Mavọ Wọ sa Vwọ Nẹrhovwo Wọ me je Mrẹ Ẹkpahọnphiyọ?

NẸRHOVWO RHE JIHOVA VWẸ ODẸ RI JESU

“Ovwan da nọ kemu kemu vwẹ obọ rẹ Ọsẹ na, kọ vwọ kẹ ovwan vwẹ odẹ mẹ.”—Jọn 16:23.

Eta ri Jesu na nabọ djephia nẹ Jihova guọnọre nẹ a nẹrhovwo rhe womarẹ odẹ ri Jesu, ọ dia ema, ihwo efuanfon, emekashe yẹrẹ ihwo ri ghwure-e. A da nẹrhovwo rhe Ọghẹnẹ vwẹ odẹ ri Jesu, jẹ avwanre djephia nẹ avwanre riẹn ẹdia ọghanghanre ri Jesu. Jesu da ta: “Ohwo ọvuọvo se bru Ọsẹ na rhe-e, ẹkẹvuọvo yẹ oma mẹ.”—Jọn 14:6.

TA OTA NẸ UBIUDU RHE

“Ku udu wẹn ejobi phihọ otọ vwẹ obaro rọye.”—Une Rẹ Ejiro 62:8.

Ọke ra da nẹrhovwo kẹ Jihova, e jẹ ta ota kerẹ ohwo rọ ta ota kẹ ọsẹ ro vwo ẹguọnọ. Ukperẹ e vwo se nẹ ọbe rhe yẹrẹ vwanriẹn eta ra riẹn kuyovwin, e jẹ a ta ota na vẹ ọghọ vwo nẹ ubiudu rhe.

JẸ ẸRHOVWO NA SHEPHIYỌ VẸ ỌHỌRE RẸ ỌGHẸNẸ

“Avwanre da nọ ekpẹn rẹ emu ro shephihọ ọhọre rọye ko nyo kẹ avwanre.”—1 Jọn 5:14.

Vwẹ Baibol na, Jihova Ọghẹnẹ vuẹ avwanre obo ro che ru kẹ avwanre vẹ obo rọ guọnọre nẹ avwanre ru vwọ kẹ. O ki se rhiabọreyọ ẹrhovwo avwanre, ofori nẹ ẹrhovwo avwanre “shephihọ ọhọre rọye.” E se ru ọnana womarẹ uyono ri Baibol na, ọke yena ka sa nabọ vughe. E de ru ọtiọyen, kọ cha kpahenphiyọ ẹrhovwo avwanre.

DIE YEN A SA NẸRHOVWO KPAHEN?

Nẹrhovwo Kpahen Ọdavwẹ Wẹn. A sa nẹrhovwo kpahen oborẹ avwanre guọnọre kẹdẹ kẹdẹ kerẹ emuọre, iwun, kugbe asan ra cha dia. A je sa nẹrhovwo kpahen aghwanre re vwo bru omamọ orhiẹn kugbe ẹgba re se vwo chirakon rẹ edavwini. A sa nẹrhovwo vwọ kẹ esegbuyota, evwoghovwo, kugbe ukẹcha rẹ Ọghẹnẹ.—Luk 11:3, 4, 13; Jems 1:5, 17.

Nẹrhovwo kẹ Ihwo Efa. Oma vwerhen emiọvwọn ri vwo ẹguọnọ rẹ emọ rayen siẹrẹ emọ na de vwo ẹguọnọ rẹ ohwohwo. Jihova je guọnọ nẹ emọ rọyen rehẹ otọrakpọ na ji dje ẹguọnọ kẹ ohwohwo. Ofori nẹ a nẹrhovwo kẹ ọshare yẹrẹ aye rẹ avwanre, emọ avwanre, orua avwanre, kugbe igbeyan avwanre. Odibo Jems de si: “Ovwan ohwohwo nẹ ẹrhovwo kẹ ohwo.”—Jems 5:16.

Vwẹ Akpẹvwẹ Phia. Baibol na da ta kpahen Ọmemama na: “O ru emu esiri kẹ ovwan ọ da rhọ osio nẹ odjuvwu kugbe omamọ rẹ evwru vẹ ọke rẹ ivuevu rere ovwan vwo emuọre vẹ aghọghọ.” (Iruo Rẹ Iyinkọn Na 14:17) E de roro kpahen oborẹ Ọghẹnẹ ru kẹ avwanre, o che mu avwanre vwọ kpẹvwẹ womarẹ ẹrhovwo. O ji fo nẹ a vwẹ uruemu rẹ avwanre vwọ kpẹvwẹ.—Kọlose 3:15.

