UYONO 15
Ono Yen Jesu?
Jesu ọyen ọvo usun rẹ ihwo ri me titi vwẹ ikuegbe rẹ ihworakpọ. Ihwo buebun riẹn odẹ ri Jesu, ẹkẹvuọvo ayen riẹn emu buebun kpahọ-ọn, ayen ji vwo iroro sansan kpahen oka rẹ ohwo rẹ Jesu hepha. Die yen Baibol na ta kpahọn?
1. Ono yen Jesu?
Jesu ọyen amakashe ro vwo ẹgba mamọ rọ dia obo odjuvwu. Jihova yen marọ tavwen ọ ke ma erọnvwọn efa. Ọtiọyena, e de se “ọmọ ọkpako rẹ emama na ejobi.” (Kọlose 1:15) Baibol na se Jesu “Ọmọ ọvuọvo” rẹ Ọghẹnẹ, kidie ọyen ọvo yen Jihova komobọ mare. (Jọn 3:16) Jesu nene Jihova rọ dia Ọsẹ rọyen wiankugbe, rọ vwọ chọn uko vwọ ma erọnvwọn eje. (Se Isẹ 8:30.) Jesu je nabọ riavwerhen rẹ oyerinkugbe ọkpẹkpẹkpẹ vẹ Jihova. Baibol na sere “Ota na” kidie ọ fuevun ga kerẹ ọtota rẹ Ọghẹnẹ, rọ vwọ vwẹ ovuẹ vẹ odjekẹ rẹ Ọghẹnẹ vwọ phia.—Jọn 1:14.
2. Diesorọ Jesu vwọ rhe otọrakpọ na?
Omarẹ ikpe 2,000 re wanre na, Jihova de ru emu rẹ igbevwunu ọvo. Jesu je vwọ hẹ odjuvwu, Jihova da womarẹ ẹwẹn ọfuanfon rọyen phi arhọ ri Jesu phiyọ evun rẹ ọmọtobẹ ọvo re se Meri. Idjerhe nana kọyen e vwo vwiẹ Jesu kerẹ ohworakpọ. (Se Luk 1:34, 35.) Jesu rhe otọrakpọ na kerẹ Mesaya re veri na, yẹrẹ Kristi rere o vwo sivwin ihworakpọ.a Aroẹmrẹ eje ri shekpahen Mesaya na rugba vwẹ oma rọyen; ọnana nẹrhẹ ihwo riẹn nẹ Jesu yen “Kristi na, Ọmọ rẹ Ọghẹnẹ ri bẹdẹ na.”—Matiu 16:16.
3. Tivọ yen Jesu hepha asaọkiephana?
Jesu vwo ghwu nu, Jihova da rhọvwọn nushi kerẹ amakashe, o de rhivwin kpo odjuvwu. Vwẹ odjuvwu, “Ọghẹnẹ . . . [da] kparọ kpenu gangan.” (Filipae 2:9) Asaọkiephana, Jesu vwo ẹdia rode vwẹ odjuvwu. Ọyehẹ ọ rọ vwọ kpahen Jihova.
HIẸ KODO
Yono kpobarophiyọ kpahen oka rẹ ohwo rẹ Jesu ghini hepha, kugbe oboresorọ e vwo yono kpahọn vwọ dia obo re ghanre.
4. Jesu dia Ọghẹnẹ Romevwẹgba-a
Dede nẹ Baibol na yonori nẹ Jesu ọyen amakashe ro vwo ẹgba mamọ vwẹ obo odjuvwu, ọ vwomakpotọ kẹ Jihova rọ dia Ọsẹ rọyen. Diesorọ a sa vwọ ta ọtiọyen? Hworo IVIDIO na rere wọ mrẹ oborẹ Baibol na ta kpahen ofẹnẹ rọhẹ uvwre ri Jesu vẹ Ọghẹnẹ romevwẹgba na.
Ẹkpo ri Baibol re vwọ kpahọn na cha chọn avwanre uko vwọ riẹn oyerinkugbe rọhẹ uvwre ri Jihova vẹ Jesu. Se ẹkpo ri Baibol ọvuọvo na, ovwan ta ota kpahen enọ ri nenire.
Se Luk 1:30-32.
Mavọ yen amakashe na djisẹ rẹ oyerinkugbe ri Jesu vẹ Ọghẹnẹ rọ dia “Ọro Mekpenu”?
Se Matiu 3:16, 17.
Die yen urhurhu ro nẹ obo odjuvwu rhe na tare ọke rẹ Jesu vwo bromaphiyame?
Ono wo rorori nẹ ọyen vwo urhurhu yena?
