Muegbe Hẹrhẹ Ẹdẹ ri Jihova

1. Die yen ofori nẹ e ru e se vwo sivwin rhọ vwẹ ẹdẹ ri Jihova na?

BAIBOL na da ta ota kpahen “ẹdẹ rẹ Ọrovwohwo,” o mudiaphiyọ ọke ri Jihova cha vwọ ghwọrọ ivwighwrẹn rọyen je vwẹ usivwin kẹ ihwo rọyen. Vwẹ ọke awanre Jihova ghwọrọ ẹgborho evo. (Aiz 13:​1, 6; Izi 13:5; Zẹf 1:8) Vwẹ ọke rẹ avwanre na, “ẹdẹ rẹ Ọrovwohwo” cha tonphiyọ vẹ oghwọrọ ri Babilọn Rode ji kuphiyọ vwẹ ofovwin rẹ Amagidọn. E se vwo sivwin rhọ vwẹ “ẹdẹ” yena, ko fori nẹ e muegbe enẹna. Ọ diẹ Jesu tare nẹ e muegbe hẹrhẹ “ukpokpogho rode” na ọvo-o, ẹkẹvuọvo e “muegbe ọkieje.”​—Mt 24:21; Lu 12:40.

2. Diesorọ 1 Tẹsalonaika se vwo fierere kẹ avwanre?

² Vwẹ ileta rẹsosuọ ẹwẹn ọfuanfon na mu ọyinkọn Pọl vwo si rhe iniọvo ri Tẹsalonaika, ọ reyọ idje buebun vwọ chọn iniọvo na uko vwo muegbe hẹrhẹ ẹdẹ rode ri Jihova. Pọl riẹnre nẹ ọ dia ọke yena yen ẹdẹ ri Jihova cha vwọ rhe-e. (2Tẹ 2:​1-3) Dedena, o jiriro kẹ iniọvo na nẹ ayen muegbe hẹrhẹ ẹdẹ na kerẹsiẹ a da mrẹ nẹ ọ cha rhe odẹ rọ cha na, avwanre je sa reyọ uchebro rọyen na vwo ruiruo. E jẹ a fuẹrẹn obo rọ ta kpahen: (1) oborẹ ẹdẹ ri Jihova cha rhe wan, (2) ihwo ra cha ghwọrọ, kugbe (3) obo re se vwo muegbe e vwo sivwin rhọ.

MAVỌ YEN ẸDẸ RI JIHOVA CHA RHE WAN?

3. Idjerhe vọ yen ẹdẹ ri Jihova cha vwọ rhe kẹrẹ oji vwẹ ason? (Ni uhoho na.)

³ “Kerẹ oji vwẹ ason.” (1Tẹ 5:2) Ọnana yen ọrẹsosuọ usun rẹ idje erha re vwo djisẹ rẹ obo rẹ ẹdẹ ri Jihova cha rhe wan. Iji ghwọrọ ọke-e, ason re roro phiyọ yen ayen vwọ ro ihwo ọrhan. Ẹdẹ ri Jihova je cha rhe kpregede, ọ cha ro ihwo buebun ọrhan. Oborẹ erọnvwọn cha phia wan cha tobọ gbe Inenikristi rẹ uyota unu. Jẹ, vwọ fẹnẹ irumwemwu na, emu vuọvo che te avwanre oma-a.

4. Idjerhe vọ yen ẹdẹ ri Jihova vwọ họhọ aye ro chuẹ uvwiẹ?

⁴ “Kerẹ aye rọ chuẹ uvwiẹ.” (1Tẹ 5:3) Aye vẹ evun cha sa riẹn ọke ro che vwo vwiẹ-ẹ. Aphro herọ-ọ, ọ riẹnre nẹ ọyen che je vwiẹ-ẹ. Ọke na de te, ọ cha rhe kpregede vẹ ọmiaovwẹ, a cha sa dobọ rọyen ji-i. Ọtiọyen ọ je hepha, avwanre riẹn unọke vẹ ẹdẹ, rẹ ẹdẹ ri Jihova cha vwo tonphiyọ-ọ. Dedena, o mu avwanre ẹro nẹ ọ cha rhe, ẹdẹ rẹ Ọghẹnẹ bru phiyọ rọ cha vwọ ghwọrọ irumwemwu na cha rhe kpregede emu vuọvo cha sa dobọ rọyen ji-i.

