Obo ro Mudiaphiyọ E Vwo Jẹ Ẹbẹre Ọvo Ẹka

Jesu yono idibo rọyen nẹ ayen “dia e rẹ akpọ na-a.” (Jọn 15:19) Ọnana churobọ si e vwo jẹ ẹbẹre ọvo ẹka vwẹ oseghe rẹ usuon vẹ ifovwin. Vwọrẹ uyota, ọ lọhọre re vwo jẹ ẹbẹre ọvo ẹka-a. A sa vwẹ avwanre jehwẹ. Kẹ, mavọ yen e se vwo jẹ ẹbẹre ọvo ẹka ji fuevun kẹ Jihova?

1. Ẹro vọ yen Inenikristi rẹ uyota vwo ni usuon rẹ ihworakpọ?

Inenikristi muọghọ kẹ usuon. Avwanre ruẹ nene ota ri Jesu nana: “A vwẹ emu rẹ Siza kẹ Siza.” Ọyena mudiaphiyọ nẹ a cha yan nene urhi rẹ ẹkuotọ na, kerẹ a vwọ hwosa rẹ uyovwin. (Mak 12:17) Baibol na tare nẹ usuon rẹ ihwo­rakpọ herọ kidie Jihova yen nẹrhẹ ayen suẹn. (Rom 13:1) Ọtiọyena, avwanre mrẹvughe nẹ o vwo asan rẹ ẹgba rẹ usuon rẹ ihworakpọ bare. Uvie rẹ Ọghẹnẹ ọvo yen avwanre riẹnre nẹ ọ sa rhuẹrẹ ebẹnbẹn rẹ ihworakpọ phiyọ.

2. Mavọ yen e se vwo djephia nẹ avwanre dia ẹbẹre ọvo rẹ akpọ na-a?

Kerẹ Jesu, avwanre vwomaba oseghe rẹ usuo-on. Ọke rẹ ihwo vwọ guọnọ vwẹ Jesu mu ovie vwẹ otọrakpọ na fikirẹ igbevwunu ọvo ro ruru, Jesu da sen. (Jọn 6:​15) Diesorọ? Kirobo rọ tare ukuko na, “uvie mẹ dia ọ rẹ akpọ nana-a.” (Jọn 18:36) Kerẹ idibo ri Jesu, e se djephia nẹ avwanre dia ẹbẹre ọvo rẹ akpọ na-a vwẹ idjerhe sansan. Kerẹ udje, avwanre kpo ofovwi-in. (Se Maika 4:3.) Avwanre muọghọ kẹ oka rẹ ẹkuotọ kerẹ aphiala na, ẹkẹvuọvo avwanre ga aye-en. (1 Jọn 5:​21) Avwanre titi ohwo ọvo ro mu ekpeti rẹ usuon vrẹ ọ ro chekọ yẹrẹ vwomaba ukoko rẹ oseghe rẹ usuo-on. Vwẹ idjerhe nana vẹ efa, avwanre djephia nẹ a fuevun riẹriẹriẹ kẹ Uvie rẹ Ọghẹnẹ.

HIẸ KODO

3. Inenikristi rẹ uyota dia ẹbẹre ọvo rẹ akpọ na-a

Jesu vẹ idibo rọyen phi omamọ rẹ udje phiyotọ kẹ avwanre. Se Rom 13:​1, 5-7 kugbe 1 Pita 2:​13, 14. Hworo IVIDIO na ovwan ta ota kpahen onọ ro nenire.

IVIDIO: Inenikristi rẹ Uyota Ka Ẹbẹre Vuọvo-o​—Ẹbẹre 1 (4:​28)

• Diesorọ avwanre vwo muọghọ kẹ ihwo rẹ usuon?

• Ọrhọ yen idjerhe evo re se vwo djephia nẹ a vwomakpotọ kẹ usuon rayen?

Vwẹ ọke rẹ ofovwin, ihwo rẹ ẹkuotọ evo sa tanẹ ayen ka ẹbẹre vuọvo vwẹ ofovwin na-a, ayen de vwẹ ukẹcha kẹ ẹbẹre ivẹ na. Die yen o ghini mudiaphiyọ e vwo jẹ ẹbẹre ọvo ẹka? Se Jọn 17:16. Hworo IVIDIO na ovwan ta ota kpahen onọ ro nenire.

