Jihova Cha Chọn wẹ Uko Vwo Yerin Ghene Ebẹnbẹn rẹ Akpeyeren

1. Imuẹro vọ yen avwanre vwori?

KERẸ idibo ri Jihova, avwanre riẹnre nẹ o vwo ẹguọnọ avwanre, ọ je guọnọ nẹ e yeren uvi rẹ akpọ. (Ro 8:​35-39) Vwọba, o ji mu avwanre ẹro nẹ a da reyọ odjekẹ ri Baibol na vwo ruiruo, o che fi erere kẹ avwanre. (Aiz 48:​17, 18) Kẹ ọ da rha dianẹ e hirharoku ebẹnbẹn re rhẹro rọye-en vwo?

2. Ebẹnbẹn vọ yen e se hirharoku, kẹ iroro vọ yen ebẹnbẹn ọtiọyen sa so?

² Idibo ri Jihova ejobi vwo ebẹnbẹn rẹ ayen nene muabọ. Kerẹ udje, ohwo rẹ orua ra vwẹroso se ku avwanre phiyotọ. Ọ sa dianẹ e nene ọga muabọ rọ nẹrhẹ e rhe se ruẹ obo ra guọnọ ru vwẹ ẹga ri Jihova-a. Avwanre se rhiẹromrẹ ebẹnbẹn rẹ oghwọrọ ri kpregede ghwa cha. Yẹrẹ e se mukpahen avwanre fikirẹ esegbuyota avwanre. E de hirharoku edavwini tiọyen, e se roro nẹ: ‘Die yen phia? Die yen mi ruru rọ chọre? Kọyen Jihova ghene kpairoro vrẹ vwẹ?’ Iroro ọtiọyen kọn ro owẹ ẹwẹn jovwo re? Ọ da dia ọtiọyen, wo jẹ ofu dje we-e. Idibo ri Jihova buebun ji nene iroro ọtiọyen muabọ re.​—Un 22:​1, 2; Hab 1:​2, 3.

3. Die yen avwanre yono vwo nẹ Une rẹ Ejiro 34:19 rhe?

³ Se Une rẹ Ejiro 34:19. Jokaphiyọ ẹkpo eghanghanre ivẹ rehẹ owọ rẹ ota na: (1) Evwata rẹ ihwo hirharokuẹ ebẹnbẹn. (2) Jihova sivwin avwanre nẹ ebẹnbẹn rẹ avwanre. Idjerhe vọ yen Jihova vwo ruẹ ọtiọyen? Ọyehẹ rọ vwọ chọn avwanre uko vwọ vwẹ ẹro abavo vwo ni eyeren nana. Dede nẹ Jihova veri nẹ ihwo re vwẹ ẹga kẹ che vwo aghọghọ, ọ dia ọyen e che vwo yeren akpọ rẹ ebẹnbẹn kanre enẹna-a. (Aiz 66:14) Ọ vuẹ avwanre nẹ a tẹnrovi obaro na​—rọ dia ọke avwanre che vwo yeren akpọ rọ guọnọre nẹ a riavwerhen rọyen bẹdẹ. (2 Kọ 4:​16-18) Asaọkiephana ọ je chọn avwanre uko a sa vwọ reyọ ẹga vwọ kẹ.​—Uvw 3:​22-24.

4. Die yen a cha ta ota kpahen vwẹ uyono nana?

⁴ E jẹ a ta ota kpahen obo re se yono vwo nẹ idje rẹ idibo ri Jihova re fuevun vwẹ ọke rẹ awanre kugbe ọke rẹ avwanre na. Kirobo ra cha mrẹ, ọkievo e se hirharoku ebẹnbẹn re rhẹro rọye-en. Ẹkẹvuọvo, a da vwẹroso Jihova, o che bicha avwanre ọkieje. (Un 55:22) A cha vwọ fuẹrẹn idje nana, nọ oma wẹn: ‘Die yen mi rhe ru ọ da dianẹ mi hirharoku ẹdia ọtiọyen? Mavọ yen idje nana vwo ru ẹroẹvwọsuọ ri mi vwo kpahen Jihova ganphiyọ? Mavọ yen me sa vwo reyọ obo ri mi yonori vwo ruiruo vwẹ akpeyeren?’