5. Idjerhe vọ yen ukpokpogho rode na vwọ họhọ ọke ro rhie cha?

⁵ Kerẹ ọke ro rhie cha. Udje rerha ri Pọl vwo ruiruo rhoma djunute iji ri chuji vwẹ ason. Vwẹ ọke ọfa, Pọl da reyọ ẹdẹ ri Jihova vwo djẹ ẹdẹ ro rhie cha. (1Tẹ 5:4) Iji ri bru ihwo ra vwẹ ason rhe nomaso-o, ọke se rhie vwa ayen e mi mu ayen. Ukpokpogho rode na je cha nẹrhẹ a mrẹ aphiphẹn rẹ ihwo re họhọ iji rehẹ ebri, ri vwobọ vwẹ erọnvwọn ri tu Ọghẹnẹ oma. Vwọ fẹnẹ ayen, avwanre se muegbe womarẹ a vwọ kẹnoma kẹ iruemu ri tu Jihova oma ji nenesi rẹ “obo ri yoma ejobi kugbe obo re gbare kugbe uyota.” (Ẹf 5:​8-12) Pọl da reyọ idje ivẹ re họhọ ohwohwo vwo djisẹ rẹ ihwo ra cha ghwọrọ.

IHWO VỌ YEN A CHA GHWỌRỌ VWẸ ẸDẸ RI JIHOVA?

6. Diesorọ a sa vwọ tanẹ ihwo buebun vwerhẹn? (1 Tẹsalonaika 5:​6, 7)

⁶ “Otu re vwerhẹ.” (Se 1 Tẹsalonaika 5:​6, 7.) Pọl reyọ ihwo ra cha ghwọrọ vwẹ ẹdẹ ri Jihova na vwo dje ihwo re vwerhẹn. Ayen vwo oniso oborẹ ọke na djẹ wa-an yẹrẹ obo re phia-a. Eriyin na, ayen se vwo ọmrẹvughe erọnvwọn eghanghanre re phia-a, yẹrẹ jowọ ro fori-i. Nonẹna, ihwo buebun pha kerẹ ihwo re vwerhẹn. (Ro 11:8) Ayen vwo imuẹro kpahen obo ri djerephia nẹ e yerẹn vwẹ ukuko “rẹ ẹdẹ na” re-e, nẹ ukpokpogho rode na je cha rhe kẹrẹkpẹ-ẹ. Erọnvwọn kiriguo re phia vwẹ akpọ na sa rhọvwọn ihwo evo nẹ ovwerhẹn je nẹrhẹ ayen vwo owenvwe rayen vwọ kerhọ kẹ ovuẹ rẹ Uvie na. Dedena, ihwo buebun rhoma rhivwin kpo ovwerhẹn ukperẹ ayen vwọ rhẹrẹ. Evo re tobọ vwo imuẹro kpahen ẹdẹ rẹ ẹdjọeguo dede roro nẹ ọke na ji sheri. (2Pi 3:​3, 4) Ẹkẹvuọvo avwanre mrẹvughe nẹ ọyen obo re ghanre ra vwọ rhẹrẹ kẹdi kẹdẹ.

7. Idjerhe vọ yen ihwo ra cha ghwọrọ na vwọ họhọ ihwo rẹ udi muẹ?

⁷ “Otu rẹ idi rhe muẹ.” Ọyinkọn Pọl reyọ ihwo ra cha ghwọrọ vwo djẹ egbaudi. Ihwo rẹ udi muẹ fobọ riẹn obo re phia-a, ọnana kọ nẹrhẹ ayen brorhiẹn re chọre. Ọtiọyen ọ je hepha, iruimwemwu ihwo ruẹ nene orhọesio rẹ Ọghẹnẹ-ẹ. Ayen yerẹn akpọ ro che sun ayen kpo oghwọrọ. Ẹkẹvuọvo a vwẹ uchebro kẹ Inenikristi nẹ ayen bru iroro kpevun je vwẹ ẹro kpẹn. (1Tẹ 5:6) Ohwo ọvo ro yono Baibol kodo tare nẹ e vwo bru iroro kpevun mudiaphiyọ re vwo “vwo ẹwẹn ri dọe, je frẹkotọ roro emu te tavwen, ọ me nẹrhẹ e brorhiẹn rọ gbare.” Diesorọ o vwo fo nẹ e vwo iroro abavo ro phieghe-e? Ọ cha nẹrhẹ a kẹnoma kẹ eta yẹrẹ oseghe rẹ usuon akpọ na. Ẹdẹ ri Jihova vwo siẹkẹrẹ phiyọ na, okeke ra vwọ kẹ ẹbẹre rẹ akpọ na cha rha ganphiyọ. Jẹ, ofori nẹ a ro ẹnwan kpahen obo ra cha ta-a. Ẹwẹn ọfuanfon na cha chọn avwanre uko vwo vwo iroro abavo ro je phieghe ji brorhiẹn rẹ aghwanre.​—Luk 12:​11, 12.

