Ovwan Bọn Ohwohwo Gan Vwevunrẹ Uyono

1. Diesorọ avwanre vwọ kpahenphiyọ enọ vwẹ uyono?

DIESORỌ avwanre vwo kpo uyono? Ẹsosuọ, re vwo jiri Jihova. (Un 26:12; 111:1) Avwanre ji kpo uyono rere a sa vwọ vwẹ ọbọngan kẹ ohwohwo vwevunrẹ ọke ọgangan nana. (1 Tẹ 5:11) Siẹrẹ avwanre da rionbọ je kpahenphiyọ onọ, jẹ avwanre ruẹ erọnvwọn ivẹ nana.

2. Uphẹn vọ yen avwanre vwori a sa vwọ kpahenphiyọ enọ vwẹ uyono?

² Kudughwrẹn kudughwrẹn, avwanre vwo uphẹn ra vwọ kpahenphiyọ enọ vwẹ uyono. Kerẹ udje, avwanre se vwobọ vwẹ uyono rẹ Uwevwin Orhẹrẹ re ruẹ vwẹ oba rẹ udughwrẹn na. Vwẹ uyono re ruẹ vwẹ uvwre rẹ udughwrẹn na, avwanre sa kpahenphiyọ enọ vwẹ ẹbẹre rẹ Efe Eghanghanre, Uyono ri Baibol, kugbe ẹbẹre efa re vwo ruẹ otaẹtakuẹgbe.

3. Ebẹnbẹn vọ yen e se hirharoku, kẹ mavọ yen obo rehẹ Hibru 10:​24, 25 sa vwọ chọn avwanre uko?

³ Avwanre eje guọnọ vwẹ ujiri kẹ Jihova je bọn iniọvo avwanre gan. Ẹkẹvuọvo e se hirharoku ebẹnbẹn siẹrẹ a da kpahenphiyọ enọ. Oshọ ra vwọ kpahenphiyọ enọ se mu avwanre, yẹrẹ avwanre se vwo owenvwe ra vwọ kpahenphiyọ enọ ẹkẹvuọvo e se jẹ avwanre e se uchabọ ra guọnọre. Die yen sa chọn avwanre uko vwo phi ebẹnbẹn nana kparobọ? A sa mrẹ ẹkpahọnphiyọ rẹ onọ na vwẹ ileta rẹ ọyinkọn Pọl si vwo rhe iniọvo ri Hibru. Rọ vwọ karunumuẹ ọghanrovwẹ rẹ uyono ẹra, ọ da tanẹ a tẹnrovi obo re se vwo “bru ohwohwo uche.” (Se Hibru 10:​24, 25.) A da mrẹvughe nẹ iniọvo na sa mrẹ ọbọngan vwo nẹ ẹkpahọnphiyọ rẹ avwanre rhe, oshọ ra vwọ rionbọ je kpahenphiyọ enọ rhe che mu avwanre-e. Ọ da dianẹ e rhe ji se avwanre uchabọ ra guọnọre-e, oma je sa vwerhen avwanre nẹ a kẹ ihwo efa uphẹn rẹ ayen vwọ kpahenphiyọ enọ.​—1 Pi 3:8.

4. Ẹkpo erha vọ yen a cha ta ota kpahen vwẹ uyono nana?

⁴ Vwẹ uyono nana, a cha ta ota kpahen obo ra sa vwọ bọn ohwohwo gan vwẹ ukoko rẹ ighwoghwota rọyen ghwe bu-un rẹ ihwo ri kpahenphiyọ enọ ji te emuọvo-o. E de ru ọyena nu, ka cha ta ota kpahen obo ra sa vwọ bọn ohwohwo gan vwẹ ukoko rẹ ighwoghwota buebun hepha rẹ ihwo buebun da rionbọ re vwọ kpahenphiyọ enọ. Ukuotọ rọyen, avwanre je cha ta ota kpahen obo ra sa vwọ reyọ ẹkpahọnphiyọ avwanre vwọ bọn ohwohwo gan.