VWO ODIRIN WỌ JE GBOMASI ẸRHOVWO ẸNẸ

Ọke evo, ofu se dje avwanre siẹrẹ a rha mrẹ ẹkpahọnphiyọ rẹ ẹrhovwo avwanre kpakpata-a. Kẹ ọnana mudiaphiyọ nẹ Ọghẹnẹ rhe vwo ọdavwẹ rẹ avwanre-e? Ẹjo, kakaka! Roro kpahen idje evo ri djerephia nẹ ofori ra vwọ gbomasi ẹrhovwo ẹnẹ.

Steve, re djunute vwẹ uyovwinrota rẹsosuọ siẹvure, da ta: “Ọ rha dia ẹrhovwo-o, jẹ akpọ mẹ yanghan ku rhabae.” Die yen vwẹ ukẹcha vwọ kẹ vwo wene? Ọ da rhe ton uyono ri Baibol phiyọ, o de yono kpahen ọghanrovwẹ ra vwọ nẹrhovwo ọkieje. Steve da ta: “Me kpẹvwẹ Ọghẹnẹ womarẹ ẹrhovwo fikirẹ ukẹcha rẹ igbeyan mẹ vwọ kẹ vwẹ, asaọkiephana omavwerhovwẹn ro rhe vwẹ vrẹ obo ri jovwo.”

Kẹ Jenny, rọ tare nẹ o muwan rọ vwọ nẹrhovwo kẹ Ọghẹnẹ-ẹ vwo? Ọ da ta: “Ọke mi vwo ni oma mẹ nẹ mi fiemu kakaka-a, me da rẹ Ọghẹnẹ nẹ ọ chọn vwẹ uko me sa vwọ riẹn oboresorọ mi vwo nẹ oma mẹ kueku.” Mavọ yen ọnana vwọ vwẹ ukẹcha kẹ? “Ọnana nẹrhẹ mi ni oma mẹ kirobo rẹ Ọghẹnẹ ni vwe, me da rhe mrẹvughe nẹ ubiudu mẹ da tobọ bru hwe vwe, Ọghẹnẹ bru hwe vwe-e. Ọnana je chọn vwẹ uko vwo chirakon.” Die kọyen nẹ obuko rọyen rhe? “Ẹrhovwo nẹrhẹ me mrẹ Jihova kerẹ Ọghẹnẹ ro vwo ẹguọnọ, Ọsẹ, kugbe Ugbeyan rọ vwẹrote vwe, rọ je chọn vwẹ uko takpẹ me davwẹngba mi vwo ru obo rọ guọnọre.”

Gbe ji roro kpahen obo re phia kẹ Isabel. Ọke rọ vwọ mrevun, idọktọ rọyen da vuẹ nẹ oma rẹ ọmọ na che shechọ. Ẹwẹn rọyen da ghwa hra totọ. Ihwo evo tobọ vuẹ nẹ ọ ghwa kpanre evun na. “Ki mi roro nẹ mi che ghwu fikirẹ odjadja rọhẹ ubiudu mẹ.” Die kọyen o ruru? Ọ da ta: “Me da nẹrhovwo mamọ nẹ Ọghẹnẹ chọn vwẹ uko.” O de rhi vwiẹ ọmọshare, re se Gerard, oma rọyen ghini shechọ. Isabel niro nẹ Ọghẹnẹ kpahenphiyọ ẹrhovwo rọyen na? E, o niro ọtiọyen! Vwẹ idjerhe vọ? Ọ da ta: “Me da mrẹ ọmọ mẹ rọhẹ ẹgbukpe 14 asaọkiephana rọ riavwerhen rẹ akpeyeren dede nẹ oma rọyen shechọ, ọ nẹrhẹ me riẹn nẹ ọmọ mẹ na ghini ẹkpahọnphiyọ rẹ ẹrhovwo mẹ, ọyen ebruphiyọ rọ ma rho kparobọ rẹ Jihova Ọghẹnẹ vwọ kẹ vwẹ.”

Eta tiọyena nẹrhẹ avwanre roro kpahen eta rẹ ọbuine na: “E Ọrovwohwo, wẹ ri nyo ẹguọnọ rẹ ohwo dẹndẹn; wo ru udu rayen gan, wọ kerhọn rayen.” (Une Rẹ Ejiro 10:17) Ọnana ghini se mu ohwo vwọ gbomasi ẹrhovwo ẹnẹ!

Baibol na niyẹnrẹn rẹ ẹrhovwo buebun rẹ Jesu nẹre. Ọ ra ma riẹn ọyen o ro yono idibo rọyen. Die yen e se yono norhe?