IVIDIO: Inenikristi rẹ Uyota Ka Ẹbẹre Vuọvo-o​—Ẹbẹre 2 (3:​11)

• Die yen o mudiaphiyọ e vwo jẹ ẹbẹre ọvo ẹka?

Ihwo rẹ usuon da rha tanẹ e ru obo re vwọso urhi rẹ Ọghẹnẹ vwo? Se Iruo Rẹ Iyinkọn Na 5:​28, 29. Hworo IVIDIO na ovwan ta ota ­kpahen onọ ro nenire.

IVIDIO: Inenikristi rẹ Uyota Ka Ẹbẹre Vuọvo-o​—Ẹbẹre 3 (1:​18)

• Urhi ono yen avwanre cha kerhọ kẹ siẹrẹ urhi rẹ Ọghẹnẹ vẹ ọ rẹ ohworakpọ da vwọso ohwohwo?

• Wo se roro kpahen obo re sa phia rọ cha nẹrhẹ Onenikristi sen urhi rẹ usuon rẹ ihworakpọ?

4. Wọ ka ẹbẹre vuọvo rẹ akpọ na vwẹ iroro vẹ irueru wẹ-ẹn

Se 1 Jọn 5:​21. Hworo IVIDIO na ovwan ta ota kpahen onọ ro nenire.

IVIDIO: Oboresorọ Inenikristi Vwọ Guọnọ Uduefiogbere​—Wo jẹ Ẹbẹre Ọvo rẹ Akpọ na Ẹka (2:​49)

• Vwevunrẹ ividio na, diesorọ Ayenge vwo brorhiẹn nẹ ọ cha vwomaba ukoko rẹ oseghe rẹ usuo-on, yẹrẹ erẹ rẹ ẹkuotọ kerẹ e vwo yerin aphiala?

• Wo rorori nẹ ọyen orhiẹn aghwanre?

Ẹdia efa vọ yen sa davwen evun-ẹfuọn rọyen ni? Hworo IVIDIO na, ovwan ta ota kpahen onọ ro nenire.

IVIDIO: Obo re se Yono nẹ Uwevwin Orhẹrẹ Na​—Wọ ka Ẹbẹre Ọvo re Akpọ rọ Fẹnẹ Ihwo Na-a (5:​16)

• Mavọ yen e se vwo jẹ ẹbẹre ọvo ẹka siẹrẹ o de shekpahen irueru rẹ ehaẹha rẹ akpọeje?

• Mavọ yen e se vwo jẹ ẹbẹre ọvo rẹ akpọ na ẹka ọ da tobọ dianẹ orhiẹn rẹ ihwo rehẹ usuon na te avwanre oma?

• Mavọ yen iyẹnrẹn ro nẹ uwevwin ovuẹ cha yẹrẹ vwẹ ekogho na sa vwọ nẹrhẹ a ka ẹbẹre ọvo rẹ akpọ na?

ỌDJẸKOKO

• Inenikristi davwẹngba vwọ kẹnoma kẹ oseghe usuon vwọrẹ iroro, eta vẹ irueru rayen.

Ẹrhomafuẹrẹn

• Die yen a guọnọ nẹ e ru kẹ usuon rẹ ihworakpọ?

• Diesorọ a vwọ kẹnoma kẹ oseghe rẹ usuon?

• Ẹdia vọ yen sa davwen evun-ẹfuọn rẹ avwanre ni?

HIẸ GUỌNỌ

Die yen erọnvwọn evo re se vwo ze rere e se vwo jẹ ẹbẹre ọvo rẹ akpọ na ẹka?

Jihova ji Ku Avwanre Phiyotọ Dẹvo-o (3:14)

Die yen ihwo rẹ orua se ru vwo muegbe phiyotọ vwọ kẹ obo re sa davwen evun-ẹfuọn rayen ni?

Sẹro rẹ Uruemu re Vwo jẹ Ẹbẹre Ọvo rẹ Akpọ na Ẹka Vwẹ Irueru Azagba (4:25)

Diesorọ a vwọ chochọn rẹ ẹkuotọ rẹ ohwo vwo jẹ dia ọghọ ro me yovwin rẹ ohwo se vwo?

