-
Erẹ Ejobi Yen Vwerhen Ọghẹnẹ Oma?Vwo Omavwerhovwẹn Bẹdẹ!—Ọbe re Vwo Yono Baibol Na
-
-
Se Ẹfesọs 5:10, ovwan ta ota kpahen enọ nana:
Die yen ofori nẹ a riẹn ọke re de brorhiẹn rẹ orẹ re che vwobọ vwọ?
Erẹ vọ yen titiri vwẹ ekogho wẹn?
Wo rorori nẹ erẹ nana vwerhen Jihova oma?
Kerẹ udje, wo roro kpahen ẹro rẹ Ọghẹnẹ vwo ni orẹ rẹ ẹkarophiyọ rẹ ẹdẹ re vwiẹ ohwo jovwo re? O vwo ọke vuọvo rẹ Baibol na vwo djunute idibo ri Jihova ri ru orẹ rẹ ẹdẹ re vwiẹ ohwo-o, ẹkẹvuọvo ọ ta ota kpahen ihwo ivẹ re ga Jihova-a ri ru orẹ rẹ ẹkarophiyọ rẹ ẹdẹ re vwiẹ ohwo. Se Jẹnẹsis 40:20-22 kugbe Matiu 14:6-10. Ovwan ta ota kpahen enọ nana:
Mavọ yen orẹ rẹ ẹdẹ re vwiẹ ohwo ivẹ na vwọ họhọ ohwohwo?
Vwo nene ikuegbe na, ẹro vọ yen Jihova vwo ni orẹ rẹ ẹdẹ re vwiẹ ohwo?
Dedena, wo se roro, ‘O fiemu kẹ Jihova siẹrẹ mi de vwobọ vwẹ orẹ rẹ ẹdẹ re vwiẹ ohwo yẹrẹ erẹ efa ri Baibol na senre?’ Se Eyanno 32:1-8. Hworo IVIDIO na ovwan ta ota kpahen enọ ri nenire.
Diesorọ avwanre vwọ riẹn obo ri je Jihova?
Mavọ yen e se vwo ru ọtiọyen?
Obo ra sa vwọ riẹn sẹ orẹ na tuẹ Jihova oma
Iyono ri nẹ Baibol na rhe-e yen e muro kpahen? Wọ vwọ riẹn ẹkpahọnphiyọ na, fuẹrẹn otọ rọyen.
O muọghọ rọ vrẹka vwọ kẹ ihworakpọ, ukoko yẹrẹ oka rẹ ẹkuotọ? Avwanre muọghọ kẹ Jihova vrẹ kemu kemu, ọyen avwanre je vwẹroso nẹ ọ cha rhuẹrẹ ebẹnbẹn rẹ akpọ na phiyọ.
Irueru rọyen vwọso iwan ri Baibol? Ofori nẹ avwanre dia fuanfon ọkieje.
-
-
Sanẹ Erọnvwọn ra Vwọ Diotọ re Cha Nẹrhẹ Oma Vwerhen JihovaVwo Omavwerhovwẹn Bẹdẹ!—Ọbe re Vwo Yono Baibol Na
-
-
UYONO 53
Sanẹ Erọnvwọn ra Vwọ Diotọ re Cha Nẹrhẹ Oma Vwerhen Jihova
Jihova ọyen “Ọghẹnẹ rẹ oma vwerhan.” (1 Timoti 1:11, NW) Ọ guọnọre nẹ e vwo omavwerhovwẹn je riavwerhen rẹ akpeyeren. Oma vwerhọn a da rhuẹrẹ ọke phiyotọ vwo nẹ iruo e vwo rovwoma. Vwẹ uyono nana, a cha mrẹ obo ra sa vwọ vwẹ ọke rẹ omaerovwon vwo ruiruo vwẹ idjerhe ro shephiyọ, rọ je cha nẹrhẹ oma vwerhen Jihova.