DIE YEN AVWANRE SE RU VWO MUEGBE HẸRHẸ ẸDẸ RI JIHOVA NA?

8. Die yen e djunute vwẹ 1 Tẹsalonaika 5:8 re sa chọn avwanre uko vwọ rhẹrẹ je sẹro iroro avwanre? (Ni uhoho na.)

⁸ “Ku ophapha rẹ udu . . . kugbe . . . erhu” na phiyọ. Pọl reyọ avwanre vwo dje isodje re vwẹ ẹro kpẹn ri muegbe fia hẹrhẹ ofovwin. (Se 1 Tẹsalonaika 5:​8, NW.) Ọkieje yen a vwọ guọnọ nẹ isodje muegbe hẹrhẹ ofovwin. Ọtiọyen yen ọ je hepha vwọ kẹ avwanre. Avwanre muegbe hẹrhẹ ẹdẹ ri Jihova womarẹ e vwo ku ophapha rẹ udu rẹ esegbuyota vẹ ẹguọnọ phiyọ kugbe erhu rẹ usivwin. Erọnvwọn nana sa chọn avwanre uko mamọ.

9. Idjerhe vọ yen esegbuyota vwọ sẹro avwanre?

⁹ Ophapha rẹ udu sẹro udu rẹ isodje. Ọtiọyen esegbuyota vẹ ẹguọnọ je sẹro ubiudu rẹ udje na. E cha chọn avwanre uko vwọ ga Ọghẹnẹ ji nene Jesu ọkieje. Esegbuyota kẹ avwanre imuẹro nẹ Jihova cha hwosa kẹ avwanre siẹrẹ a da vwẹ udu rẹ avwanre eje vwọ guọnọ. (Hib 11:6) O che mu avwanre vwọ fuevun kẹ Osun avwanre Jesu, ọ da tobọ dianẹ e che chirakon ebẹnbẹn. Avwanre se ru esegbuyota avwanre gan vwo chirakon rẹ ebẹnbẹn akpeyeren womarẹ e vwo yono nẹ udje rẹ ihwo re yọnregan dede nẹ ayen hirharoku omukpahen yẹrẹ uweren ọgangan. A da vwẹrokere ihwo ri yeren akpọ ri kekpe ji phi Uvie na phiyọ ẹdia rẹsosuọ, ka sa kẹnoma kẹ imuoshọ re herọ siẹrẹ a da vwọ tua ekuakua rẹ akpeyeren.b

10. Mavọ yen ẹguọnọ re vwo kpahen Ọghẹnẹ kugbe irivẹ vwọ chọn avwanre uko vwo chirakon?

¹⁰ Ẹguọnọ ọyẹn obo re ghanre mamọ a sa vwọ rhẹrẹ je sẹro iroro avwanre. (Mt 22:​37-39) Ẹguọnọ rẹ Ọghẹnẹ cha chọn avwanre uko vwo chirakon vwẹ iruo aghwoghwo na ọ da tobọ dianẹ ọ cha ghwa ebẹnbẹn rhe avwanre. (2Ti 1:​7, 8) Kidie nẹ avwanre vwo ẹguọnọ rẹ ihwo rehẹ uyota na-a, ọnana ko mu avwanre vwo ghwoghwo, dje ekogho avwanre ẹwiẹwian, vwobọ vwẹ aghwoghwo rẹ ifonu kugbe ọ rẹ ileta. Avwanre vwo iphiẹrophiyọ nẹ ẹdẹ ọvo irivẹ avwanre che kurhẹriẹ ji ru obo ri yovwirin.​—Izi 18:​27, 28.