BỌN OHWOHWO GAN VWẸ UKOKO RẸ IGHWOGHWOTA RỌYEN GHWE BU-UN

5. Mavọ yen a sa vwọ bọn ohwohwo gan ọ da dianẹ ihwo ri rhe uyono bunru-u?

⁵ Vwẹ ukoko yẹrẹ ẹko rẹ ighwoghwota rọyen ghwe bu-un, ọ bẹn rẹ ohwo rọ vwẹrote uyono na vwọ mrẹ ihwo se. Ọkievo, ọ hẹrhẹ emerha tavwen ohwo ọvo ke cha rionbọ ro che se. Ọnana kọ nẹrhẹ uyono na siotọ​—ofu mi ji dje ohwo. Kẹ die wo se ru? Vwo owenvwe wọ vwọ rionbọ abọ buebun. Wo de ru ọtiọyen, ihwo efa je sa vwẹrokere uwe vwọ rionbọ.

6-7. Mavọ yen e se vwo si ẹnwan rẹ obo ra cha ta kpotọ siẹrẹ a da kpahenphiyọ enọ?

⁶ Kẹ ọ da rha dianẹ oshọ ru wọ vwọ kpahenphiyọ onọ mu we vwo? Ọtiọyen ọ je hepha vwọ kẹ ihwo buebun. Ẹkẹvuọvo, diesorọ wọ rha gbẹn idjerhe sansan wo vwo phi oshọ na kparobọ rere iniọvo na sa vwọ mrẹ ọbọnga-an? Mavọ yen wo se vwo ru ọtiọyen?

⁷ Wọ sa mrẹ ukẹcha siẹrẹ wọ da fuẹrẹn iroroẹjẹ sansan ra vwọphia vwẹ Uwevwin Orhẹrẹ re yono wan re.b Kerẹ udje, muegbe ro fiotọ. (Isẹ 21:5) Wọ da nabọ vwo ẹruo rẹ obo re che yono na fiotọ, ọ rha cha bẹn wọ vwọ rionbọ je kpahenphiyọ onọ-ọ. Vwọba, jẹ ẹkpahọnphiyọ wẹn dia kprẹn. (Isẹ 15:23; 17:27) Ẹkpahọnphiyọ da dia kprẹn, a rha ro ẹnwan rọye-en. Ọ phẹrẹ iniọvo na vwo vwo ẹruọ rẹ ẹkpahọnphiyọ rọ pha kprẹn ro vwo irhiẹn eta ọvo yẹrẹ ivẹ, ukperẹ ọ rọ pha grongron ra da ta eta buebun. Wo djephia nẹ wọ nabọ muegbe wo ji vwo ẹruọ rẹ obo re yono na fiotọ siẹrẹ wọ da reyọ eta romobọ wẹn vwọ kpahenphiyọ enọ.

8. Ẹro vọ yen Jihova vwo ni ẹgbaẹdavwọn rẹ avwanre?

⁸ Ọ da dianẹ wọ vwẹ iroroẹjẹ nana vwo ruiruo jẹ oshọ ji mu we wọ vwọ kpahenphiyọ onọ vrẹ obọ ọvo yẹrẹ abọ ivẹ vwo? Jẹ o muwẹro nẹ ẹgbaẹdavwọn wẹn wo vwo ru asan rẹ ẹgba wẹn teri pha ghanghanre vwẹ ẹro ri Jihova. (Lu 21:​1-4) Wo vwo ru asan rẹ ẹgba wẹn teri ọ dia o muidiaphiyọ nẹ wo che ru vrẹ oma wẹ-ẹn. (Fil 4:5) Riẹn asan rẹ ẹgba wẹn muru, bru ẹkẹn kẹ oma, ji nẹrhovwo rhe Jihova nẹ ọ kẹ wẹ ẹwẹn ri dọe wo se vwo ruo. Ẹsosuọ, tẹnrovi obo wọ sa vwọ kpahenphiyọ onọ ọvo rọ pha kprẹn.