1. Die yen ofori nẹ a karophiyọ ọke ra da sanẹ erọnvwọn ra vwọ diotọ?
Die yen wo ruẹ ọke wo de rovwoma? Ihwo evo ghwọrọ ọke rẹ omaerovwon rayen vwẹ uwevwin rẹ ayen vwo se ọbe, kerhọ rẹ ihwehworo, ni TV, yẹrẹ ro intanẹti. Ihwo efa nene igbeyan rayen heha kerẹ e vwo kpo oyan, kpo ame ẹrhẹrhẹ ji te igemu. Otoro obo ri jẹ avwanre-e, ofori nẹ erọnvwọn ra vwọ diotọ na “je Ọrovwohwo.” (Ẹfesọs 5:10) O ji fo nẹ e vwo ẹruọ rẹ ọyena kidie erọnvwọn ra vwọ diotọ buebun ri titiri nonẹna churobọ si ozighi, ọfanrhiẹn yẹrẹ uruemu rẹ orhan. (Se Une Rẹ Ejiro 11:5.) Die yen cha chọn avwanre uko vwọ vwẹ aghwanre vwọ sanẹ erọnvwọn ra vwọ diotọ?
A da vwẹ ugbeyan mu ihwo ri vwo ẹguọnọ ri Jihova, a sa vwẹrokere omamọ rẹ iruemu rayen je sanẹ omamọ rẹ erọnvwọn ra vwọ diotọ. Kirobo re yono wanre, “ohwo rọ yan nene evwaghwanre ko vwo aghwanre.” Ẹkẹvuọvo, e de nene ihwo ri vwo ẹguọnọ rẹ iwan ri Jihova-a ghwọrọ ọke kugbe ọkieje, a cha “re oja.”—Isẹ 13:20.
2. Diesorọ a vwọ riẹn uchọke ra ghwọrọ phiyọ erọnvwọn ra vwọ diotọ?
Ọ da tobọ dianẹ erọnvwọn ra vwọ diotọ na yovwirin, o ji fo nẹ a jomaotọ rere e vwo jẹ ọke ẹghwọrọ gan nọ vwo ni ayen. E rhe ru ọtiọye-en, a rha cha mrẹ ọke vwo ru obo re ma ghanre-e. Baibol na bru avwanre uche nẹ e “kuẹ ọke fia-a.”—Se Ẹfesọs 5:15, 16.
HIẸ KODO
Yono kpahen obo re se vwo bru omamọ rẹ orhiẹn kpahen erọnvwọn ra vwọ diotọ.
3. Kẹnoma kẹ erharhe rẹ erọnvwọn ra vwọ diotọ
Diesorọ a vwọ jomaotọ vwọ sanẹ erọnvwọn ra vwọ diotọ? Hworo IVIDIO na, ovwan ta ota kpahen onọ ro nenire.
Mavọ yen afieha ri Rom rẹ awanre vwọ họhọ erọnvwọn evo ra vwọ diotọ asaọkiephana?
Vwevunrẹ ividio na, die yen Danny yono kpahen erọnvwọn ra vwọ diotọ?
Se Rom 12:9, ovwan ta ota kpahen onọ nana:
Mavọ yen ẹkpo ri Baibol na sa vwọ chọn wẹ uko vwọ sanẹ omamọ rẹ erọnvwọn ra vwọ diotọ?
Erhọ yen erọnvwọn evo ri tuẹ Jihova oma? Se Isẹ 6:16, 17 kugbe Galesha 5:19-21. Ovwan de se ẹkpo ri Baibol ọvuọvo na nu, ovwan ta ota kpahen onọ nana:
Ọrhọ vwẹ usun rẹ erọnvwọn re djunute vwẹ awọreta yena yen a mrẹ vwẹ erọnvwọn ra vwọ diotọ asaọkiephana?