11. Idjerhe vọ yen ẹguọnọ re vwo kpahen iniọvo na vwọ chọn avwanre uko? (1 Tẹsalonaika 5:11)

¹¹ Iniọvo rẹ ukoko na jehẹ usun irivẹ avwanre re che dje ẹguọnọ kẹ. E se dje ẹguọnọ yena phia siẹrẹ e de “phiuduphiyọ ohwohwo awọ je bọn ohwohwo gan.” (Se 1 Tẹsalonaika 5:​11, NW) Kerẹ isodje ri biẹcha ohwohwo vwẹ ofovwin, ọtiọyen avwanre ji phiuduphiyọ ohwohwo awọ. Vwọrẹ uyota, obọ sa chọ isodje vwọ wan ọrivẹ rọyen oma vwevunrẹ ofovwin ẹkẹvuọvo ọ diẹ arudo yen o vwo ruo-o. Vwẹ idjerhe vuọvo na, avwanre cha vwẹ arudo vwo ru obo ri che miovwẹ iniọvo avwanre ivun yẹrẹ ru orukeri-i. (1Tẹ 5:​13, 15) Avwanre ji dje ẹguọnọ phia womarẹ e vwo muọghọ kẹ iniọvo ri mu usiokọ rẹ ukoko na. (1Tẹ 5:12) Ọke rẹ Pọl vwo si ileta nana, jẹ o ji te ẹgbukpe ọvo ra vwọ vwẹ ukoko ri Tẹsalonaika vwo mu-u. Ọ sa dianẹ eshare re vwo mu na je tẹn ona rẹ obo re ru erọnvwọn wa-an, ọ je sa dianẹ o vwo erọnvwọn evo rayen ru chọ. Dedena, ofori nẹ e muọghọ kẹ ayen. Ukpokpogho rode na vwo siẹkẹrẹ na, ekpako ukoko avwanre sa vwẹ odjekẹ vwọ kẹ avwanre vrẹ oborẹ ayen ruẹ enẹna. Ọ sa dianẹ odjekẹ rhe che se nẹ esiri ukoko yẹrẹ oghọn ukoko bru avwanre rhe-e; ọtiọyena, ọyen obo re ghanre re vwo vwo ẹguọnọ ji muọghọ kẹ ekpako rẹ ukoko avwanre enẹna. O toro obo re phiare-e, e jẹ a sẹro iroro avwanre, a tẹnroviẹ jẹgba raye-en, ẹkẹvuọvo a tẹnrovi oborẹ Jihova wan oma rẹ Kristi suẹn eshare nana re fuevun na.

12. Idjerhe vọ yen iphiẹrophiyọ vwọ sẹro iroro avwanre?

¹² Kirobo rẹ erhu sẹro uyovwin rẹ isodje ye, ọtiọyen iphiẹrophiyọ rẹ usivwin sẹro rẹ iroro avwanre. Iphiẹrophiyọ avwanre da gan, ka cha mrẹvughe nẹ ojevwe rẹ akpọ nana ofefe. (Fil 3:8) Iphiẹrophiyọ avwanre cha chọn avwanre uko vwo vwo iroro abavo ro phieghe-e. Ọnana yen obo re phia kẹ Wallace vẹ Laurinda, re ga vwẹ Africa. Uvwre rẹ udughwrẹn erha, oni ri Wallace vẹ ọsẹ ri Laurinda de ghwu. Fikirẹ ọga ri COVID-19, ayen rhe se kpo ra mrẹ ihwo rẹ orua raye-en. Wallace de si: “Iphiẹrophiyọ rẹ evrẹnushi na chọn ovwẹ uko vwo roro kpahen ayen, ọ dia oborẹ ayen hepha tavwen ayen ki ghwu-u, ẹkẹvuọvo oborẹ ayen cha dia siẹrẹ a da rhọvwan ayen rhe akpọ ọkpokpọ na. Siẹrẹ mi de muomaphiyọ yẹrẹ nene iroro rẹ ohwo ro ghwu va vwẹ abọ muabọ, iphiẹrophiyọ nana nẹrhẹ ẹwẹn mẹ totọ.”

13. Die yen e se ru vwo vwo ẹwẹn ọfuanfon na?

¹³ “We fun Erhi rẹ Ọghẹnẹ rọ hẹ oma rẹ ovwa-an.” (1Tẹ 5:19) Pọl reyọ ẹwẹn ọfuanfon na vwo dje erhanre rọhẹ oma rẹ avwanre. Avwanre de vwo ẹwẹn ọfuanfon na, avwanre ke cha vọn vẹ oruru kugbe osasavwe re vwo ru obo ri yovwirin, ọ je kẹ avwanre ẹgba ra vwọ wian kẹ Jihova. (Ro 12:11) Die yen e se ru e vwo vwo ẹwẹn ọfuanfon na? A sa rẹ nẹ ọ vwọ kẹ avwanre, yono Baibol na, ji kuomagbe ukoko rọyen rọ vwẹ ẹwẹn ọfuanfon rọyen vwo suẹn. E de ru ọtiọyen, ọ cha chọn avwanre uko vwo vwo “omamọ rẹ ẹwẹn na, NW.”​—Gal. 5:​22, 23.