BỌN OHWOHWO GAN VWẸ UKOKO RẸ IGHWOGHWOTA BUEBUN HEPHA

9. Egbabọse vọ yen sa vwomaphia vwẹ ukoko ro vwo ighwoghwota buebun?

⁹ Egbabọse ọfa herọ ọ da dianẹ ukoko wẹn vwo ighwoghwota buebun. Ọkiọvo ọ sa dianẹ iniọvo buebun rionbọ ayen vwọ kpahenphiyọ enọ ọ me nẹrhẹ e jẹ uwe e se. Kerẹ udje, Danielle vwo omavwerhovwen rọ vwọ kpahenphiyọ enọ ọkieje vwevunrẹ uyono.c Ọ reyọ kerẹ ẹbẹre ọvo rẹ ẹga rọ vwọ kẹ Jihova, idjerhe ọvo rọ vwọ vwẹ ọbọngan kẹ iniọvo na, ji ruẹ esegbuyota ro vwo kpahen Baibol na ganphiyọ. Ẹkẹvuọvo ọke ro vwo wene ukoko rọ hepha kpo ukoko rẹ ighwoghwota rọyen pha buebun, a rha fobọ se-e​—ọkiọvo dede ọ tobọ kpahenphiyọ onọ ọvo vwevunrẹ uyono-o. Ọ da ta “ofu de rhi dje vwe hwe, kọ họhọre nẹ uphẹn rẹ ẹga va vwẹ abọ. Emu ọtiọna da rhe phia abọ buebun re, wo se roro nẹ arudo yen e vwo jẹ uwe e se.”

10. Mavọ yen e se vwo vwo uphẹn buebun ra vwọ kpahenphiyọ enọ?

¹⁰ Obo re phia kẹ Danielle na ji ru we jovwo re? Ọ da dia ọtiọyen, wo se vwo ẹwẹn rẹ me ghwa kpairoro vrẹ rere me kerhọ ọvo. Ẹkẹvuọvo wọ dobọ rẹ ẹgbaẹdavwọn wọ vwọ kpahenphiyọ onọ jẹ-ẹ. Die yen wo se ru? O che yovwin siẹrẹ wo de muegbe rẹ ẹkpahọnphiyọ buebun phiyotọ vwọ kẹ uyono eje re ruẹ. Ọ da dianẹ e se we vwẹ ọtonphiyọ rẹ uyono na-a, uphẹn efa je herọ wọ vwọ kpahenphiyọ enọ uyono na vwọ yanran na. Wo de muegbe rẹ uyono rẹ Uwevwin Orhẹrẹ na, roro kpahen oborẹ ẹkorota ọvuọvo vwo churobọ si uyovwinrota re yono na. Wo de ru ọtiọyen, ku wọ sa mrẹ ẹkpahọnphiyọ buebun wọ sa vwọphia vwẹ ọke ro fori. Vwọba, wo se muegbe vwọ kẹ enọ rẹ ẹkoreta re pha gangan re ta ota kpahen iyono ikokodo. (1 Kọ 2:10) Diesorọ? Kidie ihwo re rionbọ vwẹ ẹbẹre nana ghwe buẹ-ẹn. Kẹ ọ da rha dianẹ wọ davwen iroroẹjẹ nana eje, jẹ vwẹ iyono buebun re wanvrẹ re e ji se we-e vwo? Wo se bru ohwo rọ vwẹrote uyono na ra tavwen uyono ke tonphiyọ je vuẹ nẹ o vwo onọ ọvo ru wọ guọnọ kpahenphiyọ.

11. Die yen Filipae 2:4 vuẹ avwanre nẹ e ru?

¹¹ Se Filipae 2:4. Ẹwẹn ọfuanfon mu ọyinkọn Pọl vwo jiro kẹ Inenikristi nẹ ayen guọnọ erhuvwu rẹ ihwo efa. Mavọ yen a sa vwọ reyọ uchebro yena vwo ruiruo ọke ra da hẹ uyono? E jẹ a karophiyọ nẹ ihwo efa je herọ re guọnọ kpahenphiyọ enọ, ọ dia avwanre ọvo-o.

