¹⁰ Ẹsosuọ, avwanre ru itetoro ro nẹ ẹwẹn rhe kidie avwanre vwo ẹguọnọ ri Jihova, a je guọnọ “ru obo ri je.” (1 Jọn 3:22) Oma ghene vwerhen Jihova siẹrẹ odibo rọyen da kẹ okẹ ro nẹ otọ rẹ ubiudu rhe. E jẹ a fuẹrẹn oborẹ ọyinkọn Pọl ta kpahen uruemu ra vwọ kẹ okẹ na. (Se 2 Kọrẹnt 9:7.) A gba Onenikristi rẹ uyota kẹ okẹ-ẹ. Ukperẹ ọtiọyen, o ru itetoro “kirobo rẹ udu rọye dje kẹ.”c Kọyen, tavwen ọ ke kẹ okẹ, ọ nabọ roro kpahen obo rọ sa vwọ vwẹ ukẹcha phia vwẹ ẹdia ra da guọnọ ukẹcha. Jihova ni ohwo tiọyen ghanghanre, kidie “Ọghẹnẹ guọnọ okẹ rẹ ivun avwerhe.” Efanfan ọfa tare nẹ, “Ọghẹnẹ vwo ẹguọnọ rẹ ihwo re kẹ okẹ.”