Ọbe Rivẹ ri Samuẹl

3 Ofovwin rọhẹ uvwre rẹ uwevwin ri Sọl vẹ uwevwin ri Devid jehẹ otọ; Devid kọ goma phiyọ, jẹ uwevwin ri Sọl rha vwiẹrẹ phiyọ.

2 Vwẹ uvwre rẹ ọke nana, e vwiẹ emọ kẹ Devid vwẹ Hẹbrọn. Ọmọkpako rọyen yen Amnọn rẹ Ahinoam ohwo ri Jẹzriẹl vwiẹ kẹ. 3 Ọrivẹ yen Kiliab rẹ Abigẹl ayeuku ri Nebal ohwo ri Kamẹl vwiẹre; ọrerha yen Absalọm ọmọ ri Meaka, ọmọtẹ ri Talmai ovie ri Gẹshọ. 4 Ọrẹne yen Adonaijah ọmọ ri Hagit, ọriyorin yen Shẹfataya ọmọ ri Abaital. 5 Ọresan yen Itriẹm rẹ Ẹgla aye ri Devid vwiẹre. Enana yen e vwiẹ kẹ Devid vwẹ Hẹbrọn.

6 Ofovwin rẹ uwevwin ri Sọl vẹ uwevwin ri Devid je vwọ hẹ otọ na, jẹ Abna rhe ruẹ ẹdia rọyen ganphiyọ vwẹ uwevwin ri Sọl. 7 Asaọkiephana Sọl vwo ọsen ọvo jovwo rẹ odẹ rọyen dia Rizpa, ọmọtẹ rẹ Eiya. Ọke vwọ yan obaro, Ish-boshẹt da ta kẹ Abna nẹ: “Diesorọ wo vwo nene ọsen rẹ ọsẹ mẹ mroma?” 8 Ivun de miovwo Abna mamọ kpahen eta rẹ Ish-boshẹt na, ọ da tanẹ: “Mẹvwẹ uyovwin rẹ eranko ro nẹ Juda rhe? Rhi te ọke na, mi dje ẹguọnọ ro jẹ rhẹriẹ kẹ uwevwin rẹ ọsẹ wẹn Sọl vẹ iniọvo rọyen kugbe igbeyan rọyen, me je rhe shẹ wẹ phiyọ obọ ri Devid dẹvoo; jẹ wọ hanrha ovwẹ nonẹna nẹ me vẹ aye ọvo ru emuọvo rọ chọre? 9 E jẹ Ọghẹnẹ ru ọtiọyen kẹ Abna je vwọ ba, siẹrẹ mi rhe ru kẹ Devid kirobo rẹ Jihova duvwun iyorin rọyen kẹẹ: 10 rọ vwọ reyọ uvie na vwo nẹ uwevwin ri Sọl, ọ me vwẹ ekete ri Devid vwo mu vwẹ enu rẹ Izrẹl kugbe enu ri Juda, vwo nẹ Dan re te Biẹ-shiba.” 11 Ọ rha sa kpahen ota vuọvo kẹ Abnaa, kidie oshọ rọyen muo.

12 Ugege yena, Abna de ji ikọn bru Devid tanẹ: “Ono yen vwo otọ na?” Ọ da je ta: “Nene uvwe re ọphọ, ki mi che ru kemu kemu ri mi se ru eje vwo ku Izrẹl ejobi rhẹriẹ kpo ẹbẹre wẹn.” 13 Ọtiọyena ọ da kpahen nẹ: “Oyoma! Mi che nene uwe re ọphọ. Orọnvwọn ọvuọvo re me guọnọ mie we yen wọ davwẹngba wọ vwọ mrẹ opharo mẹẹ, jokpanẹ wọ reyọ Maikal ọmọtẹ ri Sọl rhe, ọke ru wọ da cha rhe mrẹ vwẹ.” 14 Ọtiọyena Devid de ji ikọn bru Ish-boshẹt ọmọ ri Sọl ra nẹ: “Vwẹ aye mẹ Maikal re me vwẹ uvweruvwe 100 rẹ ihwo ri Filistia vwo bremu rọyen na kẹ vwẹ.” 15 Ọtiọyena Ish-boshẹt de ji ohwo ra reyọ mie ọshare rọyen Paltiẹl, ọmọ ri Leish rhe. 16 Ẹkẹvuọvo ọshare rọyen ko nene, jẹ ọ viẹ ro vwo nene na rhirin re te Bahurim. Etiyin Abna da ta kẹ nẹ: “Rhivwin kpo!” Ọtiọyena o de rhivwin kpo.

17 Vwẹ uvwre rẹ ọke yena, Abna da vwẹ ovuẹ rhe ekpako rẹ Izrẹl nẹ: “Vwẹ ọke ọvo rọ wanre, ovwan guọnọre nẹ Devid dia ovie vwẹ enu rẹ ovwan. 18 Ovwan jowọ asaọkiephana, kidie Jihova ta kẹ Devid nẹ: ‘Womarẹ obọ rẹ odibo mẹ Devid mi che sivwin ihwo mẹ Izrẹl vwo nẹ obọ rẹ ihwo ri Filistia, kugbe vwo nẹ obọ rẹ ivwighrẹn rayen eje.’” 19 Ọtiọyena Abna de nene ihwo ri Bẹnjamin ta ota. Abna de ji kpo Hẹbrọn re nene Devid ta ota vwẹ odjahọn, rọ vwọ vuẹ oborẹ Izrẹl vẹ uwevwin ri Bẹnjamin eje rhọnvwephiyọ.