12. Idjerhe vọ yen a sa vwọ bọn ihwo efa gan vwevunrẹ uyono? (Ni uhoho na.)

¹² Di roro vwẹ idjerhe ọtiọna. Ọ da dianẹ wọ vẹ igbeyan wẹn ta ota kuẹgbe, owẹ ọvo cha ta ota na te ẹdia rẹ ayen rhe che vwo uphẹn rẹ ayen vwo toroba-a? Kakaka! Wọ guọnọre nẹ ayen toroba ota na. Ọtiọyen ọ je hepha, vwevunrẹ uyono, a guọnọ vwẹ uphẹn kẹ ihwo buebun ayen vwọ kpahenphiyọ enọ. Vwọrẹ uyota, idjerhe ọvo ro me yovwin ra sa vwọ bọn iniọvo avwanre gan ọyen a vwọ vwẹ uphẹn kẹ ayen vwọ kpahenphiyọ enọ. (1 Kọ 10:24) E ja ta ota kpahen obo re se vwo ru ọtiọyen.

13. Mavọ yen a sa vwọ vwẹ uphẹn kẹ iniọvo efa vwọ kpahenphiyọ enọ?

¹³ Emu ọvo ra guọnọre yen, ẹkpahọnphiyọ avwanre dia kprẹn, rere ihwo efa sa vwọ mrẹ uphẹn rẹ ayen vwọ kpahenphiyọ enọ. A guọnọre nẹ ekpako vẹ ighwoghwota ri tedje dia uvi rẹ udje kẹ ihwo efa. Ọ da tobọ dianẹ ẹkpahọnphiyọ wẹn pha kprẹn, kẹnoma kẹ uruemu re vwo djunute ẹkpo buebun. Owẹ ọvo de djunute ẹkpo rehẹ ẹkorota na eje, ihwo efa rha cha mrẹ oborẹ ayen cha ta-a. Kerẹ udje, vwẹ ẹkorota nana, a reyọ iroroẹjẹ ivẹ vwọphia​—jẹ ẹkpahọnphiyọ wẹn dia kprẹn wọ je kẹnoma kẹ uruemu re vwo djunute ẹkpo ibuebun. Ọ da dianẹ wẹwẹ yen ohwo rẹsosuọ re ke se vwọ kpahenphiyọ onọ rẹ ẹkorota nana, diesorọ wo rhe ghwe djunute ẹkpo ọvo-o?

14. Die yen sa chọn avwanre uko vwọ riẹn uchabọ ro fori nẹ a rionbọ? (Ni uhoho na.)

¹⁴ Reyọ aghwanre vwo brorhiẹn rẹ uchabọ wọ cha rionbọ vwọ kpahenphiyọ onọ vwevunrẹ uyono. E de dje abọ ẹriẹnriẹn, ọ cha nẹrhẹ ohwo rọ vwẹrote uyono na hirharoku ọnyẹ ro vwo se avwanre abọ buebun ọ da tobọ dianẹ uphẹn je rhe dia kẹ ihwo efa rẹ ayen vwọ kpahenphiyọ onọ-ọ. Ọnana sa nẹrhẹ ofu ra vwọ rionbọ dje ihwo efa.​—Agh 3:7.

15. (a) Die yen ofori nẹ e ru ọ da dianẹ e se avwanre-e? (b) Mavọ yen ihwo re vwẹrote uyono na se vwo dje erorokẹ kẹ ihwo eje? (Ni ekpeti na “Ọ da Dianẹ Wẹwẹ Yen Vwẹrote Uyono Na.”)

¹⁵ Ihwo buebun da rionbọ vwevunrẹ uyono, ọ cha bẹn ra vwọ kpahenphiyọ enọ abọ buebun kirobo rẹ avwanre guọnọre. Ọkiọvo, ohwo rọ vwẹrote uyono na che se se avwanre dede-e. Ọyena sa nẹrhẹ ofu dje ohwo, ẹkẹvuọvo e jẹ ivun miovwo avwanre siẹrẹ e rhe se avwanre-e.​—Agh 7:9.

16. Mavọ yen a sa vwọ reyọ ọbọngan kẹ ihwo efa re kpahenphiyọ onọ?

¹⁶ Ọ da dianẹ wọ sa kpahenphiyọ enọ abọ buebun kirobo wọ guọnọre-e, diesorọ wọ rha nabọ kerhọ kẹ ẹkpahọnphiyọ rẹ ihwo efa ji jiri ayen siẹrẹ uyono na de kuphiyọ nu-u? Ejiro ru wo jiri iniọvo wẹn sa vwẹ ọbọngan kẹ ayen kirobo rẹ ẹkpahọnphiyọ wẹn ji che ru. (Isẹ 10:21) Ujiri ọyen idjerhe ọfa ra vwọ bọn ohwohwo gan.