14. Die yen ofori nẹ a kẹnoma kẹ a da guọnọ vwo ẹwẹn ọfuanfon rẹ Ọghẹnẹ ọkieje? (Ni uhoho na.)

¹⁴ Ọghẹnẹ da kẹ avwanre ẹwẹn ọfuanfon rọyen nu, e jẹ a jomaotọ e vwo jẹ “erhi rẹ Ọghẹnẹ” e fun. Ihwo re sẹro iroro vẹ uruemu rọ fonro ọvo, yen Ọghẹnẹ vwẹ ẹwẹn ọfuanfon rọyen kẹ. Avwanre de roro kpahen iruemu ri fori-i ji ruẹ nene ayen, ọ rha cha kẹ avwanre ẹwẹn ọfuanfon rọye-en. (1Tẹ 4:​7, 8) E se vwo vwo ẹwẹn ọfuanfon na ọkieje, e ja “jẹ aroẹmrẹ fia-a.” (1Tẹ 5:20) “Aroẹmrẹ” re djunute vwẹ owọ rẹ ota nana mudiaphiyọ evuẹ ri Jihova vwọ kẹ avwanre womarẹ ẹwẹn ọfuanfon rọyen, te i ri shekpahen ẹdẹ ri Jihova vẹ ọke avwanre na. E je siẹ ẹdẹ na nẹ ẹwẹ-ẹn, ji roro nẹ Amagidọn cha rhe vwẹ ọke rẹ avwanre na-a. Ukperẹ ọtiọyen, e ja kọn phiyọ ẹwẹn​—womarẹ e vwo vwo uruemu rẹ abavo ji muomaphiyọ “eyenre rẹ ẹfuọn kugbe uyoyovwi” kẹdẹ kẹdẹ.​—2Pi 3:​11, 12.

“DAVWE EMU KEMU EJOBI NI”

15. Mavọ yen avwanre sa vwọ kẹnoma kẹ ophiẹnvwe rẹ ikuegbe vẹ evuẹ rẹ efian rẹ Idẹbono hrahra? (1 Tẹsalonaika 5:21)

¹⁵ Kẹrẹkpẹ vwẹ obaro na, ihwo re vwọso Ọghẹnẹ ki che kperi ukperi rẹ: “Ufuoma kugbe ofuvwegbe!” (1Tẹ 5:3) Evuẹ rẹ efian rẹ Idẹbono hrahra ke cha vọn akpọ na ji sun ihwo buebun ghwru. (Ẹvw 16:​13, 14) Kẹ avwanre vwo? A cha sa phiẹn avwanre-e ọ da dianẹ a “davwe [yẹrẹ, “guọnọ otọ” rẹ] emu kemu ejobi ni.” (Se 1 Tẹsalonaika 5:21.) Ota ri Grik ra fan phiyọ “davwe” dje obo ra davwẹ oro yẹrẹ idọnọ ọfuanfon rere e se vwo vughe ọ rọ dia omamọ. Ọtiọyena, ofori nẹ e roro kpahen obo re se vẹ obo re nyo sẹ ghini uyota. Ọyena ghanre kẹ iniọvo ri Tẹsalonaika vwẹ ọke yena, ọtiọyen ọ je hepha kẹ avwanre ukpokpogho rode na vwo siẹkẹrẹ phiyọ na. Ukperẹ e vwo se kemu kemu rẹ ihwo ta eje gbuyota, avwanre vwẹ ẹgba iroro avwanre vwọ reyọ obo re se yẹrẹ obo re nyo kugbe oborẹ Baibol na vẹ ukoko ri Jihova ta vwọ vwanvwẹ ohwohwo. E vwo ru ọtiọyen ye, a rha cha sa phiẹn avwanre vwo se efian rẹ ihwo hrahra na gbuyota-a.​—Isẹ 14:15; 1Ti 4:1.

16. Uvi iphiẹrophiyọ vọ yen avwanre vwori, kẹ die yen avwanre brorhiẹn re vwo ru?

¹⁶ Kerẹ ẹko, idibo rẹ Ọghẹnẹ che sivwin rhọ vrabọ rẹ ukpokpogho rode na. Dedena, avwanre ohwo vuọvo riẹn oborẹ odẹ rọ cha na cha dia-a. (Jem 4:14) Ọ da dianẹ e ghwuru tavwen yẹrẹ a wanvrẹ ukpokpogho rode na, a cha reyọ arhọ ri bẹdẹ vwọ hwosa kẹ avwanre ọ da dianẹ a fuevun te oba. Ihwo ra jẹreyọ na cha vwomaba Kristi vwẹ obodjuvwu. Igodẹ efa na cha dia iparadaisi vwẹ otọrakpọ na. E jẹ avwanre eje tẹnrovi iphiẹrophiyọ rẹ avwanre vwori ji muegbe hẹrhẹ ẹdẹ ri Jihova na!