20 Ọke rẹ Abna vẹ eshare 20 vwo bru Devid rhe vwẹ Hẹbrọn, Devid de chere udemu vwọ kẹ Abna vẹ eshare re vẹ ọyen gba herọ na. 21 Abna da ta kẹ Devid nẹ: “Juvwe yanran re koko Izrẹl eje kẹ ọrovwovwe ovie, rere ayen nene uwe re ọphọ, ku wọ dia ovie vwẹ enu rẹ emu eje ru wọ guọnọre.”* Ọtiọyena Devid de siobọnẹ Abna kpo, ọ da yanran vwọrẹ ufuoma.

22 Ọke yena, idibo ri Devid vẹ Joab de nẹ ofovwin rẹ ayen rare rhe, ayen ghwẹ ekuakua buebun nene oma rhe. Abna rha herọ vẹ Devid vwẹ Hẹbrọn ọfaa, kidie o siobọno yanran vwọrẹ ufuoma re. 23 Ọke rẹ Joab vẹ otuofovwin na eje re vẹ ọyen gba herọ vwọ rhe, a da vuẹ Joab nẹ: “Abna ọmọ ri Nẹr bru ovie rhe, o de siobọno yanran, ọ da yanran vwọrẹ ufuoma.” 24 Ọtiọyena Joab de bru ovie rhe, ọ da tanẹ: “Die yen wo ruru na? Me riẹnre nẹ Abna bru we rhe. Diesorọ wo vwo siobọno yanran? Asaọkiephana ọ djẹ vabọ re. 25 Wo vughe Abna ọmọ ri Nẹr! Ọ rhere rhe phiẹn wẹ, rọ vwọ riẹn kemu kemu ru wo ruẹ vẹ kasan kasan ru wọ ra.”

26 Ọtiọyena Joab da yanjẹ Devid vwo, o de ji ikọn nene Abna, ayen da reyọ rhivwin vwo nẹ asan ọgọdọ ri Saira rhe; ẹkẹvuọvo Devid riẹn emu vuọvo kpahọọn. 27 Ọke rẹ Abna vwo rhivwin rhe Hẹbrọn, Joab da reyọ ro ọkọkọ vwẹ asan anurhoro rẹ orere na, ro vwo nene ta ota vwẹ odjahọn. Ẹkẹvuọvo o de duvwun evun rọyen vwẹ etiyin, o de ghwu; o ru ọnana kidie o hwe* oniọvo rọyen Asahẹl. 28 Ọke rẹ Devid vwo nyo kpahọn, ọ da tanẹ: “Me vẹ uvie mẹ fonro bẹdẹ vwẹ obaro ri Jihova, vwo nẹ abe rẹ ọbara ri Abna, ọmọ ri Nẹr. 29 E jẹ ọ dia enu rẹ uyovwin ri Joab kugbe uwevwin rẹ ọsẹ rọyen ejobi. E jẹ ọshare rọ rioja rẹ ame oma ro hwẹ yẹrẹ ọhọnvwoti yẹrẹ ọshare ro che se ru oborẹ eshare ruẹẹ* yẹrẹ ohwo ra vwẹ ọlọkọ hwe yẹrẹ ohwo ro vwo emuọree kanre uwevwin ri Joabuu!” 30 Ọtiọyena Joab kugbe oniọvo rọyen Abishai de hwe Abna, kidie ọ teyen Asahẹl oniọvo rayen hwe vwẹ ofovwin vwẹ Gibiọn.

31 Ọtiọyena Devid da ta kẹ Joab kugbe ihwo eje re vẹ ọyen gba herọ na nẹ: “Ovwan bẹrẹ iwun rẹ ovwan je vwẹ emwa rẹ esiso rhuon rere ovwan vwerhe oma kẹ Abna.” Jẹ Ovie Devid komobọ rha yan nene ehwa re vwo mu orivwin na. 32 Ayen de shi Abna phiyọ Hẹbrọn; ovie na da viẹ gangan vwẹ asan ushi rẹ Abna, ihwo na eje da je viẹ. 33 Ovie na da so une rẹ uvweri kẹ Abna, ọ da tanẹ:

“Ofori nẹ Abna ghwu ughwu rẹ ohwo ro vwo ọhọọ?

Ju wo sheri kerẹ ohwo ro she vwẹ obaro rẹ ihwo ri churhi.”*

Etiyin ihwo na eje da rhoma viẹ kẹ.

35 Ọke vwọ yan obaro, ihwo na eje de bru Devid rhe rere ayen nẹrhẹ je vwẹ emuọre kẹ vwẹ aruphẹn, ẹkẹvuọvo Devid duvwun iyorin nẹ: “E jẹ Ọghẹnẹ ru ọtiọyen kẹ vwẹ je vwọ ba, ọ da dianẹ me vwẹ ibrẹdi yẹrẹ kemu kemu ọfa vwo te unu bẹsiẹ ọnre na vwo she!” 36 Ihwo na eje de noso, o de je ayen. Kemu kemu rẹ ovie na ruru de je ihwo na eje. 37 Ọtiọyena ihwo na eje kugbe Izrẹl eje da riẹn vwẹ ẹdẹ yena nẹ ọ dia ovie na yen tanẹ a teyen Abna ọmọ ri Nẹr hwee. 38 Ọtiọyena ovie na da ta kẹ idibo rọyen nẹ: “Ovwan rha riẹn nẹ osun vẹ ohwo rode yen ghwuru vwẹ Izrẹl nonẹna? 39 Nonẹna mi vwo ogangaan, dede nẹ a jẹ vwẹ reyọ kerẹ ovie, eshare nana, emọ ri Zẹruya branọ. E jẹ Jihova hwosa kẹ orumwemwu vwo nene umwemwu rọyen.”