IDJERHE EFA RA SA VWỌ BỌN OHWOHWO GAN

17. (a) Mavọ yen emiọvwọn sa vwọ chọn emọ rayen uko vwo muegbe rẹ ẹkpahọnphiyọ ri fori? (b) Vwo nene obo rehẹ ividio na, die yen owọẹjẹ ẹne ro fori nẹ e nene siẹrẹ e de muegbe rẹ ẹkpahọnphiyọ? (Ni eta rehẹ obotọ na.)

¹⁷ Ọrhọ yen idjerhe ọfa ra sa vwọ bọn ohwohwo gan vwevunrẹ uyono? Wọ da dia ọmiọvwọn, chọn emọ wẹn uko vwo muegbe rẹ ẹkpahọnphiyọ ro fo kẹ edje rayen. (Mt 21:16) Ọkievo, a sa ta ota kpahen eta eghanghanre kerẹ, ebẹnbẹn rẹ orọnvwe kugbe eta ri shekpahen ọfanrhiẹn vwevunrẹ uyono, ẹkẹvuọvo a sa mrẹ ẹkorota ọvo yẹrẹ ivẹ rẹ emọ da sa kpahenphiyọ enọ. Vwọba, chọn emọ wẹn uko vwo vwo ẹruọ rẹ oboresorọ e se vwo jẹ ayen e se ọ da tobọ dianẹ ayen rionbọ. Ọnana cha nẹrhẹ ivun jẹ ayen e miovwo e de se ihwo efa ukperẹ ayen.​—1 Ti 6:18.d

18. Mavọ yen a sa vwọ kẹnoma kẹ uruemu re vwo jiri oma rẹ ohwo siẹrẹ a da kpahenphiyọ enọ? (Isẹ 27:2)

¹⁸ Avwanre eje se mugbe rẹ ẹkpahọnphiyọ re sa vwẹ ọbọnga vwọ kẹ iniọvo avwanre ji brọghọ phiyọ Jihova oma. (Isẹ 25:11) Ọkiọvo a sa ta ota kpahen obo re rhiẹromrẹ, ẹkẹvuọvo e ja kẹnoma kẹ uruemu re vwo jiri oma re ohwo. (Se Isẹ 27:2; 2 Kọ 10:18) Ukperẹ ọtiọyen, e ja tẹnrovi Jihova, ota rọyen, kugbe ihwo rọyen. (Ẹvw 4:11) Ọ da dianẹ onọ rẹ ẹkorota na guọnọre nẹ a ta ota kpahen obo re rhiẹromrẹ, o fori nẹ e ru ọtiọyen. Udje rẹ ọnana vwomaphia vwẹ ẹkorota rọ vwọ kpahen ọnana.

19. (a) Erhuvwu vọ yen che norhẹ siẹrẹ e de dje erorokẹ kẹ ihwo eje re rhe uyono? (Rom 1:​11, 12) (b) Die yen kẹ wẹ omavwerhovwẹn siẹrẹ wọ da kpahenphiyọ enọ vwevunrẹ uyono?

¹⁹ Dede nẹ irhi rẹ obo ra kpahenphiyọ enọ wan ghwa herọ-ọ, avwanre eje sa davwẹngba vwọ bọn ohwohwo gan womarẹ ẹkpahọnphiyọ rẹ avwanre. Ọnana se mudiaphiyọ nẹ a cha kpahenphiyọ enọ abọ buebun. Yẹrẹ uphẹn re vwori ra vwọ kpahenphiyọ enọ te kẹ avwanre e mi ji vwo omavwerhovwẹn nẹ ihwo efa vwo uphẹn rẹ ayen vwọ kpahenphiyọ enọ. A da tẹnrovi erhuvwu rẹ ihwo efa vwevunrẹ uyono, avwanre eje ki se “ru esegbuyota rẹ ohwohwo gan.”​—Se Rom 1:​11, 12.