AKPEYEREN RẸ INENIKRISTI

Ẹbẹre Kpokpọ ra Vwọba Uyono rẹ Uvwre rẹ Udughwrẹn Na

Vwo nẹ January 2018 yanran, a cha vwẹ odjefiotọ kugbe ihoho vẹ ividio rehẹ New World Translation of the Holy Scriptures (nwtsty) ọ re vwo ru uyono rọhẹ intanẹti vwọba uyono rẹ uvwre rẹ udughwrẹn na, ọ da tobọ dianẹ ọ je rhe dia vwẹ ejajẹ wẹ-ẹn. Ọnana cha nẹrhẹ wọ nabọ riavwerhen rẹ uyono na, ọke wo de muegbe. Ọ rọ ma rho, jẹ ẹbẹre nana si we kẹre Ọsẹ rẹ avwanre ro vwo ẹguọnọ na Jihova!

ODJEFIOTỌ

Odjefiotọ na djekpahen iruemu, ekogho, kugbe ejajẹ vwẹ awọreta buebun rẹ Baibol na.

Matiu 12:20

Iwiki ro brivwirhin: Urhukpẹ obọ ra ma mrẹ vwẹ uwevwin yen ẹmẹvwẹrẹ re ku ephri rẹ oliv phiyọ. Iwiki na kọyen se ephri na kpo obenu rere urhukpẹ na sa vwọ la. Ubiota rẹ Grik “iwiki ro brivwirhin” se mudiaphiyọ iwiki ro ji brẹ ivwirhin kidie uwerhanre ji chekọ vwọ, ẹkẹvuọvo erhanre rọyen joma fun re, yẹrẹ ọ tobọ fun re. Aroẹmrẹ rẹ Aizaya 42:3 ta ota kpahen arodọnvwẹ rẹ Jesu nẹ; Jesu che fun omurhukpẹ rẹ iphiẹrophiyọ rẹ ihwo dẹndẹn vẹ e rẹ akpọ bẹn na vwori-i.

Matiu 26:13

Uyota: Ota na a·menʹ ọyen ubiota rẹ Hibru, rẹ ihwo rẹ Grik wene kpo ʼa·menʹ, ro mudiaphiyọ “e jẹ ọ dia ọtiọyen,” yẹrẹ “vwọrẹ imuẹro.” Jesu reyọ ota nana vwọ ton ota phiyọ ọke rọ da guọnọ ta ota, ve ive, yẹrẹ mraro, ọ reyerọ vwo djephia nẹ obo rọ ta na uyota, a je sa vwẹrosuọ. Ẹbe rẹ ẹga tare nẹ, idjerhe rẹ oghẹresan yen Jesu vwọ reyọ ota na “uyota,” yẹrẹ amen, vwo ruiruo. Ọke rọ da reyọ vwo ruiruo kpahen ohwohwo (a·menʹ a·menʹ) kirobo rọ hepha vwẹ Ọbe rẹ Jọn, ka fan ota rẹ Jesu na phiyọ “uyota, uyota.”—Jọn 1:51.

IHOHO VẸ IVIDIO

Ifoto, ihoho ra ya re, ividio ra ta ota phiyọ-ọ, vẹ ikatunu nabọ djekpahen iyẹnrẹn sansan re si phiyọ Baibol na.

Bẹtfagi, Ugbenu rẹ Oliv, vẹ Jerusalẹm

Ividio nana dje idjerhe ọvo ro nẹ ẹbẹre ọnre va nẹ cha, ro Jerusalẹm. Idjerhe na nẹ ọko ọvo ra riẹn phiyọ et-Tur nonẹna kpo asan ri me kpenu vwẹ Ugbenu rẹ Oliv. Ihwo tobọ tanẹ ọko re se et-Tur na yen Bẹtfagi rẹ Baibol na djunute. Bẹtani hẹ ẹbẹre ọnre va nẹ cha rẹ Bẹtfagi vwẹ ọghwrọrọ rẹ ẹbẹre ọnre va nẹ cha rẹ Ugbenu rẹ Oliv. Ọke rẹ Jesu vwọ hẹ Jerusalẹm, o vwo ẹkuruemu rọ vẹ idibo rọyen vwọ vwerhẹn Bẹtani hrọke. Nonẹna, el-ʽAzariyeh (El ʽEizariya), kọyen odẹ re vwo se ọko rẹ Bẹtani hepha jovwo. Odẹ na el-ʽAzariyeh (El ʽEizariya), ọyen odẹ rẹ Arab ro mudiaphiyọ “Asan rẹ Lazarọs.” O muẹro nẹ Jesu dia uwevwin rẹ Mata, Meri, vẹ Lazarọs. (Mat. 21:17; Mak 11:11; Luk 21:37; Jọn 11:1) Ọ sa dianẹ oka rẹ idjerhe ra mrẹre vwẹ ividio na yen Jesu wan kpo Jerusalẹm ọke ro de nẹ uwevwin rayen. Vwẹ Nisan 9, 33 C.E., rẹ Jesu vwọ gua upene rẹ ẹkẹtẹkẹtẹ wan Ugbenu rẹ Oliv ro Jerusalẹm, ọ sa dianẹ idjerhe ro nẹ Bẹtfagi kpo Jerusalẹm yen ọ wanre.

Idjerhe ro nẹ Bẹtani Kpo Bẹtfagi
Bẹtfagi
Ugbenu rẹ Oliv
Iyara rẹ Kidrọn
Ugbenu rẹ Uwevwin rẹ Ẹga

Upẹrẹn re Hwe Phiyọ Ubeku rẹ Uchukowọ

Ọnana ifoto rẹ ubeku rẹ uchukowọ rẹ ohworakpọ re ruru, re hwe upẹrẹn ro gron te 11.5 cm (4.5 in.) phiyọ. Ukpe rẹ 1968 yen a vwọ mrẹ ubeku na ọke ra vwọ tọn erọnvwọn nẹ otọ vwẹ obọrhe ọnre rẹ Jerusalẹm, e ru ubeku nana vwẹ ọke rẹ ihwo rẹ Rom. Ubeku rẹ awanre nana, nẹrhẹ a riẹn nẹ a reyọ upẹrẹn vwọ kanran ohwo muẹ urhe ọke re de brorhiẹn rẹ ughwu hwe. Ọ sa dianẹ oka rẹ upẹrẹn nana yen isodje rẹ Rom vwọ kanre Jesu Kristi mu urhe rẹ oja na. A mrẹ ubeku na vwẹ ekpeti ra vwẹ oragha ru, ra ghwẹ ibeku rẹ ihwo ri ghwuru phiyọ ọke rẹ uvwon rẹ oma rayen de gbon fiọnfiọn nu. Ọnana djephia nẹ e ji se shi ohwo ra kanre mu urhe.—Mat. 27:35.