ỌKE RẸ AWANRE

5. Ebẹnbẹn vọ yen Jekọp hirharoku fikirẹ Laban? (Ni uhoho rọhẹ opharo ọbe na.)

⁵ Idibo ri Jihova vwẹ awanre hirharoku ebẹnbẹn rẹ ayen rhẹro rọye-en. Roro kpahen obo re phia kẹ Jekọp. Ọsẹ rọyen vuẹ rẹ nẹ ọ reyọ aye ọvo usun rẹ emetẹ ri Laban, rọ dia ohwo rẹ orua rayen rọ je ga Jihova, ọsẹ rọyen je vwẹ imuẹro kẹ nẹ o de ru ọtiọyen Jihova che bruba kẹ gbidiki. (Jẹ 28:​1-4) Ọtiọyena, Jekọp de ru obo ri fori. O vrẹn nẹ otọ ri Kenan je yan ugbo oshesheri bru Laban ra, ro vwo emetẹ ivẹ​—Leah kugbe Rachel. Jekọp de rhi vwo ẹguọnọ rẹ omọtẹ ri Laban otete re se Rachel, ọ da je rhọnvwe nẹ ọ cha ga ọsẹ rọyen ẹgbukpe ighwrẹn tavwen ọ ke rọvwọn. (Jẹ 29:18) Ẹkẹvuọvo erọnvwọn rhe shephiyọ kirobo rẹ Jekọp rhẹro rọye-en. Laban da phiẹn vwọ rọvwọn ọmọtẹ rọyen ọkpako, Leah. Udughwrẹn ọvo vwọ wan nu, Laban da vwẹ uphẹn kẹ Jekọp nẹ ọ rọvwọn Rachel, ẹkẹvuọvo ọ cha rhoma ga ẹgbukpe ighwrẹn efa. (Jẹ 29:​25-27) Laban je ghwa Jekọp re ọke rọ vwọ vwẹrote uchuru rọyen. Kọyen ẹgbukpe uje soso rẹ Jekọp nene Laban dia na, yen ọ vwo ghwa re!​—Jẹ 31:​41, 42.

6. Ebẹbẹn efa vọ yen Jekọp chirakon rọyen?

⁶ Jekọp ji chirakon rẹ ebẹnbẹn efa. O vwo orua rode, jẹ emọ rọyen ro ohwohwo-o. Ayen tobọ shẹ oniọvo rayen otete Josẹf kpo eviẹn. Emọ ri Jekọp ivẹ, Simiọn vẹ Livae, je ghwa ophọphọvwe rhe orua na kugbe odẹ ri Jihova. Vwọba, aye ri Jekọp ro vwo ẹguọnọ rọyen mamọ, Rachel, de rhe ghwu ro vwo vwiẹ ọmọ rivẹ rọyen. Fikirẹ owẹnvwe ọgangan ro firi, Jekọp vẹ orua rọyen da je kua kpo otọ rẹ Ijipt vwẹ ọke ọghwo rọyen.​—Jẹ 34:30; 35:​16-19; 37:28; 45:​9-11, 28.

7. Idjerhe vọ yen Jihova vwo dje kẹ Jekọp nẹ o vwo aroesiri rọyen?

⁷ Vwevunrẹ ebẹnbẹn nana eje, esegbuyota rẹ Jekọp vwo kpahen Jihova vẹ ive Rọyen shekpotọ-ọ. Ukuotọ rọyen, Jihova de rhi dje kẹ Jekọp nẹ o vwo aroesiri rọyen. Kerẹ udje, dede nẹ Laban ghwa rọ re abọ buebun, Jihova ji bruba kẹ, o de rhi fe. Roro kpahen oborẹ Jekọp vwo ọdavwaro rẹ obo ri Jihova ru kẹ ọke rọ vwọ rhoma rhe mrẹ Josẹf​—ọmọ rọyen ro rorori nẹ o ghwuru ọke grongron re wanre! Uvi rẹ oyerinkugbe rẹ Jekọp vẹ Jihova vwori yen nẹrhẹ o se yerin ghene ebẹnbẹn rọyen. (Jẹ 30:43; 32:​9, 10; 46:​28-30) Avwanre da sẹro rẹ uvi oyerinkugbe ra vẹ Jihova vwori, ke ghini se yerin ghene edavwini re rhẹro rọye-en.