Obo wọ sa vwọ vwẹ aghwanre sanẹ erọnvwọn ra vwọ diotọ
Nọ oma wẹn:
Die? O churobọ si erọnvwọn ri tuẹ Jihova oma?
Ọke? O gbowọphiyọ erọnvwọn re ma ghanre?
Amono? Ọ nẹrhẹ mi siẹkẹrẹ ihwo ri vwo ẹguọnọ ri Jihova-a?
A vwọ kẹnoma kare kare kẹ imuoshọ yen me yovwin. Ọtiọyena, e jẹ a kẹnoma kẹ erọnvwọn ra vwọ diotọ rẹ avwanre rorori nẹ i che fierere kẹ avwanre-e
4. Wo kuẹ ọke fia-a
Hworo IVIDIO na, ovwan ta ota kpahen onọ ro nenire.
Dede nẹ oniọvo ọshare rọhẹ ividio na ni erharhe rẹ erọnvwọ-ọn, ebẹnbẹn vọ yen o vwori?
Se Filipae 1:10, ovwan ta ota kpahen onọ nana:
Mavọ yen ẹkpo ri Baibol nana sa vwọ chọn avwanre uko vwo brorhiẹn rẹ uchọke ra ghwọrọ phiyọ ehẹha?
5. Sanẹ omamọ rẹ erọnvwọn ra vwọ diotọ
Dede nẹ erọnvwọn evo ra vwọ diotọ tuẹ Jihova oma, o ji vwo efa buebun ri je Jihova. Se Aghwoghwo 8:15 kugbe Filipae 4:8, ovwan ta ota kpahen onọ nana:
Erọnvwọn ra vwọ diotọ ri shephiyọ vọ yen je we?
Wọ sa riavwerhen rẹ ehẹha vẹ omamọ rẹ erọnvwọn ra vwọ diotọ
IHWO EVO TA: “O vwo emu vuọvo rọ chọre vẹ erọnvwọn ra vwọ diotọ ri titi ozighi, ọfanrhiẹn yẹrẹ uruemu rẹ orha-an takpe nẹ mi ruẹ aye-en.”
Die yen wọ cha ta?
ỌDJẸKOKO
Jihova guọnọre nẹ avwanre sanẹ omamọ rẹ erọnvwọn ra vwọ diotọ re cha nẹrhẹ e vwo omavwerhovwẹn.
Ẹrhomafuẹrẹn
Erọnvwọn ra vwọ diotọ vọ yen ofori nẹ Inenikristi kẹnoma kẹ?
Diesorọ a vwọ jomaotọ kpahen ọke ra ghwọrọ phiyọ erọnvwọn ra vwọ diotọ?
Diesorọ wọ vwọ guọnọ sanẹ erọnvwọn ra vwọ diotọ ri je Jihova?
HIẸ GUỌNỌ
Mrẹ ohwo ro vwo oghwa rọ vwọ sanẹ erọnvwọn ra vwọ diotọ kẹ avwanre.
“O Vwo Ifimu, Ẹbe, Yẹrẹ Ine Evo rẹ Iseri rẹ Jihova Gha?” (Uyovwinrota rọhẹ jw.org)
Mrẹ obo wo se vwo bru omamọ rẹ orhiẹn kpahen ehẹha vẹ irueru rẹ omaerovwon.
“Oborẹ Wo Vwo Ru Ehaẹha Fierere?” (Uwevwin Orhẹrẹ rẹ October 15, 2011)
Vwẹ ikuegbe rẹ “Mi Tobọ Phi Uruemu rẹ Omaẹfẹnẹ Kparobọ,” mrẹ oboresorọ ọshare ọvo vwo wene erọnvwọn ra vwọ diotọ ro vwobọ vwọ.
Mrẹ oborẹ oni ọvo vwọ vwẹ aghwanre sanẹ erọnvwọn ra vwọ diotọ ri vwo ikuegbe ri shekpahen orho erivwin.
-