghwọrọ avwanre vwo nẹ kasan kasan vwẹ ekogho rẹ Izrẹl na— 6 e jẹ a vwẹ emeshare rọyen ighwrẹn vwọ kẹ avwanre. Avwanre cha vwẹ irivwin rayen vwọ ya* vwẹ obaro ri Jihova vwẹ Gibia, orere ri Sọl,* ohwo rẹ Jihova jẹreyọ na.” Ovie na da ta: “Me cha vwẹ ayen kpahotọ.”
7 Ẹkẹvuọvo ovie na de gbe arodọnvwẹ kẹ Mẹfiboshẹt, ọmọ ri Jonatan uvwrọmọ ri Sọl fikirẹ iyorin rẹ Devid vẹ Jonatan ọmọ ri Sọl duvwunru vwẹ obaro ri Jihova. 8 Ọtiọyena ovie na da reyọ Amonai kugbe Mẹfiboshẹt, emeshare ivẹ rẹ Rizpa rọ dia ọmọtẹ rẹ Eiya vwiẹ kẹ Sọl, kugbe emeshare iyorin rẹ ọmọtẹ ri Sọl re se Maikal* vwiẹ kẹ Edrẹl ọmọ ri Bazilai ohwo ri Mẹhola. 9 Ọtiọyena ọ da vwẹ ayen kpahotọ kẹ ihwo ri Gibiọn na, ayen da vwẹ irivwin rayen ya vwẹ enu rẹ ugbenu vwẹ obaro ri Jihova. Ayen ighwrẹn na de ghwu; a teyen ayen hwe vwẹ ẹdẹ rẹsosuọ re vwo vuẹ orhọ, vwẹ ọtonphiyọ rẹ orhọ rẹ ibali. 10 Ọtiọyena Rizpa ọmọtẹ rẹ Eiya da reyọ amwa rẹ esiso, ọ da vwọ hwa enu rẹ oragha na vwo nẹ ọtonphiyọ rẹ orhọ re te ọke rẹ osio vwọ rhọ nẹ idjuvwu rhe ku irivwin na; ọ vwẹ uphẹn vwọ kẹ ephran rẹ idjuvwu na nẹ e rhan mu ayen vwẹ oghẹruvo yẹrẹ eranvwe rẹ aghwa nẹ i sikẹrẹ ayen vwẹ asoon.
11 A da vuẹ Devid oborẹ Rizpa ọmọtẹ rẹ Eiya, ọsen ri Sọl ruru. 12 Ọtiọyena Devid da yanran ra reyọ ibeku ri Sọl kugbe ibeku rẹ ọmọ rọyen Jonatan vwo mie isun* ri Jebẹsh-giliẹd, ri cho ayen vwo nẹ ọsuorere ri Bẹt-shan, asan rẹ ihwo ri Filistia vwẹ ayen ya vwẹ ẹdẹ rẹ ihwo ri Filistia na teyen Sọl hwe vwẹ enu rẹ ugbenu ri Gilboa. 13 Ọ da reyọ ibeku ri Sọl kugbe ibeku rẹ ọmọ rọyen Jonatan nẹ oboyin rhe, ayen da je ghwẹ ibeku rẹ eshare ra teyen hwe* na koko. 14 Ọtiọyena ayen de shi ibeku ri Sọl kugbe i ri Jonatan ọmọ rọyen phiyọ ushi ri Kish ọsẹ ri Sọl vwẹ otọ ri Bẹnjamin vwẹ Zila. Ayen vwo ru erọnvwọn eje rẹ ovie na ji iji rọyen nu, Ọghẹnẹ da kerhọ rẹ orẹ rayen vwọ kẹ otọ na.
15 Ofovwin da rhoma she vwẹ uvwre rẹ ihwo ri Filistia kugbe Izrẹl. Ọtiọyena Devid vẹ idibo rọyen da yanran re nene ihwo ri Filistia na họnre, ẹkẹvuọvo oma de rhi bru Devid ku. 16 Ọmọ ri Rẹfeim ọvo re se Ishbai-binọb rẹ oshuẹ rẹ ẹrovwo rọyen họhọ te shẹkẹl 300* ro ji vwo ọlọkọ kpokpọ kọ guọnọ teyen Devid hwe. 17 Vwẹ ugege yena, Abishai ọmọ ri Zẹruya da rhe vwẹ ukẹcha kẹ, ọ da teyen ohwo ri Filistia na she, o de hwe ghwu. Ọtiọyena eshare ri Devid de duvwun iyorin nana kẹ nẹ: “Wo rhe che nene avwanre kpo ofovwin ọfaa! Wo fuẹn urhukpẹ rẹ Izrẹẹl!”
18 Ọyena vwọ wan nu, ayen da rhoma nene ihwo ri Filistia na phi ofovwin vwẹ Gọb. Vwẹ ọke yena, Sibẹkai rẹ ohwo ri Husha da teyen Saf ọmọ ri Rẹfeim hwe.
19 Ayen da rhoma nene ihwo ri Filistia na phi ofovwin vwẹ Gọb, Ẹlhenan ọmọ rẹ Jeharẹ-oregim ohwo ri Bẹtlẹhẹm da teyen Golayat ohwo ri Gat hwe, rẹ oshuẹ rọyen vwo urhe rọ họhọ urhe rẹ ihwo ri ruẹ emwa kiẹn oruru phiyọ.
20 Ofovwin da rhoma she vwẹ Gat, o vwo ọshare ọvo rọ rhoro mamọ vwẹ etiyin, o vwo irhiabọ 6 vwẹ obọ ọvuọvo kugbe irhiawọ 6 vwẹ owọ ọvuọvo, eje 24; ọyen jẹ ọmọ ri Rẹfeim. 21 Kọ vwẹ Izrẹl jehwẹ, ọtiọyena Jonatan ọmọ ri Shimiai, oniọvo ri Devid da teyọn hwe.
22 Ihwo ẹne nana yen nẹ orua ri Rẹfeim rhe vwẹ Gat, Devid vẹ idibo rọyen yen vwẹ obọ rayen teyen ayen hwe.