“Ọghẹnẹ se Ru Emu Eje” (5:19)

Mrẹ obo wo se vwo jẹ ẹbẹre ọvo rẹ akpọ na ẹka ọke wo de brorhiẹn ro shekpahen iruo ru wo che ru.

“Dohwo Doghwa Rọyen Gba Cha Ghwa” (Uwevwin Orhẹrẹ ri March 15, 2006)

O rhe che kri-i, Inenikristi eje che hirharoku edavwini kugbe omukpahen. Ofori nẹ oshọ mu avwanre?

1. Diesorọ e vwo rhẹro rẹ omukpahen?

Baibol na da ta: “Ihwo ejobi re guọnọ yere akpọ ọfuanfon rọ herọ vwi Kristi Jesu ke kpokpo.” (2 Timoti 3:​12) E mukpahen Jesu kidie ọ dia ẹbẹre ọvo rẹ akpọ rẹ Eshu-u. Avwanre je dia ẹbẹre ọvo rẹ akpọ nana-a. Ọtiọyena, o rhe gbe avwanre unu ọke rẹ usuon rẹ akpọ na vẹ okugbe rẹ ẹga rẹ efian de muẹkpahen avwanre-e.​​—Jọn 15:​18, 19.

2. Mavọ yen e se vwo muegbe vwọ hẹrhẹ omukpahen?

Enẹna, ofori nẹ a bọn ẹroẹvwọsuọ rẹ avwanre kpahen Jihova ganphiyọ. Rhuẹrẹ ọke kẹdẹ kẹdẹ vwọ nẹrhovwo rhe Jihova ji se Baibol na. Kpo uyono ọkieje. Enana eje cha nẹrhẹ wo vwo ẹgba wo se vwo fiudugberi chirakon ri koka koka rẹ omukpahen, ọ da tobọ dianẹ obọ rẹ ihwo rẹ orua wẹn yen o nurhe. Ọyinkọn Pọl ro rhiẹromrẹ omukpahen mamọ, da ta: “Ọrovwohwo hẹ ọchuko mẹ, oshọ gbi mu uvwe-e.”​​—Hibru 13:6.

A je sa bọn uduefiogbere avwanre gan womarẹ e vwo ghwoghwota ọkieje. Iruo rẹ aghwoghwo na yono avwanre nẹ a vwẹroso Jihova ji phi oshọ rẹ ihworakpọ kparobọ. (Isẹ 29:25) Wo de fiudugberi ghwoghwota na enẹna, kẹ wọ sa choma wo vwo ghwoghwota na ọ da tobọ dianẹ igomẹti dobọ rẹ iruo avwanre ji.​​—1 Tẹsalonaika 2:2.

3. Erere vọ yen che norhe e de chirakon rẹ omukpahen?

Vwọrẹ uyota, omukpahen vwerhen ohwo oma-a, ẹkẹvuọvo, e de se chirakon rẹ omukpahen, esegbuyota rẹ avwanre cha ganphiyọ. E che sikẹrẹ Jihova phiyọ kidie avwanre rhiẹromrẹ ukẹcha rọyen ọke rẹ ẹwẹn avwanre vwọ kuọrọn. (Se Jems 1:​2-4.) Oja avwanre ria da Jihova, ẹkẹvuọvo oma vwerhọn e de chirakon. Baibol na da ta: “Ọ da dianẹ ovwan ru obo ri yovwiri rẹ ovwan da reoja fiki rọye re de chiro, ọye hẹ obo rẹ Ọghẹnẹ guọnọre.” (1 Pita 2:​20) Jihova cha vwẹ arhọ ri bẹdẹ vwẹ akpọ rẹ omukpahen kanre vwọ hwosa kẹ ihwo ri fuevun te oba.​​—Matiu 24:13.

HIẸ KODO

4. Wo se chirakon rẹ omukpahen rẹ orua

Jesu riẹnre nẹ ihwo rẹ orua rẹ avwanre evo cha guọnọ nẹ a ga Jihova-a. Se Matiu 10:​34-​36, ovwan ta ota kpahen onọ nana:

• Die yen sa phia ọke rẹ ohwo ọvo vwevunrẹ orua de brorhiẹn rọ vwọ ga Jihova?