8. Die yen Ovie Devid guọnọ ru?

⁸ Ovie Devid se ru erọnvwọn eje rọ guọnọ ru vwẹ ẹga ri Jihova-a. Kerẹ udje, ọ ghene guọnọ bọn uwevwin rẹ ẹga vwọ kẹ Ọghẹnẹ. Ọ vuẹ ọmraro Natan kpahen obo rọ guọnọ ru na. Natan da vuẹ: “Ru obo ri hẹ udu wẹn, kidie Ọghẹnẹ vẹ owẹ herọ.” (1Ik 17:​1, 2) Avwanre sa vwẹ ẹwẹn roro oborẹ eta yena phiuduphiyọ Devid awọ. Ọ sa dianẹ ugege yena, ọ da ton egbemuo rẹ owian rode na phiyọ.

9. Die yen Devid ruru ọke ra vwo vuẹ nẹ ọ dia ọyen yen cha bọn uwevwin rẹ ẹga na-a?

⁹ Ọmraro ri Jihova de rhivwin bro ra je vuẹ ovuẹ rọ vwerhen rọ oma-a. “Vwẹ ason ọvuọvo na,” Jihova da womarẹ ọmraro Natan vuẹ Devid nẹ ọ dia ọyen yen cha bọn uwevwin rẹ ẹga na-a, ẹkẹvuọvo ọvo usun rẹ emọ rọyen yen cha bọn. (1Ik 17:​3, 4, 11, 12) Kẹ die yen Devid ruru ọke rẹ ovuẹ nana vwo te obọ? O de wene ẹwẹn. Ọ da tẹnrovi obo ro se vwo koko igho vẹ ekuakua rẹ ọmọ rọyen Solomon cha vwọ bọn uwevwin na.​—1Ik 29:​1-5.

10. Idjerhe vọ yen Jihova vwo bruphiyọ kẹ Devid?

¹⁰ A ghwa vwọ vuẹ Devid nẹ ọ dia ọyen yen cha bọn uwevwin rẹ ẹga na-a, Jihova vẹ ọyen da re ọphọ. Jihova de ve kẹ Devid nẹ ohwo ọvo ro che nẹ uvwiẹ rọyen rhe che sun bẹdẹ. (2 Sa 7:16) Vwẹ ẹwẹn roro oborẹ oma cha vwerhen Devid te vwẹ akpọ ọkpokpọ na, rọ vwọ riẹn nẹ ọ riavwerhen rẹ Usuon Ẹgbukpe Uriorin ri Jesu, Ovie ro nẹ uvwiẹ rọyen rhe! Ikuegbe nana yono avwanre nẹ ọ da tobọ dianẹ avwanre se ru obo ra guọnọ ru kẹ Jihova-a, Ọghẹnẹ avwanre je sa kẹ avwanre ebruphiyọ efa re rhẹro rọye-en.

11. Idjerhe vọ yen e vwo bruba kẹ Inenikristi ẹgbukpe ujorin rẹsosuọ dede nẹ Uvie na rhere ọke ayen vwo rhẹro rọye-en? (Iruo rẹ Iyinkọn Na 6:7)

¹¹ Inenikristi rẹ ẹgbukpe ujorin rẹsosuọ nene ebẹnbẹn re rhẹro rọye-en muabọ. Kerẹ udje, ayen rhẹro rẹ Uvie rẹ Ọghẹnẹ, ẹkẹvuọvo ayen riẹn ọke rọ cha vwọ rhe-e. (Iru 1:​6, 7) Ọtiọyena, kẹ die yen ayen ruru? Ayen de muomaphiyọ iruo rẹ aghwoghwo na. Iyẹnrẹn esiri na rhe vwọ hra nene asan eje, kẹ ayen rhe mrẹvughe nẹ Jihova ghini bruba ẹgbaẹdavwọn rayen.​—Se Iruo rẹ Iyinkọn Na 6:7.

12. Die yen Inenikristi ẹgbukpe ujorin rẹsosuọ ruru ọke rẹ owẹnvwe vwo fi?

¹² Ọkiọvo rhi vwo te, owẹnvwe ọgangan de fi “vwẹ akpọ na ejobi.” (Iru 11:28) Ọnana ji te Inenikristi ẹgbukpe ujorin rẹsosuọ oma. Wọ sa vwẹ ẹwẹn roro oborẹ ọkanrovwẹ rẹ emu nana mu ayen oma te? Aphro herọ-ọ nẹ ọnana nẹrhẹ igbuyovwin rẹ orua ro ẹnwan kpahen oborẹ ayen sa vwọ ghẹrẹ erua rayen. Kẹ ighene ri muegbe rẹ obo ayen se vwo ru bunphiyọ vwẹ iruo rẹ aghwoghwo rayen vwo? Ayen se roro nẹ a gba hẹrhẹ te ọke rẹ owẹnvwe na vwo nẹ otọ tavwen? O toro ẹdia rẹ ayen hepha-a, Inenikristi rẹ ọke yena ru ewene. Ayen davwẹngba vwo ghwoghwo vwẹ kidjerhe kidjerhe rẹ ẹgba rayen muru, oma je vwerhen ayen vwo nene iniọvo rehẹ Judia ghare oborẹ ayen vwori.​—Iru 11:​29, 30.

