Jesu Vwomaphia kẹ Ihwiyerin

Jesu vwọ vwomaphia kẹ iyinkọn na nu, ọmọke vwọ wan nu, Pita de re hwe iyerin vwẹ Urhie rẹ Galili. Tọmọs, Jems, Jọn, vẹ idibo efa de nene. Jẹ, vwẹ ọsoso rẹ ason na, ayen hwe erin ọvuọvo-o.

Ọke vwo rhie, ayen da mrẹ ọshare ọvo ro mudia okọkọ rẹ urhie na. Ọ da kparunu se ayen: ‘Ovwan se hwe erin vuọvo-o?’ Ayen da kpahen kẹ: “Ẹjo.” Ọshare na da ta: “Fa ariri na phihọ obọrhe rẹ okọ na.” Ayen vwo ru ọtiọyen, ariri na da rhe vọn vẹ erin, ayen rhe se muo dede-e. Jọn da mrẹvughe nẹ ọshare na, Jesu, ọ da ta: “Ọye Ọrovwohwo na!” Kpakpata, Pita de pho ro urhie na, ọ da rhẹrhẹ bro ra, idibo ichekọ na de bi okọ nene.

Ayen vwo te orhoma rẹ urhie na, ayen da mrẹ ikara vẹ erin vwẹ enu erhanre. Jesu da vuẹ ayen nẹ ayen vwẹ erin evo vwọba emu na. Ọ da vuẹ ayen: ‘Ovwan rhe riemu.’

Ayen vwọ riemu nu, Jesu da nọ Pita: ‘Wo vwo ẹguọnọ mẹ vwọ vrẹ iyerin ehwe?’ Pita da ta: ‘E, Ọrovwori, wọ riẹnre nẹ mi vwo ẹguọnọ wẹn.’ Jesu da vuẹ: ‘Gba ghẹrẹ igegede mẹ.’ Jesu da rhoma nọ: ‘Pita, wo vwo ẹguọnọ mẹ?’ Pita da ta: ‘Ọrovwori, wọ riẹnre nẹ mi vwo ẹguọnọ wẹn.’ Jesu da ta: “Sẹro rẹ igegede mẹ.” Jesu da rhoma nọ abọ rerha. Ivun de miovwo Pita. Ọ da ta: ‘Ọrovwori, wọ riẹn erọnvwọn eje. Wọ riẹnre nẹ mi vwo ẹguọnọ wẹn.’ Jesu da vuẹ: “Ghẹrẹ igegede mẹ.” Ọ da vuẹ Pita: “Nene uvwe” ọkieje.