IVIDIO: Jihova Se Avwanre Te Oma (5:​13)

• Die yen wo che ru siẹrẹ ohwo rẹ orua yẹrẹ ugbeyan wẹn da guọnọ nẹ wọ dobọ rẹ ẹga ri Jihova ji?

Se Une Rẹ Ejiro 27:10 kugbe Mak 10:​29, 30. Ovwan de se ẹkpo ri Baibol ọvuọvo nu, ovwan ta ota kpahen onọ nana:

• Mavọ yen ive nana sa vwọ chọn wẹ uko ọke rẹ ihwo rẹ orua yẹrẹ igbeyan wẹn de muẹkpahen owẹ?

5. Ga Jihova ọ da tobọ dianẹ wo hirharoku omukpahen

IVIDIO: Dje Uduefiogbere Phia Wo de Hirharoku Omukpahen (6:​27)

• Mavọ yen idje rehẹ ividio na vwọ bọn wẹn gan?

Se Iruo Rẹ Iyinkọn Na 5:​27-​29 kugbe Hibru 10:​24, 25. Ovwan de se ẹkpo ri Baibol ọvuọvo nu, ovwan ta ota kpahen onọ nana:

• Diesorọ ọ vwọ ghanre e vwo muomaphiyọ ẹga ri Jihova ọ da tobọ dianẹ igomẹti dobọ rẹ emẹvwa yẹrẹ iruo aghwoghwo avwanre ji?

6. Jihova cha chọn wẹn uko vwo chirakon

IVIDIO: Jihova Cha kẹ Vwẹ Ẹgba (3:​40)

• Vwevunrẹ ividio na, die yen nẹrhẹ Iseri yena chirakon?

Se Rom 8:​35, 37-​39 kugbe Filipae 4:​13. Ovwan de se ẹkpo ri Baibol ọvuọvo nu, ovwan ta ota kpahen onọ nana:

• Mavọ yen ẹkpo ri Baibol na vwọ kẹ wẹ imuẹro nẹ wo se chirakon rẹ edavwini eje?

Se Matiu 5:​10-​12, ovwan ta ota kpahen onọ nana:

• Die yen sa kẹ wẹ omavwerhovwẹn dede nẹ wo hirharokuẹ omukpahen?

ỌDJẸKOKO

Oma vwerhen Jihova fikirẹ ẹgbaẹdavwọn a vwọ ga dede nẹ e rhiẹromrẹ omukpahen. Womarẹ ukẹcha rọyen, e se phikparobọ!

Ẹrhomafuẹrẹn

• Diesorọ Inenikristi vwo rhẹro rẹ omukpahen?

• Die yen wo se ru enẹna vwo muegbe hẹrhẹ omukpahen?

• Die yen sa nẹrhẹ wo vwo imuẹro nẹ wọ sa ga Jihova dede nẹ wo hirharokuẹ edavwini?

HIẸ GUỌNỌ

Mrẹ eghene ọshare ọvo ro dje oborẹ Jihova vwọ chọn uko vwo chirakon ọke re vwo mu phiyọ uwodi kidie nẹ ọ ka ẹbẹre vuọvo-o.

Chirakon Wo de Hirharoku Omukpahen (2:34)

Yono kpahen obo re chọn aye gbe ọshare ọvo uko vwọ fuevun ga Jihova vwẹ ikpe buebun dede nẹ ayen hirharoku omukpahen.

Ga Jihova Vwẹ Ọke Ẹdia Wẹn de Wene (7:11)

Yono kpahen obo re se vwo fiudugberi hirharoku omukpahen.

“Muegbe Hẹrhẹ Omukpahen Asaọkiephana” (Uwevwin Orhẹrẹ ri July 2019)

Ẹro vọ yen ofori nẹ e vwo ni omukpahen rẹ orua, kẹ mavọ yen a sa vwọ dia ohwo rẹ ufuoma je serọ rẹ evun-ẹfuọn rẹ avwanre?

“Uyota na Ghwa ‘Ufuoma Rhe-e, Ẹkẹvuọvo Ọlọkọ’” (Uwevwin Orhẹrẹ rẹ October 2017)