13. Ebruphiyọ vọ yen Inenikristi na mrẹre ọke rẹ owẹnvwe vwo fi?

¹³ Ebruphiyọ vọ yen Inenikristi na mrẹre ọke rẹ owẹnvwe vwo fi? Ihwo ra vwẹ ukẹcha kẹ rhiẹromrẹ oborẹ Jihova vwẹrote ayen. (Mt 6:​31-33) Ọnana nẹrhẹ ayen sikẹrẹ iniọvo re vwẹ ukẹcha kẹ ayen na. Ihwo ri ruẹ itetero yẹrẹ e re vwẹ ukẹcha phia ji rhiẹromrẹ omavwerhovwẹn ro no cha siẹrẹ a da kokẹ. (Iru 20:35) Jihova bruba kẹ ayen eje ri ru ewene vwẹ ẹdia sansan re vwomaphia.

14. Die yen phia vwọ kẹ Banabas vẹ ọyinkọn Pọl, kẹ die yen nẹ obuko rọyen rhe? (Iruo rẹ Iyinkọn Na 14:​21, 22)

¹⁴ E mukpahen Inenikristi rẹ ẹgbukpe ujorin rẹsosuọ abọ buebun tobọ te ọke rẹ ayen rhẹro rọyen dede-e. Roro kpahen obo re phia kẹ Banabas vẹ ọyinkọn Pọl ọke rẹ ayen vwo ghwoghwota vwẹ ekogho ri Listra. Ẹsosuọ, ihwo na ke dede ayen sasasa. Jẹ ọke vwọ yanran na, e re vwọsua da “riẹriẹ ihwo na,” ayen da vwẹ ikpokpo vwo phi Pọl, je yan jovwo nẹ o ghwu. (Iru 14:19) Ẹkẹvuọvo Pọl vẹ Banabas de kpo asan ọfa de re ghwoghwo. Kẹ die yen nẹ obuko rẹ ọnana rhe? “Ihwo buebu de kurheriẹ”, eta vẹ udje rayen da je nẹrhẹ iniọvo na mrẹ ọbọngan. (Se Iruo rẹ Iyinkọn Na 14:​21, 22.) Kidie nẹ Pọl vẹ Banabas dobọrẹ aghwoghwo na ji ọke re vwo muẹkpahen aye-en, ọnana da nẹrhẹ ihwo buebun mrẹ erere. A rha dobọrẹ owian rẹ Jihova vwọ kẹ avwanre nẹ e ru na ji-i, o che bruba kẹ avwanre.

ỌKE RẸ AVWANRE NA

15. Die yen udje rẹ Oniọvo A. H. Macmillan yono uwe?

¹⁵ Ikpe evo a ke rhe mrẹ 1914, o vwo erọnvwọn evo rẹ idibo ri Jihova rhẹro rọyen. Kerẹ udje, roro kpahen oniọvo A. H. Macmillan. Kirobo iniọvo buebun rorori ọke yena, Oniọvo Macmillan rhẹro nẹ ọyen che kpo odjuvwu kẹrẹkpẹ. Vwẹ ota ọvo rọ tare vwẹ September 1914, ọ da ta: “Ọkiọvo ọnana yen ota rotu rọ koba re me cha ta.” Vwọrẹ uyota, ọ dia ọyen yen ota rọyen rọ koba-a. Ọke vwọ yanran na Oniọvo Macmillan de si: “Ọ sa dianẹ avwanre evo brokpakpa gan nọ e vwo roro nẹ e che kpo odjuvwu ugugege yena. Obo ro fori nẹ avwanre ru jovwo yen e vwo muomaphiyọ iruo rẹ Ọrovwori na.” Oniọvo Macmillan ghini muabọ phiyotọ-ọ. Oruru rọyen kpahen iruo aghwoghwo na ganre mamọ. O vwo uphẹn rọ vwọ vwẹ ọbọngan kẹ iniọvo buebun re mu phiyọ uwodi kidie ayen rhọnvwe vwomaba iruo rẹ isodje-e. Dede nẹ ọ ghwore, ọ je fuevun kpo uyono re ruẹ ọkieje. Erere vọ yen Oniọvo Macmillan mrẹre ro vwo muomaphiyọ ẹga ri Jihova ọke rọ vwọ hẹrhẹ osaẹhwa rọyen? Ọmọke krẹn tavwen o ki ghwu vwẹ ukpe ri 1966, o de si: “Esegbuyota mẹ je pha gangan nonẹna kirobo rọ hepha jovwo.” Ọnana uvi rẹ uruemu ro fori nẹ avwanre eje vwẹrokere​—marho ọ da dianẹ ọke grongron yen e chirakon rẹ ebẹnbẹn re!​—Hib 13:7.

