• Yono Mie Oniọvo ri Jesu Otete
    Uwevwin Orhẹrẹ (Ọ re yono)—2022 | January

    • VWOMAKPOTỌ ỌKIEJE KERẸ JEMS

      Jems wiowian rẹ ọkanrirhe ọke rẹ Jesu ra rhọvwọn nushi rhe vwọ ta ota kẹ.

      Jems vwomakpotọ rhọnvwe nẹ Jesu yen Mesaya na ọke rọ vwọ vwomaphia kẹ, nẹ ọke yena yanran ọ da rhe fuevun ga kerẹ odibo ri Jesu (Ni ẹkoreta 5-7)

      5. Die yen Jems ruru ọke rẹ Jesu vwọ vwomaphia kẹ ra vwọ rhọvwọn nushi nu?

      5 Ọke vọ yen Jems rhe vwọ dia odibo ri Jesu? A vwọ rhọvwọn Jesu nushi nu “ọ da vwomaphia kẹ Jems, ọ ke je vwomaphia kẹ iyinkọn na ejobi.” (1 Kọr. 15:7) Kidie nẹ Jems mrẹ Jesu ra vwọ rhọvwọn nushi nu, ọ da rhe dia odibo rọyen. Jems jehẹ usun rẹ iyinkọn re rhẹro rẹ ẹwẹn ọfuanfon re veri na vwẹ enu rẹ ubruwevwin ọvo vwẹ Jerusalẹm. (Iruo 1:13, 14) Ọke vwọ yanran na, Jems de ji rhi vwo uphẹn rọ vwọ ga kerẹ ọvo usun rẹ Ẹko Rọvwẹrote na vwẹ ẹgbukpe ujorin rẹsosuọ. (Iruo 15:6, 13-22; Gal. 2:9) Ọ sa dianẹ a ke rhe mrẹ 62 C.E., ẹwẹn ọfuanfon na ji muo vwo si ẹbe vwo rhe Inenikristi ra vwẹ ẹwẹn ọfuanfon jẹreyọ. Te ọ dianẹ e vwo iphiẹrophiyọ ra vwọ dia otọrakpọ na yẹrẹ kpo odjuvwu, avwanre eje mrẹ erere vwo nẹ ọbe yena cha nonẹna. (Jems 1:1) Kirobo rẹ ogbikuegbe ọvo re se Josephus rọ diarọ vwẹ ẹgbukpe ujorin rẹsosuọ tare, Ananias the Younger, rọ dia Orherẹn Rode rẹ ihwo ri Ju, yen kuenu nẹ a teyen Jems hwe. Jems fuevun kẹ Jihova rhi te ọke ro vwo ku iruo rọyen phiyọ vwẹ otọrakpọ na.