Ọbe Rivẹ ri Samuẹl
24 Ophu ri Jihova da rhoma tua kpahen Izrẹl ọke rẹ ohwo ọvo vwọ kpare ẹwẹn ri Devid* vwọso ayen tanẹ: “Yanran re kere Izrẹl kugbe Juda.” 2 Ọtiọyena ovie na da ta kẹ Joab onotu rẹ otuofovwin rọ vẹ ọyen gba herọ na nẹ: “Biko yan nene ivwiẹ rẹ Izrẹl ejobi, vwo nẹ Dan re te Biẹ-shiba, rere wo si odẹ rẹ ihwo na phiyotọ me sa vwọ riẹn uchunu rayen.” 3 Ẹkẹvuọvo Joab da ta kẹ ovie na nẹ: “E jẹ Jihova Ọghẹnẹ wẹn ru ihwo na bunphiyọ abọ 100 rere ẹro rẹ ọrovwovwe ovie je mrẹ, ẹkẹvuọvo diesorọ ọrovwovwe ovie vwọ guọnọ ruẹ emu tiọna?”
4 Ẹkẹvuọvo ota rẹ ovie na da gan nọ ọ ri Joab kugbe e rẹ inotu rẹ otuofovwin na. Ọtiọyena Joab kugbe inotu rẹ otuofovwin na da yan nẹ obaro rẹ ovie na re si edẹ rẹ ihwo rẹ Izrẹl phiyotọ. 5 Ayen da shariẹ Jọdan na vrẹ, ayen de wonphiyọ* Aroa, vwẹ obọrhen* rẹ orere rọhẹ uherevie rẹ iyara* na, ayen de kpo otọ rẹ orua rẹ ihwo ri Gad, ayen de rhe nẹ etiyin kpo Jeza. 6 Ọyena vwọ wan nu, ayen de kpo Giliẹd vẹ otọ ri Tatim-họdshai, ayen de nẹ etiyin kpo Dan-jean, ayen de kin riariẹ kpo Saidọn. 7 Ayen de kpo orere ri Taya ra gbogba riariẹ kugbe irere rẹ ihwo ri Haiv eje kugbe e rẹ ihwo ri Kenan, ukuotọ rọyen, ayen de ku oyan na phiyọ vwẹ Nẹgẹb ri Juda vwẹ Biẹ-shiba. 8 Ọtiọyen kọyen ayen yan nene otọ na eje, ayen da rhe Jerusalẹm vwẹ oba rẹ emeranvwe irhirin kugbe ẹdẹ 20. 9 Asaọkiephana Joab da vwẹ ukeri rẹ ihwo re si edẹ rayen phiyotọ na vwọ kẹ ovie na, egba ofovwin 800,000 re vwẹ ọlọkọ choma kẹ ofovwin yehẹ Izrẹl, eshare ri Juda ke rha 500,000.
10 Ẹkẹvuọvo ubiudu* ri Devid ko kpokpo ọke ro vwo kere ihwo na nu. Devid da ta kẹ Jihova nẹ: “Mi ru umwemwu gangan womarẹ ọnana ri mi ruru na. Asaọkiephana Jihova, biko vwẹ oruchọ rẹ odibo wẹn vwo ghovwo, kidie mi ru emu rẹ ẹkpa gangan.” 11 Ọke rẹ Devid vwo vrẹn vwẹ urhiọke, ota ri Jihova de bru Gad ọmraro na, ọmremramrẹ ri Devid rhe nẹ: 12 “Yanran rere wọ ta kẹ Devid nẹ, ‘Ọnana yen oborẹ Jihova tare: “Me vwẹ erọnvwọn erha kẹ wẹ. Jẹ ọ ru wọ guọnọre nẹ mi ru we.”’” 13 Ọtiọyena Gad de bru Devid rhe, ọ da ta kẹ nẹ: “Owẹnvwe fi vwẹ otọ wẹn vwẹ ẹgbukpe ighwrẹn? Gbanẹ wọ mrẹ ivwighrẹn wẹn djẹ emeranvwe erha jẹ ayen vwọtua wẹ? Gbanẹ ọga dia otọ wẹn vwẹ ẹdẹ erha? Asaọkiephana nabọ roro kpahen oborẹ me cha kpahen kẹ Ohwo ro ji vwe rhe.” 14 Ọtiọyena Devid da ta kẹ Gad nẹ: “Ofu dje vwe hwe. Biko jẹ avwanre shephiyọ obọ ri Jihova, kidie arodọnvwẹ rọyen rhoro; ẹkẹvuọvo wo juvwe shephiyọ obọ rẹ ohworakpọọ.”