16. Obẹnbẹn vọ yen Herbert Jennings vẹ aye rọyen hirharoku? (Jems 4:14)

¹⁶ Idibo ri Jihova buebun nene ebẹnbẹn rẹ omakpokpọ rẹ ayen rhẹro rọye-en muabọ. Kerẹ udje, Oniọvo Herbert Jenningsb vwo gbikun rẹ akpeyeren rọyen, o dje obo rọ vẹ aye rọyen vwọ mrẹ omavwerhovwẹn vwẹ iruo rẹ imishọnare rayen vwẹ Ghana. Ọke vwọ yanran na, e de rhi noso nẹ o vwo ọga afọnrhe re se mood disorder. Vwo nene eta rehẹ Jems 4:​14, Oniọvo Jennings de dje kpahen ẹdia rọ hepha na nẹ “ọnana dia oborẹ avwanre rhẹro rọyen nẹ ọ cha phia ‘odẹ rọ cha na-a.’ ” (Se.) O de ji si: “Avwanre vwẹ ẹro abavo vwo ni ẹdia na, avwanre de ru ọrhuẹrẹphiyotọ avwanre vwo vrẹn jẹ igbeyan avwanre eje rehẹ Ghana vwo ji rhivwin kpo Canada [de re sivwin oma].” Jihova vwẹ ukẹcha kẹ Oniọvo Jennings kugbe aye rọyen vwọ fuevun ga dede nẹ ayen hirharoku ebẹnbẹn nana.

17. Erere vọ yen iniọvo efa mrẹ nẹ udje rẹ Oniọvo Jennings rhe?

¹⁷ Oborẹ Oniọvo Jennings tare ro vwo gbikun rẹ akpeyeren rọyen vwẹ ukẹcha kẹ ihwo efa mamọ. Oniọvo aye ọvo de si: “Ikuegbe vuọvo ji te vwe ẹwẹn mamọ kerẹ ikuegbe nana mi seri na-a. . . . Mi vwo se kpahen oborẹ Oniọvo Jennings yan jẹ iruo rọyen vwo ro vwo sivwin ọga na, ọnana chọn vwẹ uko vwọ vwẹ ẹro abavo vwo ni ẹdia mẹ.” Oniọvo ọfa, de ji si: “Me vwọ ga kerẹ ọkpako rẹ ukoko ẹgbukpe ihwe nu, mi de siobọ nẹ uphẹn rẹ ẹga nana fikirẹ ọga rẹ iroro. Obo re phiare na da rhe nẹrhẹ ofu dje vwe tẹdia rẹ mi gbi se se ikuegbe rẹ akpeyeren re vwomaphia vwẹ ẹbe rẹ ukoko na-a. . . . Ẹkẹvuọvo akoechiro rẹ Oniọvo Jennings nabọ phiuduphiyọ uvwe awọ.” Ọnana karophiyọ avwanre nẹ e de chirakon rẹ ebẹnbẹn re rhẹro rọye-en, ihwo efa sa mrẹ ọbọngan norhe. Ọ da tobọ dianẹ ekuakua weneri vwẹ akpeyeren, esegbuyota vẹ akoechiro avwanre je sa dia udje kẹ ihwo efa.​—1 Pi 5:9.