Se Jọn 14:28.
Ono yen ọkpako, ro ji me vwo ogangan vwẹ uvwre rẹ ọsẹ vẹ ọmọ?
Die yen Jesu mudiaphiyọ ro vwo se Jihova Ọsẹ rọyen?
Se Jọn 12:49.
Jesu rorori nẹ ẹgba vuọvo yen rhe ọyen vẹ Ọsẹ rọyen? Die wo rorori?
5. Jesu djerephia nẹ ọyehẹ Mesaya na
Baibol na vọnre vẹ aroẹmrẹ buebun re sa chọn ihwo uko vwọ riẹn Mesaya na rọ dia ohwo rẹ Ọghẹnẹ jẹreyọ ro che sivwin ihworakpọ. Hworo IVIDIO na rere wọ mrẹ aroẹmrẹ evo ri rugba vwẹ oma ri Jesu ọke rọ vwọ rhe otọrakpọ na.
Se aroẹmrẹ ri Baibol nana, ovwan ta ota kpahen enọ ri nenire:
Se Maika 5:2 wọ vwọ riẹn asan re de che vwiẹ Mesaya na.b
Evwiẹ ri Jesu na ru orugba rẹ aroẹmrẹ nana?—Matiu 2:1.
Se Une Rẹ Ejiro 34:20 kugbe Zekaraya 12:10 rere wọ mrẹ oborẹ Baibol na ta kpahen ughwu ri Mesaya na.
Aroẹmrẹ nana rugba?—Jọn 19:33-37.
Wo rorori nẹ Jesu sa vwẹ ẹgba romobọ rọyen vwo ru orugba rẹ aroẹmrẹ nana?
Die yen ọnana yono uwe kpahen Jesu?
6. Avwanre mrẹ erere e de yono kpahen Jesu
Baibol na kanrunumu ọghanrovwẹ re vwo yono kpahen Jesu kugbe iruo rẹ Ọghẹnẹ vwọ kẹ. Se Jọn 14:6 kugbe 17:3, ovwan ta ota kpahen onọ nana:
Diesorọ o vwo fo nẹ wo yono kpahen Jesu?
Jesu rhie idjerhe ra sa vwọ dia ugbeyan rẹ Ọghẹnẹ phiyotọ. O yono ihwo uyota ro shekpahen Jihova, womarẹ Jesu kẹ avwanre se vwo arhọ ri bẹdẹ
IHWO EVO TA: “Iseri ri Jihova se Jesu gbuyota-a.”
Die wọ cha ta?
ỌDJẸKOKO
Jesu ọyen amakashe ro vwo ẹgba. Ọyen Ọmọ rẹ Ọghẹnẹ kugbe Mesaya na.
Ẹrhomafuẹrẹn
Diesorọ e vwo se Jesu “ọmọ ọkpako rẹ emama na ejobi”?
Die yen Jesu ruru ọ ke rhe otọrakpọ na?
Mavọ yen avwanre vwọ riẹn nẹ Jesu yen Mesaya na?
HIẸ GUỌNỌ
Mrẹ ẹdia rẹ Jesu kare kerẹ Mesaya na.
“Aroẹmrẹ ri Shekpahen Mesaya na Djerephia nẹ Jesu Yen Mesaya Na?” (Uyovwinrota rọhẹ jw.org)
Yono kpahen idjerhe rẹ Baibol na vwo dje oborẹ Ọghẹnẹ vwọ dia ọsẹ ri Jesu.
“Diesorọ E Vwo Se Jesu Ọmọ rẹ Ọghẹnẹ?” (Uyovwinrota rọhẹ jw.org)
Roro kpahen oboresorọ uyono rẹ Eghẹnẹ Erha ri Kuomagbe Dia Ọvo vwọ dia uyono ro nẹ Baibol na rhe-e.
Mrẹ oborẹ akpeyeren rẹ aye ọvo vwo wene ọke rọ vwọ fuẹrẹn oborẹ Baibol na ta kpahen Jesu.
“Aye Ọvo rọ Dia Ohwo ri Ju Dje Oboresorọ Ọ Vwọ Rhoma Fuẹrẹn Esegbuyota Rọyen” (Awake!, May 2013)
a A cha fuẹrẹn oboresorọ ihworakpọ vwọ guọnọ usivwin kugbe oborẹ Jesu vwo sivwin avwanre vwẹ uyono 26 vẹ 27.
b Ni Eta rẹ Odjefiotọ 2 vwọ kẹ aroẹmrẹ ro shekpahen ọke rẹ Jesu cha vwọ vwomaphia vwẹ akpọ na.