15 Ọtiọyena Jihova da nẹrhẹ ọga dia Izrẹl vwo nẹ urhiọke rhirin re te ọke rọ tare na, ọnana da nẹrhẹ ihwo 70,000 vwo nẹ Dan re te Biẹ-shiba ghwu. 16 Ọke rẹ amakashe na vwọ rionbọ phiyọ Jerusalẹm rere ọ ghwọrọ, okpetu na da da Jihova,* ọ da ta kẹ amakashe rọ sua oghwọrọ vwẹ ohri rẹ ihwo na nẹ: “O teri! Asaọkiephana phi obọ wẹn phiyotọ.” Amakashe ri Jihova na sikẹre asan re de wonro ibi ekankọn rẹ Arọna ohwo ri Jẹbus na jovwo re.
17 Ọke rẹ Devid vwọ mrẹ amakashe na rọ teyan ihwo na hwe, ọ da ta kẹ Jihova nẹ: “Mẹvwẹ yen ru umwemwu, mẹvwẹ yen ji ru chọ; ẹkẹvuọvo die yen igodẹ nana ruru? Biko jẹ obọ wẹn vwọso ovwẹ vẹ uwevwin rẹ ọsẹ mẹ.”
18 Ọtiọyena Gad de bru Devid rhe vwẹ ẹdẹ yena, ọ da ta kẹ nẹ: “Yanran ra so agbada ọvo kẹ Jihova vwẹ asan re de wonro ibi ekankọn rẹ Arọna ohwo ri Jẹbus na.” 19 Ọtiọyena Devid da yanran vwo nene oborẹ Jihova womarẹ Gad ji iji rọyen. 20 Ọke rẹ Arọna vwo ni obotọ je mrẹ ovie na vẹ idibo rọyen ri bro cha, ugege yena Arọna da ro otafe, ọ da riẹn totọ kẹ ovie na vẹ opharo rọyen rọ bọvwọn rhuotọ. 21 Arọna da nọ nẹ: “Diesorọ ọrovwovwe ovie vwo bru odibo rọyen rhe?” Devid da kpahen nẹ: “Me rhe dẹ asan re de wonro ibi ekankọn na mie we rere me so agbada kẹ Jihova, rere a sa vwọ dobọ rẹ ọtiekọ ra vwọ ghwiẹ ihwo na ji.” 22 Ẹkẹvuọvo Arọna da ta kẹ Devid nẹ: “E jẹ ọrovwovwe ovie reyọ, je vwẹ obo ro niri nẹ o yovwirin* vwo ze izobo. Nighere, erhuẹn re che vwo ze izobo rẹ ẹtorhẹ na vẹ ephapha re vwo wonro ibi ekankọn na kugbe irhe re phi phiyọ ohọre rẹ erhuẹn na re che vwo koko erhanre, ena. 23 E ovie, Arọna vwẹ enana eje vwọ kẹ ovie.” Arọna da ta kẹ ovie na nẹ: “E jẹ Jihova Ọghẹnẹ wẹn dje ẹroesiri kẹ wẹ.”
24 Ẹkẹvuọvo ovie da ta kẹ Arọna nẹ: “Ẹjo, me cha dẹ mie we. Mi che ze izobo rẹ ẹtorhẹ rẹ ọphẹ vwọ kẹ Jihova Ọghẹnẹ mẹẹ.” Ọtiọyena Devid da vwẹ shẹkẹl* rẹ idọnọ ọfuanfon 50 vwọ dẹ asan re de wonro ibi ekankọn na vẹ erhuẹn na. 25 Devid da so agbada ọvo kẹ Jihova vwẹ etiyin, o de ze izobo rẹ ẹtorhẹ kugbe izobo rẹ ọrekugbe. Jihova da kpahen phiyọ orẹ vwọ kẹ otọ na, a da dobọ rẹ ọtiekọ ra vwọ ghwiẹ Izrẹl na ji.