18. Kirobo ra mrẹ vwẹ uhoho na, die yen wo yono vwo nẹ udje rẹ ayeuku rẹ Nigeria na rhe?

¹⁸ Ọga ri COVID-19 rọ hrabọ ro asan eje na so ebẹnbẹn kẹ idibo ri Jihova buebun. Kerẹ udje, igho vẹ emu ro rhẹ ayeuku ọvo vwẹ Nigeria te emuọvo-o. Urhiọke ẹdẹ ọvo, rẹ ayen vwọ guọnọ chere irosu rayen ro chekọ, ọmọtẹ rọyen da nọ oborẹ ayen cha re ẹsiẹfa. Oni na da vuẹ nẹ emu yẹrẹ igho ọfa rha herọ-ọ, e de cherẹ ọnana nu ka cha vwẹroso Jihova kerẹ ayeuku ri Zarefat na. (1 Iv 17:​8-16) Tavwen ẹwẹn rayen ke tobọ kpo oborẹ ayen cha re oghẹruvo ẹdẹ yena, iniọvo na da phare ọko rẹ emu vwo rhe ayen. Emu ra vwọ kẹ ayen na che tẹ ayen re ẹdijana ivẹ soso. Oniọvo na da tanẹ ọyen nama roro nẹ Jihova nabọ kerhọ ọke rọ vẹ ọmọtẹ rọyen vwọ ta ota-a. Vwọrẹ uyota a da vwẹroso Jihova, ebẹnbẹn rẹ akpeyeren sa nẹrhẹ e sikẹrẹ phiyọ.​—1 Pi 5:​6, 7.

19. Omukpahen vọ yen Aleksey Yershov chirakon rọyen?

¹⁹ Vwẹ ikpe evo rhire na, iniọvo avwanre buebun chirakon rẹ omukpahen rẹ ayen rhẹro rọye-en. Roro kpahen obo re phia kẹ Oniọvo Aleksey Yershov, rọ dia Russia. Iseri ri Jihova re dia ẹkuotọ yena vwo ugbomọphẹ ọke rẹ Oniọvo Yershov vwo bromaphiyame ukpe ri 1994. Ikpe evo vwọ wan nu, ẹdia rẹ iniọvo ri Russia de rhi wene. Vwẹ ukpe ri 2020, a da kpanre uwevwin Oniọvo Yershov je hiẹ ji mu ekuakua rọyen buebun reyọ. Emeranvwe evo vwọ wan nu, igọmẹti da je vwẹ urhi vwọ yọnrọn. Ọ rọ ma da ohwo, ohwo ọvo ro me ruẹ nẹ o vwo omavwerhovwẹn kpahen uyono ri Baibol ọsoso ẹgbukpe ọvo, yen ru ividio rọ nẹrhẹ a yọnrọn oniọvo na. Uruemu rẹ ophiẹnvwe nana brare mamọ!

20. Mavọ yen Oniọvo Yershov vwo ru oyerinkugbe rọyen vẹ ọ rẹ Jihova ganphiyọ?

²⁰ Omukpahen rẹ Oniọvo Yershov hirharoku na ghwa erhuvwu rhe? E. Oyerinkugbe rọ vẹ Jihova vwori da rhe ganphiyọ. Ọ da ta, “Me vẹ aye mẹ nẹrhovwo kuẹgbe vrẹ obo ri jovwo. Me riẹnre nẹ ababọ rẹ ukẹcha ri Jihova mẹvwẹ ọvo che se chirakon ẹdia na-a.” Ọ da je vwọba: “Uyono romobọ chọn vwẹ uko vwo yerin ghene ofudjevwe. Mi roro kpahen udje rẹ idibo ri Jihova re fuevun vwẹ obuko re. O vwo ikuegbe buebun vwẹ Baibol na ri dje obo rọ ghanre te re vwo hwomamu je vwẹroso Jihova.”

21. Die yen e yono re vwẹ uyono nana?

²¹ Die yen yono re vwẹ uyono nana? E se hirharoku ebẹnbẹn re rhẹro rọye-en vwẹ eyeren nana. Dedena, Jihova je vwẹ ukẹcha kẹ idibo rọyen siẹrẹ ayen da vwẹrosuọ. Kirobo re djunute vwẹ ẹkpo ri Baibol re mu uyono nana kpahen, “Ukpokpogho rẹ ọvwata ọpha buebu; ẹkẹvuọvo Ọrovwohwo na sivwo nẹ ayen ejobi.” (Un 34:19) Ọtiọyena e ja tẹnrovi ẹgba rẹ usivwin ri Jihova, ọ dia ebẹnbẹn rẹ avwanre-e. Kerẹ ọyinkọn Pọl, ka sa ta nẹ: “Mi se ru emu ejobi vwi Kristi rọ kẹ vwẹ ogangan.”​— Fil 4:13.